প্রেরিত্ 23
23
1পৌলে সোজা দাঙর্ তেম্মাঙ মানুচ্চুনো ইন্দি রিনি চেইনে কলঅ, “মর্ ভেইয়ুন, মুই এচ্চ্যে সং গম্ বিবেক্ দিইনে গোজেনরে ভাবিনে মর্ কামানি পালেয়োং।” 2এ কধাগান্ শুনিনে আজল্ ধর্মগুরু অননিয় পৌল কায়-কুরে যিগুনে থিয়্যেই এলাক্ তারারে পৌল মূয়োনত্ আঘাত্ গুরিবাত্তে উগুম দিলো। 3সেক্কে পৌলে অননিয়রে কলঅ, “ভন্ড, গোজেনে তরেয়ো আঘাত্ গুরিবো। আইন মজিম মর্ বিচের্ গুরিবাত্তে তুই সিয়েনত্ বোচ্চ্যস্, মাত্তর্ মরে পিদিবাত্তে উগুম দিইনে দঅ তুই নিজেই আইন ভাঙ্যস্।”
4যিগুনে পৌল কায়-কুরে থিয়্যেই এলাক্ তারা তারে কলাক্, “তুই গোজেনর্ দাঙর্ ধর্মগুরুবোরে অগমান্ গরর্।”
5সেক্কে পৌলে কলঅ, “ভেইলগ্, মুই হবর্ ন-পেদুং, ইবে দাঙর্ ধর্মগুরু। যুনি হবর্ পেদুং সে কধাগান্ ন-কদুং, কিয়া পবিত্র বোইবোত্ লেগা আঘে, ‘তর্ জাদর্ নেতাবোরে অসর্মান ন-গোজ্জ্য।’ ”
6সেই দাঙর্ তেম্মাঙর্ এক দল যে সদ্দূকী আর অন্য দল অলঅ ফরীশী, এ কধাগান হবর্ পেইনে পৌলে দাঙর্ তেম্মাঙত্ রঅ ছাড়িনে কলঅ, “মর্ ভেইয়ুন, মুই এক্কো ফরীশী আর ফরীশীর পুয়ো। মর্ বিচের্ অর্ কিয়া মুই বিশ্বেজ্ গরং, মরাগুনে আরঅ জেদা ওই উদিবাক্।” 7তার্ এ কধাগান্দোই ফরীশী আর সদ্দূকীগুনো ভিদিরে কোল্-কোজ্জ্যে আরাম্ভ অলঅ। ইয়েন্দোই দাঙর্ তেম্মাঙ মানুচ্চুনে ভাগ্ ওই গেলাক্, 8কারন সদ্দূকীগুনে কন্দে, “মরাগুনে আর্ জেদা ওই ন-উদিবাক্।” ইয়েন বাদে তারা আরঅ কন্, স্বর্গদূত্-অ নেই, কনঅ আত্মায়ো নেই; মাত্তর্ ফরীশীগুনে ইয়েনি বেক্কানি বিচ্চ্যেজ্ গরন্।
9সেক্কে ভারী কোল্-কোজ্জ্যে আরাম্ভ অলঅ আর ফরীশী দলর্ কয়েক্কো ধর্ম-মাষ্টর উদিনে রঅ ছাড়ি ছাড়ি কধা কুয়ো ধুরিলাক্। তারা কলাক্, “আমি এ মানুচ্চোর্ কনঅ দুষ্ ন-দেগির্। অয়ত কনঅ আত্মা বা কনঅ স্বর্গদূতে তা সমারে কধা কোইয়্যে।”
