ማ̈ርቆ̈ሳ 7

ዬሱ̈ሲ ባ̈ቢንታ̇ን ኬሲ̇ኖ ዎጋ ኢጺ̇ዴ

ማ̈ቶ̈ሳ 15፡1-20

1ዪኒ̇ፖ ዓኒ ፋራሳ̈ዋ̈ንኬ ዬሩሳ̈ላማፖ̇ ዬይኖ ፔቲ̇ ፔቲ̇ ሙ̈ሳ ሂጋ̇ ታማ̈ርሲዛን ዬሱ̈ሳ ቡጊዲምባ̇ር ሺ̈ቂዴ። 2ኢንታ̇ሬ ዬሱ̈ሳ ታማ̈ራን ጋርታ̇ፖ̇ ፔታ̇ን ፔታ̇ናን ፌ ኩሽ ሜ̈ጫካ̇ይዶ̈ር ፊ̈ሺ ሞ̈ምባር ቤቂ̇ዴ። 3ፋራሳ̈ዋንኬ ኣይሁዳን ዎይ ሚኖ ፌ ባ̈ባ ዎጋ ና̈ጋንዳቦ ጋ̈ሪ ዎጊን ኢንታ ኪ̈ታዚንዲፌ̈ኒ ፌ ኩሽ ኮሺንቺ̇ ሜ̈ጫካ̇ይዶር ሞ̈ባሴ። 4ጋቢፖ̇ ዬ̈ራር ሜ̈ጪንቲ ፌ̈ና ጌ̈ሻካ̇ይዶ̈ር ሞ̈ባሴ። ፌ ባ̈ቢንታንፖ̇ ኤኪ̇ኖ ሜላ ዎይሊን ዎጋ ኢንታብ ዎ። ዪንሬ ዋ̈ንጫ፣ ኦቲ̇፣ ጋባታ፣ ኣርሳ ዪን ፌ̈ኖ ባዝ ዎይ ሜ̈ጪ̇ዛ̈ዳ።

5ፋራሳ̈ዋንኬ ሙ̈ሳ ሂጋ̇ ታማ̈ርሲዛን ዬሱ̈ሳኮ “ኔ ታማ̈ራን ባ̈ቢንታን ዎጊን ኢ̈ሳ̇ር ፌ ኩሽ ሜ̈ጪንታካ̇ይዶር ኣባብ ፊ̈ሺ ሙይራ?” ዪዝ ጋ̈ር ኦይጪ̇ዴ።

6ኢያሬ ኢንታኮ “ዪንታ̇ቦ፥ ኣሳ ቲ̈ን ጺላ̇ ማይጻር ቤንታ̇ንዳብ ኮዪዛንቦ፥ ናባ ኢሳ̈ሲ ካ̈ዪ̈ርዶሪ፥

‘ዎርዣ ዓ̈ዲ ፌ ኖ̈ናባር ሙታ̇ ታ̈ና ቦንቺ̇̈ርዶኬ ኪን ቡ̈ዳባር ታ̈ና ካባ̈ሴ። 7ኢንቲ̇ ታማ̈ርሲዛዳ̈ሬ ኣሲ ኬሲ̇ኖ ዎጋ ሙታ̇፥ ቴ ቲ̈ን ጎሽታ̇ዚንዳሬ ሜላ̇’ ዪዝ ጌይኖንዳ ኪን። 8ዪንቲ̇ ጾ̈ሳ̇̇ ኪ̈ታ ኣሻ̇ሪ ኣሲ ኬሲ̇ኖ ዎጋ ሙታ̇ ሚ̈ን ኤ̈̇̈ሬ” ጌይዴ።

9ኢናፖ ኢንታ̇ኮ “ዪንቲ̇ ዪንቲ̇ ኬሲ̇ኖ ዎጋ ና̈ጋንዳብ ኮያሪ ጾ̈ሳ̇̇ ኪ̈ቲን ጋስ ኣ̈ዝ ጎይ ኬሲ̇ኔ። 10ሙ̈ሳ ጌይርዶሪ ‘ኔ ባ̈ባኬ ኔ ኢንዲክ ቦንቻ̇ቤ፤ ፌ ባ̈ባኬ ፌ ኢንዲክ ቆ̈ዝ ኣሲ ዓይቆ̇ ጋ̈ቤ’ ጌይንዶ̈ን፥ 11ዪንቲ ጌይርዶ̈ሪ “ፔቲ̇ ኣሲ ፌ ኢንዲ̇ንዲኬ ፌ ባ̈ባ̈ዲክ ማ̈ዳ̇ዚን ኣሻ̇ሪ ‘ታ̈ኒ ታ ባ̈ባ̈ብኬ ቴ ኢንዲ̇ብ ኢማ̇ዝ ባዚን ጾ̈ሳ̇̇̈ብ ዣ̈ርሽ ኢሚ̇ኔ’ ጌ̈ዬ̈ጌይን፥ 12ዪንቲ ና̈ሳ ዪ ዎሃቦ ፌ ባ̈ባኬ ፌ ኢንዲ̇ክ ማ̈ዳካ̇ይፌ̈ን ኢያ ካዪ̈ሬ። 13ዪንዲ̇ስቲ̇ ሙታ̇ዶ̈ሪ ዪንታ̇ ዎጋ ናኣናኣብ ኣ̈ ሙታ̇ ጾ̈ሳ̇̇ ቃ̈ላ ጋስ ኣሺ̇̈ሬ። ሜላር ዪን ዪን ፌ̈ኖ ዎይሊን ባዝ ዪንቲ ኦ̈̈ሬ” ጌይዴ።

