रोमी 1
1
1मै पावल येशू ख्रीष्टक कमारा यी चिठी लिखटुँ। उहाँ महीह आपन र्वाजल प्रेरित हुइक लाग बलैल ओ परमेश्वरक खुशीक खबर सुनैना कामक लाग अलग कर्ल। 2धेर साल आघ परमेश्वर खुशीक खबरक बारेम प्रतिज्ञा कर्ल। यिह प्रतिज्ञा अगमवक्ताहुँक्र पवित्र धर्मशास्त्रम लिख्ल।
3उ खुशीक खबर कलक परमेश्वरक छावा हमार प्रभु येशू ख्रीष्टक बारेम हो। उहाँ मनै होक राजा दाऊदक वंशम जन्मल। 4पवित्र आत्मक देखाइल अनुसार हमार प्रभु येशू ख्रीष्ट त परमेश्वरक शक्तिशाली छावा हुइट। यी बातह उहाँ मुवलमसे फेदोस्र जिलक बातले स्पष्ट पर्ठा। 5हमार प्रभु येशू ख्रीष्टद्वारा परमेश्वर महीह अनुग्रह कैक आपन विशेष दूत बनैल। सब जातिक मनै विश्वास करहीँ ओ उहाँक कहल मनहीँ कैक उहाँक सम्मानक लाग महीह यी खुशीक खबर सुनैना काम देगैल् बा। 6टुह्र फे हुँकन्हक सँगसँग येशू ख्रीष्टक मनै हुइक लाग बलागैल् बाटो।
7रोमम रहल टुह्र सब मनै, परमेश्वरक प्रियहुँक्र, उहाँक भक्त जन हुइक लाग बलागैल् मनै, टुँहन मै यी चिठी लिखटुँ। हमार परमेश्वर बाबा ओ प्रभु येशू ख्रीष्ट टुँहन अनुग्रह ओ शान्ति देहीँ।
रोम जैना पावलक इच्छा
8ख्रीष्टम टुह्र विश्वास करल बात सबजहन थाहाँ बा। उहओर्से पैल्ह टुह्र सबजन्हक लाग मै येशू ख्रीष्टद्वारा आपन परमेश्वरह धन्यवाद देठुँ। 9उहाँक छावक खुशीक खबर सुनाक मै हृदयसे जो उहाँक सेवा कर्ठुं। मै प्रार्थना करबेर टुँहन फे सम्झठुँ। म्वार कहल बात सत्य हो कैक त परमेश्वर अपन्हे साक्षी हुइट। 10परमेश्वरक इच्छा अनुसार आब टुँहन भेँटाइ सेकूँ कैक मै उहाँह बिन्ती करटुँ। 11पवित्र आत्मसे पाइल आशिष देक टुँहन विश्वासम अरगर बनाइ सेकूँ कना म्वार भारी इच्छा बा। 12म्वार विश्वासले टुँहन ओ टुन्हक विश्वासले महीह बल मिल सेकी कना म्वार चाहना बा।
13भैयौ, टुँहन भेँट्ना मै धेर फ्यारा विचार कर्नु तर कौनो ना कौनो कारणले आम्हीसम आइ नैसेक्नु कना बात टुह्र थाहाँ पाइल मै चाहटुँ। और ठाउँक गैरयहूदी मनैन् आत्मिक रूपम परिपक्व बनाइक लाग सहायता करअस मै टुँहन फे सहायता कर सेकूँ कना मै चहठुँ।#प्रे १९:२१ 14काकरकि महीह सभ्य-असभ्य, पह्रल-नैपह्रल सबजहन खुशीक खबर सुनैना कर लागल बा। 15उहओर्से टुह्र रोमम रहल मनैन फे यी खुशीक खबर सुनैना म्वार धेर इच्छा बा।
खुशीक खबर जो परमेश्वरक शक्ति
