প্রেরিত্ 11
11
পিতরে যিরূশালেমত্
1অযিহূদীগুনেয়ো যে গোজেনর্ কধা বিশ্বেজ্ গোজ্জ্যন্ সে কধাগান্ প্রচারক্কুনে আর গোদা যিহূদীয়ার্ বিশ্বেজি ভেইয়ুনে শুনিলাক্। 2ইয়েনত্যে পিতরে যেক্কে যিরূশালেমত্ এলঅ সেক্কে সেই বিশ্বেজিগুনো ভিদিরে যিগুনে সুন্নত গোজ্জ্যে এলাক্ তারা তারে দুষ্ দিইনে কলাক্, 3“তুই চুনুগুলো মাঢাবো-ন-কাপ্যে মানুচ্চুনো ঘরত্ যেইনে তারা সমারে হানা-দানা গোজ্জ্যস্।”
4সেক্কে পিতরে পৌইল্যাত্তুন্ ধুরি আরাম্ভ গুরিনে যিয়েনি যিয়েনি ঘোট্যে সিয়েনি এক্কান্ এক্কান্ গুরি বুঝেইনে কলঅ, 5মুই যাফো শঅরত্ তবনা গরঙর্, এমন্ সময়োত্ ঘুম যাত্তে ধোক্ক্যেন্ অবস্থাত্ পড়িনে এক্কান্ দর্শন পেলুং। মুই দেগিলুং দাঙর্ কাবড় ধোক্ক্যেন্ এক্কান জিনিচ্ চের্ কুণোত্ ধুরিনে আগাজত্তুন্ মইধু লামেই দিয়্যে অর্। 6মুই গমেডালে রিনি চেলুং সিয়েন ভিদিরে নানান্ বাবোত্ত্যে য়েমান্, ঝার্বো য়েমান, বুগোদি আঢি বেড়েইয়্যে প্রাণি আর পেগ্ আঘন্। 7যেরেদি মুই এক্কো রঅ শুনিলুং কেঅ যেন কত্তে, পিতর, উঠ্, মারিনে হা।
8মুই কলুং, না, না, প্রভু, কনঅ বাবদে না। অপবিত্র বা অসিজি কনঅ কিজু কনদিন্অ মুই মুয়োত্ ন-দুয়োং।
9ইয়েন পরেদি স্বর্গত্তুন্ দ্বিবার্ কুয়ো অলঅ, গোজেনে যিয়েন সিজি গোজ্জ্যে সিয়েনরে তুই অপবিত্র ন-কোচ্। 10এবাবোত্যে তিনবার্ অলঅ, সে পরেদি বেক্কানি আরঅ আগাজত্ তুলি নেযা অলঅ।
11ইয়েনর পরেদি সমারে সমারে মুই যে ঘরানত্ এলুং সে ঘরানত্ তিনজন মানুচ্ এইনে থিয়েলাক্। কৈসরিয়াত্তুন্ তারারে দিপাধা ওইয়্যে। 12সেক্কে পবিত্র আত্মাগানে মরে কনঅ সন্দেহ ন-গুরিনে তারা সমারে যেবাত্তে কলঅ। এ ছঅজন ভেইয়ো মঅ সমারে যেয়োন্। পরেদি আমি সে মানুচ্চো ঘরত্ সোমেলং যিবে মরে ডাগিনে পাধেয়্যে। 13তে এক্কো স্বর্গদূতরে কেধোক্ক্যেন্ গুরি তা ঘরত্ দেক্ক্যে সিয়েন আমারে কলঅ। সেই স্বর্গদূত্তো তারে কোইয়্যেদে, শিমোন, যিবেরে পিতর-অ কুয়ো অয়, তারে ডাগি আনিবাত্যে তুই যাফো শঅরত্ মানুচ্ পাধা। 14তে তঅ ইধু যে কধাগান্ কবঅ সেই কধাগান্দোই তুই আর তঅ পরিবারর্ বেক্ মানুচ্চুন্ পাপত্তুন্ উদ্ধোর্ পেবাক্।
15“পবিত্র আত্মাগান্ যেবাবোত্যেগুরি পত্তমে আমা উগুরে এচ্চ্যে মুই কধা কনা আরাম্ভ গরানার্ পরেদি ঠিগ্ সেবাবোত্যেগুরি তারা উগুরেয়ো এলঅ। 16সেক্কে প্রভু যিয়েনি কোইয়্যে সে কধানি মর্ মনত্ পড়িলো, ‘যোহনে পানিত্ বাপ্তিষ্ম দিদো, মাত্তর্ তমার্ বাপ্তিষ্ম অবঅ পবিত্র আত্মালোই।’ 17সালে প্রভু যীশু খ্রীষ্ট উগুরে বিশ্বেজ্ গরানার পরেদি গোজেনে আমারে যে দান দিয়্যে সেই একই দান যেক্কে তে তারারেয়ো দিলো সেক্কে মুই কন্না যে, গোজেনরে মানা গুরি পারং?”
