पेरेरित 16
16
पावल आ सिलाससङ तिमोथिक भेट् भेल
1पछास पावल डर्बि सहर हब्ति लुस्तरा सहरम पनि गेले। लुस्तरा सहरम तिमोथि कहलाहार एक जना बिस्वासि छले। ओक्र मतार प्रभुका बिस्वास कर्लाहार यहुदि छले तर ओक्र बाप चाहिं गिरिक छले। 2तिमोथिका लुस्तरा आ आइकोनियन सहरक बिस्वासिस्या एक्दम इमान्दार मानुकक रुपम चिनेक। 3पावलले ओक्राहु आप्नसङ पर्चार कर लागि लगाब मन करल्के तर ओइलगक यहुदिसिक कारनस पावलले ओक्रा खत्ना कर लगाइल्के। किरकि ओक्र बाप गिरिक स्यो कहिक ओइलगक सभे यहुदिसिका थाहा छले। 4तब ओकर्स्या सहर-सहरम जाइक यरुसलेमक पेरेरित आ अगुवास्या फैसला कर्ल बातसब बिस्वासिसिका सुनाइक पालन कर्ह्य कहिक कहल्के। 5एनामे मन्डलिक मानुकसब बिस्वासम जोर्गर हब्ति गेले आ प्रभुका बिस्वास कर्लाहार मानुकसब पनि दिन-दिने थपाइति गेले।
पावलले माकेडोनिया गेल्हार दर्सन देख्ल
6पबित्र आत्माले एसिया पर्देसम पर्चार कर नाइ जाइ कहल कारनस पावल, सिलास आ तिमोथि फिरिगिया आ गलतिया पर्देसबाक गेले। 7अनि जब ओकर्स्या माइसिया पर्देसक सिमानाम पुग्ले त ओकर्स्या बेथेनिया सहरभर जाइ लागि बिचार करल्के। तर येसुक आत्माले ओकर्सिका ओत जाइ नाइ देल्के। 8ओहेस ओकर्स्या माइसिया पर्देसबाक तोरोआस सहर गेले। 9ओहे रात पावलले एगो दर्सन देखल्के। ओइ दर्सनम माकेडोनियाक एक जना मानुकले ठेर्याइक एनामे बिन्ति करिरहल छले, “दया करिक माकेडोनिया या आ हमर्सिका सहयोग कर्।” 10जब पावलले यि दर्सन देखल्को त हमर्स्या चट्दबर माकेडोनिया जाइ लागि तयार भेल्यो। किरकि ओइलगक मानुकसिका खुसिक खबर सुनाब लागि पर्मेसोरेले हमर्सिका बलाइल स्यो कहिक हमर्स्या थाहा पाइल्यो।
लिडिया कहलाहार जनिले बिस्वास कर्ल
11ओहेस हमर्स्या तोरोआस सहरस पानि जाहाजम चर्हिक सिधा सामोथ्रा कहलाहार टापुम गेल्यो। अनि दस्रो दिन् नियापोलिस सहर पुग्ल्यो। 12ओइलगस हमर्स्या हिंठ्ति माकेडोनिया पर्देसक मुल सहर फिलिप्पि गेल्यो। उ सहर रोमि सासकक अधिनम छलो। हमर्स्या ओहे सहरम कन्हेक दिन् रहल्यो। 13अनि जब जिराइलाहार दिन् एलो त हमर्स्या नदिक काटम पर्थना कर्लाहार ठाउँ रहतो कि कहिक सहरस बाहार गेल्यो आ ओइलग धेर्याइल जनिसिसङ बात कर लग्ल्यो। 14ओइ समुहम थिआटिरा सहरस आइल लिडिया कहलाहार जनि पनि छलो। उ जनिले बैजनि रङक कप्रासिक बेपार करोक अनि पर्मेसोरका एक्दम पुजोक। ओहेस पावलले कहल बात अस्लिमे बुझुस कहिक प्रभुले ओक्र मन खोलि देल्के। 15जब ओइले आ ओक्र परिबारम भेल सभेले बप्तिस्मा लइसकल्को त ओइले हमर्सिका एनामे बिन्ति करल्को, “तोर्स्या हम्रा साँच्चेक प्रभुका बिस्वास कर्ल बहिन मान्छ त हम्र घरम आइक रह।” एनामे ओइले हमर्सिका आप्न घरम रह लागि कर् लगाइल्को।
पावल आ सिलास जेलम पर्ल
16एक दिन् हमर्स्या पर्थना कर्लाहार ठावम जाइति छल्यो त हमर्सिक भेट् एक जना नोकर्नि छउँरिसङ भेलो। उ छउँरिसङ भुतक आत्मा छलो, ओहे भुतक आत्मास ओइले पछास भेल्हार बातसब कहिक आप्न मालिकसिक लागि थुप्रे ढेवा कमाइक दिएक। 17उ छउँरि पावल आ हमर्सिक पछा-पछा आइक चिच्याइति एनामे कह लग्लो, “यि मानुकसब माहान पर्मेसोरक सेबक स्यो। एकर्स्या मुक्तिक पैरा तोर्सिका देखाइ छो।” 18थुप्रे दिन् तलिक उ छउँरिले ओनाहिमे कहति रहले। ओहेस पावलका दिक्दार लगिक उ छउँरिभर घुम्ले आ भुतक आत्माका कहल्के, “हम तोरा येसु खिरिस्टक नामम आग्या देस्यो, यि छउँरिस निक्लिक गइहाल।” पावलले कहति बितिन भुतक आत्मा उ छउँरिस निक्लिक गेले। 