14ማ̈ቃ̇ር ዬሱ̈ሲ ዎርዣ ፌ̈ክ ጼይጋሪ “ዪንቲ̇ ዎይ ቴ ጋ̈ዚን ኮሺንቻ̇ር ሲስኪ̇ብቴ። 15ኣስ ቄዛ̈ዲ ኣስ ቡ̈ዳ ጋርታ̇ፖ ኬስኪ̇ዝ ኢ̈ታ ባዝዶኬ፥ ኣሳ ጋርታ̇ ቶ̈ራ ጌሊዝ ባዝ ጊዳካ̇ዬ። [16ሲስኪ̇ዝ ዋይ ዎ ኣሲ ዓኖ̇ ሲስኮ ጋ̈ቤ”] ጌይዴ።

17ዬሱ̈ሲ ዎርዣ ኣሻ̇ር ኬ̈ ጌሊኖፖ̇ ዓኒ ኢ ታማ̈ራን ኢ ሶ̈ሊኖን ሚሳ̈ሊንኮን ቢርሺቺ̇ን ኢያ ኦይጪ̇ዴ። 18ኢያሬ ኢንታክ ጋ̈ሪ “ማ ዪንታ̇ባር ሶ̈ሊን ጌላባሳ? ኣሳ ጋርታ̇ ዓኒ ጌላሪ ኣስ ቄዝ ባዝ ኣባካር ባዮ̇ን ዪንቲ̇ ኤሪባ̈ሳ? 19ኣባ ጌዬጌ̈ይንዶ ዓኒ ጌሊዝ ባዚ ኣስ ሚላ̇ ጋርታ̇ ጌላር ዛ̈ና ኬስኪ̇ርዶኬ ቡ̈ዳ ጋርታ̇ ጌሊባ̈ሴ” ጌይዴ። ኢ ዪኖ̇ ጌይኖንዳ ሙይዝ ባዝ ዎይ ኮሽ ማ̈ቂ̇ኖን ኤሪሳንዳ̇ቦ።

20ማ̈ቃ̇ር ዬሱ̈ሲ ኢንታኮ “ኣሳ ቡ̈ዳ ጋርታፖ̇ ኬስኪዝ ኢ̈ታ ባዚ ኣስ ቄ̈ሬ። 21ዪንሬ፥ ኢ̈ታ ቆፊ፣ ኦሎላ፣ ዉሲ̇፣ ኣስ ዎ፣ 22ኣሳ ማጫ̇ባር ሱርሲ፣ ዎይ ባዝ ታ̈ብ ማ̈ቆ ጌንቲ፣ ኢ̈ቲቲ፣ ኣስ ዳሺቺ̇፣ ዲርጊሲ፣ ኣሳብ ኢ̈ታ ባዝ ቆፊ፣ ቆ̈ሳ፣ ኦቲራ፣ ቦ̈ዚቲ 23ዪን ፌ̈ኖ ኢ̈ት ባዛን ኣሳ ጋርታፖ ኬስካ̇ሪ ኣስ ቄሬ።

