गलातियनमन 2:15-16

हमरे तो जनम से यहूदी हेकी, आउर पापी कहाएक वाला परजाइत आदमीमन में से ना लगी। हमरे यहूदी बिसवासीमन जानिला कि मूसा केर नियम के माइन के केऊ हों आदमी परमेश्‍वर केर देखेक में धरमी नी बनेला। से लगिन हमरे यीशु मसीह उपरे बिसवास करली, काले कि हमरे मूसा केर नियम के माइन के निहीं मगर सिरिफ यीशु मसीह उपरे बिसवास काइर के धरमी बनब। इ लगिन कि मूसा केर नियम के माइन के केऊ हों धरमी बनेक नी पारेला।