मर्कूस 5
5
भूत्वा लागल मनैयक छुटकारा
(मत्ती ८:२८-३४; लूक. ८:२६-३९)
1येशू और हुँकार चेलनके गालील समुन्दरके दोसुर पाँजर गेरासेनस ईलाकामे पुगगिलाँ, जहाँ गनेसरेत नाउँक मनै रहिँत। 2जस्तेके येशू लाउमेसे बाहेर निकरलाँ, एकथो भूत्वा लागल मनैया मरट्ठीमेसे हुँकार थेन आइल। 3भूत्वा लागल यी मनैया मरट्ठीएमे बैठे। केऊ फेन उहिहे सिँक्रीलेके बहानके नै धारे सेके। 4बहुत्तेचो ओकर हाँथ और गोरा सिँक्रीलेके बन्धवा पाइल रहिस। पर हरेकचो सिँक्रीहे ऊ तुरदेहे, और ओकर गोरम बाँधल लोहेक साँकरहे फेन तुरदेहे। कौनो मनै फेन यिहिहे साधे नै सेकिँत। 5जबफेन रातदिन ऊ मरट्ठीक बिच्चेम और पहाड़मेसे चिल्लाए, और अपनेहे चोखुर पठरालेके बकोते। 6जब ऊ येशूहे देखल, तब् ऊ येशूसे थोरिक्के दूर रहे। ऊ येशूक थेन दौर्ती आइल, और आदर देखाइक लग हुँकार आघे ठेहुनी टेकके हुँकार आराधना करल। 7-8येशू उहिहे कलाँ, “ए भूत्वा यी मनैयकमेसे बाहेर निकर!” तब् उ भूत्वा लागल मनैया गजब जोरसे चिल्लाइल, “हे येशू सर्वोच्च परमेश्वरके छावा, अप्नि हम्रिहिन्से का चहथी? परमेश्वरके ओहोँरसे वाचा करी कि अप्नि हम्रिहिन्हे दुःख नै देबी!” 9येशू उहिहे पुँछ्लाँ, “तोरिक नाउँ का हो?” ऊ येशूहे जवाफ देहल, “मोरिक नाउँ फौज हो, काकरेकी हम्रे यहाँ यी मनैयक भित्तर बहुत्ते जाने बती।” 10तब् भूत्वनके येशूसे बिन्ती करलाँ, “हम्रिहिन्हे यी ईलाकासे बाहेर ना पठाई।” 11वहाँ डँरवामे सुरिनके एकथो बरवार बगाल चह्रतेहे। 12तब् उ भूत्वन येशूसे बिन्ती करलाँ, “हम्रिहिन्हे सुरिनकेमे पठादी ताकि हम्रे ओइन्के भित्तर जाई सेकी।” 13येशू ओइन्हे अनुमति देलाँ। और भूत उ मनैयकमेसे बाहेर निकरगिलाँ। और सुरिनकेमे पैँठगिलाँ। उ बगालमे लगभग दुई हजार सुवर रहिँत। सुरिनके बगाल पख्वामेसे तरे दौरल, और उ सुअर गालील समुन्दरमे डुबके मुगिलाँ। 14तब् जोन मनै उ सुरिनहे चह्राइतिहिँत। ओइने वहाँसे भागगिलाँ। और ओइने यी खबरहे गाउँ और नगरमे फैलादेलाँ। तब् मनै यी हेरे गैलाँ कि का हुइल रहे। 15जब ओइने येशूक थेन अइलाँ, तब ओइने उ मनैयाहे देख्लाँ, जेकरमे भूत लागल रहिँत। ऊ वहैँ बैठल रहे, ऊ लुग्गा घालल रहे, और एकदम होशमे रहे, और हेरे अउइया मनै अचम्ममे परगिलाँ। 16तब् जेने यी सक्कु देखल रहिँत, ओइने औरे जहनहे उ भूत्वा लागल मनैया और सुरिनके संग जोन हुइलिन, ओकर बारेम पूरा बतादेलाँ। 