पेरेरित 14
14
आइकोनियन सहरम पावल आ बर्नबास
1आइकोनियन सहरम पनि पावल आ बर्नबासले सब्दिनक जक्या यहुदिसिक सभाघरम जाइक पर्चार करल्के। ओकर्सिक पर्चार एहेन सक्तिसालि छले कि ओइलगक थुप्रे यहुदि आ दस्रो जातक मानुकस्या प्रभु येसुका बिस्वास करल्के। 2तर बिस्वास नाइ कर्लाहार यहुदिस्या चाहिं दस्रो जातक मानुकसिका उक्साइक बिस्वास कर्लाहार मानुकसिक बिरोध कर लगाइल्के। 3तैयो पावल आ बर्नबास थुप्रे दिन् तलिक ओइ सहरम रहले आ आप्न पुरा भरोसा प्रभुम राखिक बिना डेराइक प्रभुक बारेम पर्चार करल्के। अनि प्रभुले ओकर्सिक हाथस अचम्मक चिनह आ सक्तिसालि कामसब कराइक आप्न किर्पाक बचन साँच्चेक स्यो कहिक पर्मान देल्के। 4तर ओइ सहरक मानुकसब फुट भइक दुइ बख्राम बटाइले। ओहेस कुन्हुँ यहुदिसिभर गेले त कुन्हुँ पेरेरितसिभर एले।
5पछास कुन्हुँ-कुन्हुँ दस्रो जातक मानुकसब आ यहुदिस्या आप्न नेतासिसङ मिलिक पावल आ बर्नबासक अप्मान करिक पाखनस मार्लाहार सल्लाहा करल्के। 6तर यि बात पावल आ बर्नबासले थाहा पाइक लुकोनिया पर्देसक लुस्तरा आ डर्बि सहरक आस्पसक ठाउँबाक भागिक गेले। 7अनि उ ठाउँसिम पनि ओकर्स्या प्रभु येसुक बारेम खुसिक खबर सुनाब लग्ले।
लुस्तरा सहरम नेङ्रा मानुकका अस्लि कर्ल
8लुस्तरा सहरम एक जना एहेन नेङ्रा मानुक छले, जक्र टाङम एकोगो तागत नाइ छले। ओक्र टाङ जनमेस कम्जोर भेल कारनस कह्याहु हिंठ्ल नाइ छले। 9उ नेङ्राले पावलक बज्ल बातका ध्यान दैक सुन्ति छले। जब पावलले ओक्रा अस्लिमे ताकल्के त उ नेङ्राम अस्लि भेल्हार बिस्वास देखिक, 10कस्याइक एनामे कहल्के, “तुइं आप्न टाङक भरम ठेर्या!” पावलले कहति बितिन उ जुरुक्के उठ्ले आ हिंठ लग्ले। 11जब पावलले कर्ल यि कामका ओइलग आइल सभे मानुकस्या देखल्के त ओकर्स्या लुकानिया भसाम कस्याइक एनामे कह लग्ले, “देब्तासब त मानुकक रुपम हमर्सिलग पो उत्रिक आइल छो।” 12तब ओकर्स्या बर्नबासका जिउस देब्ता आ पावलका चाहिं हर्मेस देब्ता कहिक कह लग्ले किरकि पावल मुल पर्चार कर्लाहार छले। 13ओइ सहर भित्रि ढुक्लाहार मुह्राक काटेम जिउस देब्ताक मन्दिर छले। ओहेस ओइ मन्दिरक पुजारिले फुल्लाक मला आ बरहधसब लइक सहरक मुह्राम गेले आ मानुकसिसङ मिलिक पावल आ बर्नबासक लागि बलि चर्हाब खोजल्के।
