ሮሜ 2
2
ጾ̈ሳ̇̈ ፊርዳ
1ዪ̈ኮታ̇ቦ ሜላ ኣሳ ጋልዳ ፊርዲዛ̈ዶ! ኔ̈ናር ማቂ̇ን “ታ̈ኒ ኣባክ ኢ̈ሲ̇ኖ ባዚ ባዬ̇” ጋ̈ንዳብ ዳንዳኣባሴ። ኣባ ጌይን ኔ ሜል ኣሳ ጋልዳ ፊርዳሙታ̇ዶራ ባዝ ኢዞ ኔ ኔ ቆ̇ሚ̇ንዳር ኦ̈ርኮ ኔ̈ኒ ኔ ጋልዳ ፊርዳ̈ሬ። 2ዪኖ̇ ኦ̈ዝ ኣሳን ጋልዳ ጾ̈ሲ ኪን ፊርዲን ኢንታ̇ ጋልዳ ፊርዳዚን ኑ ኤሪ̈ሬ። 3ኣ̈ኖ! ዪ̈ፌን ኦ̈ዝ ኣሳን ጋልዳ ኔ̈ኒ ፊርዳሙታ̇ ማ ኢንቲ̇ ኦ̈ዝ ባዛን ኔ̈ናር ኦጌዪን ጾ̈ሳ̇ ፊርዳ ጋልዳፖ̇ ኔ ቡቲ̇ዛ ኔ̈ብ ማይጺ̈ራ? 4ዎይ ጾ̈ሲ ኔ̈ብ ኮሺቲ ዎይሊሲኖንዳ ኔ̈ኒ ማ̈ሪቲ ጌላምፔ̈ን ማ̈ቂ̇ኖን ኤራካ̇ይዶራ ጾ̈ሳ̇ ኮሺ̇ቲንዶ፥ ኢ ዎይ ባዝ ዳንዳኣዚንዶ፥ ዎይሊን ኢ ጋርዣዝ ጋርዢን ኔ ሌቃ̇̈ርቤ? 5ዪዚ ኔ ማ̈ሪ̇ቲ ጌላካ̇ዮንኮታ̇ብኬ ኣሳባር ጋ̈ሲንቲዝ ኣስ ማ̈ቂ̇ኖኮታ̇ቦ ጾ̈ሳ̇ ጎይላ̈ዲኬ ኪን ማ̈ቂ̇ኖ ኢ ፊርዳ ዬይዝ ቃ̈ሚ̇ን ኔ ኔ ጋልዳ ፊርዲን ዴ̈ጻ̇ምፔ̈ን ዎታ̈ሬ። 6ጾ̈ሲ ዎይ ኣሳቦ ኣሳ ኦ̈ሲንዲፌ̈ን ኢሚ̇̈ሬ። 7ኮሽ̇ ኦሳ̇ ሚ̈ጛር ኦ̈ሙታ̇ ቦንችኬ ዪባ̈ሶ ሼምፓ ዲጛንዳቦ ኮዪዛንቦ ጾ̈ሳ̇̇̈ዲ ሜናብ ሼምፓባር ዶኢ ኢሚ̇̈ሬ። 8ፌ̈ና ሙታ̇ ማ̈ዲ̇ዝ ባዝ ኮዪዛን፣ ኪን ባዛብ ኪቲ̇ንቲባ̈ሶንኬ ዉጫ ባዝ ኦ̈ንዳብ ዎልኣ ዞሪንቲ̇ዝ ኣሳን ጾ̈ሳ̇̈ዲ ዎይሊን ጎይሊ̈ሬ። 9ኦ̈ናካር ማ̈ቂ̇ን ኢ̈ት ኦ̈ዝ ኣሳ ጋልዳ ቲ̈ኒታር ኣይሁዳን ጋልዳ ኢናፖ̇ ኣይሁድ ባዮ̇ ኣሳን ጋልዳ ሜታኬ ዋያ ማ̈ቂ̇̈ሬ። 10ዎቲናካሬ ኮሽ̇ ባዝ ኦ̈ዝ ኣሳን ዎይ ኣይሁዳር ማ̈ቆ̇ ኣይሁድ ባዮ̇ ኣሳር ማ̈ቂ̇ን ኢንታ̇ብ ጾ̈ሳ̇̇̈ዲ ቦንችኬ ሳሪቲ ኢሚ̇̈ሬ። 11ጾ̈ሲ ኣስ ጌይዛ ዎይ ዎልፌ̈ን ቤቂ̇̈ርዶኬ ኣሳ ኣ̈ፋብ ዬ̈ልቂ̇ ኤሪባ̈ሴ።
