Mateo 18

Deya U Pinakamataas?

(Markos 9:33-37; Lukas 9:46-48)

1Ti itona panahon ay immadeni ni Jesus u disepulus na hide sakay nagtanong, “Panginoon, deya u pinakamataas tu kaharian ti langit?” 2Dinulaw ni Jesus u essa a anak sakay pinataknág tu atubang de. 3Kinagi na, “Pakatandaan moy iye: hanggan awan kam nagbago sakay pumarehas tu anak hide a mapakumbaba, talaga a awan kam mebilang tu pinaghariyán dán hide nu Diyos. 4Ni deya man u magpakababa a kumán a anak a iye ay siya u pinakamataas tu pinaghariyán dán nu Diyos hide. 5Sakay ni deya man a tumanggap tu essa a anak a kona he dipo bakán a hikán bale hikán u tinanggap na.”

U Ginábwatan Hide nu Pagkasala

(Markos 9:42-48; Lukas 17:1-2)

6Kinagi pa ni Jesus “Mas mapiyya pa tu essa a tolay a báttenan siya ti essa a dakál a bito tu álleg na sakay itápduk siya tu bállog nu diget nan magin ginábwatan siya nu págkasala nu essa tu konna he a anak a naniwala nikán. 7Mahirap a tahod u kalagayan nu tolay ti munduwáy dipo tu ginabwatan hide nu kasalanan! Awan mawan u ginábwatan hide nu kasalanan, pero makaanteng u mangyari tu tolay a pinaggábwatan nu kasalanan!

8Ni u kamát oni tikád mo u ginábwatan nu pagkasala mo ay káttolan mo iye sakay ibut! Mapiyya pa a angay ka ti langit a káttol u essa mo a kamát oni tikád nan te duwwa ka a kamát o tikád sakay ti impiyerno labe u angayan mo. 9Sakay ni u mata mo u ginábwatan nu pagkasala mo ay lábwetan mo iye sakay ibut! Mapiyya pa a meangay ka ti langit a buhák u essa a mata nan te duwwa ka a mata sakay meangay tu apoy nu impiyerno.”

U Talinghaga nu Netawtaw a Tupa

(Lukas 15:3-7)

10Kinagi pa ni Jesus “Magingat kam a dyan moy hamakán u essa nu badit a iye hide. Kagiyan ko nikam: ti langit, u anghel di hide ay pirmi a atoy tu atubang nu Ama ko. 11Dipo immangay u Anak nu Tolay para iligtas u netawtaw.

12Anya tu pangisip moy u gimitán nu essa a tolay a te 100 a tupa ni netawtaw u essa a tupa na? Awan beman iwahak na u 99 a nagsabsab tu kalamonan para la ehyokan na u netawtaw? 13Kagiyan ko nikam: ni ketan na u netawtaw ay higit u kasayaan na tu essa nan tu 99 a awan netawtaw. 14Kona labe hina a awan gusto nu Ama moy a atoy ti langit a metawtaw u essa tu badit a iye.”

Ni Magkasala U Essa a Kapatkaka ti Pánnampalataya

15Kinagi pa ni Jesus “Ni magkasala niko u kapatkaka mo, angay mo siya uhunan ti maganda. Ni sinanig na ka sakay nagaged ti patawad, u pággagum moy bilang mátkaka ay nepasoli mo tu dati. 16Pero ni umád siya sumanig, mángkuyog ka pa ti essa o duwwa a kapatkakka para u atanan nu pinaguhonan moy ay mapatunayan nu duwwa o tállo a sestigo. 17Ni umád padi siya sumanig nide, ikagi mo iye tu kapisanan nu kapatkaka hide ti pannampalataya. Sakay ni umád padi siya sumanig nide ay ibilang mo dán siya a essa a awan maniwala tu Diyos oni essa a madukás a tagakolekta ti buwes.”

Kapangyariyan a Magbawal sakay Magpayag

18Kinagi pa ni Jesus “Kagiyan ko nikam: anya man a ipagbawal moy ti lutaáy ay ipagbawal ti langit sakay anya man a payagen moy ti lutaáy ay payagen bi ti langit#18:18 Ti Griego: u gilotan moy ti lutaáy ay gilotan be ti langit sakay u lukasán moy ti lutaáy ay lukasán be ti langit.

19Sakay kagiyan ko pa be nikam: ni u duwwa nikam he ti lutaay ay magkaessa tu pagaged ti anya man a bagay tu pagdasal moy ay iyatád iye nikam nu Ama ko a atoy ti langit. 20Dipo ni te duwwa o tállo a nagipon-ipon dipo nikán ay hoddák a kaguman de.”

U Talinghaga Tungkol tu Utusan a Awan Magpatawad

21Nadid immadeni ti Pedro ni Jesus sakay nagtanong nikuna, “Panginoon, sangan a beses ko a patawadan u kapatkakka ko a pahuway-huway a nagkasala nikán? Penpitto beman?” 22Tinábbeg siya ni Jesus, “Bakán a penpitto la, ni awan kada magakasala siya niko ay patawadan mo. 23Dipo u pághare nu Diyos ay kapareho ni iye: nagdisisyon u essa a hare a pagbayadan u utusan na hide a te utang nikuna. 24U dipalongo a inyangay nikuna ay u essa a te utang a sapulo a milyun a piso. 25Dipo awan siya makabayad ay inyutos nu hare a ilako siya, u kabanga na, u anak na hide, sakay u atanan nu ari-arian na para pangbayad. 26Limmuhod u tolay a iye tu atubang nu hare sakay nákkekagbi ‘Atáddennák mo pa ti panahon sakay bayaden ko niko u atanan.’ 27Kinagbiyan siya nu hare kanya binale awan na u utang na hide sakay pinalaya siya.

28Pero kállakad na hod ay nakatagbo na u essa tu kapareho na a utusan a te utang a 500 a piso nikuna. Tinawedán na iye tu bukhaw na sakay kinagi na ‘Magbayad ka tu utang mo nikán!’ 29Limmuhod u te utang sakay nákkekagbi nikuna ‘Atáddennák mo pa ti panahon sakay bayaden taka.’ 30Pero awan siya pinumayag; nan impepireso na u kapareho na a utusan hanggan makabayad. 31Nikuna netan u nangyari nu agum hide a utusan ay nasakitan hide ti husto. Ummangay hide tu hare sakay impilet di u nangyari. 32Kanya pinadulaw siya nu hare. ‘Hiko, dapat ka a dukás’ kagi nu hare. ‘Pinatawad taka tu utang mo dipo nákkekagbi ka nikán. 33Nahabagák niko; awan beman dapat ka be a mahabag tu kapareho mo?’ 34Sakay tu iyamot nu hare, ay impepireso na u awan ti kagbi a utusan hanggan a mabayadan na u utang na. 35Kona labe hina u gimitán nikam nu Ama ko a atoy ti langit ni awan moy patawadan u kapatkakka moy.”

Đang chọn:

Mateo 18: MBJC

Tô màu

Chia sẻ

So sánh

Sao chép