প্রেরিত্ 18
18
করিন্থ শঅরত্
1ইয়েনর্ পরেদি পৌলে এথেন্স ফেলেইনে করিন্থ শঅরত্ গেলঅ। 2সিধু আকিলা নাঙে এক্কো যিহূদী সমারে তার্ দেগা অলঅ। পন্ত রেজ্যত্ আকিলার্ জর্ম ওইয়্যে। সম্রাট ক্লৌদিয় বেক্ যিহূদীগুনোরে রোম ছাড়ি যেবাত্যে উগুম্ দিয়্যে। সেনত্তে কয়েক্ দিন আগে আকিলা তা মোক্কো প্রিষ্কিল্লারে লোইনে ইটালিত্তুন্ করিন্থত্ এচ্চ্যে। পৌলে তারা ইধু গেলঅ। 3তারা ধোক্ক্যেন্ তেয়ো তাম্বুল বানাইদ্যে কাম্ গত্ত বিলি তারা সমারে থেইনে কাম্ গরা ধুরিলো। 4পত্তি জিরেবার্ দিনোত্ পৌলে সমাজ-ঘরত্ যেইনে যীশু পৌইদ্যেনে কধা কদঅ আর গ্রীক আহ্ যিহূদীগুনোরে যীশুর্ পধত্ আনিবার্ চেষ্টা গত্ত।
5সীল আর তীমথিয় ম্যাসিডোনিয়াত্তুন্ এলে পরেদি পৌলে বানা গোজেনর্ কধা ফগদাং গুরিনে তার বেক্ সময়ান্ কাদা ধল্ল। তে যিহূদীগুনো ইধু সাক্ষ্য দিদো, যীশুই মশীহ। 6মাত্তর্ যিহূদীগুনে যেক্কে পৌল বিরুদ্ধে কধা কোইনে তারে অগমান্ গরা ধুরিলাক্ সেক্কে পৌলে তারা বিরুদ্ধে তা কাবড়-চুগোড়ানি ঝাড়ি ফেলেল আর কলঅ, “তমা লো-গানির্ দায় তমা নিজো মাধা উগুরে থোক্। এ পৌইদ্যেনে মর্ কনঅ দুষ্ নেই। ইক্কেত্তুন্ ধুরি মুই অযিহূদীগুনো ইধু যেম্।”
7ইয়েনর্ পরেদি পৌলে সমাজ-ঘরান্ ফেলেইনে তিতিয়-যুষ্ট নাঙে এক্কো মান্জ্য ঘরত্ গেলঅ। এ মানুচ্চো ঘরান্ সমাজ-ঘর কায়কুরে এলঅ আর তে অযিহূদী ওইনেয়ো গোজেনর্ উবোসনা গুরিদো। 8সমাজ-ঘরর্ নেতা ক্রীষ্প আর তা ঘরর্ বেক্কুনে প্রভু উগুরে বিশ্বেজ্ গুরিলাক্। ইয়েন বাদে করিন্থীয়গুনো ভিদিরে ভালোকজনে পৌল কধা শুনিনে বিশ্বেজ্ গুরিলাক্ আর বাপ্তিষ্ম ললাক্।
9এক দিন্ন্যে রেদোত্ প্রভু এক্কো দর্শন মাধ্যমে পৌলরে এ কধাগান্ কলঅ, “ন-দোরেচ্, কধা কনাত্ থাক্, অলর্ গুরি ন-থেইচ্; 10কিয়া মুই তঅ লগে লগে আগং। তরে আক্রমণ গুরিনে কেঅ তর্ ক্ষতি ন-গুরিবাক্, কিয়া এ শঅরত্ মর্ বোউৎ মানুচ্ আঘন্।” 11ইয়েন্দোই পৌলে দেড় বজর্ সেই শঅরত্ থেইনে মানুচ্চুনোরে গোজেনর্ কধা শিক্ষ্যে দিলো। 12গাল্লিয়ো যেক্কে আখায়া রেজ্যর্ শাসনগুরিয়্যে এলঅ সেক্কে যিহূদীগুনে বেক্কুনে মিলি পৌলরে ধুরিনে বিচেরত্যে কোদোত্ আনিলাক্। 13তারা কলাক্, “এ মানুচ্চো এমন্ গুরিনে গোজেনর্ উবোসনা গত্তে কাট্ট্যে দের্ যিয়েন রীতি-সুদোমর্ বিরুদ্ধে।”
14পৌলে কধা কদে যেবঅ এমন সময়োত্ গাল্লিয়ো যিহূদীগুনোরে কলঅ, “যিহূদীলগ্, ইয়েন যুনি কনঅ অন্যেয় বা যদবদে কনঅ দুষোর্ বেপার অদঅ সালে তমা কধা শুনোনা মর্ পক্ষে ঠিগ্ কাম অদঅ। 15মাত্তর্ ইয়েন যেক্কে বিশেষ কনঅ বেপার, কারঅ নাঙর্ বেপার আর তমা রীতি-সুদোমর্ বেপার, সেনত্তে তুমি ইয়েনর্ মিট্মাট্ গরঅ। মুই সিয়েনি পৌইদ্যেনে বিচের্ ন-গুরিম।” 16এ কধাগান্ কোইনে তে কোদোত্তুন্ তারারে নিগিলেই দিবার্ উগুম দিলো। 17সেক্কে সেই যিহূদীগুনে বেক্কুনে মিলিনে সমাজ-ঘরর্ নেতা সোস্থিনীরে ধুরিনে কোদো মুজুঙোত্ পিদিলাক্; মাত্তর্ গাল্লিয়ো সিয়েন রিনিয়ো ন-চেলঅ।
