Mateo 22

U Talinghaga Tungkol tu Kasalan

(Lukas 14:15-24)

1Nadid nagtoldo dámman ti Jesus tu pupuno nu Judio hide tu pamamagitan nu talinghaga. Kinagi na, 2“U pághare nu Diyos ay kapareho ni iye: Naghanda ti essa a handaan u essa a hare para tu kasal nu anak na a lállake. 3Inutusan na u utusan na hide para akitan u naimbitaan hide pero umád de a mákpágkasayaan. 4Huway siya nangutos ti iba a utusan hide sakay pinagbilinan a, ‘Kagiyan moy tu inimbitaan hide “Nehanda ko dán u handaan. Nabuno ko dán u baka ko hide, u pinatabe hide a bul-o sakay handa dán be u atanan a bagay. Kamon dán tu handaan!” ’ 5Pero awan iye pinansin nu naimbitaan hide. Immangay hide tu sadi-sadili de a angayan, u essa ay tu luta na sakay u essa ay tu negosyo na. 6U agum ay ginábbu de u utusan hide, pinahirapan sakay binunu. 7Naiyamut a tahod u hare. Pinaangay na u sundalo na hide, impabuno na u nangbuno hide sakay impatutod na u banuwan de. 8Kinagi na tu utusan na hide, ‘Nakahanda dán u handaan, pero awan karapat-dapat u inimbitaan hide. 9Kaya umangay kam tu kakarsada a makpal a tolay sakay imbitaan moy tu kasalan u atanan a ketan moy.’ 10Lummuwas ngane hide tu matolay a kakarsada u utusan hide sakay kinuyog u atanan a netan de, mágkadukás sakay mágkabait. Kanya naputat nu bisita hide u lugar a pagkasalan.

11Nikuna ilingán nu hare u bisita hide ay netan na hod u essa a tolay a awan nakadamit para tu handaan. 12‘Barkada, bakin nakasaddap ka he a awan nakadamit ti maganda?’ tanong na. Awan ti nakagi u tolay. 13Kaya kinagi nu hare tu utusan na hide ‘Gilotán moy u kamát na sakay tikád sakay itapduk siya tu pinakamadihám a lugar a hod tu luwas. Hod ay mághirap siya ti grabe sakay mággaadoyan’ ”. 14Kaya kinagi ni Jesus “Dipo makpal u nadulawan pero sasangan u mapili.”

U Pagbayad tu Buwis

(Markos 12:13-17; Lukas 20:20-26)

15Nadid linumakad u Pariseo hide sakay pinágguhunan ni pakodya de madakáp ti Jesus tu tábbeg na hide. 16Kaya pinaangay de nikuna u sangan tu disepulus de hide a kaguman u sangan a sakop ni hare Herodes. Kinagi de, “Maistu, tukoy mi a hiko ay matapat sakay itáttoldo mo u buo a tatahoden a gusto nu Diyos a gimetan nu tolay hide. Awan ka ti piliyán dipo pareho u pangileng mo tu atanan a tolay. 17Anya wád tu palagay mo? Neayon beman tu Kautusan a magbuwes tu Hari a Cesar oni awan?” 18Pero tukoy ni Jesus u plano de a madukás kanya kinagi na, “Mapagkunware kam! Bakin gustowák moy a linlangán? 19Dah iyatád moy he nikán u pilak a págbuwes.” Sakay inatádden de siya. 20“Kandeya a hupa sakay ngahan u ketan he?” tanung ni Jesus. 21“Kan hare a Cesar,” tábbeg de. Sakay kinagi na nide, “Ni konna hod, iyatád moy ni hare a Cesar u para ni hare a Cesar sakay tu Diyos u para tu Diyos.” 22Nagtaka hide nikuna nasaneg de iye sakay linumakad hide.

