मत्ती 4
4
यीसु कर परिक्छा
(मरकुस 1:12-13; लूका 4:1-13)
1पवितर आतमा यीसु के पतेरा छो लइ जथै, ता भुतवा के दवारा ओखर परिक्छा होय। 2यीसु चालीस रोज अउ चालीस रात उपास करथै, एखर बाद हे उके भूख लागथै। 3तब परखै बाले यीसु के लिघ्घो आय के कथै, “अगर तै भगवान कर टोरवा हबस, ता कहि दे कि हइ पथरा रोटी बन जाय।”
4यीसु उके जबाब देथै, “पवितर किताब हे लिखवरे हबै, कि मनसे केबल रोटी खाय लग नेहको, पय ऊ सब बात लग जिन्दा रही, जउन भगवान कर मुंह लग निकडथै।”
5तब भुतवा यीसु के पवितर सहर यरुसलेम हे लइ जथै, अउ उके बिनती भवन के चुट्ठी हे लइ जायके कथै। 6अगर तै भगवान कर टोरवा हबस, ता खुद के तरी छो गिराय दे, काखे तोर बारे हे असना लिखररे हबै,
कि ऊ अपन स्वरगदूत के आदेस देही,
अउ तोके हाथो हाथ हे उठाय लेही,
कहुं असना झइ होय कि तोर गोड हे पीरा होय।
7यीसु ओखर लग कथै, इहो लिखररे हबै, कि तै परभु भगवान कर परिक्छा झइ कर।
8फेरै भुतवा ओही अक्ठी बोहत डोंगर कर चुट्ठी हे लइ जायके, सगलू दुनिया कर राज अउ उनखर महिमा दिखाइस। 9भुतवा यीसु लग कथै, “अगर तै गिरके मोके निहुर के परनाम करबे, ता मै हइ सगलू कुछ तोके दइ देहुं।”
10यीसु जबाब देथै, हे भुतवा इछो लग दुरिहां कढ जा, काखे पवितर किताब हे लिखवरे हबै, अपन परभु भगवान के परनाम कर अउ उहै के सेबा अउ उपास कर।
11तब भुतवा उछो लग कढ जथै, अउ स्वरगदूत आय के यीसु कर सेबा करै लागथै।
यीसु गलील लग सेबा सुरू करथै
(मरकुस 1:14-15; लूका 4:14,15,31)
12यीसु हइ सुनिस कि यूहन्ना के जेल हे बेड दइन, ता ऊ गलील इलाका छो कढ गइस। 13ऊ नासरत सहर छांड के कफरनहूम सहर हे रहै लगिस, हइ सहर जबूलून अउ नप्ताली परदेस हे हबै। 14जउन मेर यसायाह ग्यानी मनसे के दवारा कहे रथै, ऊ बात पूर हुइस।
15जबूलून अउ नप्ताली के देस दहार के टाठा हे,
यरदन नदिया के ऊ पार
गैर यहूदी के गलील।
16उन जउन अंधियार हे निबास करै बाले हबै,
अक्ठी तेज उजियार के दरसन करिस,
उन मनसे जउन असना जिघा हे निबास करथै, जेखर उप्पर मिरतू छाया हबै,
उजियार हुइस।
17ऊ टेम लग यीसु परचार करै के अउ हइ संदेस सुनामै लगिस, पाप लग मन बदला काखे स्वरग कर राज लिघ्घो आय गय हबै।
यीसु चारठे चेलन के बलाथै
(मरकुस 1:16-20; लूका 5:1-11; यूहन्ना 1:35-42)
18यीसु गलील कर दहार कर पाखा हे घूमत रथै, ऊ दुइठे भाई के देखथै समोन जउन पतरस कहाथै, अउ ओखर भाई अन्द्रियास के, जउन जाला लगाउत देखथै, काखे उन ढिमरा रथै। 19यीसु उनखर लग कथै, “मोर पाछू आबा मै तुमही मनसे के दिलन के पकडै बाले बनाहुं।” 20उन हरबी जाला के छांड के ओखर पाछू आ जथै।
21फेर यीसु उछो लग आगू बढथै, ता दुइठे भाई याकूब अउ ओखर भाई यूहन्ना के, उन अपन बाफ जबदी के संग नाह जिहाज हे जाला के निरवारथै, यीसु उनही बलाथै। 22उन हरबी नाह जिहाज अउ अपन बाफ के छांड के ओखर संग आ जथै।
यीसु कर सिक्छा परचार अउ निक्खा करै के काम
(लूका 6:17-19)
23यीसु सगलू गलील इलाका हे उनखर बीच यहूदी मंडली हे स्वरग के राज कर संदेस के बारे हे परचार करथै, अउ हर मेर के नंगहन अउ ढिलवन के निक्खा करथै। 24अउ सगलू सीरिया देस हे यीसु कर नाम बगर जथै, नंगहा मनसे, भुतवन लग परेसान, मिरगी अउ लकवा बालेन के ओखर लिघ्घो लानथै, यीसु उनही निक्खा कर देथै। 25इहैनिता गलील अउ दिकापुलिस मतलब दस सहर के परदेस, यरुसलेम, यहूदिया, अउ यरदन नदिया के ऊ पार के मनसे झुन्ड के झुन्ड ओखर पाछू चलथै।
Đang chọn:
मत्ती 4: BTP25
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
The Bhumiya Bible © The Word for the World International and © 2025 Bhumiya Bhasha Samiti, Madhya Pradesh
