Marcos 2
2
I Jesús xukunaj jun achi chi sikirnaq uch'akul
1Are ik'awnaq chik keb' oxib' ij, i Jesús xtzalij chub'i pa tinimit Capernaum. Are x-etamaxik chi o i Jesús ru' ja, 2juntir xemoltaj k'iyal winaq, lik ke'ok ti chik xolchija; are uri i Jesús xok chub'ixkil utzij i Dios chke. 3Xaqte'et xeupon kajib' achiyab' kok'am b'i jun achi chwa ch'at chi sikirnaq uch'akul. 4Xwiri xe'ok ti chub'i ru' i Jesús pa ja kumal uk'iyal winaq chi je o chila ru'. Rumali xe'el b'i puwi i ja xaq xki'an jun tel puwi i ja le, ipa o wi i Jesús; te'uri xkiqajsaj b'i iwab' chwach i Jesús. 5I Jesús are xrilo chi lik kikub'am kik'ux che, xub'ij che iwab':
—Wak'al, ronojel ni'pa amak kkuytaj ni chawe.
6Xwiri o jujun chke i tijonelab' re ujer atb'al tzij je kul chila. Ike xe'ok chuch'ob'ik pkik'ux: 7“¿B'uchak chi keje ile kub'ij i achi le? I tzij chi xub'ij le utz ti laj taq tzij kuta i Dios, man xwi i Dios o pu'ab' kukuy kimak i winaq”; xecha. 8Xwiri i Jesús juntir xunab'ej wach ketijin i winaq chuch'ob'ik, rumali xutz'onoj chke:
—¿B'uchak chi keje ile kich'ob'o? 9¿Pachike lik k'ax ti ub'ixkil che i sikirnaq uch'akul: “I amak kkuytaj ni chawe”, o are: “Chatwalijoq, chayaka b'i ach'at xaq chatb'inoq”? 10Xwiri Yin chi Xinalaxoq chwach Ulew pacha Winaq, kink'ut ni chiwe chi o ronojel atb'al tzij pin-ab' re kinkuyb'ej kimak i winaq chwach ronojel i jyub' ta'aj?
Are uri xub'ij che i sikirnaq uch'akul:
11—Chatwalijoq, chayaka b'i ach'at, jat chi awachoch.
12Are uri i sikirnaq uch'akul juntir xwalij anoq, xuyak uch'at, xel chila chkiwach konojel i winaq chi je o pa ja. Rumali konojel i winaq lik xkib'isoj xaq lik xe'ok il che wach xkilo, are uri xkikoj u'ij i Dios xaq xkib'ij:
—Lik qilom ti ile —xecha.
I Jesús kusik'ij i ma Leví
13Te'uri x-e chik i Jesús chuchi' i semelik ya; i winaq lik je k'i xemoltaj chik chila ru', are uri i Jesús xuk'ut utzij i Dios chke. 14Are ktijin che i b'e xril jun achi chi ma Leví ub'i, uk'ojol ma Alfeo. I ma Leví le kul chila puk'ijib'al ipa kutz'onoj wi alkawal re i atb'al tzij re i tinimit Roma. Are uri i Jesús xub'ij che:
—Chatterej chwij.
Are uri ma Leví juntir xwalijik xaq xterej b'i chrij.
15Xuk'ulmaj are ktijin i Jesús chwa'im junam ku' utijoxelab' prachoch ma Leví xaq i jub'an chik ajtz'onol alkawal re i tinimit Roma xaq i jub'an chik winaq chi utz ti kik'aslemal, konojel ike le je kul chi mexa. Lik je k'i i winaq je teren chrij i Jesús. 16O jujun chke i tijonelab' re ujer atb'al tzij chi aj fariseo#2.16 I aj fariseo je are jutzob'aj aj Judío chi lik are kkaj ike chi are k-anik pacha kub'ij u'atb'al tzij i ma Moisés.; are xkilo chi i Jesús kutij uwa ku' konojel i winaq le, are uri xkitz'onoj chke utijoxelab', xkib'ij:
—¿B'uchak itijonel yix le chi kutij uwa ku' ajtz'onol alkawal xaq ku' ajmakib' laj taq winaq? —Xecha.
