Psalms 42
42
1အို ဘုရားရှင်၊ သမင်သည် အေးမြသောစမ်းရေကို လိုလားတောင့်တသကဲ့သို့ ကိုယ်တော်အား အကျွန်ုပ် လိုလားတောင့်တပါ၏။ 2အကျွန်ုပ်၏စိတ်ဝိညာဉ်သည် ဘုရားရှင်တည်းဟူသော အသက်ရှင်တော်မူသည့်ဘုရားကို လိုလားတောင့်တပါ၏။ အကျွန်ုပ်သည် မည်သည့်အချိန်မှလာ၍ ဘုရားရှင်၏မျက်နှာတော်ကို ဖူးရပါမည်နည်း။ 3လူတို့က "သင်၏ဘုရားရှင်သည် မည်သည့်အရပ်၌ရှိသနည်း" ဟု အကျွန်ုပ်အား တစ်နေ့လုံးပြောဆိုကြသောအခါ အကျွန်ုပ်မျက်ရည်သည် နေ့ညမပြတ် အကျွန်ုပ်အတွက် စားစရာဖြစ်ရပါ၏။ 4ဤအရာတို့အား အကျွန်ုပ်အောက်မေ့သောအခါ အကျွန်ုပ်၏စိတ်ဝိညာဉ်သည် ယိုဖိတ်လျက်ရှိ၏။ အကြောင်းမူကား အကျွန်ုပ်သည် လူအုပ်ကြီးနှင့်အတူ လျှောက်သွား၍ ပွဲတော်ကျင်းပနေသည့် ထိုလူအုပ်နှင့်အတူ ရွှင်လန်းဝမ်းမြောက်စွာကြွေးကြော်၍ ဘုရားရှင်၏အိမ်တော်သို့ တရွေ့ရွေ့သွားလေ့ရှိ၏။ 5အို အကျွန်ုပ်၏စိတ်ဝိညာဉ်၊ သင်သည် အဘယ်ကြောင့်ညှိုးငယ်နေရသနည်း။ အကျွန်ုပ်အထဲ၌ အဘယ်ကြောင့် မငြိမ်မသက်ဖြစ်နေရသနည်း။ ဘုရားရှင်အား မျှော်လင့်လျက် ယုံကြည်ကိုးစားလော့။ အကြောင်းမူကား အကျွန်ုပ်သည် အကျွန်ုပ်ကယ်တင်ရှင်ဖြစ်တော်မူသည့် ဘုရားရှင်အား နောက်ထပ်တစ်ဖန် ချီးမွမ်းမည်ဖြစ်ပါ၏။ 6အို အကျွန်ုပ်၏ဘုရားရှင်၊ အကျွန်ုပ်၏စိတ်ဝိညာဉ်သည် အကျွန်ုပ်အထဲ၌ ညှိုးငယ်လျက်ရှိပါ၏။ ထို့ကြောင့် အကျွန်ုပ်သည် ဂျော်ဒန်မြစ်ဝှမ်းနှင့် ဟေရမုန်တောင်ရိုးတို့မှလည်းကောင်း၊ မိဇရတောင်မှလည်းကောင်း ကိုယ်တော်ကိုအောက်မေ့ပါ၏။ 7ကိုယ်တော်၏ရေတံခွန်တို့ မြည်ဟည်းသံဖြင့် နက်ရှိုင်းရာအရပ်သည် နက်ရှိုင်းသည့်အရပ်အား အော်ဟစ်၍ခေါ်ပါ၏။ ကိုယ်တော်၏ လှိုင်းလုံးများနှင့် လှိုင်းတံပိုးအပေါင်းတို့သည် အကျွန်ုပ်အပေါ် လွှမ်းမိုးသွားကြပါ၏ 8ဘုရားရှင်သည် နေ့အချိန်၌ မိမိ၏မေတ္တာကရုဏာတော်ကို ပြသတော်မူသည်ဖြစ်၍ ညအချိန်၌ အကျွန်ုပ်အသက်၏ အရှင်သခင်ဖြစ်တော်မူသော ဘုရားရှင်ထံ အကျွန်ုပ်ဆုတောင်း၏။ အကျွန်ုပ်သည် ကိုယ်တော်အား သီဆိုချီးမွမ်းပါမည်။ 9အကျွန်ုပ်၏ကျောက်ဖြစ်တော်မူသော ဘုရားရှင်အား "အကျွန်ုပ်ကို အဘယ်ကြောင့်မေ့လျော့တော်မူသနည်း။ အကျွန်ုပ်သည် အဘယ်ကြောင့် ရန်သူတို့၏ဖိနှိပ်မှုထံ၌ ဝမ်းနည်းပူဆွေးလျက် သွားလာနေရပါသနည်း" ဟု အကျွန်ုပ်လျှောက်တင်၏။ 10အကျွန်ုပ်ရန်သူတို့က "သင်၏ဘုရားရှင်သည် မည်သည့်အရပ်၌ရှိသနည်း" ဟု အကျွန်ုပ်အား တစ်နေ့လုံးပြောဆိုကြလျက် အကျွန်ုပ်၏အရိုးများ ကွဲကြေလုမတတ် အကျွန်ုပ်အား ကဲ့ရဲ့ပြစ်တင်ကြပါ၏။ 11အို အကျွန်ုပ်၏စိတ်ညာဉ်၊ သင်သည် အဘယ်ကြောင့် ညှိုးငယ်နေရပါသနည်း။ အကျွန်ုပ်အထဲ၌ အဘယ်ကြောင့် မငြိမ်မသက်ဖြစ်နေရပါသနည်း။ ဘုရားရှင်အား မျှော်လင့်၍ ယုံကြည်ကိုးစားလော့။ အကျွန်ုပ်သည် အကျွန်ုပ်အားကယ်တင်တော်မူသောအရှင်၊ အကျွန်ုပ်ဘုရားရှင်ကို နောက်ထပ်တစ်ဖန် ချီးမွမ်းပါမည်။
Đang chọn:
Psalms 42: TPV-RV
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.