مرقس 5

ئِجّن ذَايس جْنُوْن ذِي ثْمُوْرْث ن يجَرِيثِيْين

1ئِࢲْوَا عِيْسَى غَار وجمَّاض-ين ن ڒبْحَر غَار ثْمُوْرْث ن يجَرِيثِيْين. 2وَامِي يضْرَا زِي ثْغَرَّابُوْت يڒْقَا يجّن ن ورْيَاز ذَايس جّنّ ذ اَعفَّان يُوْسَا-د زݣ يمضْڒَان. 3يزدّغ ذِنِّي ذݣ يمضْڒَان. وَار يزمَّر ؤُڒَا ذ يجّن اَث يقّن وَاخَّا س سْنَاسڒ. 4أَطَّاس ن تْوَاڒَاثِين شرّْفن-ث زݣ يفَاسّن ذ يضَارن س سْنَاسڒ ذ لقْتِينَا وَلَكِن يقطّو سْنَاسڒ يتْرزَّا لقْتِينَا. وَار يزمَّر ؤُڒَا ذ يجّن اَث يطّف. 5ئِتِيڒِي دْجِيڒث ذ نْهَار ذݣ يمضْڒَان ذ يذُوْرَار يسْنكَّر ثْغُوْيّث يجَرّح يخف نّس س وزْرُو. 6وَامِي يࢲْرَا عِيْسَى زِي ڒݣّْوَاج، يُوْزّڒ غَارس يسجّذ-اَس. 7ئِنْدق-د س يِجّن ن ثْمِيجَّا ثجْهذ ينَّا-ٱس: "آ عِيْسَى آ مِّيس ن أَربِّـي يُوْعْڒَان، مِين ثخْسذ زَّايِي؟ تتَّارغ زَّايك إِ أَربِّـي حمَا وَار ذَايِي تْعدِّيبذ شَا!" 8ينَّا مَانَايَا مِينْزِي عِيْسَى تُوْغَا ينَّا-ٱس: "آ جّنّ أَعفَّان فّغ زݣ ورْيَاز-أَ!"

9ئِسقْسَا-ث عِيْسَى ينَّا-ٱس: "مَامّش ذَاش قَّارن؟"

ينَّا-ٱس: "نش قَّارن-اَيِي أَبرُّو مِينْزِي نشِّين اَطَّاس إِذْنغ." 10ئِحشّم-يث اَطَّاس حمَا وَار ثن يسّكِّي بَارَّا إِ جِّهث نِّي. 11ذِي ڒْوقْث نِّي ذِنِّي يجّن ن ثْحِيمرْث ذ ثَمقّْرَانْت ن يِيڒْفَان ثَرْوس خ وذْرَار. 12تَّارن زَّايس جْنُوْن نِّي نَّان-اَس: "سكّ-اَنغ غَار يِيڒْفَان-ين حمَا اَذَايْسن نَاذف." 13وَامِي ثن يجَّا، فّْغن جْنُوْن نِّي يعفَّانن ؤُذْفن ذݣ يِيڒْفَان نِّي. ثُوْزّڒ ثْحِيمرْث نِّي ثهْوَا خ وذْرَار غَار ڒبْحَر ثغْرق ذِنِّي. تُوْغَا لْعَدَد نْسن عْڒَاين اَڒفَاين.

14يِنِّي يَروّْسن اَروْڒن سُوْفْغن ڒخْبَار ذِي ثنْدِينْت ذ ڒدْشُوْرَاث. فّْغن-د يِوْذَان حمَا اَذ خْزَرن مِين يوقْعن. 15ؤُسِين-د غَار عِيْسَى ؤُفِين اَرْيَاز نِّي إِي ذِي تُوْغَا يدْجَا اَبرُّو ن جْنُوْن يَرض اَرُّوض نّس يقِّيم يݣنْفَا س ڒَعْقڒ نّس. أُوْشَا ݣّْوْذن اَطَّاس. 16خْبَرن-ثن ڒشْهُوْذ خ مِين يوقْعن إِ ورْيَاز نِّي إِي ذِي تُوْغَا دْجَان جْنُوْن ذ مِين ذَاسن يوقْعن إِ يِيڒْفَان. 17أُوْشَا بْذَان تتَّارن زَّايس حمَا اَخَاسن يبعّذ زِي جِّهث نْسن.

