साल्न्हाका चात्या 3
3
एमि लेङग्रा एल्का
1पतरुस कालाउ युहान्ना दिनाको सुम बजे प्रार्थाना पाका पहरता मुन्दिर हानिघाहि। 2कालाउ द्याङगेलाइ जोलोम सोङ लेङग्रा द्याङहेङ फुतेङ दिनाङ मुन्दिरको सुन्दर मिङको फिनुता ताअ्पिघाखे। कि वा मुन्दिरता लोका द्याङगेलाइ दोफा भिख ह्रेलि द्वाको। 3जेलाउ पतरुस कालाउ युहान्नाहेङ मुन्दिरता हानिकाताङ पाका तिङहि, कालाउ वा ओबालाइ दोफा भिख ह्रेहि। 4पतरुस युहान्ना दोफाङ वासेहेङ सोझाङ खाङतेङ दोअ्हि, “केलाइ भारि खाङ!” 5इम्बालाइसो हाइ दोङ निङलि आस पातेङ वा इम्बालाइहेङ खाङहि।
6कालाउ पतरुस दोअ्हि, “काङको दोफा सोना-चान्दि मान्थु, कालाउ काङको दोफा जेदोङ हि इङको नासेहेङ प्याङका। नासरत येसु ख्रिस्टको मिङता ल्हो कालाउ तेअ्।” 7कालाउ पतरुस उङको द्याङको दाम्पाहा खुर चातेङ ल्होपाहि कालाउ एन्सालाउ दोङ वाको खोकोइगेलाइको गुलि गाठोगेलाइता बल लोहि। 8उङको द्याङ जुरुक्क ल्होतेङ जाअ्हि कालाउ तेअ्लि तेङहि। वा तेअ्काताङ कालाउ तोङकाताङ कालाउ परमेस्वरको बाखिन पाकाताङ इम्बालाइ दोफा मुन्दिरको सालेङता हानिहि। 9कालाउ झाराङ द्याङगेलाइ वासेहेङ तेअ्काताङ पाका कालाउ परमेस्वरको बाखिन पाकाताङ पाका तिङहि। 10ओबालाइ वासेहेङ मुन्दिरको सुन्दर फिनुता ताअ्का लेङग्रा भिखारि योम्तेङ हिका या दोङ हि दोअ्तेङ वासेहेङ नाल्हि। कालाउ वाको ह्रुता जेङका काथाता ओबालाइ मेनाङ भारभुसाइहि।
मुन्दिरता पतरुसको उपदेस
11उङको द्याङ पतरुस कालाउ युहान्नाको लेसारा पिताइका तिङतेङ झाराङ द्याङगेलाइ भारबुसाइ मानितेङ सोलोमोन मिङको बारान्दाता इम्बालाइकोता धाअ्तेङ लोहि। 12इङको तिङतेङ पतरुस द्याङगेलाइहेङ दोअ्हि, ओइ इस्राएलको द्याङगेलाइ इदोइ काथाता हाइ पालि नेलाइ आचाम्मा जेङसुखेना हाइ केलाइ वासेहेङ ताइको सरबुङ कालाउ भक्तिसो दोङ तेअ्लि दोपाका दोअ्का सम्झिसुखेना? 13आब्राहाम, इसाहाक, कालाउ याकुबको परमेस्वर केलाइको पुर्खागेलाइको परमेस्वर दोङ ताइको सेवक येसुहेङ महिमित पाहि। कालाउ इम्बालाइ वासेहेङ सेअ्ताको दोअ्तेङ यहुदि आगुवागेलाइको खुरता सुम्पिपिहि। कालाउ पिलातस येसुहेङ लाअ्पिलि खाङलाउ बुङ नेलाइ मालाअ्पिलि दोअ्सुना। 14कालाउ नेलाइ येसुहेङ सुइकार मापासुन्हा, जाइ पबित्तरो कालाउ धर्मि हिघाहि। कालाउ नेलाइ एमि ज्यान माराहेङ नेलाइको भाअ्सिङ लाअ्पिलि माग पासुन्हा। 15कालाउ जाइ द्याङगेलाइहेङ आनान्त जिबन पिखे, नेलाइ वासेहेङ सेअ्सुन्हा वासेहेङ परमेस्वर दोङ सिकासो आरोङ सिन्हु पाहि, केलाइ या काथाको साक्सि हिनाहि। 16इदोइ द्याङ जाइहेङ नेलाइ नाल्सुखेना, कालाउ एला नेलाइ तिङसुखेना, वा येसु ख्रिस्टको मिङता खाङधुरि पाकानाङ बल्लियाका जेङका हि कालाउ येसुको मिङता एल्का हि, कालाउ जाइहेङ नेलाइ ताइमिङ तिङसुखेना।
17ओइ एला काङको खान्धुराइ ओनेगेलाइ, कासेहेङ थाहा हि, कि नेलाइ कालाउ नेलाइको आगुवागेलाइ येसुहेङ सेअ्हि हाइपालिपानु वा ख्रिस्ट हि दोअ्का नेलाइहेङ थाहा मान्थुघाखे। 18कालाउ ख्रिस्ट दुख भोगिलि कालाउ सेअ्न्हालि गोयाङ दोअ्तेङ गोताङ परमेस्वरको बक्तापाहासो हेन्जा लाम्फा दोअ्लि दोअ्का हिघाहि। एसापा परमेस्वर आगमबानि पुरा पाहि। 19ओदोङ भाअ्सिङ पाप पालि लाअ्सु कालाउ परमेस्वर भारि घुरिसु, कि नेलाइको पाप स्यामा पाप्याको, कालाउकि नेलाइता परमेस्वरसो आत्मिक सरबुङको सोमोइ ल्वाको। 20कालाउ परमेस्वर नेलाइको भाअ्सिङ लाम्फासोङ नियुक्ति पाका येसु, जाइ ख्रिस्ट हि वासेहेङ दिङगिल प्याङ। 21कालाउ येसु स्वर्गताङ हिलि आवस्यक हि, एन्सालाउ थेकापा परमेस्वर ताइमिङ बानाइका गोताङ आनेमानेगेलाइ नावा बानाइ प्याङ। हेन्जा सोमोइ लाम्फा परमेस्वर उङको ताइको पबित्तरो बक्तागेलाइ पाहासो इङको बाचा पाका हिघाहि। 22हाइपालिपानु मोसा दोअ्का हिघाहि, प्रभु नेलाइको परमेस्वर कासेहेङ जेसाङ जाअ्पाका हि, एन्साङ नेलाइको ओनेगेलाइको माझासो एमि परमेस्वरको बक्ता नेलाइको भाअ्सिङ दिङदिल्प्याङ। कालाउ वा नेलाइहेङ जेदोङ-जेदोङ द्वावा इङको गोताङ काथा नेलाइ हिङलि गोइस्वाना। 23कालाउ हासु बुङ द्याङ उङको परमेस्वरको बक्ताको दोअ्का माहिङपिनु, वासेहेङ परमेस्वरको द्याङगेलाइसो खेनावा कालाउ वासेहेङ नासा पावा।
24सामुएल चुम्तेङ न्हुसोको गोताङ परमेस्वरको बक्तागेलाइ जेथे बुङ दोअ्का हिघाहि, उङको झाराङ इदोङ दिनाको बारेता दोअ्का हि। 25नेलाइ झाराङ परमेस्वरको बक्ताको सान्तानगेलाइ हिसुना कालाउ नेलाइहेङ दोङ इङको बाचा पिहि, जेदोङ परमेस्वर नेलाइको पुर्खा आब्राहाम दोफा धेउका हिघाहि। ओदोङ भाअ्सिङ वा आब्राहामहेङ दोअ्हि, नाङको हारागुटियासो प्रिथिबिको गोताङ द्याङगेलाइ आसिस निनाङ। 26परमेस्वर झाराङ खान्तेङ लाम्फा ताइको सेवकहेङ सिकासो सिन्हु पाहि कालाउ नेलाइकोता दिङगिल्हि, कालाउकि परमेस्वर नेलाइ झाराङहेङ पापमय जिबनसो लाअ्पातेङ आसिस प्याको।
Đang chọn:
साल्न्हाका चात्या 3: DHINT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dhimal New Testament, by The Love Fellowship is licensed under Creative Commons Attribution-ShareAlike 4.0 License.