আপল্লোর্ কধা
18বেশ্ কয়েক দিন করিন্থ শঅরত্ কাদানার্ পরেদি পৌলে বিশ্বেজি ভেইয়ুনোত্তুন্ বিদেয় নিলো আর আকিলা আহ্ প্রিষ্কিল্লা সমারে পানি পধেদি সিরিয়া দেজত্ এলঅ। পৌলে এক্কান্ মানত্ গোজ্জ্যে বিলি লদ্ দিবার্ আগেদি কিংক্রিয়া বন্দরত্ তা মাধাবো মুরেল। 19ইফিষ শঅরত্ লুমিনে তে প্রিষ্কিল্লা আর আকিলারে ইরি দিলো। যেরেদি তে নিজে সমাজ-ঘরত্ যেইনে যিহূদীগুনো সমারে যীশু পৌইদ্যেনে কধাবাত্তা কুয়ো ধুরিলো। 20যিহূদীগুনে তারে তারা সমারে কিজু দিন থেবাত্যে কলাক্, মাত্তর্ তে রাজী ন-অলঅ। 21সালে সিয়োত্তুন যেবার্ অক্তত্ তে কলঅ, গোজেনর্ আওজ্ অলে মুই আরঅ ফিরি এইম্। সে পরেদি তে ইফিষত্তুন্ জাহাজত্ গুরি লদ্ দিলো।
22তে কৈসরিয়া শঅরত্ লুমিনে জাহাজত্তুন্ লামিনে যিরূশালেমত্ গেলঅ। সিধু মন্ডলীর্ মানুচ্চুনোরে ভালেদি জানানার্ পরেদি তে আন্তিয়খিয়াত্ গেলঅ। 23আন্তিয়খিয়াত্ কয়েক দিন কাদানার্ পরেদি তে সিধু লদ্ দিলো আর গালাতিয়া আর ফরুগিয়া রেজ্যর্ এক জাগাত্তুন্ অন্য জাগাত্ ঘুরি ঘুরি শিচ্চ্যগুনোরে বিশ্বেজ্ বাড়েইনে তারারে দরমর গুরিলো।
24এ ভিদিরে আপল্লো নাঙে এক্কো যিহূদী ইফিষত্ লুমিলো। আলেক্জান্দ্রিয়া শঅরত্ তার্ ঘর এলঅ। তে এক্কো গম্ কধা কোইয়্যে এলঅ আর পবিত্র বোইবো গমেডালে জানিদো। 25প্রভুর্ পধঅ পৌইদ্যেনে তে শিক্ষ্যে পেয়্যে। তে অমকদ আওজ্ গুরিনে কধা কদঅ আর যীশু পৌইদ্যেনে গমেডালে শিক্ষ্যে দিদো, মাত্তর্ যোহনর্ বাপ্তিষ্ম বাদে আর কনঅ বাপ্তিষ্ম কধা তে কোই ন-পাত্ত। 26তে অমকদ সাহচ্ গুরিনে সমাজ-ঘরত্ কধা কুয়ো ধুরিলো। সেক্কে প্রিষ্কিল্লা আর আকিলা আপল্লোর কধা শুনিনে তারে তারা ঘরত্ বোলেলাক্ আর গোজেন পধ পৌইদ্যেনে আরঅ গমেডালে তারে বুঝেই দিলাক্।
27যেরেদি আপল্লো যেক্কে আখায়াত্ যেবাত্তে চেলঅ সেক্কে ইফিষ বিশ্বেজি ভেইয়ুনে তারে উচ্চোমি তুলি দিলাক্। আখায়ার শিচ্চ্যগুনে যেন আপল্লোরে মানি লন্ ইয়েনত্তে ইফিষীয় ভেইয়ুনে আখায়াত্ চিধি লিগিলাক্। গোজেনর্ দোয়্যেই আখায়াত্ যিগুনে বিশ্বেজি ওইয়োন আপল্লো সিধু লুমিনে তারারে বল্ দিলো। 28যীশু যে মশীহ সিয়েন তে পবিত্র বোইবো ভিদিরেত্তুন্ প্রমাণ গুরিলো আর বেক্কুনো মুজুঙোত্ অমকদ দরমর যুক্তিলোই তর্কাতুর্কিত্ যিহূদীগুনোরে ওদেই দিলো।
Đang chọn:
প্রেরিত্ 18: CBT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Copyright © 2021 Bangladesh Bible Society