17I Jesús are xuta wach kkib'ij, xub'ij chke:
—I winaq chi je iwab' kajwax jun ajkun chke, xwiri i winaq chi utz kiwach nti uchak uri jun ajkun chke. Yin in k'unnaq ti chkitzukuxik i utz laj taq winaq; yin in k'unnaq chkitzukuxik i ajmakib' laj taq winaq
Keje ile xub'ij i Jesús chke.
Tz'onb'enik che i Jesús chrij umayixik wa'im re lapanik ru' i Dios
18O julaj i je utijoxelab' ma Wan, Ajqajsanel Ya, xaq i aj fariseo, kimayim tan kiwa'im man kiya'om kib' che i lapanik ru' i Dios. O jujun chke i winaq xe'e ru' i Jesús, xkitz'onoj che:
—¿B'uchak chi atijoxelab' yet kimayim ti kiwa'im rumal i lapanik ru' i Dios pacha kki'an utijoxelab' ma Wan, xaq i aj fariseo? —Xecha.
19Are uri i Jesús xub'ij chke:
—¿Xatab'a kkimayij kiwa'im i winaq chi je sik'tal che jun k'ulankil, we k'a o i achi chila ku' chi xk'uli'ik? Man we k'a o i achi ku' kumaj taj we kkitij ti wa ru'. 20Xwiri kuriq ni ij chi kk'am b'i achi le chi xk'uli'ik, are kuriqa i ij le are uri kkimayij ni kiwa'im rumal i lapanik ru' i Dios —keje ile xub'ij i Jesús chke.
21Mijun kuk'ojoj jun u'u' el ru' jun k'ojb'al k'ak', man i k'ojb'al k'ak' le ktzajik xaq kuraqch'ij b'i k'ul el xane lik kunimarsaj b'i uri i raqch'ijnaq. 22Xaq mijun kukoj uwa'al uva chi k'a te muqb'am chupam jun surum el. Man i uwa'al uva chi k'a te muqb'am kuraqch'ij b'i surum, lik ku'an utz ti che uwa'al uva muqb'am xaq keje i surum. Rumali lik rajwaxik chi kk'ol uwa'al uva k'a te muqb'am chupam jun surum k'ak'; keje ile xub'ij i Jesús chke.
Utijoxelab' i Jesús kkich'up i trigo che i ij sábado
23Xuk'ulmaj che jun ij sábado i Jesús kemalkat junam ku' utijoxelab' chupam jub'an tikon, are uri i utijoxelab' le xe'ok chuch'upik i trigo pkik'awb'al. 24I aj fariseo xkib'ij che i Jesús:
—¡Chata pe'! ¿B'uchak atijoxelab' chi kkich'up i trigo che i iji sábado, aweta'am ti b'awa chi utz ti ch'upunik che i iji? —Xecha.
25Xwiri i Jesús xub'ij chke: —¿Xatab'a iwajlam ti uwach i wuj wach xu'an mam David ujer junam ku' i rachi'il are xpe kinumik? 26I ma David le xok prachoch i Dios xaq xutij i wa re trigo chi jachtal pu'ab' i Dios chi xwi i rajpatan i Dios yatal chke chi kkitijo, xwiri ire xaq xuya ke i rachi'il chi je enaq ru'. Are xuk'ulmaj ile, are i mam Abiatar chi atz laj rajpatan i Dios.
27I Jesús xaq xub'ij chik:
—I ij sábado ke i winaq xyijb'axik, rumali are ti i ij sábado o pkiwi i winaq. 28Rumali Yin chi Xinalaxoq chwach Ulew pacha Winaq, lik kin-ajawin puwi i ij sábado —keje ile xub'ij i Jesús chke.
Đang chọn:
Marcos 2: ACHICUB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Biblia Achí de Cubulco, Derechos reservados de Sociedad Bíblica de Guatemala
