مرقس 4

ڒْمَعْنَا ن ونِّي يزرّْعن

1عَاوذ يبْذَا عِيْسَى يسڒْمَاذ خ طَّارْف ن ڒبْحَر. مُوْنن-د خَاس اَطَّاس ن ڒْغَاشِي، ئِكَّر نتَّا ينْيَا ذݣ يِجّن ن ثْغَرَّابُوت ذِي ڒْوسْط ن وَامَان يقِّيم ذَايس، ئِوْذَان قِّيمن مَارَّا ذِي ڒْبَرّ خ طَّارْف ن ڒبْحَر. 2ئِسڒْمَاذ-اَسن اَطَّاس ن ثْمسْڒَايِين س ڒمْعَانِي. ينَّا-ٱسن ذݣ وسڒْمذ نّس: 3"صنّْطث، ئِفّغ وفدْجَاح اَذ يزْرع. 4وَامِي يزرّع، ثوْضَا-يَاس شَان زَّرِّيعث خ طَّارْف ن وبْرِيذ، ؤُسِين-د يجْضَاض شِّين-تث. 5شَان زَّرِّيعث ثوْضَا-يَاس جَار يِزْرَا وَار ذِنِّي بُو شَاڒ اَطَّاس. ثغْمِي-د ذغْيَا ڒَاحقَّاش وَار ثُوْدْجِيغ شَا ذِي ثْمُوْرْث اَطَّاس. 6وَلَكِن وَامِي ثْسُوْمَّر ثْفُوْشْت، ثْنزْڒف ڒخْدّنِّي ثِيسْرَاو ڒَاحقَّاش يࢲوْرَان نّس وَار ؤُوْثِين شَا غَار ڒَادْجغ ن ثْمُوْرْث. 7شَان زَّرِّيعث ثوْضَا جَار يسنَّانن. غْمِين-د اَكِذس يسنَّانن نِّي جيّْفن-تث وَار ثݣِّي بُو ثِيْذرِين. 8وَلَكِن شَان زَّرِّيعث ثوْضَا خ ثْمُوْرْث ثَصبْحَانْت، ثُوْڒِي-د ثمْغَر ثݣَّا ثِيْذرِين. ڒبْعَاض ݣِّينْت ثْڒَاثِين، ڒبْعَاض ݣِّينْت ستِّين، ڒبْعَاض ݣِّينْت مِيَّا." 9أُوشَا ينَّا-ٱسن عِيْسَى: "صنّط مْلِيح آ ونِّي يتْسْڒَان."

أَسْفْهم ن ڒْمَعْنَا ن ونِّي يزرّْعن

10وَامِي عِيْسَى يقِّيم وَاحْذس، سّقْسَان-ث يِنِّي ذَاس ينّْضن اَك ثنْعَاش ن يمحْضَارن خ ڒمْعَانِي-يَا. 11ينَّا-ٱسن: "ئِتْوَاسْمح إِ كنِّيو اَذ تسّْنم مِين ينُوْفَّرن ذِي ڒْمُلْك ن أَربِّـي. يِنِّي زِي بَارَّا مَارَّا تَاس-اَسن-د س ڒمْعَانِي وَاهَا:

12<وَاخَّا خزَّرن، وَار تْوِيڒِين شَا.

وَاخَّا تسْڒَان، وَار فهّْمن إِ شَا وَار تُوْبِين شَا،

وَار ذَاسن تْوَاغْفَرنْت ڒْمُعْصِيَاث نْسن.>"