10সেই কোল্-কোজ্জ্যেগান্ এদক্ দাঙর্ অলঅ যে, আজল্ সেনাপতিবো দোরেলদে যে যুনি তারা পৌলরে কট্টা কট্টা গুরি ফেলান্। তে সৈন্যগুনোরে উগুম্ দিলো যেন তারা যেইনে মানুচ্চুনো আঢত্তুন্ পৌলরে ছাড়েই আনিনে কেম্পত্ নেযান্।
11তার্ কেল্যে রেদোত্ প্রভু পৌল কায়কুরে থিয়্যেইনে কলঅ, “সাহসী অ, যিরূশালেমত্ যেবাবোত্যে গুরি তুই মঅ পৌইদ্যেনে সাক্ষ্য দুয়োচ্ সেবাবোত্যেগুরি রোমত্অ তত্তুন্ সাক্ষ্য দিয়্যে পড়িবো।”
পৌলরে মারে ফেলেবার্ কুজুরোমি
12তার্ কেল্যে বেন্যেমাদান্ যিহূদীগুনে এক্কান্ কুজুরোমি গুরিলাক্ আর পৌলরে মারেই ন-ফেলানা সং কিচ্চু ন-হেবাক্ বিলিনে সমত্ খেলাক্। 13চল্লিশ জনত্তুন্অ বেশ্ মান্জ্যে এ কুজুরোমিগান্ গুরিলাক্। 14তারা আজল্ ধর্মগুরুগুনোর আর যিহূদী বুড়ো নেতাগুনো ইধু যেইনে কলাক্, “পৌলরে মারেই ন-ফেলানা সং আমি কিচ্চু ন-হেবং বিলি জদবদে সমত্ খেইয়্যেই। 15ইক্কিনে তুমি আর দাঙর্ তেম্মাঙর্ মানুচ্চুনে এ পৌইদ্যেনে আরঅ গমেদালে বিজিরে-চেবার্ নাঙে পৌলরে তমা মুজুঙোত্ আনিবাত্যে আজল্ সেনাপতিবো ইধু হবর্ পাধ। তে ইধু লুমিবার আগে আমি তারে শেজ্ গুরি ফেলেবাত্যে যুক্কোল্ ওই আঘিই।”
16মাত্তর্ পৌল ভাগিনেবো এ কুজুরোমির্ কধাগান শুনিনে কেম্পত্ গেলঅ আর পৌলরে সেই হবরান্ জানেল। 17সেক্কে পৌলে এক্কো শত উগুরে সেনাপতিরে ডাগিনে কলঅ, “এ গাবুজ্জ্যে পুয়োবোরে আজল্ সেনাপতিবো ইধু নেযা। তাইধু ইবের্ কিজু কবার্ আঘে।”
18সেক্কে সেই শত উগুরে সেনাপতিবো সেই গাবুজ্জ্যে পুয়োবোরে নেযেইনে আজল্ সেনাপতিবো ইধু যেইনে কলঅ, “বন্দী পৌলে মরে ডাগিনে এ গাবুজ্জ্যে পুয়োবোরে তইধু আনিবাত্যে কলঅ, কারন তইধু তার্ নাকি কিজু হবার্ আঘে।”
19আজল্ সেনাপতিবো সেক্কে সেই গাবুজ্জ্যে পুয়োবোর্ আঢ্তানি ধুরিনে এক কিত্তেদি নেযেইনে কলঅ, “মরে তুই কি কবাত্তে চাজ্?”