ፔቲ̇ ሚ̈ን ኣማ̇ና ዎ ኣይሁድ ዜር ማ̈ቃካ̇ዮ ኣሲንዶ

ማ̈ቶ̈ሳ 15፡21-28

24ዬሱ̈ሲ ኢናፖ̇ ዲንዳሪ ጢሮ̈ሳ ጋ̈ዝ ካታሚን ቡጊድ ዎ ቤሲ̇ን ጋልዳ ሉካ̇ሪ ፔቲ̇ ኣሳ ኣ̈ል ጌሊዴ። ኢ ኢና ጌሊኖን ኦ̈ናካር ኤራካ̇ይፌ̈ኒ ኮዪንዶ̈ን ኣ̈ቺ̇ንታ̇ንዳብ ዳንዳኣካ̇ዬ። 25ኢዝ ናኢ̈ን ኢ̈ታ ኣያ̇ናባር ኤ̈ንቲ̇ኖ ፔቲ̇ ኣስዶራ ዬሱ̈ሲ ኢና ዬይኖን ሲስካራ ኤሊ̇ባር ዬ̈ራ ኢ ቶሂን ጋልዳ ኬዳ̇ዴ። 26ኣሲንዳ̇ ሶ̈ራ ጋዳ̇ ፊንቄ̇ ጌይዝ ቤስ̇ ዬሊንቲ̇ኖ ኣይሁድ ዜር ማ̈ቃካ̇ዮ ኣስዶ̈ራ ኢዛ ፌ ናኢን ጋልዳፖ̇ ኢ̈ታ ኣያ̇ና ኬሳ̇ምፔ̈ኒ ዬሱ̈ሳ ጌሻዴ። 27ዬሱ̈ሲ ኢዝኮ ጌይርዶሪ “ናኣን#7፡27 ናኤ ጌይንቲ̇ኖን ኣይሁድ ዜርን። ፊ̈ሺን ኤካ̇ሪ ካናብ ኢማ̇ዚን ኮሽ ጊዳካ̇ዬ። ቲ̈ን ናኣን ሙዪ ሚሽኮ ጋ̈ቤ” ጌይዴ። 28ኢዛር ጋ̈ራ “ኣ̈፥ ጎዶ! ዪ ኪን፥ ማ̈ቂናካሬ ካናንር ሌ̈ማታ ጻና ዶኣሪ ናኣን ጋልዳፖ ኬዳ̇ዚን ማጺ ሙይርሽዋ” ጋ̈ር ማሃዴ። 29ኢያሬ “ዪና̇ ኔ ጌይኖንኮታ̇ቦ ኢ̈ታ ኣያ̇ና ኔ ናኢን ጋልዳፖ ኬስኪ̇ኔ፤ ዪዚ ኣ̈ል ሉካ̇ቤ” ጌይዴ።

30ኢዛር ማ̈ቃ̇ር ኣ̈ል ሉካ̇ምባራ ኢዝ ናኢን ጋልዳፖ ኢ̈ታ ኣያ̇ና ኬስኪ̇ን ፋጻር ኣርሳ ጋልዳ ሜላ̇ ሱርቂ̇ንዶ̈ን ዬላ̇ዴ።

ዬሱ̈ሲ ዋይ ዱል̇ኬ ኖ̈ና ሙ̈ም ማ̈ቂኖ ፔቲ̇ ኣስ ፋዴ

ማ̈ቶ̈ሳ 15፡29-31

31ዬሱ̈ሲ ጢሮ̈ሳፖ̇ ዲንዳ̇ሪ ሲዶ̈ናኬ ታጳ̇ ካታማ ጌይዝ ጋዳን ኣ̈̇ሪ ጋሊላ ባሃ̈ሪንኮ ዬይዴ። 32ኢኖ ኣሳን ዋይ ሲስኪ̇ባ̈ሲ ኖ̈ና ሶ̈ሊባ̈ሶ ፔቲ̇ ኣስ ዬሱ̈ሳክ ኤሄ̈ሪ ኢ ፌ ኩሺን ኢ ጋል ጋዳ̇ር ፋምፔ̈ን ጌሺዴ። 33ዬሱ̈ሳር ና̈ሳ ዎርዣን ጋርታፖ ሜላ ቤስ̇ ኤ̈ጛሪ ፌ ጊልኣን ኢ ዋይን ጋርታ̇ ሚሺዴ። ኢናፖ̇ ፌ ጊልኢን ጋልዳ ጩታ̇ሪ ና̈ሳ ኢርጺንን ዎ̈ሺዴ። 34ኢናፖ̇ ፉዳ ኣፋ ቤቂ̇ ሹ̈ናሪ ናሳ̈ኮ “ኤፍታ” ጌይዴ። ኢዝ ቢርሺቺ̇ንዳ “ፊርቂንታ̇ቤ” ጌንቴ̇። 35ና̈ሳ ዋይንዳ ኤሊ̇ባር ሲስካ̇ዴ፤ ኢ ኖ̈ኒንዳር ፊላ̈ታ ሶ̈ላዴ።

36ዬሱ̈ሲ ኣሳ̈ኮ “ባዝ ዪኖ ኦ̈ባካር ሶ̈ላፒ̇ቴ” ጋ̈ር ኪ̈ቲ̇ንዶ̈ን ኣሳን ኬስካ̇ር ሶ̈ሊን ጋድ ዬልዴ። 37ዎርዣ ዎይ ዎይሊን ጋራ̇ሚንታ̇ር ጌዪ “ኢ ዎይ ባዝ ኮሽ ዎቲኔ፤ ዋይ ዱላ̇ን ሲስካምፔ̈ኒ፥ ኖ̈ና ሙ̈ማን ሶ̈ላምፔ̈ን ዎቲኔ” ጌይዴ።

Đang chọn:

ማ̈ርቆ̈ሳ 7: ኦጫ̈ቃማ

Tô màu

Chia sẻ

Sao chép