Luke 15
15
1တစ်နေ့သ၌ အခွန်ကောက်သူများနှင့် အပြစ်ဒုစရိုက်သမားအပေါင်းတို့သည် ကိုယ်တော်ယေရှု၏ဟောပြောသွန်သင်မှုကို နားထောင်ရန် ရောက်လာကြ၏။ 2ထိုအခါ ဖာရိရှဲများနှင့် ကျမ်းတတ်ဆရာများက “ဤသူသည် အပြစ်ဒုစရိုက်သမားများနှင့် မိတ်ဆွေဖွဲ့နေရုံမျှမက ထိုသူတို့နှင့်အတူတူပင် စားသောက်နေပါသည်တကား” ဟုပြစ်တင်ဝေဖန်ကြ၏။ 3သို့သော် ကိုယ်တော်က သူတို့အား ပုံဥပမာတစ်ခုဖြင့် မိန့်တော်မူသည်မှာ 4“သင်တို့၌ သိုးအကောင်တစ်ရာရှိပြီး ထိုသိုးအုပ်ထဲမှ တစ်ကောင်သည်ပျောက်ဆုံးလျှင် သင်သည် သိုးကိုးဆယ့်ကိုးကောင်ကို လူသူကင်းဝေးရာအရပ်၌ ချန်ထားခဲ့၍ ပျောက်ဆုံးသောသိုးတစ်ကောင်ကို မတွေ့မချင်း လိုက်ရှာမည်မဟုတ်လော။ 5ပြန်တွေ့သောအခါ၌လည်း ထိုသိုးကို ပုခုံးပေါ်ရွက်၍ ဝမ်းမြောက်ဝမ်းသာဖြင့် အိမ်ကိုပြန်လာကာ 6အိမ်နီးချင်းတို့ကို ခေါ်လျက် ‘ငါ၏ပျောက်ဆုံးသောသိုးကို ပြန်ရှာတွေ့ပြီဖြစ်၍ ငါနှင့်အတူ ဝမ်းမြောက်ကြလော့’ ဟုဆိုလိမ့်မည်။ 7ထိုကဲ့သို့ပင် သင်တို့အား ငါဆိုမည်ကား ဖြောင့်မတ်မှန်ကန်သောသူ ကိုးဆယ့်ကိုးဦးအတွက်ထက် အပြစ်ဒုစရိုက်မှ နောင်တသံဝေဂရ၍ ဘုရားရှင်ဘက်သို့ လှည့်လာသောသူတစ်ဦးအတွက်ကို ပို၍ ရွှေမြို့တော်၌ ဝမ်းမြောက်ဝမ်းသာရှိကြလိမ့်မည်” ဟုမိန့်တော်မူ၏။ 8ထို့နောက် ကိုယ်တော်က လူထုပရိသတ်အား နောက်ထပ်ပုံဥပမာဖြင့် မိန့်ဆိုသည်မှာ “ငွေဒင်္ဂါးဆယ်ပြားရှိသည့် အမျိုးသမီးတစ်ဦး၌ ငွေဒင်္ဂါးတစ်ပြား ပျောက်ဆုံးလျှင် သူမသည် မီးအိမ်ကို ထွန်းညှိ၍ အိမ်ကို တံမြက်စည်းလှဲကာ မတွေ့မချင်းရှာမည်မဟုတ်လော။ 9ပြန်ရှာတွေ့သောအခါ၌လည်း သူမသည် အိမ်နီးချင်းတို့ကိုခေါ်၍ ‘ပျောက်သွားသည့်ငွေဒင်္ဂါးကို ပြန်တွေ့ပြီဖြစ်၍ ဝမ်းသာကြလော့’ ဟုဆိုလိမ့်မည်။ 10ထိုနည်းတူ သင်တို့အား ငါဆိုမည်ကား နောင်တသံဝေဂရ၍ ဘုရားရှင်ဘက်သို့ ပြန်လှည့်လာသော အပြစ်ဒုစရိုက်သားတစ်ဦးအတွက် ဘုရားရှင်၏နတ်ဒေဝါများသည် ဝမ်းမြောက်ဝမ်းသာဖြစ်ကြလိမ့်မည်” ဟုမိန့်တော်မူ၏။ 11တဖန် ကိုယ်တော်က