मरकुस 7
7
रीति रिवाजा रअ प्रश्न
(मत्ती 15.1-9)
1तेबा फरीसी होर कुछ शास्त्री जोह यरूशलेमा का आउये थी, तेऊ सेटा कठे होई, 2होर त्याहे यीशु रे कुछ, चेले अशुद्ध मतलब बिना हाथ धोये रोटी खांदे हेरी 3किबेकी बडे फरीसी होर सारे यहूदी, प्राचीना री रीति रिवाजा पैंदे चलदा थी, होर जेबरे तक त्याह रामबडे चार हाथ नांई धोए तेबरे तक त्याह नांई खांदे थी, 4होर बाजारा का इच्छी करे, जेबरे तक नांई नेहुदे, तेवरे तक नांई खांदे, होर बहू सारी होरा गला, जोह त्या जेह मागणे वै पज़ेरी, जेडे कटोरे, होर लोटे, होर चाम्बे रे भांडे धोउणे होर मांजे शुद्ध करने। 5तेबा त्या फरीसी होर शास्त्री तेऊका पुछू, तेरे चेले बजुर्गा री रीति रिवाजा पैंदे किबे नांई चलदे, होर किबे अशुद्ध हाथा सगे रोटी खांदा? 6तेऊये त्याहवे बोलू, यशायाह तमा कपटीयो वै बखे रामाड़ी भविष्यवाणी करी दी; जेड़ा लिखू दा भी,
याह लोका मुहा का मेरी इज्जत करा, पर त्यारा मन मा का दूर रहंदा।
7या थोगे मेरी पूजा करदा, किबेकी मणशा री आज्ञा वै धर्मा री गला खोजी करे सखाऊदा।
8किबेकी तमे परमेश्वर री आज्ञा टाल़ी करे मणशा रे रीति रिवाजा मना। 9तेऊ त्याहवै बोलु, तमे आपणी रीति रिवाजा मनणे री तणी परमेश्वरा री आज्ञा केहडे सावै टाल़ी सका। 10किवेकि मूसा बोलुदा साहा, आपणे बापू होर आमा री इज्जत करे, होर जोह आपणे आमा बापू वे बुरा बोललअ, सह मारी पाउणअ। 11पर तमे बोल्दा कि अगर आपणे आमा होर बापू वै बोले, कि मेरी जासु चिजा का तमा लाभ भेटी सका, सह मांई परमेश्वरा वै भेंट दिनी। 12तेबा तमा तेऊरे आमा-बापू री किछे सेवा नांई करणे दिंदे। 13एउ साबे तमा आपणे बयाहा रे रीति रिवाजा में परमेश्वरा रे वचना टाल़ा। होर एडा बहू काम करदा।
मणशा अशुद्ध करण आली गला
(मत्ती 15.10-20)
14तेबा तेऊये लोका आपु सेटा शादी करे बोलू, तमे सबे मेरी शुणा, होर समझा। 15एडी किछे चीज़ नांई आंधी जोह मणशा रे मुँहाँ का निखल़ा सह मणशा अशुद्ध करा 16अगर जासके कणेट हो त्या शुणा। 17तेबा सह भिड़ा मेंजा का घरा वै नाठअ, तेऊरे चेले तेऊका दृष्टान्ता रे बारे में सह पुछु। 18तेऊए त्याहबे बोलू, कि तमे भी एडे नासमझ होई? तमे नांई समझदे कि जोह चीज़ बागा का मणशा रे मितर नाहदा सह तेऊ अशुद्ध नांई करी सकती? 19किबेकी सह तेऊरे मना में नांई पर पेटा बै नाह्दा होर बासी संघे बागे निखला? यह बोली करे तेऊये सवै खाणे री सारी चीज़ा शुद्ध ठहराई। 20तेऊकी तेऊए बोलु, जोह मणशा मेंज़ा का निखला सह मणशा अशुद्ध करा। 21किबेकी बुरे विचार मितरा का मतलब मणश रे मना का माडे विचार, ब्यभिचार, चोरी, हत्या दूजे री बेटड़ी 22लालच, मुर्खता, ठगना, नकामअ, माडी नज़रा निन्दा, घमण्ड, होर मुर्खता री गल्ला निखला। 23या सभे गल्ला मितरा का ही निख्ला, होर मणशा अशुद्ध करा।
सुरूफिनीकी जाति री बेटड़ी रा बुशाह
(मत्ती 15.21-28)
24तेऊकी यीशु तखा का उठी करे सूर होर सैदा रे देशा वै आउअ; होर एकी घरा वै नाठअ होर चाहदा थी, कि कासी एतका पता ना लागे पर त्या अनजान नाँई रही सके। 25होर तेवरी एक बेटड़ी जासरी होछी शोहरी मे दुष्टात्मा थी, तेऊरी चर्चा शुणी करे आई, होर तेऊरी जाघा पड़ी। 26सह यूनानी होर सुरुफिनिकी जाति री थी। तेसे तेऊका बिनती करी कि मेरी शोहरी का दुष्टात्मा काहड़। 27तेऊ तेसा वै बोलु, पहिले शोहरू रज़णे दे, किबेकी शोहरू री रोटी कुते जैंह डाहणी ठीक नांई आंधी। 28तेसे तेउबे उतर दिना, सची साहा प्रभु; तेबा कुते भी शोहरू री रोटी चुरे मेंजा थाली का खांदा। 29तेऊए तेसा वै बोलू, ऐसा गला री वजह का ठुर। दुष्टात्मा तेरी शोहरी का निकती। 30तेसे आपणे घरे नाशी करे हेरू कि शोहरी मांजे पैंदे वैठी दी होर दुष्टात्मा निकती दी थी।
टऊणअ होर थाबल़अ मणश ठीक करणअ
31तेऊकी यीशु सूर होर सैदा रे देशे मेंज़ा का निखली करे दिकपुलिस होई करे गलीला झीला रे किनारे पूजअ। 32तेबा लोके एक टऊण होर थाबलअ भी, तेऊ सेटा बे आणी करे तेऊका अर्ज करी की एऊ पैंदे आपण हाथ डाह। 33तेबा तेऊए सह खासे लोका का अलग करू, तेऊकी आपणी गुठी तेऊरे कनेट पाई, होर गुठी करे तेऊरी जीभ छुंई; 34होर स्वर्गा री फेरा बे हेरु होर तेऊवे बोलू, “इप्फतह!” मतलब “खुल जा।” 35तेऊकी तेऊरे कनेट खुली होर जीभा री बंधन तेभरी खुली, होर सह ठीक बोलदअ लागअ 36तेबा तेऊये त्याहवे बोलू कासी वे नांई खोज़े पर त्या नाही करे तेथरा ज्यादा प्रचारा करदे लागे। 37त्याह बहू हेरान होई करे बोलदे लागे, तेऊये जोह करू सह सारा शोभला करू; सह टउणे वे शूणने री, होर थाबले वे बोलणे री शक्ति दिन्दा।
Đang chọn:
मरकुस 7: ISJNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
