Marcos 11
11
I Jesús kok pa tinimit Jerusalén
1Are naqaj chik je o wi che i tinimit Jerusalén; xaq are je o chik chila che i keb' komon Betfagé xaq i Betania, chi je o chwach i jyub' Olivos, are uri i Jesús xeutaq b'i keb' chke utijoxelab'. 2Xub'ij chke:
—Jix che i komon chi o chqawach, are kixok b'ik kiriq ni jun b'uru yuqul chila, i b'uru le mijun winaq annaq chrij. Chitoro xaq chik'ama li chwe. 3We o jun winaq ktz'onow chiwe b'uchak chi kik'am b'ik, chib'ij che chi kuriq uchak che i Ajwal, xwiri juntir kutzalijsaj chaloq, chixchoq che.
Keje ile xub'ij i Jesús chke.
4Are uri xe'e chu'anik pacha xb'ix chke rumal i Jesús, are xekiriqa i b'uru le yuqul pa b'e chwach jun ja, are uri xkitor loq.
5Je o jujun winaq chila xkitz'onoj chke:
—¿Wach kixtijin yix chu'anik? ¿B'uchak kitor b'i b'uru le? —Xecha.
6Are uri i tijoxelab' le xkib'ij pacha ub'im b'i Jesús chke; te'uri xya' li b'uru chke. 7I tijoxelab' le, xkik'am b'i b'uru ru' i Jesús; are uri xkilik' ki'u' chrij; te'uri i Jesús x-an b'i chrij i b'uru. 8Je k'i i winaq xkilik' ki'u' pa b'e re wiqb'al re, xaq o jub'an chik xkiwiq i b'e ru' u'ab' taq che' chi kik'atzim li pa taq es. 9Konojel i winaq chi je nab'e chwach i Jesús, xaq konojel ni'pa je teren b'i chrij; kesik'in chub'ixkil i tziji:
—¡Nim u'ij! ¡Lik nim u'ij i taqtal li rumal i Dios! —Xecha. 10“¡Lik k'amori che i Dios man kjeqan i utz laj ajawinik chi are i ajawinik re i qamam mam David! ¡K'amori, lik choksax u'ij i Dios!”
11I Jesús xok pa Jerusalén, suk'ulik x-e prachoch i Dios, xtaqen k'ulala, te'uri juntir x-e pa Betania junam ku' i kab'lajuj utijoxelab' man ya xqaj ij.
I Jesús xuk'oqoj uche'lal higo chi nti uwach
12Chukab' ij, are xe'el chali chila pa Betania, i Jesús xpe unumik. 13Chinaj xril pan jun uche'lal higo chi lik rax uxaq, rumali x-e chutaqexik we o uwach, xwiri nti uwach xwi uxaq olik, man are ti u'ijlal chi kwachinik. 14Are uri i Jesús xub'ij che uche'lal higo:
—¡Lik k-e ij saq chawij chi mijun winaq kk'un taq chutijawik jun echa' chawe!
I utijoxelab' to' xkita wach xub'ij.
I Jesús xeresaj b'i ajk'ay prachoch i Dios
15Are xeupon pa Jerusalén i Jesús xok prachoch i Dios, are uri xok li chkelsaxik konojel ni'pa je ajk'ayinel xaq i je ajlo'onel. Are uri xupiskilij b'i kimexa i kejalwachiw uwach i pwaq, xaq keje xu'an che kitem i je ajk'ay palomax. 16Xaq xuya ti chik chke i winaq chi keik'aw prachoch i Dios ru' jalajuj taq b'iroxik. 17Te'uri xok chuk'utik chke i winaq; xub'ij:
—Chupam uwuj i Dios tz'ib'tal kan keje iri: I wachoch lik k-etamax na chi are jun ja chi kojb'al u'ij i Dios ke konojel i winaq re jalajuj taq tinimit re uwach i jyub' ta'aj, xwiri yix i'anom kijul ili'omab' che —keje ile xub'ij i Jesús chke.
