Be Mochi 10
10
Koneliyo è tson chí fǝ́ Bitru dwa
1A Kesariya nobǝ akan è no a zǝn, bè fǝ́ ye anga Koneliyo, gè no chu mo be yakàn gwé chwen a ngǝ (600) a tswa mo be ya yakàn mo ya a Etali. 2A gè ngge be ya kpenmu mbwe binbin bè no be ya è fen nè tsen Ehwya anga. Gè no bwe be ya è fwa be ngge mò ra esese anga, gè fyàn ye anga adi e bgó ebgom a zǝn Ehwya ra. 3Nò kè akan, abu tse ta mo ekakennò, a nò è hwya ara ángá, enggwà è kan ye a fǝzǝn, gè di maleka mo Ehwya, è bwa a zǝn ye ezǝ nè jan, “Koneliyo.”
4Koneliyo è ti fǝzǝn nggwa ye a ju a tswa etsentsen, nè ká ye eka jan, “Etsodwe mò hon ano?”
Maleka hon è jan, “Ehwya fo ara ebgo ebgom mbo, ge di ara mò esese a o bwe bwi be ya ekan anga, enona, Ehwya chà mngoda ye ngge bo ra. 5Asuswana tson be nobǝ be e ken a Jopa, be e ken e ti Sima nobǝ a bè fǝ́ anga Bitru ángá, e bwa. 6Ge no anga ngge Sima, ya mochi mo kpumo, mbwe ye no tenten a tón sǝn.”
7Atan a maleka hon è jan fwa ngge ge nè nya ara ángá, Koneliyo è fǝ́ be ya mochi mbwe fà tangge yakàn akan e fen Ehwya anga, a engga mo be yakàn ya è bwe ye mochi anga, dwa. 8Atan a gè jantu gu ara be, be mò è bwe ángá, gè tson be ken a Jopa.
Enggwà è kan Bitru a fǝzǝn
9Zǝn ngga re mo nó a nò è sen ara a kpe ángá, abu be ya mochi mo Koneliyo, è nyaken efǝ adi chí a gè tson be ángá, a bè bwa tén ara a eten efifi hon ángá, Bitru è tonvǝ́ a àtá a kpe evǝa ge e bgó ebgo. 10Mbe è fu ye anga, gè nda anga ge e de mode. Atan enò, bè chà bwe mode hon anga, enggwà è kan ye a fǝzǝn. 11Gè di kpe è fkigwa, mò akan è no abu adanmo a bè vǝtan nó no enggwanggwa ngge dgomo ndwe a bè kpu ndifu dwa a tón engàngà ndwe mo adanmo hon nè du nó chá kpe no nyashwa a tswa zǝnchaje. 12A tswa mo nó, gè di be gwemo kpwafu ndwe efki efki, ngge be gwemo ya e gwa anga egwam ángá tangge be nwendnyemo. 13Ekǝnggwa gè fo aken è jan ye jan, “Bitru nyi etkyen, gu we kǝ́n.”
14Bitru è janfwe ye jan, “É yé, Etsodwe, m chà de didi m mò akan a edon mo je ya a Yahuda jan ne no ngge emma eno e ra fwa mo nó echanwenwen ra ra.”
15Aken hon è jan ye adi e fà jan, “We jan mbo jan egwa egwa mo mò a Ehwya nacha ara ángá ne no didi ra.”
16Mò hon ena è bwe kè ta, kǝnggwa kè akan bè vǝ mò hon twabǝ vǝ́ chá kpe.
17Abu Bitru è chà ka fwa anga a chu engà mo enggwà é kan ye a fǝzǝn na, be ya a Koneliyo è tson be chí ángá, è di ara mbwe Sima nè ywano a fǝtsǝmo mo nó. 18Bè fǝ́dwa nè ká eka evǝa be e yi jan Sima, ya echan a bè fǝ́ anga Bitru ángá, no a tswa akanmu hon.
19A Bitru è chà no ka fwa anga a chu enggwà hon éè kan ye a fǝzǝn ángá, Engǝ́ mo Ehwya è jan ye jan, “Sima, be nobǝ ta ká eka mbo anga. 20Enona, nyi etkyen we shi a sen mo àtá a kpe ena. We tsen mbo tsuruku mo ekenm ngge be ra, adia m tson be a me.”
21Bitru è nyi etkyen shi a sen nè jan be ya hon jan, “A me ma ende a nye nda anga. Mò e ti nye bwa ángá a ano?”
22Be nobǝ hon è janfwe ye, “Koneliyo, chu mo be yakàn gwé chwen a ngǝ (600) a tswa mo be yakàn mo Roma, a nwene e tson je chí ángá. Ga nobǝ ebitete n tse Ehwya anga, binbin mo ya a Yahuda no ye egǝ̀n anga. Maleka echanwenwen mo Ehwya jan ye jan ne ge e fǝ́ o dwa e ken a mbwe ye evǝa ge e fo mò a wa jan ye ángá.” 23Ekǝnggwa Bitru è cha be nobǝ hon shi a tswa àtá abu be ya echan mbwe. Bè dwa a zǝn.
Bitru a mu Koneliyo
Zǝn ngga re mo nó Bitru è ti kèn nya ngge be nobǝ hon tangge be ya ekǝ̀n-etsǝ́m ya ehwyà a Jopa, è ken ngge be. 24Zǝn ngga re mo nó efwe, bè shingga a Kesariya. Koneliyo è chà nobà be anga, enona, gè fǝ́ fǝn gu be ya mbwe ye ngge be shushwa fǝ mbwe dwa. 25Abu Bitru è kwa nyashi a tswa akanmu Koneliyo ángá, Koneliyo è bwa ben ye nè hò a sen chafya mbwe, nè no ye egǝ̀n. 26Tea Bitru è vǝ ye etkyen nè jan, “Nyi etkyen, a me ma nobǝ kpwà ara.”