Kákkabiyag a Huway

(Markos 12:18-27; Lukas 20:27-40)

23Ti aldew labeyan itod ay immadeni ni Jesus u sangan a Saduseo hide. Hide u tolay a naniwala a awan biyagán a huway u natay hide. Kinagi de, 24“Maisto, intoldo ni Moises a ni matay a awan ti anak u essa a lállake, u kapatkaka na u dapat mangkabanga tu bilo para magkaanak hide para tu natay. 25Tu itod ay te pitto a matkaka a lállake he nikami. Nakkabanga u panganay sakay natay a awan ti anak kanya kinabanga u kabanga na nu kasunod a kapatkakka na. 26Kona labe u nangyari tu kaduwwa, tu kátallo hanggan tu kápitto. Natay hide a atanan. 27Káttapos ay natay be u bábbey. 28Deya tu pitto u magin kabanga na tu huway a kákkabiyag dipo siya ay nakabanga de a atanan?”

29Timmábbeg ti Jesus, “Liwat kam a tahod, dipo awan moy tukoy u Kasulatan hide oni u kapangyariyan nu Diyos. 30Dipo tu huway a kákkabiyag, u tolay hide ay awan mákkabanga; hide ay magin kapareho nu anghel hide ti langit. 31Tungkol be tu huway a kákkabiyag, awan moy padla beman nabasa tu Kasulatan u kinagi nikam nu Diyos? Kinagi na, 32‘Hikán u Diyos ni Abraham, Diyos ni Isaac sakay Diyos ni Jacob.’ U Diyos ay bakán a Diyos nu patay, ni awan nu biyag hide.” 33Sakay nikuna nasaneg iye nu tolay hide ay nagtaka hide tu toldo na.

U Pinakamahalaga a Utos

(Markos 12:28-34; Lukas 10:25-28)

34Nagipun-ipon u Pariseo hide nikuna nabaheta de a napatahimik ni Jesus u Saduseo hide. Sakay nagisip hide ti itanong de ni Jesus. 35Sakay essa nide a malalaki tu Kautusan, u nagtanung ni Jesus para purbaan siya. 36“Maisto, anya u pinakamahalaga a utos tu Kautusan?” 37Timmábbeg ti Jesus, “Mahalán mo u Panginoon mo a Diyos ti buo a puso, ti buo a kaliduwa sakay ti buo a isip. 38Sa iye u pinakamahalaga a utos. 39Sa be iye u kaduwwa: Mahalán mo u kapareho mo konna tu pagmahal mo tu sadili mo. 40U duwwa a utos a iye u ginábwatan nu buo a Kautusan ni Moises sakay u toldo nu propeta hide#22:40 Kautusan ni Moises sakay u toldo nu propeta hide: U atanan a nakasulat tu Dati a Tipan..”

U Tanong ni Jesus Tungkol tu “Anak ni David”

(Markos 12:35-37; Lukas 20:41-44)

41Tinanung ni Jesus u napisan hide a Pariseo: 42“Anya u pákkatukoy moy tungkol tu Mesias? Kan deya siya a lahi?” “Ni Hari David,” tábbeg de. 43“Ni konna hod,” kagi ni Jesus, “bakin dimmulaw nikuna a Panginoon ti David nikuna inggiyya siya nu Ispiritu? U kinagi na, 44Kinagi nu Panginoon ko tu Panginoon, ‘Umetnud ka tu kawanan ko#22:44 U gusto na kagiyan ay siya u pinakamakapangyariyan tu atanan., hanggan a mapasuko ko niko u atanan a kadima mo hide#22:44 Basaan tu Awit 110:1.’ 45Ti David mismo u dimmulaw nikuna a Panginoon; kodya a makagi a lahi ni David u Mesias?” 46Ni essa man nide ay awan ti makatábbeg nikuna. Sakay sapul hod awan dán ti nangahas a magtanung nikuna.

Đang chọn:

Mateo 22: MBJC

Tô màu

Chia sẻ

So sánh

Sao chép