17तब् जोन मनै वहाँ हेरे आइल रहिँत, येशूहे ओइने अपन ईलाका छोरना बिन्ती करलाँ। 18जब येशू लाउमे जाइतिहिँत, तब उ मनैया जेकरमे भूत्वा लागल रहिस, येशूहे ऊ बिन्ती करल, “महिन्हे अपन संग आई दि।” 19पर येशू उहिहे अनुमति नै देलाँ, बेन उहिहे कलाँ, “अपन घरे अपन परिवारके थेन जाऊ, और ओइन्हे बताऊ कि प्रभु तोहाँर लग कतरा भारी काम करलाँ, और ऊ तोहाँरमे कसिन दया देखैलाँ।” 20तब उ मनैया अपन घरक ईलाकामे चलगिल। और उ मनैया सारा डेकापोलिस प्रदेशमे बताई लागल कि येशू ओकर लग कतरा महान काम करलाँ, और सक्कु मनै अचम्म मन्लाँ।
मुअल लौँदी और रोगाइल जन्नी मनैया
(मत्ती ९:१८-२६; लूक. ८:४-५६)
21एकचो फेनदोस्रे येशू गालील समुन्दरके दोसुर आँरितिर लाउमे चहुँरके फिर्ता अइलाँ। जब येशू वहाँ पुग्लाँ ते ओइने आँरितिरे ठरह्याइल रहिँत तब हुँकार चारु ओहोँर एकथो बरवार भीड़ जमा हुइल रहे। 22यहूदी बैठक भवनके मुखिया फेन वहाँ आइल। ओकर नाउँ याइरस रहिस, जब येशूहे ऊ देखल ते ऊ हुँकार थेन गैल और येशूक आघे ठेहुनी टेकल। 23येशूहे ऊ असिक कहिके बिन्ती करल, “मोरिक छुट्की छाई मुए लागल बा। अप्नि आके ओकर उप्पर अपन हाँथ धारदी, ताकि ऊ चोखाजाए और जिजाए।” 24तब् येशू याइरसके संग गैलाँ। बहुत्ते जाने हुँकार संग गैलाँ, और हुँकार चारु ओहोँर भीड़ लगाइतिहिँत। 25भीड़के बिच्चेम एकथो जन्नी रहे, जिहिहे बाह्र साल आघेसे खुन बहना रोग लागल रहिस। 26ऊ बहुत्ते बैदनके थेन फेन गैल रहे, पर ओइने उहिहे आकुर धेउर दुःख देना बाहेक औरे कुछु नै करलाँ। ओकर थेन ज्या फेन रहिस, ऊ सक्कु खर्च कर दारल रहे। पर चोखैना छोरके ऊ आकुर जोरसे बेमार होगिल रहे। 27जब उ जन्नी येशूक बारेम सुनल रहे, तब्बेहेँ ऊ भीड़के बिच्चेम हुँकार पाछे आगिल, और बरे मुश्किलसे हुँकार लुग्गक झल्लर छुअल। 28उ जन्नी मनैया असिन यकर लग करल, काकरेकी ऊ अपनेहे कहे, “यदि मै येशूक बाहिरी लुग्गा किल छुए सेकम कलेसे फेन मै चोखाजिम।” 29जस्तेहेँके ऊ येशूक बाहिरी लुग्गा छुअल, ओकर खुन बहना रुकगिलिस, और ऊ जानदारल कि मै चोखागिनु। 30येशू भीड़मे पाछे घुम्लाँ, और पुँछ्लाँ, “मोरिक लुग्गाहे के छुअल?” येशू असिन यहे कारण करलाँ, काकरेकी ऊ महसुस करलाँ कि हुँकारमेसे शक्ति बाहेर निकरगिल। 