18এ কধাগান্ শুনিনে যিহূদিয়ার বিশ্বেজিগুনে আর্ আবিত্তি ন-গুরিনে গোজেনরে বাঈনী গুরিনে কলাক্, “সালে গোজেনে অযিহূদীগুনোরেয়ো জিংকানি পেবাত্যে পাপত্তুন্ মনানি ফিরেবার সুযোগ্ দিলো।”
সিরিয়া দেজর্ আন্তিয়খিয়ার মন্ডলী
19স্তিফানরে কেন্দ্র গুরিনে বিশ্বেজিগুনো উগুরে অত্যেচারর্ কারনে যিগুনে ছিদি পোজ্জ্যন্ তারা ফৈনীকিয়া, সাইপ্রাস আর সিরিয়া দেজর্ আন্তিয়খিয়া সং যেইনে বানা যিহূদীগুনো ইধু গোজেনর্ কধা কলাক্। 20মাত্তর্ তারাত্তুন্ কয়েকজনে আন্তিয়খিয়াত্ যেইনে গ্রীক ভাষায় কধা কোইয়্যে মানুচ্চুনো ইধুয়ো প্রভু যীশু পৌইদ্যেনে গম্ হবর্ ফগদাং গরা ধুরিলাক্। ইগুনে এলাক্ সাইপ্রাস দ্বীপ আর কুরীণী শঅরর্ মানুচ্। 21গোজেনর্ খেমতা তারা উগুরে এলঅ বিলি বোউত্ মানুচ্ প্রভু উগুরে বিশ্বেজ্ গুরিনে তা ইধু ফিরিলাক্।
22এ হবরান্ যিরূশালেমর্ মন্ডলী মানুচ্চুনো কানত্ যানার্ পরেদি তারা বার্ণবারে আন্তিয়খিয়াত্ পাধেই দিলাক্। 23গোজেনে যে কেধোক্ক্যেন্ গুরি আন্তিয়খিয়া মানুচ্চুনোরে দোয়্যে গোজ্জ্যে বার্ণবা এইনে সিয়েন দেগিনে অমকদ হুজি অলঅ। তারা যেন বেক্ মনান্ দিইনে প্রভু ইধু বিশ্বেজি থান্ সেনত্তে তে তারার্ বেক্কুনোরে উচ্চোমি দিয়্যে ধুরিলো। 24বার্ণবা এক্কো গম মানুচ্ এলঅ আর তে পবিত্র আত্মালোই আর বিশ্বাজে ঠিগ্ এলঅ। সেক্কে প্রভু ভালোক্ জনরে তার্ নিজো ইধু আন্যে।
25ইয়েন পরেদি বার্ণবা শৌলরে তোগেবাত্যে তার্ষ শঅরত্ গেলঅ, 26আর তারে তোগেই পেইনে আন্তিয়খিয়াত্ আনিলো। বার্ণবা আর শৌল এক বজর্ সং মন্ডলী মানুচ্চুনো সমারে মিলিনে বোউত্ মান্জ্যরে শিক্ষ্যে দিলাক্। আন্তিয়খিয়াত্ খ্রীষ্ট শিচ্চ্যগুনোরে খ্রীষ্টান নাঙে পত্তমে ডাগা অলঅ।
27ইয়েন ভিদিরে কয়েক্কো ভাববাদী যিরূশালেমত্তুন্ আন্তিয়খিয়াত্ এলাক্। 28তারাত্তুন্ আগাব নাঙে একজনে থিয়্যেইনে পবিত্র আত্মার পরিচালনাই কলঅ, গোদা রোম রেজ্যত্ এক্কো অমকদ ভাদ রাত্ অবঅ। (সম্রাট ক্লৌদিয়র রাজাগিরির্ সময়োত্ সে কধাগান পুরেল।)
29সেক্কে শিচ্চ্যগুনে ঠিগ্ গুরিলাক্, যিহূদিয়া রেজ্যর্ বিশ্বেজি ভেইয়ুনোরে সাহায্য দিবাত্যে তারা পত্তিজনে নিজোর্ নিজোর্ সাধ্য মজিম্ টেঙা পাধেবাক্। তারা সিয়েন গোজ্জ্যন্। 30তারা বার্ণবা আর শৌল আঢত্ যিহূদিয়া মন্ডলীগুনোর বুড়ো নেতাগুনো ইধু সেই সাহায্যগানি পাধেই দিলাক্।
Đang chọn:
প্রেরিত্ 11: CBT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Copyright © 2021 Bangladesh Bible Society