27Abu be no jan fwa anga eso ángá, Bitru è kwashi chá tswa àtá, nè di be nobǝ mbo no a zǝn. 28Bitru è jan be, “A nye e chu nye, nye yi jan adi edon mo je, ge tse-etsem a ya a Yahuda e mme emmeken ngge ende e fwa ye ya a Yahuda ara, eno e ra, ge e ban e di nó. Tea Ehwya tú m jan me e jan m jan ende akan no ngge emma eno e ra fwa ye echanwenwen ra ra. 29Enona, atan a bè fǝ́ m dwa ángá, m̀ twa m efyan ra, m̀ nyi tén etkyen. Asuswana, nye e jan mò e bwe nyè tson jan be e fǝ́ m dwa ángá.”
30Koneliyo è janfwe ye jan, “Tsǝ ndwe éè twafǝ̀ ángá, m̀ no bgó ebgo anga a mbwe m abu atan enó, abu tse ta mo ekakennò, a nò hwya ara. Kè akan, nobǝ akan a tswa mokàn è mbǝgezǝ anga etenten è bwa ywa chafya mam, 31ne jan, ‘Koneliyo, Ehwya fo ara ebgo mbo n cha mngoda ye be edwe mbo a o dwe be ye ekan anga ra. 32Tson be nobǝ be e ken a Jopa, be e fǝ́ Sima a bè fǝ́ anga Bitru dwa, ge e bwa. Ge kwa echan no a mu Sima ya mochi mo kpumo. Mu Sima hon no tenten a tón sǝn.’ 33Enona, m̀ tson be e fǝ́ o dwa kè akan, ge se ara a o bwa ara na. Asuswana binbin mo je, je no ana a chafya mo Ehwya evǝa je e buton e fo egwa egwa mo mò a Ehwya du o jan we jan je ángá.”
34Ekǝnggwa, Bitru è kwa ara be fwa ejanm jan, “Asuswana m hwayi ara jan, adi ebi Ehwya cha ebgan sǝ́ ye nobǝ anga ra, 35tea ge cha be nobǝ anga a tswa egwa egwa mo eyasǝnsen, e tsen Ehwya n bwe mò e no esese anga. 36Nye yi chí a Ehwya è tson ken a zǝn be ya a Esǝrela ángá, a chí mo Fwa Esese mo zǝno adgye ngge Ehwya adi efka mo Yeso Kristi e no Etsodwe mo be nobǝ binbin ángá. 37Nye yi mò è bwe a tswa binbin mo sǝnsen mo Yahudiya, è tke a Galili chashin a Yohana è no du edgon anga jan be nobǝ be e twa etwa mo ebgen ngge be e bwe be batisǝma ángá. 38Nye yi jan Ehwya è tsǝ̀pe Yeso ya a Nazarati hon ngge Engǝ́ ngge echakpo mbwe. Kǝnggwa Yeso è no ken anga eten ngge eten nè no bwe esese ngge ematswam mo binbin mo ya è no ngge engǝ́ esera a ju be, adia Ehwya è no ngge ge ángá.
39“A je binbin, ja be ya e jan be nobǝ binbin mo be mò a Yeso è bwe a tswa eyasǝnsen mo be ya a Yahuda tangge Urishelima. Bè gu ye adi ekenfum a chu tumo, 40tea tsǝnò adi e ta Ehwya è ti ye nyi etkyen gwa a je mo dì, nè du ye gè mbwibwa a zǝn be nobǝ. 41Fwa ye binbin mo be nobǝ è di ye ra, tea a je ya Ehwya è swavǝ ara ángá, ja ya è de nè ngǝ ngge ge atan a gè nyi ara etkyen a dì ángá, jè di ye. 42Gè du je mochi jan je e du edgon mo nó a zǝn be nobǝ, je e jan be nobǝ jan a ge ga ende a Ehwya è swa ga kpèn be ya e no angǝ ngge ya e fǝ ara anga kǝ́n. 43Binbin mo be efojan è jan ara fwa a chu ye jan, egwa egwa e tsǝ́ekǝ̀n a chu Yeso, a ben egwanom mo be ebgen mbwe adi ti mbwe.”
Be ya e fwa be ya a Esǝrela ra, è ben Engǝ́ mo Ehwya
44Abu a Bitru è chà jan fwa hon ena ken anga, Engǝ́ mo Ehwya è shwa a ju binbin mo be ya è fo fwa hon ángá. 45Ekǝnggwa binbin mo be ya a Esǝrela ya ekǝ̀n-etsǝ́m ya è bwa ngge Bitru ángá, è tàn ebwikpe adia Engǝ́ mo Ehwya è shwa ara èé a chu be ya e fwa be ya a Esǝrela ra ángá. 46Adia bè fo be ya e fwa be ya a Esǝrela ra, è no jan fwa anga adi be hwi efki nè no tàn Ehwya anga.
Ekǝnggwa Bitru è jan, 47“Nobǝ akan dòn a ti m̀ mbwe jan be e bwe be be ya ena batisǝma ngge mbǝ ra? Be cha ara Engǝ́ mo Ehwya abu jè cha ángá gaten.” 48Enona, gè du jan be e bwe be batisǝma adi ti mo Yeso Kristi. Ekǝnggwa bè bgó jan Bitru nè beti e bishi ngge be mo tsǝ fà.
Đang chọn:
Be Mochi 10: ICH
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2024 Luke Initiative for Scripture Translation