19तर जब ओक्र मालिकस्या ओकर्सिक ढेवा कमाइलाहार पैरा बन् भेल देखल्के त पावल आ सिलासका पक्रिक तान्ति सहरक चोकम सासकसिलग लगाइल्के। 20ओकर्स्या पावल आ सिलासका सहरक सासकसिलग लगाइक एनामे कहल्के, “यि मानुकसब यहुदि स्यो। एकर्स्या हमर्सिक सहरम एक्दम असान्ति फैलाइल छो। 21एकर्स्या एहेन चाल-चलनसब सिखाइ छो कि जुन आपन्सिक रोमि नियम अन्सार सुइकार कर आ पालन कर ठिक नाइ स्यो।” 22यि बात सुनिक ओइलग धेर्याइल मानुकस्या पावल आ सिलासक बिरोध कर लग्ले। तब सहरक सासकस्या ओकर्सिक कप्रा फटाइ देल्के आ लाठिस पिट लागि आदेस देल्के।
23जब ओकर्स्या लाठिस पिटि सकल्के त पावल आ सिलासका जेलम घालि देल्के। अनि जेलक हाकिमका एकर्सिका होसयार भइक ताक् कहिक आदेस देल्के। 24एहेन आदेस पाइक जेलक हाकिमले पावल आ सिलासका जेलक सभेस भित्रिक कोठाम लगाइल्के आ ओकर्सिक टाङ्का दुइगो काठक बिल्लिम राखिक बाह्नि देल्के।
25तर अधा रातम पावल आ सिलासले पर्थना कर्ति पर्मेसोरक भजन गितकाइति छले। अनि जेलम पर्ल अरु मानुकस्या चाहिं ओकर्सिक गितकाइल सुन्ति छले। 26ओहे जुमा अन्चकिएम बर्कि भुइचाल गेल। अनि जेलक जगसब हिल्ले आ सभे केबारिसब खुजल्ले। जेलम बाह्निक राख्ल सभे जनाक जिजिरसब पनि खुजल्ले। 27जब जेलक हाकिम निनस जग्ले त सभे केबारिसब खुजल्ल देखिक जेलम बन् कर्ल सभे मानुकसब भाग्लो कहिक आत्मा हत्या कर लागि आप्न तर्बार निकालल्के। 28तर पावलले कस्याइक एनामे कहल्के, “तुइं आप्न कथ्यो हानि नाइ कर् किरकि हमर्स्या सभे जना एहेलग स्यो।”
29यि बात सुनिक जेलक हाकिमले दिब्या माङल्के आ दोग्ति भित्रि गेले। अनि डरस लद-लद काप्ति पावल आ सिलासक टाङम गोरलागल्के। 30अनि ओइले ओकर्सिका बाहार आनिक एनामे पुछल्के, “ए भाइसब, मुक्ति पाब लागि हम्रा कथि कर पर्तो?”
31तब पावल आ सिलासले उत्तर देल्के, “प्रभु येसुका बिस्वास कर् अनि तुइं आ तोर परिबारले मुक्ति पाइब।” 32तब ओकर्स्या जेलक हाकिम आ ओक्र सभे परिबारका प्रभुक बचन सुनाइल्के। 33ओक्र पछास जेलक हाकिमले रातिए पावल आ सिलासका लगाइक ओकर्सिक घा धोइ देल्के। अनि उ हाकिम आ ओक्र पुरा परिबारले चत्दबर बप्तिस्मा लेल्के। 34तब उ हाकिमले पावल आ सिलासका आप्न घरम लगाइक खनाइ खुवाइल्के आ पर्मेसोरम बिस्वास कर्ल कारनस ओकर्स्या पुरा परिबार एक्दम खुसि भेले।
35जब बिहान भेले त सहरक सासकस्या पावल आ सिलासका छोरि धि कहिक सिपाहिसिक मार्फत जेलक हाकिमलग खबर पठाइल्के।
36तब जेलक हाकिमले पावलका कहल्के, “सहरक सासकस्या तोरा आ सिलासका छोरि दिअ कहल छो। ओहेस आब् तोर्स्या अस्लिमे जो।”
37तर पावलले सिपाहिसिका कहल्के, “हमर्स्या रोमक मानुक स्यो। तैयो ओकर्स्या कथ्यो गल्तिए बिना हमर्सिका मानुकसिक अगाम पिटल्को आ जेलम पनि बन् करल्को अनि अखन चाहिं सुटुक्के छोर खोज्ति छो। यि हब नाइ सक्तो, ओकर्स्या आप्नि आइक हमर्सिका निकालिक लगाउस।”
38पावलले कहल बात सिपाहिस्या सहरक सासकसिका सुनाइल्के। जब ओकर्स्या पावल आ सिलास रोमक मानुक स्यो कहिक थाहा पाइल्के त ओकर्स्या डेराइले। 39ओहेस ओकर्स्या एले आ पावल आ सिलाससङ छेमा माङिक ओकर्सिका जेलस बाहार निकालल्के। अनि हमर्सिक सहरका छोरिक जो कहिक बिन्ति करल्के। 40जब पावल आ सिलास जेलस निकल्ले त ओकर्स्या लिडियाक घर गेले आ ओइलगक बिस्वासिसिसङ भेट-घाट करिक ओकर्सिका हौसला दैक ओइलगस गेले।
Đang chọn:
पेरेरित 16: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