18Are xkita i kaj-atzil i rajpatan i Dios xaq i tijonelab' re i atb'al tzij, wach xub'ij i Jesús, are uri xe'ok chutzukuxik wach ukamsaxik kki'ano, man lik kkixij kib' che, man konojel i winaq xkib'isoj wach i k'utunik ktijin chu'ankil. 19Xwiri are xok a'ab' i Jesús junam ku' utijoxelab' xe'el chila pa tinimit.
I uche'lal higo xchaqijik
20Are xsaqir chukab' ij, xeik'aw chila chunaqaj uche'lal higo, are uri xkilo chi lik chaqijnaq chik ronojel xaq i ra'. 21Are uri ma Pedro xk'un chuk'ux wach i tzij xub'ij kan i Jesús che i che' le, rumali xub'ij che i Jesús:
—Tijonel, chawila pe i che' le chi xak'oqoj kanoq, xchaqijik.
22I Jesús xula' uwach:
—Chikub'a ik'ux che i Dios. 23Lik saq laj tzij kinb'ij chiwe, jun we kub'ij che i jyub' le: Chatel chila, chak'aqa b'i awib' pa mar; we lik keb' ti uk'ux chub'ixkil, xaq we lik kukojo chi k-antaj na wach i kub'ij, lik keje ni uri ile k-antajik. 24Rumali kinb'ij chiwe: Ronojel ni'pa kitz'onoj yix che i Dios, we kikojo chi lik kya'taj ni chiwe, lik keje ni uri ile kuk'ulmaj. 25Are kixtijin che i lapanik ru' i Dios, we o jun maktajnaq chiwach, chikuyu uri umak che, man keje ile i Ta chikaj xaq kukuy ni imak yix. 26Man yix we kikuy ti kimak i jub'an, xaq i Ta chikaj kukuy ti uri imak yix —keje ile xub'ij i Jesús chke.#11.26 I versículo ri kriqtaj ti chupam konojel i wuj chi o utzij i Dios chupam.
I atb'al tzij chi o pu'ab' i Jesús
27Chrijil chik ronojel ile i Jesús xaq i utijoxelab' xe'e chik pa Jerusalén. Tz'aqat are kb'in i Jesús prachoch i Dios, are uri xetejeb' pan i kaj-atzil i rajpatan i Dios ru' xaq i tijonelab' re i atb'al tzij, xaq i je unimaqil i tinimit. 28Are uri xkitz'onoj che i Jesús:
—¿B'i chi atb'al tzijal o pa'ab' chu'anik ile? ¿Pachin xyaw pa'ab' chi ka'an ile? —Keje ile xkib'ij che i Jesús.
29I Jesús xub'ij chke:
—Yin xaq kin-an jun tz'onb'enik chiwe; yix we kila' uwach chwe, xaq yin kinb'ij uri chiwe b'i chi atb'al tzijal o pin-ab'. 30Chib'ij chwe ¿Pachin xtaqaw li ma Wan chuqajsaxik ya pkiwi i winaq? ¿Are i Dios xtaqaw loq? ¿O xa winaq xtaqaw loq? Chib'ij pe chwe —keje ile xub'ij i Jesús chke.
31Ike xe'ok chuchapik kib' chitzij chkiwach; xkib'ij: We kqab'ij che chi are Dios taqawnaq loq, ire kub'ij ni uri chqe: “¿B'uchak uri xikoj taj?” 32“¿Xatab'a kqab'ij che chi je are i winaq je taqawnaq loq?” Keje ile xkib'ij man lik kkixij kib' chke i winaq; man konojel i winaq kikojom chi ma Wan lik profeta. 33Rumali, xkib'ij che i Jesús:
—Qeta'am taj.
Are uri i Jesús xub'ij chke:
—Xaq keje yin uri kinb'ij ti chiwe b'i chi atb'al tzijal o pin-ab' chu'anik iri —xcha.
Đang chọn:
Marcos 11: ACHICUB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Biblia Achí de Cubulco, Derechos reservados de Sociedad Bíblica de Guatemala