12ሂጋ̇ ኢንታ̇ብ ባይዶን ናጋራ ኦ̈ኖን ዎይ ሂጋ̇ ባይዶን ሜናብ ጾ̈ሳ̇̇ ጋልዳፖ ፋጊንቲ̇ ኣቲ̇̈ሬ። ሂጋ̇ ኢንታ̇ብ ዎዶን ናጋራ ኦ̈ኖን ዎይ ሂጊ̇ንባራ ኢንታ̇ ጋልዳ ፊርዲንቲ̇̈ሬ። 13ጾ̈ሳ̇ ቲ̈ን ጺላ̇ ማ̈ቂ̇ዛን ሂጊ̇ን ሲስካ̇ሪ ኦ̈ሳ ጋልዳ ፌ̈ሺ̇ዛንዶኬ ሂጊ̇ን ሲስካ̇ሪ ኦ̈ሳ ጋልዳ ፌ̈ሺባሶን ጊዳካ̇ዬ። 14ሂጊ̇ ኢንታ̇ብ ባዮ̇ ኣይሁድ ባዮ̇ ኣሳን ኢንታ ቡ̈ዲ ኢንታ̇ ዞሪን ሂጊ̇ን ኪታ̇ዝ ባዚን ኦ̈ ፎታምባ̇ራ፥ ሂጎ̇ ኢንታ̇ብ ባይካሬ ኢንታ ቡ̈ዲን ጋርታ̇ ዎ ሂጊ̇ንባራ ኢንቲ̇ ፌ ኦ̈ንዳብ ኮሺ̇ዝ ባዚን ኣብዝኮ ኤሪ̈ሬ። 15ዪና̇ ኢንቲ̇ ዎታዚንዳ ሂጋ̇ ኪታ̇ዝ ባዚን ዎይ ኢንታ̇ ቡዲን ጋርታ ጻ̈ፊንቲ̇ኖን ቤይሳ̈ሬ፤ ማ ኢንታ̇ ዎዚኒንዳር ዪኖ̇ ኤራ̈ሬ። ፔታ̇̈ብ ፔታ̈̇ቦ ኢንታ̇ ቡዲን ኢንታ̇ኮ “ኔ ዓኖ̇ ኣባብ ዎቲዬ?” ጋ̈ሬ፤ ማ ፔታ̇̈ብ ፔታ̇̈ቦ “ባዝ ዓኖ̇ ኔ ኮሽ ዎቲኔ!” ጋ̈ሬ። 16ዪና̇ ማ̈ቃ̇ዚንዳ ታ̈ኒ ሶ̈ላዝ ዎጛላ ቃ̈ሊንዲፌ̈ኒ ኣሳን ኦ̈ኖ ሜላ ኣቲ̇ን ጌማ ባዛን ጋልዳ ጾ̈ሳ̇̇̈ዲ ዬሱ̈ስ ክርስቶ̈ሳ ጎይባራ ፊርዳዝ ቃሚ̇ንባራ።
ኣይሁዳንኬ ኢንታ̇ ሂጊ̇ንዲክ
17ዪዚ ኔ ኔ̈ና “ታ̈ኒ ኣይሁድ ዜር” ጋ̈ርኮ፤ ሂጊ̇ን ጋልዳ ኣጚታ̈ራ “ታ̈ኒ ጾ̈ሳ̇̇ ኣሴ” ጌያ ኬርፋ̈ርኮ፤ 18“ታ̈ኒ ጾ̈ሳ̇ ኮያዝ ባዚን ኤራ̈ሬ፤ ሂጊ̇ን ታማ̈ሪኖኮታ̇ቦ ኮሽ ባዝ ኦ̈ዚን ኤራ̈ሬ፤ 19ኣ̈ፊ ዎባ̇ን ቲ̈ኒዛ ታ̈ና፤ ም ጋርታ̇ ዎንቦ ፎኢን ታ̈ና፤ 20ታማ̈ራካዮን ኤርሳ̈ሬ፤ ኤራ ጉ̈ጺ̇ኖን ታማርሳ̈ሬ፤ ሂጋ̇ ጎይባራ ታ̈ቦ ጊዲዝ ኪንቲ ኤራ ታ̈ብ ዎ” ጋ̈ርኮ፥ 21ዪዚ ኔ̈ኒ ሜላን ታማ̈ርሲዛ̈ዶ፤ ኔ ኔ̈ና ኣባብ ታማ̈ርሳ̇ባሳ? ኔ ኣሳኮ ዉ̈ቃፒ̇ቴ ጌይዝ ና̈ሳ̈ዲ ኔ ቆሚ̇ን ዉቃ̇̈ራ? 22ኦሎ̇ላ ጋዳፒ̇ቴ ጋ̈ርዶራ፤ ኔ ቆሚ̇ን ኦሎላ ጋዳ̇̈ራ? ኔ̈ኒ ኤ̈ቃ ኢጻ̇ርዶራ፤ ኢንታ̇ ዛባ̇ን ቡራ̈ራ? 23ኔ ጾ̈ሳ̇ ሂጋ̇ባር ኬርፊዝ ና̈ሳ̈ዲ ሂጊ̇ን ላ̈ላ̇ ጾ̈ሳ̇ ሌቃ̇̈ራ? 24ዪዳሬ “ዪንቲ̇ ኣይሁዳን ጊሽ̇ ጾ̈ሳ̇ ሱ̈ም ኣይሁድ ባዮ̇ ኣሳን ቲ̈ን ቆ̈ንቲ̈̇ሬ” ጋ̈ሪ ጻ̈ፊንቲ̇ኖንዲፌ̈ኒዬ።
25ጋራ̇ዚንታዚን ኔ̈ና ማ̈ዳ̇ዚንዳ ኔ̈ኒ ሂጊ̇ን ናጋ̇ ፎቴጌይንዶ፤ ሂጊ̇ን ናጋ̇ ፎታ̇ባስኮ ኔ ጋራ̇ዚንቲ̇ኖንዳ ጋራ̇ዚንታካ̇ዮዲፌ̈ን ፋይዲንታ̈ሬ። 26ጋራዚንታካ̇ዮ ኣይሁድ ባዮ̇ ኣሳን ሂጊ̇ን ኪታ̇ዚን ፎቲ̇ርኮ ኢንቲ̇ ጋራ̇ዚንታ̇ካ̇ዮንዳ ጋራ̇ዚንቲ̇ኖ̈ዲፌ̈ን ፋይዲንቲ̇̈ሬ። 27ኔ̈ቦ ጻፊንቲ̇ኖ ሂጋ̇ር ዶኢን፥ ማ ዪ ጋልዳ ጋራ̇ዚንቲ̇ኖ ኣስዶ̈ራ ሂጊ̇ን ላ̈ላ̇ርኮ ጋራ̇ዚንታ̇ካይዶሪ ሂጊ̇ን ና̈ጊ̇ዛ ኣይሁድ ባዮ̇ ኣሳን ኔ ጋልዳ ፊርዲ̈ሬ። 28ዪዚ ሱ̈ምባር ሙታ̇ ኣይሁድ ማ̈ቂ̇ኖ ኣሲ ኪን ኣይሁድ ዜር ጊዳካ̇ዬ፤ ዪና ኢዝፌን ኣሳብ ቤንታ̇ዚን ሙታ̇ ጋራ̇ዚንቲ̇ዛ̈ዲ ኪን ጋራዚንቲ ጊዳካ̇ዬ። 29ኪንባር ኣይሁድ ጌይንቲዛን፥ ጾ̈ሳ̇̈̇ ሂጋ ና̈ጊ ፎቲዛን። ኪን ጋራዚንቲ ጋ̈ዚንዳ፥ ሂጊ̇ን ጋልዳ “ጋራ̇ዚንታ̇ቤ” ጌይኖንዲፌ̈ኒ ኣሳብ ቤንታ̇ዝ ጋሊ̇ን ጋራ̇ዛዚን ጊዳካ̇ይዶ̈ን ጾ̈ሳ̇̇ ኣያና̇ባራ ቡ̈ዳ ኦ̈ሂንታ̇ዚንዶ። ዪኒ̇ፌ̈ኒ ኢ ቡ̈ዲን ኦ̈ሂንቲ̇ኖ ና̈ሳ̈ ኣንጃ ኤኪ̇ዛ̈ዲ ጾ̈ሳ̇ ጋልዳፖ̇ዶኬ ኣሳ ጋልዳፖ̇ ጊዳካ̇ዬ።
Đang chọn:
ሮሜ 2: ኦጫ̈ቃማ
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập