Nugana 1
1
‘UPWA 1.
1Nuganaia Eaubada garewa ta gabura ‘i mweruruidi. 2Ta bare‘u waboreborena ta kakaena; ta guguioi ni‘u ‘etanaia ‘i miami: ta Eaubada iaruiaruana ni‘u ‘etanaia ‘i alealeledadana. 3Ta Eaubada ‘i ona Ma‘edana ‘i da apwesa: ta ma‘edana ‘i apwesa. 4Ta Eaubada ma‘edana i ‘itena, ‘aene ‘i bobo‘ana: ta Eaubada ma‘edana ‘i wearina guguioiega. 5Ta Eaubada ma‘edana ‘i eesena Asiata, ta guguioi ‘i eesena Boiboi. Ta ni‘atu asuinuanua ta ni‘atu gonagona, ‘asiata ‘e bweuna.
6Ta Eaubada ‘i ona, Bwagabwaga ‘i da apwesa ni‘u gamwagamwanaia, ta ni‘u be ni‘u ‘i da weari. 7Ta Eaubada bwagabwaga ‘i bubuna, ta ni‘u bwagabwaga ‘ubunaia ta ni‘u bwagabwaga debanaia ‘i wearidi: ta nadigega ‘i apwesa. 8Ta Eaubada bwagabwaga nina ‘i eesena Garewa. Ta ni‘atu asuinuanua ta ni‘atu gonagona, ‘asiata ‘eruena.
9Ta Eaubada ‘i ona, Ni‘u garewa ‘ubuninaia si da egogona esena ‘e bweuna ‘ena, ta bwa‘a iadaiadana ‘i da apwesa: ta ni‘atu nadigega.
10Ta Eaubada bwa‘a iadaiadana ‘i eesena Bare‘u; ta ni‘u ‘idi egogona ‘i eesena Ora: ta Eaubada i ‘itena ‘i bobo‘ana. 11Ta Eaubada ‘i ona, Bare‘uiega nedu ‘i da tabwama, pwatura maatuna, kaiwe uauana uana ‘i da uaua adelina nadigega, maatuna, bare‘uia: ta ni‘atu nadigega. 12Ta bare‘uiega nedu ‘i tabwama, pwatura maatuna adelina nadigega, ta kaiwe uauana, maatuna, adelina nadigega: ta Eaubada i ‘itena ‘i bobo‘ana. 13Ta ni‘atu asuinuanua ta nia‘tu gonagona, ‘asiata ‘etonina.
14Ta Eaubada ‘i ona, Maiare si da apwesa garewa bwagabwagana ‘enaia be ‘enega asiata si da weari boiboiega; ta si da ‘ewe‘iwe‘iiaia manudi be, tuta manudi be, asiata ta iakwara manudi be: 15ta si da emaiare garewa bwagabwagana ‘enaia be bare‘u si da tuema‘edanina: ta ni‘atu ‘i nadigega. 16Ta Eaubada maiare sinabwadi ‘e rua ‘i bubudi; maiare me sinabwana asiata ‘i da loine, ta maiare me gidarina boiboi ‘i da loine: wate kwadima ‘i bubudi. 17Ta Eaubada garewa bwagabwagana ‘ena ‘i sa‘udi be ‘enega bare‘u si da tuema‘edanina, 18ta asiata be boiboi si da loinedi, ta ma‘edana si da weari guguioiega: ta Eaubada i ‘itena ‘i bobo‘ana. 19Ta ni‘atu ‘asuinuanua ta ni‘atu gonagona, asiata ‘e atana.
20Ta Eaubada ‘i ona, Ni‘uia iage mwerumweruruidi maiawasidi si da iaudidigana, ta manua si da taea bare‘u ‘etanaia garewa bwagabwagana matanaia. 21Ta Eaubada rabarabaoo sinabwadi ‘i mweruruidi, iage mwerumweruruidi maiawasidi iauiaudi si ‘eetapewa ta, taudi ni‘uia iaudidigadi, adelidi nadigega, manua mapapedi adelina nadigega ta: ta Eaubada i ‘itena ‘i bobo‘ana. 22Ta Eaubada ‘i ona obobomedi, ‘i gwae, Wa da losiwa, ta wa da eiau, ta ni‘u oraia wa da loemae, ta manua si da eiau bare‘uia. 23Ta ni‘atu asuinuanua ta ni‘atu gonagona, asiata ‘e nimana.
24Ta Eaubada ‘i ona, Bare‘u ‘enega iage mwerumweruruina maiawasina ‘i da apwesama adelina nadigega, iobai, iage lookawarina ta, bare‘u bomitawana adelina nadigega ta: ta ni‘atu ‘i nadigega. 25Ta Eaubada bare‘u bomitawana adelina nadigega ‘i bubuna, iobai adelidi nadigega ta, iage iauiauna bare‘uia si elookawara adelina nadigega ta: ta Eaubada i ‘itena ‘i bobo‘ana. 26Ta Eaubada ‘i ona, Tai ta da bubuna ‘ada ma‘ama‘aiau ‘atua, ‘ada ‘ita nadigega; ta si da loina ora ianina ‘edia be, mwatui manuina ‘edia be, iobai ‘edia be, bare‘u maibo‘ana ‘ena be, iage iauna si lookawara bare‘uia si kawakawara ‘edia be. 27Ta Eaubada tai ‘i mweruruina ‘ana ma‘ama‘aiau tauna ‘atua, Eaubada ‘ana ma‘ama‘aiau ‘atua ‘i mweruruina; me‘olotona ta mewainena ‘i mweruruidi. 28Ta Eaubada ‘i ona‐obobomedi: ta Eaubada ‘i eonedi, wa da losiwa, ta wa da eiau, ta bare‘u wa da loemae, ta ‘ena wa da ewaiwai; ta wa da loina ora ‘ana iana ‘edia be, mwatui manuina ‘edia be, iage iauna maiawasidi bare‘uia si looniu ‘edia be. 29Ta Eaubada ‘i ona, Wa ‘ita, pwatura iauna maatuna ia ‘ebwaemi, taudi bare‘u maibo‘ana matanaia si miami, kaiwe iauna ta, kaiwe maatuna uana ‘ena ‘i miami; ‘ami masura manuna, 30ta bare‘u bomitawana iauna ‘enaia, mwatui manuina iauna ‘enaia ta, iage iauna ‘i elookawara bare‘uia ‘enaia ta, ‘edia iawasidi ‘i miami, ni‘atu pwatura karakarawina iauna ia ‘ebwaedi ‘adi masura manuna: ta ni ‘atu ‘i nadigega. 31Ta Eaubada iage ‘e bweuna ‘e bweuna ni‘atu ‘i bubuna i ‘itena, ta, wa ‘ita, ‘i to bobo‘ana sana. Ta ni‘atu asuinuanua ta ni‘atu gonagona, asiata ‘e sikisi nina.
Đang chọn:
Nugana 1: DOBOT
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Published by the British and Foreign Bible Society in 1919