Marcos 4
4
Tijojb'al tzij chrij i ajtikanel
1I Jesús xujeq chik uk'utik utzij i Dios chila chuchi' i semelik ya. Che i ij le lik je k'i winaq xemoltajik, rumali i Jesús x-an chupam jun barco chi o chwi ya xkub'i chupam. I winaq xekanaj kan chuchi' i ya. 2Are uri i Jesús lik k'i i k'utunik xujeq uya'ik chke i winaq chila ru' jalajuj taq tijojb'al tzij.
Chupam uk'utunik le xub'ij iri chke: 3Chita pe': Jun ajtikanel x-e pa tikanik. 4Are xukirij b'i rija' o jub'i' xtzaq pa taq b'e; are uri xek'un i tz'ikin xkitij b'ik. 5Xaq o jub'i' xtzaq pa taq ab'aj, lik juntir xalax loq man xax ulew xol taq ab'aj le. 6Xwiri, are xel li ij juntir xuk'ato man naj taj qajnaq i ra', rumali xchaqijik. 7Xaq o jub'i' chik xtzaq pa taq k'ix, xwiri are xek'iy i k'ix le xuji'saj i tikon; rumali i tikon le xwachin taj. 8Xwiri o jub'i' chik xtzaq prutzil ulew. Ile lik xk'iyik xaq xuya chomiq taq uwach. O jujun ija xuya Lajuj juwinaq (30) uwach, xaq o jujun xuya oxwinaq (60) uwach xaq o jujun xuya jo'winaq (100) uwach; keje ile xub'ij i Jesús chke.
9I Jesús xub'ij chik: “Pachin o kixikin, chkita ub'e uri wach xinb'ij” Xcha.
Wach taq uchak i tijojb'al tzij chi xub'ij i Jesús
10Are xkanaj kan i Jesús utukel, ni'pa je o naqaj che junam ku' i kab'lajuj utijoxelab', xkitz'onoj che, Wach kraj ub'ixkil i tijojb'al tzij chi xulapo. 11Are uri Jesús xub'ij chke: Yix yatal chiwe rumal i Dios chi kita ub'e ni'pa i uwam uwach re rajawinik. Xwiri i winaq chi lik naj je o wi che i saq laj tzij, ru' tijojb'al tzij kb'ix ni chke. 12Man tupu lik ketzunik xwiri lik pacha taq je mawach; tupu ketanik xwiri lik pacha taq je tak. Xwiri we kkijalwachij kik'aslemal, kkuytaj uri kimak chke rumal i Dios.
I Jesús kusaqij usuk' i tijojb'al tzij chrij ajtikanel
13I Jesús xub'ij chke: ¿Xaq keje yix kita ti ub'e i tijojb'al tzij le? ¿Wach utayik ub'e uri ki'an che i jub'an chik? 14I ajtikanel ija keje pacha jun ajb'il utzij i Dios. 15Je o jujun winaq chi je keje pacha ija chi xtzaq pa b'e: Kkita utzij i Dios, xwiri juntir kk'un Itzel chrelsaxik i utz laj tzij pkik'ux chi xkita. 16Xaq je o jujun winaq chi je keje pacha ija chi xtzaq xol taq ab'aj: Lik kekikot chutayik utzij i Dios xaq kkik'am pkik'ux. 17Xwiri xnak'i ti ra' pkik'ux, rumali kkich'ij ti naj are kpe i k'ax pkiwi xaq we kpe i ch'oj chkij rumal utzij i Dios, xa kkisach ukub'ib'al kik'ux che i Dios. 18Xaq je o jujun winaq chi je keje pacha ija chi xtzaq pa taq k'ix: Kkita utzij i Dios; 19xwiri i k'achirik re i k'aslemal chi oj o wi ri, are utzukuxik i b'eyomal chi xa ket'ortaj che xaq i urayixik i jalajuj taq b'iroxik chi xa kkirayij uwach are kchupuw i utz laj utzij i Dios pkik'ux. Rumali kwachin ti utzij i Dios pkik'aslemal. 20Xwiri o jujun winaq chi je keje pacha ija chi xtzaq prutzil ulew. Man ike kkita i utz laj utzij i Dios xaq lik kkikoj ru' ronojel kik'ux. Ike le je keje pacha jujun ija chi xuya lajuj juwinaq (30) uwach, o jujun chi xuya oxwinaq (60) uwach xaq o jujun chi xuya jo'winaq (100) uwach; keje usaqixik i tijojb'al tzij ile xu'an i Jesús chke.
