Be Mochi 11
11
Bitru è janse mò è bwe gè bwe mò a gè bwe ángá
1Be etsonchi ngge be ya è tsǝ́ ara ekǝ̀n binbin a sǝnsen mo Yahudiya è fo jan be ya e fwa be ya a Esǝrela ra hon, è cha ara fwa mo Ehwya gaten. 2Enona, atan a Bitru è vǝ́ a Urishelima ángá, be ya ekǝ̀n-etsǝ́m ya è chifǝ anga a chu tkyà etsenm ángá, è tkyá ye etkya, 3jan, “Ò ken a mbwe be ya e chà tsen be tkyà ra, ngge ò de èé mode ngge be.”
4Ekǝnggwa, Bitru è kwa ara be ejanm binbin mo be mò è bwe ángá, ngge abu gè bwe ángá: 5“M̀ no a ten efifi a Jopa bgó ebgo anga, enggwà è kan m a fǝzǝn. Mò akan è no abu adanmo a bè vǝtan nó no enggwanggwa ngge dgomo ndwe a bè kpu ndifu dwa a tón engàngà ndwe mo adanmo hon, no nyashwa a sen chá kpe, a zǝn a m̀ no ángá. 6Atan a m̀ di tswa mo nó ángá, m̀ di be, be gwemo kpwafu ndwe efki efki a tswa zǝnchaje, be gwemo ya e gwa anga egwam ángá tangge be nwendnyemo. 7Ekǝnggwa, m̀ fo aken no jan m anga jan, ‘Nyi etkyen, Bitru gu, we kǝ́n.’
8“M̀ jan, ‘É yé, ebi, Etsodwe, mò e no ngge emma eno e ra a, e fwa ye echanwenwen ra, chà kwa didi ye a kpevǝ mam ra.’
9“Aken hon è jan fwa shwa chá kpe adi e fà jan, ‘We jan mbo jan egwa egwa mo mò a Ehwya nacha ara ángá, no didi ra.’ 10Mò hon ena è bwe kè ta, ekǝnggwa bè vǝ mò hon binbin vǝ́ chá kpe efwe.
11“Atan enò, be nobǝ ta a bè tson be a Kesariya nyabwa a zǝn m ángá, è bwangga ara nè ywano a fǝtsǝmo mo mu a zǝn a m̀ kwa echan no ángá 12Engǝ́ mo Ehwya è jan m jan me e tsen m etsentsen mo ekenm ngge be ra. Be ya ekǝ̀n-etsǝ́m chwen a ngǝ ena è ba m, kǝnggwa jè kwashi a mbwe nobǝ hon. 13Nobǝ hon è jan je abu gè di maleka è mbwibwa a zǝn ye a àtá mbwe ne jan ye jan, ‘Tson be nobǝ chí ken a Jopa, ken e fǝ́ Sima a be fǝ́ anga Bitru dwa ge e bwa a zǝn o. 14Ge bwa a jan o fwa nwone a bwe o ngge binbin mo be ya e no a mbwe o ángá a ben ega ángá.’
15“Abu m̀ kwa ara fwa ejanm ngge be ángá, Engǝ́ mo Ehwya hon è shwa be a ju, abu gè shwa a ju je ekwafya ángá. 16Ekǝnggwa m̀ kaben fwa a Etsodwe è jan, ‘Yohana è bwe batisǝma ngge mbǝ tea a nye, ba bwe nye batisǝma ngge Engǝ́ mo Ehwya.’ 17Enona, ano Ehwya dwe be edwe e té mò akan ngge nwone a gè dwe je, a je ya e tsǝ́ekǝ̀n no a chu Yeso Kristi Etsodwe ángá, a me ma ara a mà a twa ese ngge Ehwya?”
18Atan a bè ya a Yahuda ya ekǝ̀n-etsǝ́m è fo enò ángá, bè twa be ese efwe ra, bè tàn Ehwya nè no jan anga jan, “Ehwya no ara èé be ya e fwa be ya a Esǝrela ra efwa be e twa etwa evǝa be e ben nya e no a fwa efwam.”
Be ya a àtá aduwa a Antakiya a sǝnsen mo Siriya
19Atan enò, be ya ekǝ̀n-etsǝ́m ya è bushan gu ara a chu fí etswam chashin a bè gu ara Estifano ángá, è tku dgyen zǝn kengga ara chà sǝnsen mo Fonikiya, Sayifuru ngge eten efifi a Antakiya nè du kpwà edgon mo Fwa Esese hon a zǝn be ya a Yahuda. 20Be ya ehwyà mo be éè no be nobǝ ya a Sayifuru ngge be ya a Sirini ángá, è ken a Antakiya nè kwa ara be ya a Girka Fwa Esese a chu Yeso Etsodwe ejanm gaten. 21Echakpo mo Ehwya è no ngge be, enona, be nobǝ embo è tsǝ́ekǝ̀n nè twanga tsuruku mo be bwa a zǝn Ehwya.
22Fwa a chu mò ena kengga a tón mo be ya ekǝ̀n-etsǝ́m è no a Urishelima ángá, enona, bè tson Banaba ken a Antakiya. 23Atan a gè bwangga ángá, nè di echi mò esese mo Ehwya a chu be ángá, gè fo etkwa. Gè janbon binbin mo be ekǝ̀n jan ne, be e no e kpwà ngge tsuruku mo be binbin enyim a chu Etsodwe. 24Banaba è no nobǝ esese nè mbo ngge Engǝ́ mo Ehwya ngge chaebi. Be nobǝ embo è tsǝ́ekǝ̀n a chu Etsodwe.
25Ekǝnggwa Banaba è ken a eten a Tasu evǝa ge e tku e nda Shawulu, 26atan a gè ben ye ángá, gè ti ye bwa a Antakiya. Enona, Banaba ngge Shawulu è ti je akan nè no ben so anga ngge be ya ekǝ̀n-etsǝ́m nè tú be nobǝ embo mò gaten. A a Antakiya a bè kwafya fǝ́ be ya è tsǝ́ekǝ̀n no a chu Kristi ángá, Krista, tú anga be ya aduwa e bgó Ehwya anga.
27Adi engga hon, be efojan ya ehwyà è vǝ a Urishelima shi a Antakiya. 28Akan mo be, a bè fǝ́ ye anga Agabu, Engǝ́ mo Ehwya è shwa ye a ju, gè nyi etkyen nè fijan mbe ekǝnkǝn nya ne tén ara na fu a tswa binbin mo sǝnsen mo Roma. (Mbe ekǝnkǝn nya hon ena è fu adi ekpengga mo tì Kaladiyo) 29Be ya è ba Yeso anga ya è no a Antakiya ángá, è pa jan ba tson edwe mo moebwejwa e ken be ya ekǝ̀n-etsǝ́m ya è no a Yahudiya ángá. Egwa egwa mo be a no mò abu ge bwe a ti ángá. 30Bè kpu be moebwejwa mo be kpu no Banaba ngge Shawulu be e kpu ken e no be echikǝ̀n mo ya è ba Yeso anga a Urishelima.
Đang chọn:
Be Mochi 11: ICH
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 Luke Initiative for Scripture Translation
