اعمال رَسولان 7
7
استیفان خودِشِ جی دِفاع کانِه
1کاهِن اعظم اِستیفانِ جی بَپُرسیِه: «ایشان دُرُس گونِن؟»
2اِستیفان باگوتِه: «اِی آداشان و اِی پیَران، مَرِه گوش هَدین! خدای پُر جَلال وَختِی اَمِی پیَر ابراهیمِ پیغمبر، بینالنهرینِ منطقه یه دِلِه دَبا و هَلَه حَران نَشَه با، اونِه ظاهر هَبا 3و باگوتِه: ”تی مِلک و تی فامیلان وِل هَکُن و مِلکی رِه که تِرِه نَشان دَنَم بوشو.“
4«پس، ابراهیم کَلدانیِانِ مِلکِ جی دِرگا بَشَه و حَرانِ دِلِه مَنزِل هَکردِه. بَعدِ اینکه اونِه پیَر بَمِردِه، خدا اونِه این مِلکِ دِلِه که امروز اونه دِلِه دَرین کوچ هَدَه. 5با این وجود خدا این مِلکِ دِلِه حتّی یه وَجَب زَمین قَدر هم اونِه اِرث نَده. وَلی وَعدِه هَدَه که این مِلکِ، اونِه و بعدِ اون، اونِه نَسلِ هَدِه، هر چَن ابراهیم اون موقِه هَلَه وَچِه نِداشته. 6خدا اِبراهیمِ باگوتِه: ”تی نَسل، غُربتِ مِلکِ دِلِه ایتا غریبه یه مِثان زندگی کانَن و چهار صَد سال اوشانِه اَسیری گیرنِن و اوشانِه ظُلم کانَن.“ 7خدا باز هَم باگوته: ”مَن اون قوم که اوشان اونِه اَسیران رِه مُجازات کانَم، وَ بعدِ اون، می قوم اون مِلکِ جی شونِن و مَرِه ایجه پَرَسِش کانَن.“ 8وَ خدا خَتنِه هَکُردَنِ عَهدِ ابراهیمِ هَدَه. پس ابراهیم اِسحاق پیَر هَبا، وَ اِسحاق رِه هَشتِمین روزِ دِلِه خَتنِه هَکردِه. وَ اِسحاق هم یَعقوب پیَر هَبا، وَ یَعقوب هم دوازدَه تا پاتریارخی یه پیَر، یَعنی اَمِی دوازدَه تایی گَتِ پیَرِ جَدّ هَبا.
9«پاتریارخی شان حَسودی یه سَر یوسِفِ مِصریان بَروتن. وَلی خدا یوسف هَمرهَ دَبا 10و اونِه تمام اون عذابای جی آزاد هَکردِه و اونِه حِکمت هَدَه و فِرعونِ نَظر عزیز هَکردِه، جوریکه فرعون، یوسِف رِه مِصرِ فرمانروا و خودِشِه دَربارِ رئیس هَکردِه.