20সেই গাবুজ্জ্যে পুয়োবো কলঅ, “যিহূদীগুনে ঠিগ্ গোজ্জ্যন্দে, পৌল পৌইদ্যেনে আরঅ গমেডালে হবর্ লবার্ নাঙে তারে এজেত্তে কেল্ল্যে দাঙর্ তেম্মাঙ মুজুঙোত্ নেযেবাত্যে তরে কোজোলি গুরিবাক্। 21তুই তারা কধালোই রাজী ন-অবে, কারন চল্লিশ জনত্তুন্অ বেশ্ মানুচ্ লুগিনে পৌলরে বাজ্জেই আগন্। পৌলরে খুন্ ন-গরানা সং এ মুনুচ্চুনে কিচ্চু ন-হেবাক্ বিলিনে সমত্ খেইয়োন্। তারা যুক্কোল্ ওইনে ইক্কিনে বানা তর্ রাজী অনাগান্ বাজ্জ্যেই আঘন্।”
22আজল্ সেনাপতিবো সেই গাবুজ্জ্যে পুয়োবোরে বিদেয় দিবার্ সময়োত্ এ উগুমান দিলো, “এ কধাগান্ যে তুই মরে জানেয়োচ্ সিয়েন কাররে ন-কোচ্।”
পৌলরে কৈসরিয়াত্ পাধা অলঅ
23পরেদি আজল্ সেনাপতিবো তার্ দ্বিজন শত উগুরে সেনাপতিগুনোরে ডাগিনে কলঅ, “দ্বিশত্ সাধারণ সৈন্য, সত্তুর্ জন ঘোড়াবলা সৈন্য আর দ্বিশত্ শেলবলা সৈন্যরে এচ্চ্যে রেত্ নটা সময়োত্ কৈসরিয়াত্ যেবাত্যে যুক্কোল্ রাগঅ। 24আর পৌলত্যেয়ো ঘোড়ার্ বেবস্থা গরঅ যাতে তারে গমেডালে আজল্ শাসনগুরিয়্যে ফীলিক্স ইধু নেযা যায়।”
25আজল্ সেনাপতিবো এ চিধিগান্ লিগিলো:
26মুই, ক্লৌদিয় লুসিয়, আজল্ শাসনগুরিয়্যে ফীলিক্স ইধু এ চিধিগান্ লেগঙর্। মর্ ভালেদিগান্ গুজি লঅ।
27“যিহূদীগুনে এ মানুচ্চোরে ধুরিনে প্রায় খুন্ গুরি ফেল্ল্যন্, মাত্তর্ মুই মঅ সৈন্যগুনোরে নেযেইনে তারে উদ্ধোর্ গুরি আন্ন্যং; কিয়া মুই কোই পারিলুং তে এক্কো রোমীয়। 28পরেদি মুই জানিবাত্তে চেলুং কিত্ত্যে মান্জ্যে তারে দুষী গত্তন্। সেনত্তে তারার্ দাঙর্ তেম্মাঙ ইধু মুই তারে নেযেলুং। 29মুই বুঝি পারিলুং, তারার্ ধর্মর্ রীতি-সুদোম পৌইদ্যেনে তারা তারে দুষী গত্তন্, মাত্তর্ মুরিবার বা জেলোত্ যাইদ্যে ধোক্ক্যেন্ এমন কনঅ দুষ্ তার্ নেই। 30যেক্কে মুই হবর্ পেলুং মানুচ্চুনে পৌল বিরুদ্ধে কুজুরোমি গত্তন্ সেক্কে মুই তারে তইধু পাধেলুং। যিগুনে তারে দুষী বানেয়োন তারারেয়ো মুই উগুম্ দিলুং যেন তারা ইবের্ দুষো পৌইদ্যেনে তইধু কন্।”
31সেক্কে সৈন্যগুনে আজল্ সেনাপতিবোর্ উগুম মজিম পৌলরে রেদোত্ তারা সমারে আন্তিপাত্রি শঅরান সং নেযেলাক্। 32তার্ কেল্যে তারা ঘোড়াবলা সৈন্যগুনো সমারে পৌলরে পাধেই দিইনে কেম্পত্ ফিরি গেলাক্। 33ঘোড়াবলা সৈন্যগুনে কৈসরিয়াত্ লুমিনে চিধিগান্ আর পৌলরে আজল্ শাসন গুরিয়্যেবোর্ আঢত্ দিলাক্। 34আজল্ শাসন গুরিয়্যেবো চিধিগান্ পড়িনে পৌলে কুদুগোর্ মানুচ্ সিয়েন পুযোর্ গুরিলো। পৌলে যে কিলিকিয়া রেজ্যর্ মানুচ্ সে কধাগান্ কোই পারিনে তে কলঅ, 35“তরে যিগুনে দুষী বানেয়োন তারা ইধু লুমিলে পরেদি মুই তঅ কধানি শুনিম।” যেরেদি তে রাজা হেরোদর্ ঘর-জেলোত্ পৌলরে চুগি দিইনে থবাত্যে কলঅ।
Đang chọn:
প্রেরিত্ 23: CBT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Copyright © 2021 Bangladesh Bible Society