13ينَّا-ٱسن: "مَا وَار ثفْهِيمم ڒْمَعْنَا-يَا؟ إِيوَا، مَامّش غَا ثْفهْمم مَارَّا ڒمْعَانِي؟ 14أَفدْجَاح نتَّا يزرّع أَوَاڒ ن أَربِّـي. 15زَّرِّيعث نِّي إِݣ يوْضَان خ وبْرِيذ نتَّاث اَم يِوْذَان إِي تسْڒَان إِ وَاوَاڒ ن أَربِّـي. ئِتْرَاح شِّيطَان ذغْيَا يتكّس اَوَاڒ نِّي يتْوَازرْعن ذَايْسن ذݣ وُوْڒ. 16زَّرِّيعث نِّي إِݣ يوْضَان جَار يِزْرَا نتَّاث اَم يِوْذَان إِي تسْڒَان إِ وَاوَاڒ ن أَربِّـي قبْڒن-ث س ڒفْرَاحْث. 17وَامِي وَار ؤُوْثِين بُو يࢲوْرَان مْلِيح ذغْيَا تْنقْڒَاعن. خْمِي د تَاسنْت شَان ڒمْحَاين نِغ ذ شَان وعدّب خ سَّبَاب ن وَاوَاڒ ن أَربِّـي، ذغْيَا تفّْغن اَبْرِيذ. 18زَّرِّيعث نِّي إِݣ يوْضَان جَار يسنَّانن نتَّاث اَم يِوْذَان إِي تسْڒَان إِ وَاوَاڒ ن أَربِّـي 19ذَايْسن اَمْنُوْس ن دُّنشْت، يشمّث-يثن طّْمَع ن وَاݣْڒَا، ذَايْسن شّهَاوَاث ن ثْمسْڒَايِين نّغْنِي، سّنِّي يتْوَاجيّف وَاوَاڒ ن أَربِّـي وَار ينفّع شَا. 20وَلَكِن زَّرِّيعث نِّي إِݣ يوْضَان ذِي ثْمُوْرْث ثَصبْحَانْت نتَّاث اَم يِوْذَان إِي تسْڒَان إِ وَاوَاڒ ن أَربِّـي قبْڒن-ث تَارْون. ڒبْعَاض تَارْون ثْڒَاثِين، ڒبْعَاض ستِّين، ڒبْعَاض مِيَّا."

ڒْمَعْنَا ن ڒْقنْدِيڒ

21ينَّا-ٱسن: "ؤُڒَا ذ يجّن وَار د يتِّيوِي ڒْقنْدِيڒ حمَا اَخَاس يقْڒب اَقْنُوْش نِغ اَث يݣّ سْوَادَّاي إِ قَامَا؛ لَّا، ئِتݣّ-يث خ ڒْمَرْفَاع. 22أَقَا مَارَّا مِين ينُوْفَّرن اَذ د يمظْهَار. مَارَّا مِين يتْوَاسْنُوْفَّرن اَذ ينفْضح. 23صنّط مْلِيح آ ونِّي يتسْڒَان."

24ينَّا-ٱسن: "أَرّم-د ڒْبَاڒ نْوم إِ مِين تسْڒَام. ڒَعْبَر إِي ثْسخْذَامم ذ ونِّي إِي كِذْوم غَا يسخْذم أَربِّـي أُو عَاذ كْتَار. 25ڒَاحقَّاش ونِّي يدْجَان غَارس يتْمَارْنِي-يَاس. وَلَكِن ونِّي وَار غَار يدْجِي شَا، ئِتْوَاكْسِي-يَاس ؤُڒَا ذ مِين غَارس."

ڒْمَعْنَا ن زَّرِّيعث يتمْغُوْرن

26ينَّا-ٱسن عِيْسَى عَاوذ: "ڒْمُلْك ن أَربِّـي يݣَّا اَم يِجّن ن بْنَاذم يزرّع زَّرِّيعْث ذِي ثْمُوْرْث. 27ئِتطّص س دْجِيڒث يتْفَاق-د اَݣ صْبَاح يتَاف زَّرِّيعث تْݣَعَّاذ تمْغُوْر. نتَّا وَار يسِّين شَا مَامّش يوْقع مَانَاينِّي. 28مِينْزِي ثَمُوْرْث تِيشّ ثِحبَّا نّس نِّيث. ذ اَمزْوَارُو ثْغمِّي-د، ثْذوّڒ ذ ثِيْذرِين، ثِيْذرِين نِّي تْعمَّرنْت س ثْحبَّا. 29وَلَكِن غِير اَذ يوْجذ يمنْدِي، ڒخْدّنِّي اَذ يفّغ اَذ يمْجَار مِينْزِي ڒْوقْث ن ومْجَار ثُوْوض-د."