11«ایما تمام مصر و کَنعان دِلِه گَتِ قَحطی و مُصیبَت بوما و اَمِی پیران هیچی بُخاردَنِ وَسین پیدانَکوردَن. 12اَمِی جَد یَعقوب وَختِی بِشنَوسِّه مِصرِ دِلِه غَلِّه پیدا بونِه، اَوّلین دَفِه اَمِی پیَرانِ اوجِه روانه هَکوردِه. 13دوّمین سفر دِلِه، یوسِف خودِش رِه خودِشِه اَداشانِ نشان هَدَه و فرعون یوسِفِ خانِوادِه یه هَمرهَ آشنا هَبا. 14پس یوسِف خودِشِه پیَر یَعقوب و تمام خودِشِه خانِوادِه رِه که سر جَم هفتاد و پَنج نفر بانِ دُمّال روانه هَکوردِه و خَبَر هَدَه مِصرِ سَمت بیئین. 15یعقوب به مِصر بَشَه و اوجِه بَمِردِه، هَم اون و هَم اَمِی پیَران، 16وَلی اوشانِ جِنازِه رِه به شَکیمِ منطقه بَبِردَن و مقَبره یه دِلِه که ابراهیم اونِه حَمورِ ریکاشانِ جی یِمقدار نُقرِه یه هَمرهَ بَهِیّه با، بَنَن. 17«هَمونجور که خُدای وَعده که خَسِّه ابراهیم وَسین اَنجام هَدِه نَزیک بونِه با، اَمِی قوم هم مِصر دِلِه زیاد بونِه با، 18تا اینکه ایتا دیگَه پادشاه بوما که یوسِفِ نِشناسِنِه با. 19اون پادشاه اَمِی قومِ هَمرهَ حیله یه هَمرهَ رَفتار هَکردِه و اَمِی پیرانِ خیلی ظُلم هَکردِه و اوشانِه مَجبور هَکردِه خودِشانِه تَرِه وَچِهان رِه دِرگا وِل هَکُنَن تا زندِه نمانَن.
20«اینجور روزگارِ دِلِه با که موسی یه پیغمبر دُنیا بوما. اون خُدای نظر قَشَنگِ وَچه با. موسی سه ماه خودِشِه پیَرِ سِرِه یه دِلِه زندگی هَکردِه. 21وَختِی اونِه دِرگا وِل هَکُردَن، فرعونِ کیجا اونِه بِیتِه و خودِشِه ریکایِ مِثان اونِه گَت هَکردِه. 22اینجوری موسی تمام مِصریانِ حِکمتِ یاد بِیتِه و کِردار و گِفتار دِلِه قُوَّت بِیتِه.
23«وَختِی موسی چهل سالِه هَبا، اونِه دِل دَکِتِه که خودِشِه آداشان یَعقوب نَسل سَمت بوشو و اوشانِ اوضاع رِه بَینِه. 24وَختِی بَدییَه ایتا مِصری مَردای، ایتا از اوشانِ ظُلم کانِه، اونِه پُشت دَر بوما و اون مِصری یه بَکوشتَن هَمرهَ، اون مَظلومِ حَقِّ بِیتِه. 25موسی گمان هَکوردِه اونِه آداشان فَهمِنِن که خدا خَنِه اونِه دَس هَمرهَ اوشانِه نِجات هَدِه، وَلی اوشان نِفَهمِسَّن. 26فردَئی، دو نَفَرِ بَدییِه که هَمدیگَرِ هَمرهَ دَعوا کِانِه بان. این نیَّتِ هَمرهَ که اوشانِه آشتی هَدِه باگوتِه: ”اِی مَرداکان، شما اَداشین، چِرا هَمدیگر بَدی کانین؟“
27«وَلی اون مَردای که دَبا خودِشِه هَمسادِه رِه بَدی هَکونه موسی رِه ایتا کِنار هُل هَدَه و باگوتِه: ”کی تِرِه اَمِی رئیس و داور هَکردِه؟ 28خَنی مَرِه هَم بَکوشی، هَمونجور که دیروز اون مِصری رِه بَکوشتی؟“ 29وَختِی موسی اینه بِشنَوسِّه، دَربَشَه و مِدیانِ مِلکِ دِلِه غریب هَبا و اوجِه دُتا ریکائه صاحاب هَبا.
30«چهل سال بُگذشتِه. ایتا روز صَحرایِ دِلِه، سینایِ کوه نَزیکی، ایتا فِرِشتِه ایتا تَش بِیتِه لَمبَس دِلِه موسی رِه ظاهر هَبا. 31وَختِی موسی اینه بَدییِه اون منظَرِه یه جی خیلی تَعَجِب هَکردِه. وَ هَمونجور که نزیک بونِه با تا بَینِه، خُداوند صِدا اونه گوش بَرِسییَه که: 32”مَن تی پیَرانِ خُدایَم، ابراهیم و اسحاق و یعقوبِ خدا.“ موسی بَتِرسیِه و جِرأت نَکُردِه بِیشِه.
