रोमि 7
7
बिहुको एनोङ उधारन
1खान्धुराइ ओनेगेलाइ, नेलाइ गिसुखेना कि, का मोसाको व्यवस्था बुझिकालाइ दोफा दोअ्दोङखा, द्याङगेलाइ बान्चिपा भरि खिनिङ व्यवस्था लागु हिखे। 2उधारनको भाअ्सिङ, एमि बेबाल ताइको के बान्चिपा भरि व्यवस्था बोमजिम वाको दोफाङ हिलि गोइखे। कालाउ जेसापा वाको के सिहि पानु वा बिहुको सामान्दासो मुक्त जेङखे। 3कालाउ जेसापा उङको बेबाल ताइको के हिलाउ दोङ भेनेङ वाबाल दोफा बिहुपाहे पानु वा कासिबिरि जेङखे। कालाउ जेसापा वाको के सिहे पानु वा व्यवस्थाको बन्धनसो मुक्त जेङखे कालाउ ताइको के सिका न्हुसो वा भेनेङ वाबाल दोफा बिहुपाहे पानु वा कासिबिरि माजेङखे।
4एसापा दोङ काङको खान्धुराइ ओनेगेलाइ, एला नेलाइ ख्रिस्ट दोफा सिसुन्हा, नेलाइ व्यवस्थाको भाअ्सिङ बुङ सिका हिसुना। कालाउ एला ख्रिस्टको हिसुना जाइ सिकासो सिन्चाल्का हि, कालाउकि नेलाइ परमेस्वरको भाअ्सिङ आसल जिबन जियाइलि दोसु। 5हाइपालिपानु जेलाउ केलाइ पापमय स्वभाबको आधिनता हिघान्हाहि, व्यवस्थाहोइ केलाइहेङ पापमय कामगेलाइ पालि मन जागाइ पिहि। इदोइ पापमय स्वभाबहोइ केलाइको जिउको गोताङ आङगहेङ बान्धाइति बानाइहि जेदोङहोइ सिका चुमाखे। 6एला केलाइ पुर्ना तरिकासो व्यवस्था केम्का भाइका माको, कालाउ परमेस्वरको आत्माको नावा तरिका आन्सार वाको सेवा पानाखे। हाइपालिपानु केलाइ ख्रिस्ट दोफा सिनाङ इदोइ व्यवस्थाको आधिनसो मुक्त जेङका हिनाहि।
पाप दोफा सङघरसो
7केलाइ हाइ दोअ्लि कुनु? व्यवस्था दोङ पाप चुमाहि? मिधुलाउ बुङ माको! जेसापा व्यवस्था मान्थुनु का पाप हाइ वाला दोअ्तेङ थाहा मागिधाङका, हाइपालिपानु “नाअ् चिचा माजेङ” दोअ्तेङ व्यवस्था दोङ मादोअ्नु चिचा जेङलि माएल दोअ्तेङ थाहा मागिधाङका। 8कालाउ पापहोइ आग्याहेङ प्रयोग पातेङ काङकोता गोताङ खाल्को लोभ पाका इच्छागेलाइ उब्जाइपाहि। हाइपालिपानु व्यवस्था माकोसिङते पाप सिका हि। 9व्यवस्थाहेङ माबुझिसिङ हिलाउ एखेप का बान्चितेङ हिघाखा, कालाउ जेलाउ का व्यवस्थाहेङ बुझिघा, झन पाप पालि इच्छा जागिहि, कालाउ का चाहि आत्माता सिघा। 10जिबन चुमालि गोइका व्यवस्थाते काङको भाअ्सिङ आत्मिक सिका कि चुमाहि। 11हाइपालिपानु पापहोइ आग्याहेङ प्रयोग पातेङ कासेहेङ धाताइहि, कालाउ ओदोङहोइ कासेहेङ आत्माता सेअ्हि। 12एन्सा पानु व्यवस्था पबित्तरो हि, कालाउ आग्या बुङ पबित्तरो हि, कालाउ न्याय बुङ आसल हि।
13हाइ व्यवस्था जाइ आसल हि कासेहेङ आत्मिक सिका पिहि? मिधुलाउ बुङ माको! भरु पाप चाहि पापको रुपता तिनाको दोअ्तेङ इङको रेम्का काथासो पापहोइ काङकोता आत्मिक सिका उब्जाइपाहि, कालाउकि आग्याहोइ पापहेङ हेन्जा मारेम्का तिङपाको।
14हाइपालिपानु केलाइ गिनाखे, कि व्यवस्था आत्मिक हि, कालाउ का चाहि जिउको स्वभाव आन्सार हिगिल्खा कालाउ का पापको बन्धनता हिघा। 15का हाइ पाखा इङको मागिखा, हाइपालिपानु का जेदोङ सहि हि ओदोङ पालि भोखा, कालाउ इङको का मापाखा। भरु का ओदोङ पाखा जेदोङहेङ का सिकाका। 16जेसापा का मारेम्का काम पाखा जेदोङ का पालि माभोखा पानु, का व्यवस्था रेम्का हि दोअ्तेङ मानियाङका। 17ओदोङ भाअ्सिङ मारेम्का पाका का माको, भरु याते काङकोता हिका पापहोइ पाका हि। 18हाइपालिपानु कासेहेङ थाहा हि, कि काङको पापमय स्वभाबता हाइ दोङ आसल काथा मान्थु, हाइपालिपानु जेदोङ रेम्का हि, इङको पालि इच्छा का दोफा हि, कालाउ का इङको पालि माद्वाङका। 19हाइपालिपानु जेदोङ रेम्का काम पालि का खाङखा, इङको का मापाखा, कालाउ दुस्ट काम जेदोङ का पालि माखाङखा, ओदोङ का पाखा। 20एला का जेदोङ इच्छा मापाखा, ओदोङ काम पाखा पानु, इङको पाका का माको, भरु काङकोता हिका पापहोइ दोङ पाखे।
21ओदोङ भाअ्सिङ का ताइमिङता एनोङ नियमहोइ काम पाका निङखा। का रेम्फा पालि खाङखा, कालाउ का मारेम्का काम कि पाखा। 22हाइपालिपानु का काङको गोताङ ह्रदयहोइ परमेस्वरको व्यवस्थाता लेङचाका हिघा। 23कालाउ का चाहि काङको जिउको आङगगेलाइता जेङका भेनेङ नियमहोइ काङको मनता हिका नियम दोफा धुम पाखे, इङकोङ सरबुङहोइ कासेहेङ पापको बान्धाइति बानाइखे, जेदोङ पाप काङकोता एला थेकापा बुङ हि। 24हाय, का हेथे दुखि द्याङ हिघा, इदोइ आत्मिक सिकासो कासेहेङ हासु लाअ्पावा? 25ओदोङ भाअ्सिङ प्रभु येसु ख्रिस्ट पाहासो बान्चिपाका परमेस्वरहेङ का धन्यबाद प्याङका। काङको मनता का परमेस्वरको व्यवस्था केम्लि इच्छा पाखा कालाउ काङको पापमय स्वभाबको कारनहोइ का लागातार पाप पातेङ हिखा।
Đang chọn:
रोमि 7: DHINT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dhimal New Testament, by The Love Fellowship is licensed under Creative Commons Attribution-ShareAlike 4.0 License.