နောက်ထပ်ပုံဥပမာဖြင့် မိန့်ကြားတော်မူသည်မှာ “တစ်ခါက လူတစ်ဦး၌ သားနှစ်ယောက်ရှိလေ၏။ 12တစ်နေ့တွင် သားငယ်သည် သူ၏ဖခင်ဖြစ်သူအား ‘အဖေ၊ အကျွန်ုပ်ရသင့်ရထိုက်သော အမွေတို့ကို ခွဲဝေပေးပါလော့’ ဟုဆိုသဖြင့် ဖခင်သည် သားနှစ်ဦးအား အမွေများခွဲဝေပေးလေ၏။ 13များမကြာမီတွင် သားငယ်သည် မိမိရှိသမျှတို့ကိုယူ၍ တိုင်းတစ်ပါးသို့ ထွက်ခွာကာ ထိုအရပ်၌ ရှိသမျှတို့ကို အကျိုးမဲ့ဖြုန်းတီးကာ မိုက်မဲစွာနေထိုင်လေ၏။ 14ထို့နောက် သူ၏ပိုင်ဆိုင်မှုများ ကုန်သည့်အချိန်၌ ထိုတိုင်းပြည်တွင် အစာရေစာငတ်မွတ်ခေါင်းပါးသည့် ကပ်ဆိုက်သဖြင့် သူသည်လည်း စားရမဲ့၊ သောက်ရမဲ့ဘဝသို့ ရောက်လေ၏။ 15ထို့ကြောင့် သူသည် ထိုတိုင်းပြည်မှ လူတစ်ဦးထံသွား၍ အလုပ်ပေးပါရန် တောင်းပန်သဖြင့် ထိုသူက သားငယ်အား သူ၏ခြံမှ ဝက်တို့ကို ထိန်းကျောင်းရန် စေခိုင်း၏။ 16ထိုအခါ သားငယ်သည် ငတ်မွတ်လှသဖြင့် ဝက်တို့စားသည့်အစာကိုပင် စားခွင့်ရလိုသော်လည်း မည်သူကမျှ သူ့အား စားစရာမပေးခဲ့ချေ။ 17အဆုံး၌ သားငယ်သည် အသိတရားရ၍ ‘ငါ၏ဖခင်အိမ်၌ အလုပ်သမားမည်မျှပင် များနေစေကာမူ သူတို့သည် အစားအစာဝဝလင်လင်စားကြရ၏။ ငါမူကား ဤအရပ်၌ အစာငတ်လျက် သေရတော့မည်။ 18ငါသည် ယခုပင် ဖခင်ထံသို့သွား၍ “အဖေ၊ အကျွန်ုပ်သည် ဘုရားရှင်ကိုလည်းကောင်း၊ အဖေ့ကိုလည်းကောင်း ပြစ်မှားမိခဲ့ပါပြီ။ 19အကျွန်ုပ်ကို သားတစ်ဦးကဲ့သို့ မသတ်မှတ်ပါတော့နှင့်။ အစေခံတစ်ဦးကဲ့သို့သာ ထားပါလော့” ဟုဆိုမည်’ ဟုတွေးတော၏။ 20ထို့နောက် သားငယ်သည် ထ၍ ဖခင်၏အိမ်သို့ ပြန်လာခဲ့၏။
ဖခင်သည် သူ၏သားငယ်ပြန်လာသည်ကို အဝေးမှလှမ်းမြင်သည်နှင့် သနားကရုဏာသက်ကာ သားငယ်ကို အပြေးအလွှားကြိုဆို၍ ပွေ့ဖက်နမ်းရှုံ့လေ၏။ 21သားငယ်ကလည်း ‘အဖေ၊ အကျွန်ုပ်သည် ဘုရားရှင်ကိုလည်းကောင်း၊ အဖေ့ကိုလည်းကောင်း ပြစ်မှားမိခဲ့ပါပြီ။ အကျွန်ုပ်သည် အဖေ၏သားဟူ၍ အခေါ်ခံရန် မထိုက်တန်တော့ပါ’ ဟုဆို၏။ 22သို့သော် ဖခင်သည် အစေခံတို့အား ခေါ်၍ ‘သူ့ကို ဝတ်ကောင်းစားလှများ ဆင်ပေးကြလော့။ လက်၌ လက်စွပ်ကို