31हुँकार चेलनके हुँकिन्हे कलाँ, “यी सक्कु मनैनहे हेरी, जेने अप्निक चारु ओहोँर भीड़ लगाइल बताँ! अप्नि कसिके कहे सेक्बी कि महिन्हे के छुअल?” 32पर येशू यी के करल कहिके जानक लग चारु ओहोँर हेर्ती रलाँ। 33उ जन्नीहे पता रहिस कि ओकर संग का हुइलिस्। ऊ डरैती#5:33 डरैती ओकर डरैनक कारण यी रहे कि येशूहे छुके और भीड़के बिच्चेम जाके यहूदी मोशक नियम कानुनके कानुन टुरल रहे। काकरेकी यहूदी मोशक नियम कानुन अनुसार ऊ छुटिह्या रहे। लग्लगैती आइल, और येशूक आघे ठेहुनी टेकके बैठ्गिल। तब् ऊ हुँकिन्हे सक्कु बात बत्वाइल। 34येशू ऊ जन्नीहे कलाँ, “आब तुँ अपन विश्वासके कारण चोखाइल बतो। परमेश्वर तुहिन्हे शान्ति दिँत! आब तुँ चोखागिल बतो, आब तुँ यी बेमारसे एकदम चोखागिल बतो।” 35जब येशू यी बोल्ती रहिँत, तब्बेहेँ कौनो मनै यहूदी बैठक भवनके मुखिया याइरसके घरेसे अइलाँ और कलाँ, “अप्निक छाई मुसेकल बा! गुरुहे आब आकुर आफत करना जरुरी नै हो।” 36ओकर कलक बातमे येशू ध्यान नै देलाँ, पर ऊ यहूदी बैठक भवनके मुखियाहे कलाँ, “जिन डराऊ, मोरिकमे विश्वास किल करो।” 37येशू भीड़मेसे कौनो फेन मनैनहे अपन संग जाइक लग अनुमति नै देलाँ। ऊ पत्रुस, याकूब और ओकर भैया यूहन्नाहे किल अपन संग आइक लग अनुमति देलाँ। 38तब् ओइने यहूदी बैठक भवनके मुखिया याइरसके संग ओकर घर गैलाँ, और ओइने देख्लाँ कि मनै अपन छाती ठठाठठाके और टोँटा फारफारके रुइतिहिँत। 39तब् येशू भित्तर गैलाँ, और ओइन्हे कलाँ, “तुहुरे असिके काकरे अपन छाती ठठाठठाके और टोँटा फारफारके रुइतो?” लौँदी अभिन मुअल नै हो, यी ते निदाइल किल बा। 40असिन सुनके मनै येशूकमे हाँस देलाँ। पर ऊ ओइन् सक्कुहुनहे घरेमेसे बाहेर पठादेलाँ। येशू उ लौँदीक दाईबाबा और उ तीनथो चेलनहे अपन संग लैगिलाँ, जेने हुँकार संग रहिँत। और ओइने वहाँ गैलाँ जहाँ लौँदी सुतल रहे। 41येशू ऊ बाह्र सालके लौँदीहे हाँथेम लेलाँ और कलाँ, “तालिता कूमी!” जेकर मतलब हुइत, “बाबु मै तुहिन्हे कहतुँ, उठ्जाऊ!” 42लौँदी जुरुकसे उठ्गिलस और यहोँरओहोँर नेगे लागल, काकरेकी ऊ बाह्र सालके रहे। जोन मनै यी देख्लाँ, ओइने गजब अचम्म मन्लाँ। 43तब् येशू लौँदीक दाईबाबाहे कड़ा चेतावनी देलाँ कि यी बातहे कहुँ नै फैलैहो कि लौँदीहे ऊ मुअलमेसे जिवादेहल। तब् येशू ओकर दाईबाबाहे कलाँ, “लौँदीहे कुछु खाई देऊ।”
Đang chọn:
मर्कूस 5: DVGNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.