33«خُداوَند اونِه باگوتِه تی لِنگِ چَمیشِ دَر بیار، چون زَمینی که اونه سَر ایسَیی مُقَدَّسِ. 34یَقیناً مَن می قومِ مُصیبَتِ مِصرِ دِلِه بَدییَم و اوشانِ نالِه رِه بِشنَوِسَّم، وَ بومَم تا اوشانِه دِرگا بیارِم. اوشانِ نِجاتِ وَسین بومَم. اَسه بییِه تِرِه به مِصر روانه هَکونَم.“
35«هَمین موسی که اَمِی قوم اونِه رَد هَکُردَن و باگوتَن: ”کی تِرِه اَمِی رئیس و داوَر هَکردِه؟“ خدا این مَردای رِه روانه هَکوردِه تا شیمی وَسین هم نِجات دهنده و هم رئیس هَبو. هَمون فِرِشتِه یه طَریق که لَمبَس دِلِه اونِه ظاهر هَبا. 36هَمین موسی با که مِصرِ دِلِه سرخِ دَریایِ وَر و صحرای دِلِه چِهل سال اوشانِ وَسین نِشانه ها و معجِزات بیاردِه و اَمِی قومِ مِصرِ جی دِرگا بیاردِه.
37«هَمین موسی یَعقوب نَسلِ باگوتِه:
”خدا شِیمی اَداشانِ دِلِه، ایتا پِیغَمبَر می مِثان شِمِرِه روانه کانِه.“
38این هَمون موسی با که صَحرای دِلِه جَماعَتِ هَمرهَ دَبا. وَ اون فِرِشتِه یه هَمرهَ که سینای کوه دِلِه اونِه هَمرهَ گَب بَزه، وَ هَم اَمِی پیرِانِ هَمرهَ. موسی زندِه کَلامِ بِدَس بیاردِه تا اَمِرِه بَرِسانِه.
39«وَلی اَمِی پیران اونه جی اِطاعَت نَکُردِن، اونِه رَد هَکُردَن و خودِشانِ دِلِ میَن مِصر سَمت وَگَرِسَّن 40اوشان هارونِ باگوتَن: ”اَمِرِه خِدایِانی بِساز تا اَمِی پیشاپیش بوشون، چون نِدانیم این موسی یه سَر که اَمَرِه مِصرِ جی دِرگا بیاردِه چی بوما!“ 41اون روزانِ دِلِه با که ایتا بُت گوکِ مِثان بِساتِن و اونه وَسین قربانی هَکُردَن و اونچه بِساته بان وَسین جَشن بِیتَن. 42وَلی خدا خودِشِه دیمِ اوشانِ جی وَگِرداندِه و اوشانِه خودِشانِه حال بَنَه تا آسِمانِ آفتو و ماه و سِتارِه رِه پَرَسِّش هَکُنَن، هَمونجور که پِیغَمبَرانِ کِتابِ دِلِه بَنویشته هَبا:
”اِی یعقوبِ تلک وطایفه، مَگِه اون چِهل سالی که صحرای دِلِه دَبِین
مَرِه سَر بَبییِه حیوان و قربانی ها بیاردین؟
43شما مُلوکِ بُتِ خیمه رِه بِیتِن، وَ شیمی بُت رِفانی سِتارِه رِه.
وَ این بُتِشان که شما پَرَسِش وَسین بِساتین.