စွပ်ပေး၍ ခြေ၌ ဖိနပ်ကို စီးစေကြလော့။ 23ပျော်ပွဲရွှင်ပွဲလုပ်ဖို့ရန် ဆူဖြိုးသောနွားပျိုကို ဟင်းချက်ရန် ပြင်ဆင်ကြလော့။ 24ငါ၏သားငယ်သည် သေဆုံးခဲ့သော်လည်း ပြန်ရှင်လာပြီ၊ ပျောက်ဆုံးခဲ့သော်လည်း ပြန်တွေ့ရပြီ’ ဟုဆိုပြီးနောက် သူတို့သည် ပျော်ပွဲရွှင်ပွဲကို အစပြုကြလေ၏။ 25ထိုအချိန်၌ လယ်ထဲ၌ အလုပ်လုပ်၍ ပြန်လာသော သားကြီးသည် အိမ်၏အနီးအနားရောက်လာသဖြင့် တေးသီချင်းသံများနှင့် ကခုန်နေသောအသံများကို ကြားရသည့်အခါ 26သူသည် အစေခံတစ်ဦးကို ခေါ်၍ ‘မည်သည့်အခြင်းအရာများ ဖြစ်ပျက်နေသနည်း’ ဟုမေးလေ၏။ 27အစေခံကလည်း ‘သင်၏ညီငယ်သည် ကျန်းမာစွာဖြင့် အိမ်သို့ပြန်ရောက်လာသဖြင့် သင်၏ဖခင်ဖြစ်သူက ဆူဖြိုးသည့်နွားပျိုကို ချက်၍ ပျော်ပွဲရွှင်ပွဲကျင်းပနေခြင်းဖြစ်ပါသည်’ ဟုဖြေလေ၏။ 28ထိုအခါ သားကြီးသည် အမျက်ထွက်၍ အိမ်ထဲသို့ မဝင်လိုသဖြင့် ဖခင်ဖြစ်သူသည် အပြင်သို့ထွက်လာပြီး သူ့ကို ဖျောင်းဖျလေ၏။ 29သားကြီးကလည်း ‘အကျွန်ုပ်သည် အဖေစေခိုင်းသမျှကို လိုက်နာခဲ့ပြီး နှစ်ပေါင်းများစွာ အလုပ်အကျွေးပြုခဲ့သော်လည်း အဖေသည် အကျွန်ုပ်အတွက် မိတ်ဆွေများနှင့်အတူတူ စားသောက်ဖို့ ဆိတ်တစ်ကောင်ကိုမျှ မပေးခဲ့ဖူးပါ။ 30သို့သော်ငြား ဤသားငယ်သည် အဖေ၏ပစ္စည်းဥစ္စာတို့ကို မကောင်းသောမိန်းမများနှင့် ဖြုန်းတီးခဲ့ပြီး ပြန်လာသည့်အခါ အဖေသည် နွားပျိုကို သတ်၍ ပျော်ပွဲရွှင်ပွဲကျင်းပပေးလေသည်တကား’ ဟုဆို၏။ 31ဖခင်ဖြစ်သူကလည်း ‘ငါ့သား၊ သင်သည် ငါနှင့်အတူ အမြဲရှိနေသည်ဖြစ်၍ ငါပိုင်ဆိုင်သမျှသည်ကား သင့်အတွက်ပင်ဖြစ်၏။ 32သို့သော် သင်၏ညီငယ်သည် သေဆုံးခဲ့သော်လည်း အသက်ပြန်ရှင်လာပြီ၊ ပျောက်ဆုံးခဲ့သော်လည်း ပြန်တွေ့ရပြီဖြစ်၍ ယခုငါတို့ ဝမ်းမြောက်ပျော်ရွှင်သင့်ပေ၏’ ဟုဆိုလေ၏” ဟူ၍မိန့်တော်မူ၏။
Đang chọn:
Luke 15: MRV
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
This translation of the Musselmani Burmese Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
