मरकुस 10

तलाका रे बारे यीशु री शिक्षा

(मत्ती 19.1-12; लूका 16.18)

1तेऊकी यीशु तखा का ऊठी करे यहूदिया प्रदेशा री सीमा यरदना नइ रे पार आऊअ। खासे लोका तेऊ जेह भी इकठे होई होर सह भी आपणी मर्जी संघे लोका समझाऊंदअ लागअ 2तेबा फरीसी तेऊ जेह इच्छी करे तेऊ परखणे बे तेऊका पुछू, केह यह कानूना रे सावे ठीक साहा की मर्द आपणी बेटड़ी छाडी दे? 3तेऊ त्याहवै उतर दीना, मूसा तमावै केह आज्ञा दिनी? 4त्याहे बोलू, मूसा त्यागपत्र लिखी करे बेटड़ी बे तलाक करने री आज्ञा दीनी दी साहा। 5यीशु त्याहवै बोलू, थारे मना री हठा का तेऊए तमावै यह आज्ञा लिखी 6पर सृष्टि का पहिले ओरी परमेश्वरे मणश होर बेटड़ी बणाई। 7एउ सावै मणश आपणे आमा वापु का अलग होई करे आपणी लाड़ी संघे रहणअ, 8त्याह दुही रअ एक शरीर हुणअ तेबा त्याह दुई नांई पर एक शरीर साहा 9तेबा जूण जोह परमेश्वरे बणाउदअ साहा मणश तेऊ अलग नांई करे। 10घरे नाही करे चेले एतके बारे में भीआ का पुछु। 11तेऊए त्याह का बोलू, जोह कोई आपणी बेटड़ी छाडी करे दूजी का ब्याह करे पहिली बेटड़ी संघे ब्यभिचार करा। 12होर ज़ेबा बेटड़ी आपणे पहिले मर्दा छाडी करे दूजे संघे ब्याह करे तेबा सह भी ब्यभिचार करदा।

यीशु बालका वै आशीष दिंदा

(मत्ती 19.13-15; लूका 18.15-17)

13तेऊकी लोका तेऊ सेटा बालका आणदे लागे, की सह त्याह पैंदे हाथ डाहे, पर चेले त्या डांटी। 14यीशु यह हेरी करे चेले वै बोलू बालका देया माँह सेटा वे ईहणे होर त्या नांई रोके किबेकी परमेश्वरा रा राज याहिरा साहा दा। 15हाऊं तमाबे सच बोला, की जोह कोई परमेश्वरा रे राज्य में बालका साई नांई मानले, सह कधी भी परमेश्वरा रे घरें नांई नाही सकतअ 16होर तेऊए त्याह कुभडी ढाकी, होर त्या पैंदे हाथ डाही करे तयाबे आशीर्वाद दीना।

सेठ जुआन शोहरू होर अनन्त जीबन

(मत्ती 19.16-30; लूका 18.18-30)

17होर जेबा सह बाता हाडदअ लागअ थी, तेबा एक मणश ठुरदे-ठुरदे तेऊ सेटा बे आउअ, होर तेऊ जेह उटे पड़ी होई करे पूछू, हे भले गूरु? अनन्त जीबना वै हाऊं केह करू? 18यीशु तेऊबै बोलू तूह महा वै उतम किवै बोला उतम कोहे नांई आंधअ सिर्फ एक परमेश्वर साहा 19तूह आज्ञा तो जान्दा की हत्या नांई करणी, ब्यभिचार, नांई करना चोरी नांई करणी झूठी गुआही नांई दीणी छल नांई करना आपणे आमा् बापू रा आदर करणा। 20तेऊये तेऊवे बोलू, हे गुरु, हाऊं याह गला होछे पोरी मनदअ आउद।

21यीशु तेऊ फेर हेरी करे तेऊका प्रेम करू, होर तेऊवे बोलू, ताह में एकी गला री कामी साहा। नाश जोह ताह सेटा साहा तेता गरीवा वै वेच, होर ताह स्वर्गा में धन भेटणा, होर महा पीछे आडअ । 22ऐसा गला शुणी करे सह नराज होऊ, होर सह नराज होई करे तखा का नाठअ, किबेकी सह बखे सेठ थी।

23यीशुये चहु तरपा फेरे हेरी करे आपणे चेले वै बोलू, सेठा रा परमेश्वर रे राज्य में नाहणा केहड़ा मुशिकल साहा दा। 24चेले तेऊरी गला शुणी करे हेरान होई। एता में यीशुये भीआ कअ बोलू, हे शोहरूओ, जोह धना पैंदे बुशा डाहनदा त्याह परमेश्वरा रे राज्य मे नाहणा बहू माुश्किल साहा दा। 25सेठा मन्शा रा परमेश्वर रे राज्य में नाहणे का ऊंटा रा सिउंणी रे छेदा नाका का निखलणा सान साहा दा। 26त्याह बखे हेरान होई होर आपु में बोलदे लागे, तेबा कासका उद्धार परमेश्वर का होई सका? 27यीशुये त्याह फेरा वै हेरी करे बोलू, मणशा का यह नांई होई सकदा पर; किबेकी परमेश्वरा का सभे होई सका। 28पतरस तेऊका बोल़दअ लागअ, हेर हामे सबे सा छाडी करे तांई संघे साहा। 29यीशु ये बोलू, हाऊं तमा का सच-सच बोला साहा कि ऐडअ कोहे नांई साहा, जूणी मेरा होर सुसमाचारा री तणी घर होर भाई बहीण, आमा बापू, शोहरू शोहरी या महा पीछे खेच छाडी हो 30होर एउ वक्ते शअ गूणा नांई पाए घरे, होर भाईयो होर बहीण माओ होर शोहरू होर खेचा बे सताबे संघे परलोका में अनन्त जीबन साहा दा त्याह जेह हुणे 31पर जोह पहिले साहा दे त्याह पीछे हूणे होर जोह पीछे साहा दे त्याह जेह हूणे।