I tijojb'al tzij re i tzijb'al
21I Jesús xub'ij chik jun tijojb'al tzij chke i winaq: Yix are kitzij jun kantil, ¿Xatab'a kiya qaj chuxe' jun kaxa, xaq chuxe' jun ch'at? Keje ti ile ki'ano. Jun kantil rajwaxik kya' an chikaj man lik naj k-e wi utzunb'al. 22Xaq keje ile, mijun b'iroxik uwam uwach we kel ti chisaq, ronojel ni'pa uwam uwach lik ketamax na. 23Pachin o kixikin, chkita ub'e uri wach xinb'ij; xcha.
24Xaq xub'ij chke: Chikojo retalil wach i kita. Man ru' i pajb'al chi kixpajan wi yix, xaq ru' i pajb'al le kixupaj wi chik yix i Dios. Xwiri k'a kuya ne chik mas uwi chiwe. 25Man jun winaq we k'i o ru' ktz'ab'ix ni uri che; xwiri jun winaq we xa jub'i' o ru' xaq kmaj ne i jub'i' le chi o ru'; keje ile xub'ij i Jesús chke.
Tijojb'al tzij chrij ija chi kk'iyik
26I Jesús xub'ij chik jun tijojb'al tzij chke i winaq: I ajawinik re i Dios keje pacha jun ajtikanel chi kutik ija pulew. 27Ire tupu kwarik xaq we k'aslik, tupu cha'ab' xaq we pa'ij xwiri i ija le chi xutiko kpo' loq xaq kk'iyik tupu ajtikanel le reta'am taj wach taq k'iyik ku'an i tikon le. 28Utukel ulew ku'an che i tikon chi kk'iyik xaq kwachinik: Nab'e kpo' li ija xaq kk'iyik, ukab': Kpe usij, te'uri kpe uwach. 29Are lik an chik uwach i tikon le kmolik, man xuriq i ij re i molonik. Keje ile xub'ij i Jesús chke.
Tijojb'al tzij chrij ija re mostas
30I Jesús xub'ij chik chke: ¿Wach nawi k-anaw i ajawinik re i Dios, o wach nawi ru' kinjunamsaj wi? 31Kinjunamsaj ni ru' jun ija re i mostas chi ktik pulew. I ija le lik are ch'utin chwach ronojel ni'pa i jalajuj taq ija chi o chwach i jyub' ta'aj. 32Xwiri we xtikik lik juntir kk'iyik, xaq lik nim kel chkiwach i jub'an chik tikon chila pa tikonb'al. I u'ab' lik nimaq, xaq kki'an ne kisok i jalajuj taq tz'ikin chupam xaq kemujan chuxe'; keje ile xub'ij i Jesús chke.
I Jesús xu'an k'utunik ru' tijojb'al taq tzij
33Keje uk'utik utzij i Dios ile xu'an i Jesús chke i winaq, ru' k'iyal taq tijojb'al tzij, lik k'a ipa ketiki wi chutayik ub'e. 34Xwiri i Jesús nti jun k'utunik xu'an chke i winaq we ru' ti tijojb'al tzij. Xwi chke utijoxelab' kusaqij wi wach ke'el usuk' i tijojb'al tzij le.
I Jesús xu'atij i tew xaq uretum i ya
35Are xok a'ab' che i ij le, i Jesús xub'ij chke utijoxelab':
—Jo', ch'aqap che i semelik ya —xcha.
36Are uri xeki'ijla kan i winaq, xkik'am b'i Jesús ku' chupam i barco ipa ax kul wi chupam. Xaq je o jub'an chik winaq xe'e ku' chupam i jub'an chik barco. 37Are ktijin ki'enam puwi i ya, xaqte'et xpe jun nim laj jab' tew upam. I tew le lik nim man xuyak uwi i ya chikaj rumali xok i ya chupam i barco lik laj xnojik. 38Xwiri i Jesús kwar pan jub'i' chutun i barco, uya'om ujolom puwi jun pacha ch'eket. Are uri xkik'astaj xaq xkib'ij che:
—¡Tijonel! ¿B'uchak chi lik nti kach'ob' che chi yoj ktijin qamuqtajik pa ya? —Xecha.
39Are uri i Jesús xwalijik, xub'ij che i tew:
—¡Matjuk'uk' chik!
Xaq xub'ij che i ya:
—¡Chamayij elik chikaj! —Xcha.
Are uri i tew juntir xuxlanik xaq i ya xsilab' ti chik. 40Te'uri i Jesús xub'ij chke utijoxelab':
—¿B'uchak chi lik kixij iwib'? ¿Xatab'a k'amaja o ukub'ib'al ik'ux?
Keje ile xub'ij i Jesús chke utijoxelab'.
41Xwiri ike lik je oknaq il rumal kixib'rikil, are uri xkitz'onoj chkiwach:
—¿B'i taq chi winaqil ire le chi lik kkojon i tew che xaq keje i ya?
Xecha chkiwach.
Đang chọn:
Marcos 4: ACHICUB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Biblia Achí de Cubulco, Derechos reservados de Sociedad Bíblica de Guatemala
