માથ્થી 10

દવાડેલ બારા સેવક

(માર્ક 3:13-19; 6:7-13; લુક. 6:12-16; 9:1-6)

1ઈસુ તેને બારા ચેલા સાહલા તેને પાસી બોલવીની, વેટ ભૂતા સાહલા કાડુલા સાટી અન જાત-જાતના રોગ દુર કરીની અજેરી લોકા સાહલા બેસ કરુલા સાટી તેહાલા તેની અધિકાર દીદા. 2તે ખાસ ચેલાસા નાવ ઈસા હતાત. સિમોન જેલા પિતર કરી સાંગત તો અન તેના ભાવુસ આન્દ્રિયા, ઝબદીના પોસા યાકુબ, તેના ભાવુસ યોહાન, 3ફિલિપ, બરથોલમી, થોમા, માથ્થી, જો કર લેનાર હતા તો, અલફીના પોસા યાકુબ, થદી, 4સિમોન (રગીટ) અન યહૂદા ઈશ્કારિયોત જો ઈસુલા દગા દીનેલ તો.

દવાડેલ સેવકસા કામા

5યે બારા ચેલા સાહલા યી સાંગીની ઈસુની દવાડા. તુમી બિન યહૂદી લોકાસે ગાવાસાહમા નોકો જાસે સમરુનીસે ગાવા સાહમાહી નોકો જાસે. 6પન જે ભુલેલ મેંડા સારકા ઈસરાયેલ લોકા આહાત તેહાપાસી જ જાયજા. 7અન ચાલતા ચાલતા પરચાર કરત સાંગજા કા, સરગને રાજના સમય આગડ આનાહા. 8અજેરી લોકા સાહલા બેસ કરજા, મરેલ લોકા સાહલા જીતા ઉઠાડજા, કોડી સાહલા બેસ કરજા, વેટ ભૂતા સાહલા કાડજા. અજેરી બેસ કરુલા સાટી તુમાલા મફત સામર્થ્ય મીળનાહા, તાહા તુમી મફત બેસ કરજા. 9ગજવામા પયસા, સોના કા પીતળના કાહી નોકો લી જાસે. 10મૂસાફરી સાટી ઠેલી, દોન દોન જોડી આંગડા અન ચપલા કા કાઠી લી જાસે નોકો કાહાકા જેહાલા તુમા પાસુન આસીરવાદ મીળહ તે તુમની જરુર પુરી પાડતીલ જ.

11જદવ તુમી એક સાહારમા નીહી ત ગાવમા જાસે, તઠ તુમાલા તેને ઘર બોલવી લી જાવલા કોની તયાર આહા તી જાની લીજા અન તે ગાવ માસુન નીંગસે તાવધર તેને ઘરમા જ રહજા. 12જે ઘર તુમી જાસેલ તે ઘરમાસલે લોકા સાહલા સલામ સાંગીની આસીરવાદ દીજા. 13તે ઘરના લોકા તુમાલા બોલવી લેતીલ ત તુમના આસીરવાદ તે ઘરમા રહીલ. જર તે નીહી બોલવત ત તુમના આસીરવાદ તુમા પાસી ફીરી યીલ. 14જો કોની તુમાલા નીહી રાખ અન તુમના નીહી આયક ત તઠુન નીંગી જાયજા. તે ઘર, સાહાર માસુન તુમી નીંગસાલ તાહા તુમને પાય વરલી ધુળ ખોખરવી ટાકજા. 15મા તુમાલા ખરા જ સાંગાહા, દેવ નેય કરુલા યીલ તે દિસી તે સાહારની દશા સદોમ અન ગમોરા સાહારને લોકાસે કરતા ભારી શિક્ષા હુયીલ.

યેનાર સતાવની

(માર્ક 13:9-13; લુક. 21:12-17)

16હેરા, મા તુમાલા મેંડાસે સારકા ખડેસે મદી દવાડાહા, તે સાટી સાપને સારકા ચતુર રહજા અન કબુતરસે સારકા ભોળા રહજા. 17સાવધાન રહા, લોકા તુમાલા ધરીની યહૂદીસી મોઠી સભામા લી જાતીલ અન તેહને પ્રાર્થના ઘર સાહમા તુમને ચાબુક કન દેતીલ. 18તુમી માના ચેલા આહાસ તે સાટી તુમાલા રાજ્યપાલ અન સતાવાળાસે પુડ ધરી લી જાતીલ, તેહાલા અન બિન યહૂદી લોકા સાહલા તુમી માને બારામા સાંગસેલ. 19પન જદવ તે તુમાલા ધરી લી જાતીલ તદવ કાય સાંગુ અન કીસાક બોલુ ઈસા તુમી ચિંતા નોકો કરસે, કાહાકા દેવ તે જ સમયમા જી કાહી તુમાલા સાંગીલ તીજ સાંગજા. 20કાહાકા તુમી પદર નીહી બોલા પન તુમના દેવ બાહાસના આત્મા તુમનેમા રહી ની બોલીલ.

21ભાવુસ પદરને ભાવુસલા અન બાહાસ તેને પોસાને ઈરુદ હુયીની મરનને સાટી સોપી દેતીલ, અન પોસા પદરને આયીસ-બાહાસના ઈરુદમા હુયીની તેહાલા મારી ટાકવતીલ. 22કાહાકા તુમી માનેવર વીસવાસ કરતાહાસ તે સાટી અખા લોકા તુમને હારી દુશ્મની રાખતીલ, પન જો મર તાવધર માનેવર વીસવાસ કરતા રહીલ તેના તારન હુયીલ. 23જદવ તે એક ગાવમા તુમાલા અપદા પાડતીલ તાહા દુસરે ગાવલા પોળી જાયજા. મા તુમાલા ખરા જ સાંગાહા કા મા, માનુસના પોસા ફીરી યેવલા પુડ ઈસરાયેલને અખે ગાવા સાહમાસુન તુમી જાયી બી નીહી સકા.