14तर जब पेरेरित पावल आ बर्नबासले यि बात थाहा पाइल्के त ओकर्स्या एक्दम दुखि भइक आप्न-आप्न कप्रा फटाइल्के आ दोग्ति मानुकसिक बिचम जाइक कस्याइक एनामे कहल्के, 15“ए दाजुभाइसब, तोर्स्या किर एहेन काम कर्छ? हमर्स्याहु त तोर्सिए जक्या दुख-सुख भोग्लाहार मानुक स्यो। हमर्स्या त तोर्सिका यि बेकार चिजसिका पुज छोरिक सोर्ग, पिर्थिबि, समुन्द्र आ ओइम भेल सभे चिजका बनाइलाहार जिउँत पर्मेसोरभर घुमिक या कहिक खुसिक खबर सुनाब आइल स्यो।#प्रस्थान २०:११; भजन १४६:६ 16पेहन्क मानुकसिका त पर्मेसोरले ओकर्सिक आप्न इच्छा अन्सार चल देल्को। 17तैयो पर्मेसोरले आप्न भलाइक कामक मार्फत आप्न बारेम गबाहि देति रहलो किरकि पर्मेसोरले अकासस पानि पारिक ठिक समैम तोर्सिका उब्जनि देछो। अनि तोर्सिक लागि ओल-छोल खाइलाहार चिजसब दैक तोर्सिक मनका आनन्दस भोर्ल छो।” 18एतेक कहल्के तब पावल आ बर्नबासले ओकर्सिका मस्किलस बलि चर्हाबस रोकल्के।
19पछास कुन्हुँ-कुन्हुँ यहुदिसब एन्टिओखिया आ आइकोनियन सहरस ओइलग एले आ ओइलगक मानुकसिका उक्साइक पावलका पाखनस मार लगाइल्के। अनि पावल मोर्लो कहिक घिस्याइति सहरस बाहार लगाइक फेकि देल्के। 20तर जब बिस्वासिसब पावलक चारोभर धेर्याइले त उ उठ्ले आ फेरि सहर भित्रि गेले। अनि दस्रो दिन् बर्नबाससङ डर्बि सहर गेले।
पावल आ बर्नबास एन्टिओखिया सहरम घुमिक एल
21ओकर्स्या डर्बि सहरम खुसिक खबर सुनाइक थुप्रे चेलासब बनाइल्के। पछास ओकर्स्या लुस्तरा आ आइकोनियन सहरक पैरा हब्ति पिसिदिया पर्देसक एन्टिओखिया सहरम घुमिक एले। 22अनि ओइलगक चेलासिक मनका जोर्गर बनाइति बिस्वासस कह्याहु पछा नाइ हट्ह्य कहिक ओकर्सिका हौसला दैक एनामे कहल्के, “आपन्सिका पर्मेसोरक राज्येम जाइ लागि थुप्रे दुख सह पर्तो।” 23तब पावल आ बर्नबासले ओइलगक सभे मन्डलिसिम एल्डरसब छानल्के आ उपबास रहिक पर्थना करल्के। अनि ओकर्सिका आप्न बिस्वास कर्ल प्रभुक जिम्माम सुम्पि देल्के।
24तब ओकर्स्या पिसिदिया पर्देसस पामफिलिया पर्देस गेले, 25आ ओइ पर्देसक पर्गा सहरम पर्मेसोरक बचन पर्चार करिक अटालिया सहर गेले। 26अनि ओइलगस ओकर्स्या पानि जाहाजम चर्हिक फेरि एन्टिओखिया सहर घुमिक एले। ओहे सहरक बिस्वासिस्या पावल आ बर्नबासका पर्मेसोरक जिम्माम सुम्पिक पर्चारक कामम पठाइल छले, जुन काम ओकर्स्या पुरा पनि करल्के।
27जब ओकर्स्या एन्टिओखिया सहर पुग्ले त ओइलग भेल सभे मन्डलिक बिस्वासिसिका बलाइल्के। अनि पर्मेसोरले ओकर्सिक मार्फत कर्ल सभे कामक बारेम आ केनामे पर्मेसोरले दस्रो जातक मानुकसिक लागि बिस्वास कर्लाहर पैरा खुजालि देल्के उ सभे बात सुनाइल्के। 28तब ओकर्स्या थुप्रे दिन् तलिक एन्टिओखियाक बिस्वासिसिसङ रहले।
Đang chọn:
पेरेरित 14: DANU
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 (Active), Mother Tongue Translators Society and Wycliffe Bible Translators, Inc. All rights reserved.