پس شِمِرِه به بابِل تَبعید کانَم.“
44«اَمِی پیران صحرایِ دِلِه شَهادَتِ خیمه رِه هَم خودِشانِه هَمرهَ داشتِن. هَمون خیمه ایی که موسی خُدای دَستور هَمرهَ طِبقِ نِمونِه ایی که بدییَه با، بِساتِه. 45اَمِی پیران وَختِی یوشَع رَهبَر با شَهادتِ خیمه رِه خودِشانِه هَمرهَ به کَنعان بیاردِن، اون موقِه که اوشان اون قومِشانِ مِلکِ که خدا اَمِی پیرِانِ چِشمِ وَرِ جی دِرگا هَکردِه بِیتَن، وَ اون خیمه تا داوودِ پادشاه موقِه اوجِه بُمانِسّه. 46خدا داوودِ لُطف کانِه با و داوود خواهش هَکردِه یَعقوب خُدای وَسین ایتا سِرِه بِسازه. 47وَلی سُلیمان پادشاه با که خُدای وَسین سِرِه بِساتِه.
48«با این وجود، خدای مُتِعال اون سِرِه هایی که آدَمی یه دَس جی بساتِ هَبا بو، مَنزِل نُکانِه، هَمونجور که اِشعیای پیغَمبَر باگوتِه:
49«خداوند گونِه: ”آسِمان می پادشاهی یه تَختِ و زَمین می لنگ جیر دَرِه!
«’می وَسین چِجور سِرِه ایی سازنین؟
می آسایشِ جا کوجه یه؟
50مَگِه می دَس تمام ایشانه نِساتِه؟»“‘
51«اِی سَرکِشِ قوم، اِی کَسایی که شِیمی دِل و گوش خَتنِه نَبا! شما هَم شیمی پیَرانِ مِثان هَلَه روح القُدُسِ پیش مقاومت کانین. 52کُدام ایتا از پِیغمبَرانِ که شِیمی پیَرانِ دَس جی آزار ندییِه بو. اوشان پِیغَمبَرانی که اون صالِح ظهورِ پِشگویی هَکُردِ بان رِه، بَکوشتن، وَ اَلان شما خُدِتان اونِه تسلیم هَکوردین و اونِه بَکوشتین، 53شُمایی که شَریعتِی که فِرشتِگان طَریق شِمِرِه بَرِسیِه رِه قبول هَکوردین، وَلی اونه جی اطاعت نَکُردِین.»
اِستیفانِ سنگسار هَبوسَّن
54شورای آدَمان وَختِی این گَبا رِه بِشنَوِسَّن، عَصبانیتِ جی اَلو بِیتَن و خودِشانِه دَندانِشان رِه هَکِلاش دَنِه بان. 55وَلی اِستیفان روح القُدُس جی مَشت آسِمانِ زُل بَزه، خُدای جلالِ بَدییَه، وَ عیسی رِه که خُدای راسِ دَس وَر ایسَبا. 56اِستیفان باگوتِه: «اَلان آسِمانِ دینَم که واز هَبا و اِنسانِ ریکا رِه دینَم که خُدای راسِ دَس وَر اِیساَ.»
57وَلی اوشان بلَندِ صدای هَمرهَ داد بَکِشییَن و گوش نَدَن و با هم اونِه سَمت هجوم بَبِردَن 58اونِه کِرِش هَدَن و شهرِ جی دِرگا بَبِردَن و سَنگسار هَکُردَن. شاهِدان خودِشانِه لِواسِشان بَکِّندَن و ایتا جَوانِ لِنگِ وَر که اونِه اِسم سولُس با بَنَن.
59وَختِی اِستیفانِ سنگسار کِانِه بان، اون بلَندِ صدای هَمرهَ باگوتِه: «اِی عیسی یه خُداوَند، می روحِ قَبول هَکُن!» 60ایما زانو بَزه و بلَندِ صدای هَمرهَ باگوتِه که «خُداوندا، این گناهِ اوشانِ حِساب نیار.» اینه باگوتِه و جان هَدَه.
Đang chọn:
اعمال رَسولان 7: GMB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
@ 2024 Korpu Company