ڒْمَعْنَا ن بُوْݣَرْذَاڒ

30ينَّا-ٱسن عَاوذ: "مِينْذِي يتْشَابَّاه ڒْمُلْك ن أَربِّـي؟ نِغ س مِينْزِي غَا ث نْمثّل؟ 31ڒْمُلْك ن أَربِّـي يݣَّا اَم يِجّن ن زَّرِّيعث ن يِجّن ن نُّوْع ن اَرْبِيع قَّارن-اَس بُوْݣَرْذَاڒ. خْمِي ت زرْعن ذِي ثْمُوْرْث تِيڒِي ذ ثَمزْيَانْت قَاع خ مَارَّا ثِحبَّا يدْجَان ذِي ثْمُوْرْث. 32وَلَكِن خْمِي ت زرْعن، تمْغَار ثْذوّڒ ذ تَمقّْرَانْت زِي مَارَّا اَرْبِيع ن ڒْعَرْسث تݣّ ڒفْرُوْع ذ يمقّْرَانن. ؤُڒَا ذ يجْضَاض تَاسن-د تݣّن ذَايس ڒَعْوَاش نْسن ذِي ثِيڒِي نّس."

33ئِسَّاوَاڒ عِيْسَى اَݣ ڒْغَاشِي س وَاطَّاس ن ڒمْعَانِي اَم يِيْنَا عْلَاحْسَاب مِين زمَّرن اَذ فهْمن. 34وَار كِذْسن يسِّيوِيڒ شَا إِلَّا س ڒمْعَانِي، وَلَكِن يمحْضَارن نّس يسفْهَام-يثن مْلِيح خْمِي يتِيڒِي اَكِذْسن وَاحْذس.

سِيذِيثْنغ عِيْسَى يهدّن ڒبْحَر

35نْهَار نِّي وَامِي د ثُوْوض ثْمدِّيث، ينَّا-ٱسن عِيْسَى إِ يمحْضَارن نّس: "يَالّه أَ نࢲْوَام غَار وجمَّاض-ين." 36وَامِي سمْحن ذِي ڒْغَاشِي، ئِرُوْح عِيْسَى اَكِذْسن ذِي ثْغَرَّابُوْت نِّي إِي ذِي يدْجَا عَاذ. اَكِذس ذِنِّي ثِغَرُّوْبَا نّغْنِي. 37ئِكَّر-د يجّن ن اَرِّيح يجْهذ اَطَّاس ذِي ڒبْحَر، ڒمْوَاج شَّاثنْت ثَغَرَّابُوْت نِّي اَڒ وَامِي ثبْذَا تْعمَّر س وَامَان. 38ن تَّا يدْجَا غَار پُـوْپَّـا#4‏.38 پُـوْپَّـا قَّارن-ت إِ ذفَّار ن ثْغَرَّابُوت. ن ثْغَرَّابُوْت يطّص يسُوْمّث يجّن ن ثْسُوْنْتَا.#4‏.38 ثْسُوْنْتَا نتَّاث ذ ثْسُوْمّت. سْفَاقن-ث يمحْضَارن نَّان-اَس: "آ لْمُعَلِّم مَا وَار ش يتْهِيمِي شَا مَانَايَا؟ أَقَا نشِّين نتْمتَّا!" 39ئِكَّر يسْبدّ اَرِّيح ينَّا-ٱس إِ ڒبْحَر: "سْقَار، قْضع ڒْحِسّ!" أُوْشَا يبدّ اَرِّيح يرْسَا ڒْحَاڒ. 40ينَّا-ٱسن: "مَايمِّي تݣّْوْذم قَاع اَمُّو؟ مَا عَاذ وَار ذَايْوم بُو لْإِيمَان؟" 41ݣّْوْذن اَطَّاس نَّان إِ وَايَاوْيَا: "مِين يعْنَا وَانِيتَان؟ ؤُڒَا ذ اَرِّيح ذ ڒبْحَر تْطَاعَان-اَس!"

Đang chọn:

مرقس 4: ريف

Tô màu

Chia sẻ

Sao chép