ચેલા બનુના અરથ

24ચેલા પદરને ગુરુ કરતા મોઠા નીહી આહા, અન ચાકર માલીકને કરતા મોઠા નીહી. 25ચેલા તેને ગુરુને સારકા આહા અન ચાકર તેને માલીકને સારકા બનુલાજ પડ તીજ બેસ આહા, જદવ તેહી ઘરને માલીકલા સૈતાન સાંગા ત તેને ઘરને સભ્ય સાહલા તેને કરતા વદારે વેટ નાવા કરી ન સાંગતીલ.

કોનાના ભેવ રાખુલા?

(લુક. 12:2-7)

26તેહાલા હેરી તુમી બીહસે નોકો, જી દપાયજેલ આહા તી ઉગડા કરુમા યીલ અન જે ગોઠ ગુપીત આહા તી ઉઘાટ પડી જાયીલ, કાહી પન દપેલ કા ગુપીત રહનાર નીહી. 27આંદારામા મા તુમાલા જી સાંગાહા તી તુમી દિસને ઉજેડમા સાંગજા, અન મા જી કાહી તુમને કાનમા વજ જ સાંગાહા, તી ઘરને આડે વરુન મોઠલે આરડીની સાંગજા. 28જે તુમને શરીરલા મારી ટાકતાહા પન આત્માલા મારી નીહી સકત, તેહાલા હેરી નોકો બીહસેલ પન જેલા તુમના શરીર અન જીવ દોની નરકમા ટાકી દેવલા તાકત આહા તે દેવલા તુમી બીહજાસ. 29કાય એક પયસામા દોન લીટકા નીહી ઈકાયજત? તરી તુમના દેવ બાહાસને ઈચાર વગર તેહા માસલા એક પન જમીનવર નીહી પાડાય જ. 30દેવ તુમને જીવનની અખે ગોઠીસી કાળજી કરહ. અન યી પન માહીત આહા કા, તુમને ડોકીના અખા કેશ ગનેલ આહાત. 31તાહા તુમી બીહસે નોકો. દેવને નદરમા તુમની કિંમત ખુબ લીટકાસે કરતા વદારે આહા.

ઈસુલા સ્વીકાર કરુલા કા નીહી

(લુક. 12:8-9; 12:51-53; 14:26-27)

32જો માનસાસે પુડ માના ચેલા આહા ઈસા કબુલ કરીલ, ત તેલા માહી સરગ માસલે માને બાને પુડ કબુલ કરીન. 33જો માનસાસે પુડ માના ચેલા આહા ઈસા નકાર કરીલ, ત તેલા માહી સરગ માસલે માને બાને પુડ નકાર કરીન.

34મા દુનેમા શાંતિ કરવુલા આનાહાવ ઈસા તુમી નોકો માનસેલ, પન મા લોકાસે મદી શાંતિ નીહી પન વાયલા કરુલા આનાહાવ. 35મા યે સાટી આનાહાવ કા, પોસા બાહાસને, પોસી આયીસને અન વહુસ સાસુસને પાસુન વાયલા કરી ભાગલા પાડી દીન. 36માનુસના ઈરુદવાળા તેને પદરને ઘરના લોકા જ હુયતીલ.

37જો કોની માને કરતા તેને બાહાસવર કા આયીસવર પકા માયા કરહ તો માના ચેલા હુયુને યોગ્ય નીહી આહા, જો કોની માને કરતા તેને પોસાવર કા પોસીવર પકા માયા કરહ તો માના ચેલા હુયુને યોગ્ય નીહી આહા. 38જો કોની માના ચેલા બનનાહા તો તેના કુરુસ લીની માને માગ નીહી યે, તો માના ચેલા બનુલા યોગ્ય નીહી આહા. 39જો કોની તેને જીવલા બચવુલા ગવસહ તો તેના નાશ કરીલ પન જો કોની માને સાટી પદરના જીવ દી દેહે તો તેને જીવલા બચવહ.

બદલા

(માર્ક 9:41)

40જો કોની તુમના સ્વીકાર કરહ ત તો માના સ્વીકાર કરહ, અન જો માના સ્વીકાર કરહ તો માલા દવાડનારલા સ્વીકાર કરહ. 41જો માનુસ દેવ કડુન સીકવનારલા, દેવ કડુન સીકવનાર ઈસા જાનીની સ્વીકાર કરહ, તેલા દેવ કડુન સીકવનારને સારકા ઈનામ મીળીલ. જો નેયી માનુસલા ધારમીક આહા ઈસા જાનીની માની લેહે, તેલા નેયી માનુસને સારકા ઈનામ મીળીલ. 42મા તુમાલા ખરા જ સાંગાહા કા માને ચેલા માસલા એક પન બારીક ચેલાલા તો માના ચેલા આહા ઈસા જાની જો કોની એક ગલાસ સેળા પાની દીલ ત તેલા ઈનામ મીળીલ જ.

Đang chọn:

માથ્થી 10: DHNNT

Tô màu

Chia sẻ

So sánh

Sao chép