रोमी 6
6
पापम मृत्यु, ख्रीष्टम जीवन
1ओसिन हो कलसे हम्र का कना? का परमेश्वरक अनुग्रह धेर पैटिरहक लाग हम्र पाप कर्टिरही त? 2अहँ, ओसिक कर्ना ठीक नैहो। पापक लाग त हम्र मुर्दा हुइटी, आब कसिक पाप कर्टी जियसेक्ठी? 3हम्र ख्रीष्ट येशूम बप्तिस्मा लेहबेर उहाँकसँग एक होक मुली कना बात टुँहन थाहाँ नैहो का? 4हम्र फे उहाँकसँग बप्तिस्माद्वारा मुक गारगैली। शक्तिशाली परमेश्वर बाबा आपन महिमाद्वारा येशू ख्रीष्टह मुवलमसे फेदोस्र जियादेल। आब हम्र फे पुरान जीवन छोर्क लौव जीवनम ख्रीष्टअस जिई।#कल २:१२
5काकरकि उहाँक मृत्युम हम्र उहाँकसँग एक हुइली कलसे उहाँ मुवलमसे फेदोस्र जीवित हुइलम फे निश्चित रूपले हम्र उहाँकसँग एक हुउइया बाटी। 6हमन यी थाहाँ बा, पापक राज्य करल जीवन नाश हुई ओ हम्र पापक कैदी हुइटीरहनैपरी कैक हमार पुरान जीवन ख्रीष्टकसँग क्रूसम मुवागैल् बा, 7काकरकि मुवल मनैया पापक कैदमसे छुट्कारा पारख्ठा। 8यदि हम्र ख्रीष्टकसँग मुली कलसे उहाँकसँग जिउइया फे बाटी कैक हम्र विश्वास कर्ठी, 9काकरकि हमन थाहाँ बा, ख्रीष्ट मुवलमसे फेदोस्र जिरल। आब उहाँ कबु फे मुउइया नैहुइट, उहाँकम मृत्युक कौनो शक्तिले कुछु कर सेकुइया नैहो। 10पापक शक्ति चकनाचूर पारक लाग ख्रीष्ट एक फ्यारा मुल। आब परमेश्वरक महिमक लाग उहाँ जिठ। 11ओसहेँक टुह्र फे अपन्हेह पापक लाग मुवल तर परमेश्वरक लाग ख्रीष्ट येशूकसँग जियल सम्झपर्ठा।
12उहओर्से शरीरक कुइच्छा अनुसार चल नैपरी कैक आपन मरणशील शरीरम पापह फेदोस्र राज्य कर जिन देओ। 13आपन कौनो फे अङ्गह पाप करक लाग दुष्टक साधन हुइ जिन देओ। बेनसे अपन्हेह सारा हिसाबले परमेश्वरम समर्पण करो, काकरकि पैल्ह त टुह्र मुवल रलहो, तर आब त लौव जीवन पारख्लो। उहओर्से परमेश्वरक महिमक लाग असल काम कर्ना साधनक रूपम आपन पूरा शरीरक सदुपयोग करो। 14पाप टुन्हकम राज्य करुइया नैहो काकरकि टुह्र व्यवस्थक अधीनम नाहीँ तर अनुग्रहक अधीनम बाटो।
परमेश्वरक कमारा
15हम्र व्यवस्थक अधीनम नाहीँ, तर अनुग्रहक अधीनम बाटी कटिम का हम्र पाप करी त? ओसिन कबु फे नैहुई। 16ज्याकर बात मान्क चाकरी करक लाग अपन्हेह समर्पण कर्ठो, टुह्र ओक्रहेक कमारा हुइठो कना बात टुह्र नैजन्टो का? पापक कमारा होक ओक्रहे आज्ञापालन कर्ठो कलसे टुँहन मुवपरी, तर परमेश्वरक कमारा होक उहाँक आज्ञापालन कर्ठो कलसे टुह्र उहाँक सामुन्नेम धर्मी ठह्राजैबो। 17टुह्र पैल्ह पापक कमारा रलहो तर आब टुँहन सिखागैल शिक्षा टुह्र हृदयसे पालन कर्ना होरलो। याकर लाग परमेश्वरह धन्यवाद ह्वाए। 18टुह्र पापक कैदमसे छुट्कारा पाक परमेश्वरक असल काम कर्ना कमारा होरलो। 19टुन्हक मानवीय स्वभावक कमजोरीक कारणले मै, टुह्र बुझ्ना हिसाबले मालिक ओ कमारक उदाहरण देक कहटुँ। एक समयम खराब इच्छा लेक झन्-झन् धेर घिनलग्टिक पाप ओ दुष्ट काम करक लाग टुह्र आपन जीवन कमाराअस सुम्परख्लहो। आब पवित्र हुइक लाग टुह्र आपन जीवन परमेश्वरक लाग असल काम कर्ना कमाराअस सुम्पदेओ। 20टुह्र पापक कमारा रहलम परमेश्वरक सामुन्नेम धार्मिक हिसाबक काम कर्बोकर्बोनैकरो। 21उ समयम करल काममसे टुह्र का पैलो? उ कामम टुह्र आजकाल शरम मन्ठो, उ सब घिनलग्टिक बातक नतिजा त मृत्यु हो। 22आब टुह्र पापक कैदमसे छुट्कारा पारख्लो ओ परमेश्वरक कमारा होरलो। याकर नतिजा पवित्रता हो। यी बातले टुँहन अनन्त जीवनम पुगैठा। 23पापक कमाही मृत्यु हो, तर सित्तैम देजैना परमेश्वरक दान त हमार प्रभु येशू ख्रीष्टम अनन्त जीवन हो।
Đang chọn:
रोमी 6: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.