18وَامِي تُوْغَا ينَّاي ذِي ثْغَرَّابُوْت، ئِتَّار زَّايس ورْيَاز نِّي إِي ذِي تُوْغَا دْجَان جْنُوْن ينَّا-ٱس: "اجّ-اَيِي اَكِش رَاحغ." 19وَلَكِن عِيْسَى يُوْݣِي، ينَّا-ٱس: "رُوْح غَار ثدَّارْث نّش ذ ڒحْبَاب نّش سْخبَّر-يثن س مِين ذَاش يݣَّا سِيذِي أَربِّـي ذ مَامّش شك يرْحم." 20ئِرُوْح ورْيَاز نِّي يبْذَا يتْخبَّار ذِي لْإِقْلِيم ؤُمِي قَّارن دِيكَاپْـلِس زِي مِين ذَاس يݣَّا عِيْسَى. قِّيمن يوْذَان نِّي مَارَّا ذهّْشن.

سِيذِيثْنغ عِيْسَى يسْݣنْفَا يدْجِيس ن يَاݣْرُس

21وَامِي يذْوڒ عِيْسَى ذِي ثْغَرَّابُوْت غَار جِّهث نِّي مَانِيس د يُوْسَا، مُوْنن-د خَاس ڒْغَاشِي ذ اَمقّْرَان خ شّطّ ن ڒبْحَر. 22يُوْسَا-د غَارس يجّن زِي اَرُّوْيَاس ن ثمْزِيذَا ن أَيث-إِسْرَائِيل قَّارن-اَس يَاݣْرُس. وَامِي يࢲْرَا عِيْسَى يوْضَا-يَاس غَار يضَارن نّس 23يحشّم-يث اَطَّاس ينَّا-ٱس قَا يدْجِي ثَمزْيَانْت اَقَّا تْمتَّا. أَرَاح-د سرْس خَاس يفَاسّن نّش حمَا اَذ تْݣنْفَا اَذ تدَّر. 24ئِرُوْح اَكِذس ذْفَارن-ت اَطَّاس ن ڒْغَاشِي تمْزَاحَامن خَاس.

25ذِنِّي يجّن ن ثمْغَارْث ثنْعَاش يسݣّْوُسَا زݣ وَامِي إِي ثهْڒش تَازّڒ س يذَامّن.#5‏.25 ئِذَامّن نتَّا ذ دّم. 26ثْعدّب اَطَّاس خ يفَاسّن ن وَاطَّاس ن يضْبِيبن. مَارَّا مِين غَارس ذ اَݣْڒَا ثْضيّع-يث بْڒَا نّْفَع. وَاخَّا اَمنِّي لْحَالَا نّس ثرْنِي. 27تسْڒَا خ عِيْسَى ثذْفَار-يث اَك ڒْغَاشِي ثْحَاذَا-يَاس اَسڒْهَام نّس. 28ثنَّا ذݣ وُوْڒ نّس اَقَا مڒَا حَاذِيغ غِير اَسڒْهَام نّس اَتَاف اَذ ݣنْفِيغ. 29ڒخْدّنِّي ثْݣنْفَا ذݣ ومْشَان ثسّن بلِّي دَّات نّس ثْݣنْفَا زِي ڒهْڒَاش نِّي.