आपणी मउता रे बारे में यीशु री चिउणी भविष्यवाणी

(मत्ती 20.17-19; लूका 18.31-34)

32त्याह यरूशलेमा वै बाता नाह्दे लागदे, होर यीशु त्याह ज़ेह-ज़ेह हाढदअ लागदअ, चेले बखे हैरान साहा होर जोह तेऊ पीछे हाणढदे लागदे थी त्याह डरी दे। तेबा तेऊ बारह चेले शादी करे त्या संघे एडी गला करदअ लागअ, जोह तेऊ संघे हुंणा, 33भाल़ा, हामे यरूशलेमा वै नाह्दे लागदे साहा होर मणशा रअ शोहरू प्रधान याजक होर शास्त्री रे हाथे ढाकणे भजयालण, होर त्याह सह दण्ड दीणे बे अन्यजाति रे हाथे दिणअ। 34त्याह तेऊरा मज़ाक करणा, तेऊ पैंदे थुकणा, कोड़े संघे चिकणअ होर सह चिकणअ होर चिउणे धिहाडे सह ज़िउदअ हुणअ।

याकूब होर यूहन्ना री अर्ज

35तेबा जब्दी रअ शोहरू याकूब होर यूहन्ना यीशु सेटा वै आए होर बोलू, हे गुरू! हामे चाहन्दा की जोह कुछ हामे ताका मांगा, सह लोडी हामा वै दिना। 36तेऊ त्याहवै बोलु, तमे कैह चाहंदा कि हाऊं तमावै कैह करू? 37तेऊए बोलू, हामा वै सहे दे कि तेरी महिमा रे राज्य में हामा मेंजा का एक तेरी धुरी फेरे होर एक तेरी बांई फेर वैशे। 38यीशु त्याह वै बोलू, तमे नांई जानदे तमे कैह मांगदा? जासू भांडे में हाऊं झूटणे आल़अ साहा, कैह तमे भी झूटी सकदा? होर जोह बपतिस्मा हाऊं लोऊण आल़अ साहा तेऊ तमे लई सकदा? 39त्याहये तेऊवै बोलू, हामे ऐडा करी सकदा। यीशु त्याह वै बोलू, जासू भांडे में महा झूटणा तेता में तमा भी झूटणा; जोह बपतिस्मा हाऊं लोऊलअ आलअ साहा सह तमा लउणा। 40पर जासू वै सह तैयार करदअ साहा, त्याह छाडी करे होर कासी भी आपणे धूरी होर बांए फेरे बिशैगणा मेरा काम नांई साहा। 41जेबा दस चेले बे यह पता लागा, तेबा याकूब होर यूहन्ना पैंदे रोष उठू। 42तेबा यीशु त्याह आपु सेटा वै शादी करे त्याह वै बोलू, तमे जाणदा कि अन्यजाति रे चुनीदे अधिकारी आपणे ठिगा पैंदे राज डाहणा; होर जोह त्याह में बड़े साहा, त्याह पैंदे हक डाहदा। 43पर तमामें ऐडा नांई लोड़ी होऊ, पर तमामें जोह बडअ हुणअ चाहन्दा सह सभी रअ सेबक बणे; 44होर जोह तमामें सभी का बडअ हुणा चाहन्दा, सह सभी रअ दास बणे। 45किबेकी मणशा रअ शोहरू आपणी सेवा करदअ नाही, पर सेवा करदअ होर बहु रै बदले त्याह री मुक्ति रै मोला रे बदले आपणे प्राण रा बलिदान दीनदअ आऊओ।

काणअ बरतिमाई री आछी करी रामाबड़ी

(मत्ती 20.29-34; लूका 18.35-43)

46होर त्याह यरीहो में आए, होर जेबा सह होर तेऊरे चेले होर बहू लोका यरीहो का निकते, तेबा तिमाई रअ शोहरू बरतिमाई, एक काणअ भिखारी सडका रै किनारे वैठदअ थी, 47सह यह शुणी करे की यीशु नासरी साहदअ तेबा सह ज़ोरे-ज़ोरे बोलदअ लागअ, हे दाऊदा रे शोहरू यीशु महा प्रेंदे दया कर। 48बहू लोके तेऊबै डांटी करे बोलू चूप रह पर सह होर भी ज़ोरे-ज़ोरे बोलदअ लागअ, हे दाऊदा रे शोहरू यीशु महा प्रेंदे दया कर। 49तेबा यीशु रुकी करे बोलू, तेऊ शादा। होरा लोका तेऊ शाददे नाठे होर तेऊबै बोलू हे होसला डाह खडअ हो! सह ताह शाददअ लागदअ। 50सह आपणे बगले झिकड़े शोटी करे तेवरी उठू होर यीशु सेटा पूजअ 51यीशु तेऊवै बोलू तुह कैह चाहंदा की हाऊं तावै कैह करु ? काणे बोलू, हे गुरू, हाऊं हेरना चाहन्दा। 52यीशु तेऊवै बोलू, घरा वै नाह तेरे बुशाह तूह बचाऊ। तेऊ तेवरी हेरदा लागा, होर बाता यीशु पीछे हाड़दअ लागअ।

Đang chọn:

मरकुस 10: ISJNT

Tô màu

Sao chép

So sánh

Chia sẻ