1 คร 2
2
1อึย เบ บีนอง, ดอ ตัห กาลาง โอว ดี เบ ลอง เฌาพรา ปี ตู ดึอม ยึร เบ, โอว ตู กาลาง โฆรห อี คึกคัม บอ โฆรห อี มูห อางยาน ดูอี. 2โคว, ดอ กอย รึม โอว โดบ เบ, โอว แฮะ อูน น็อห ต็อห, โอว ตู กาลาง มาเซ แดง กาลาง ลอง เฌา เยซู อี แฮะ คัม ดี ยัม แดง ร็อง กาแวะ. 3ดอ ตัห โอว โดง กอย เบ, โอว แฮะ ดีหลัห, ตู มึห แฮณ. โอว บอ โยว กอ ดีเยณ. 4โฆรห โอว บอ ดารา ปี กาลาง โอว, อึณ ตู โดบ ปี ปาย อางยาน ดูอี. โอว มืร ตู กาซูห น็อห เบ. มาแล, ดอ กาลาง โอว โฆรห ตี, อึณ มูห น็อห พึอม เฌาพรา บอ ปวน อัน อี แตห อึณ กาหลูห ดี น็อห เบ. 5เฌาพรา แฮะ โบง ปาย ตี, แกวะ แตห เบ หณึม อางยาน ดูอี, แตห เบ ยี หณึม บึง ปวน เฌาพรา.
6เซ อึณ ยี มึห ดูอี อี แฮะ หณึม ซีคยา, เย กาลาง ลอง อางยาน ดี เฆ. มาแล, อึณ ตู มูห อางยาน ดูอี อี กอย ฌาด นี. อาว มูห อางยาน เฆ ดา กาณา อี อึบ กาดาย นี. อางยาน เฆ ตี ดี หราย โตต. 7ปี กาลาง เย ยี มูห อางยาน เฌาพรา ปี ตู ดึอม นับ ดูอี. อางยาน ตี เฌาพรา แฮะ เบลห อูน ซีณ ดอ โฆว อัน, แตห อัน ดัว อาพูง ดังโคว อัน ดี เย ดอ ตี นี. 8เฆ ดา ตาง อี อึบ แดง กาดาย นี, อาว มึห อาเซ อี นับ ลอง อางยาน ตี, อึณ ตู กาหลูห ดี น็อห เฆ. เซ เฆ นับ, เฆ ตู ง็อห เฌา เยซู อี มึห อาพูง ดังโคว ตาง. เฆ ตู แตห อัน ยัม แดง ร็อง กาแวะ. 9มาแล, อึณ แฮะ ดึอม แดม อูน แคง บับ เฌาพรา ต็อห,
“โมยว ปี ตู ดึอม นับ, ตู ดึอม ยึร ดูอี, โมยว ปี ฮู นับ ดูอี ดี เฌณฌา, เฌาพรา แฮะ แรน อูน โมยว ตี อาดา เฆ ดูอี อี ร็อก อัน.”
10อึณ ยี มูห เย, เฌาพรา แฮะ แตห น็อห พึอม อัน บยัะ ดี เย ลอง ฌึร ตี. โคว, น็อห พึอม เฌาพรา นับ ดี ซาคีะ ดี ยอด โตต ดอน โมยว, แตห อัน บอ นับ อี ลึก กาเซา ลอง เฌาพรา. 11ดูอี มืร ตู นับ น็อห อี เฮา, อึณ มึห มี โดว บรีม อัน อี วี นับ น็อห อัน. เฌาพรา บอ ปาย ตี. อาว มึห อี นับ น็อห เฌาพรา. อึณ มึห มี น็อห พึอม เฌาพรา, อี นับ. 12เอ ยี ตู มึห อางยาน เฆ ดูอี แดง กาดาย นี. เฌาพรา แฮะ ดัว ดี เย น็อห พึอม อัน, แตห เย นับ แคะ กืน แปะ แฮะ เฆฌู เฌาพรา ดี เย. 13โกบ อึณ ปาย ตี, เย ตู กาลาง อางยาน ปี มาโนว ดูอี, เย กาลาง ปี มาโนว น็อห พึอม เฌาพรา. เย กาลาง อี โดบ น็อห พึอม เฌาพรา, แตห เฆ อี มึห น็อห พึอม เฌาพรา นับ ลอง อัน. 14เซ ดูอี ตู มึห น็อห พึอม เฌาพรา, ปี ดัว น็อห พึอม เฌาพรา ตู ปึอน ดี ลึบ แคง น็อห อัน, อัน ทาง อาว มึห ดีโคว. อัน มืร ตู นับ ดี โทม, แตห อึณ กาหลูห ดี น็อห อัน. โคว, อึณ มูห น็อห พึอม เฌาพรา อี แตห อี นับ. 15วี เหมา อี มึห น็อห พึอม เฌาพรา, อัน นับ ดี กาลาง ลอง ปี โบง ดูอี ดอน โมยว, โยว อึณ หมึอม ตู หมึอม. มาแล, อึณ ตู มึห อาเซ อี วี ปึอน กาลาง ลอง อัน.
16อึณ แฮะ หมาน, ปี ดึอม แดม อูน แคง บับ เฌาพรา ต็อห, “อาว มึห อี นับ น็อห เฌาพรา, แตห อัน วี ปึอน ดี มาโนว อัน เฌา.”
อี มูห เอ, ปี เฌณฌา เอ แฮะ โดบ ปี เฌณฌา เฌา เยซู.
Đang chọn:
1 คร 2: pce
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2021, Wycliffe Bible Translator, Inc. All rights reserved.