30عِيْسَى يسْحسّ ذِي نّفْس نّس بلِّي يجّن ن جّْهذ نّس يفّغ، ئِنقْڒب غَار ڒْغَاشِي نِّي ينَّا-ٱسن: "وِي ذَايِي يحَاذَان اَرُّوْض ينُو؟"

31نَّان-اَس يمحْضَارن نّس: "خْزَر مشْحَاڒ ن يِوْذَان إِي ذَانِيتَا تمْزَاحَامن خَاك أُو شك ثقَّارذ وِي ذَايِي يحَاذَان؟"

32وَلَكِن يقِّيم عَاذ يخزَّر اَمُّو ذ وَامُّو حمَا اَذ يࢲر وِي يݣِّين مَانَاينِّي. 33وَامِي ثسّن ثمْغَارْث نِّي مِين ذَاس يوقْعن ثݣّْوذ ترْجِيجِي، ثُوْسَا-د ثوْضَا غَار يضَارن نّس ثْعَاوذ-ٱس مَارَّا لْحَقِيقَا. 34ينَّا-ٱس: "آ يدْجِي، شم لْإِيمَان نّمْ يسْݣنْفَا-شم. رُوْح ذِي ڒهْنَا، ثݣنْفِيذ زِي ڒهْڒَاش نّم."

35وَامِي عَاذ يسَّاوَاڒ عِيْسَى، ؤُسِين-د شَان يِوْذَان زِي ثدَّارث ن اَرَّايس نِّي ثمْزِيذَا نَّان-اَس: "يدْجِيش شك ثمُّوْث، مَايمِّي عَاذ تْسدَّاعذ لْمُعَلِّم؟" 36ئِسْڒَا-يَاسن عِيْسَى إِ مِين قَّارن، ينَّا-ٱس إِ اَرَّايس نِّي ن ثمْزِيذَا: "وَار تݣّْوذ شَا! ئِتْخصَّا اَذ تَامْنذ وَاهَا."

37سّنِّي وَار يجِّي ؤُڒَا ذ يجّن اَث يذْفَار، يذْفَار-يث غِير بُطْرُس ذ يَعْقُوْب ذ يُوْحَنَّا يدْجَان ذ ؤُمَاس ن يَعْقُوْب. 38وَامِي ؤُوْضن غَار ثدَّارْث ن اَرَّايس نِّي ن ثمْزِيذَا، ئِتْوَاڒَا عِيْسَى ذِنِّي لْهَرَج ذ يِوْذَان تْرُوْن سْغُوْيِيْون اَطَّاس. 39وَامِي يُوْذف ينَّا-ٱسن: "مَايمِّي ثسْغُوْيِيْوم، مَايمِّي ثتْرُوْم؟ أَقَا ثَحنْجِيرْث-أَ وَار ثمُّوْث شَا، ثطّص وَاهَا!"

40ضحْشن خَاس، ئِكَّر عِيْسَى يسُوْفغ-يثن مَارَّا سّنِّي. يُوْوِي اَكِذس ذِنِّي بَابَاس ذ يمَّاس ن ثْحنْجِيرْث نِّي ذ يِنِّي يرُوْحن اَكِذس. يُوْذف مَانِي ثدْجَا ثْحنْجِيرْث نِّي. 41ئِطّف-اَس ذݣ وفُوْس إِ ثْحنْجِيرْث نِّي ينَّا-ٱس: طَلِيثَا قُوْمِي، يعْنِي آ ثَحنْجِيرْث كَّر.

42ڒخْدّنِّي ثكَّر ثْحنْجِيرْث نِّي ثبْذَا ثݣُّوْر. غَارس ثنْعَاش يسݣّْوُوْسَا. قِّيمن تْعجّْبن اَطَّاس. 43يُوْمَر-يثن عِيْسَى ينَّا-ٱسن وَار تْعَاوَاذم إِ حَدّ مِين يوقْعن. عَاوذ ينَّا-ٱسن ؤُشم-اَس اَذ تشّ.

Đang chọn:

مرقس 5: ريف

Tô màu

Chia sẻ

Sao chép