16यी खुशीक खबर सुनैना महीह लाज नैलागट्, काकरकि विश्वास कर्ना सबजहन मुक्ति देहक लाग यी खुशीक खबर त परमेश्वरक शक्ति हो, पैल्ह यहूदीन दोस्र गैरयहूदी मनैन।#मर्क ८:३८ 17#हब २:४यी खुशीक खबरम परमेश्वरसे अइना धार्मिकता प्रकट होरहल, ओ यी धार्मिकता कना बात विश्वासमसे सुरु हुइठा ओ विश्वासम जो पूरा हुइठा। धर्मशास्त्रम फे अस्तह बात लिखल बा, “विश्वासद्वारा धर्मी ठह्रागैल् मनै जो जीवन पैठ।”#१:१७ विश्वासद्वारा धर्मी ठह्रागैल् मनै जो जीवन पैठ: याकर और अर्थ यी फे हुइसेक्ठा, “धर्मी मनै विश्वासद्वारा जो जिठ।”
मनैन्हकपर परमेश्वरक रिस
18परमेश्वरक रिस मनैन्हक पाप ओ दुष्ट कामक विरोधम स्वर्गसे प्रकट होरहल। हुँक्र आपन दुष्ट कामले सत्य बातह दबैठ। 19परमेश्वरक बारेम मनै जानपर्ना बात हुँकन थाहाँ बाटन, काकरकि परमेश्वर अपन्हे हुँकन छर्लङ्ग हुइना हिसाबले उ बात देखादेरख्ल। 20संसारक सृष्टि हुइल्ठेसे जो उहाँक बनाइल चिजले मनै परमेश्वरह जानसेक्ठ। परमेश्वरक अनन्त शक्ति ओ परमेश्वरीय स्वभाव जसिन नैदेखपर्ना गुण फे हुँक्र मजासे बुझसेक्ठ। उहओर्से हुँकन्हक बहाना बनैना ठाउँ नैहुइटन। 21हुँक्र परमेश्वरह चिन्ह्क फे परमेश्वरह करपर्ना महिमा नैकर्ल, ना त हुँक्र उहाँह धन्यवाद देल, हुँकन्हक विचार काम नैलग्ना हुइलन ओ हुँकन्हक मूर्ख मन अन्धकारले भरगैलन।#एफि ४:१७-१८ 22हुँक्र अपन्हेह बुद्धिमान सम्झलसे फे मूर्ख हुइल। 23हुँक्र नाश नैहुइना परमेश्वरक महिमा करपर्ना ठाउँम नाश हुइना मनै, पशु, चिरैँचुरुङ्गन ओ घस्रना जनावरन्हक मूर्तिह पूजा कर्ल।#व्य ४:१६-१८
24उहओर्से हुँकन्हक हृदयक ख्वाजल घिनलग्टिक अवस्थम जो परमेश्वर हुँकन जाइदेल, ओ हुँक्र अप्न-अप्न लाजलग्टिक काम कैक आपन शरीरह अपवित्र पर्ल। 25हुँक्र परमेश्वरक सत्य बातह झूट बातसे साँटफेर कर्ल। सृष्टि करुइया ओ सड्डभर आदर पाइपर्ना परमेश्वरह छोर्क हुँक्र त उहाँक सृष्टि करल चिजिक पूजा ओ सेवा कर्ल।
26उहओर्से परमेश्वर हुँकन हुँकन्हक्के घिनलग्टिक इच्छा अनुसारक काम कर देल। जन्नीमनै फे स्वाभाविक सहवास छोर्क जन्नीमनैनसे जो एक-आपसम अस्वाभाविक सहवास कर्ल। 27ओसहेँक पुरुषहुँक्र फे जन्नीमनैनसे हुइना स्वाभाविक सहवास छोर्क और पुरुषन्हक लाग जर्ल ओ पुरुषहुँकनसे जो घिनलग्टिक काम कर्ल। हुँक्र आपन शरीरम करल दुष्ट कामक लाग उचित दण्ड भोग्ल।
28हुँक्र परमेश्वरह देहपर्ना मान्यता देह फे छोर्ल। उहाँ असिक मनै खराबी कर्टीरह्हीँ कैक हुँकन हुँकन्हक्के कुविचारम छोरदेल। 29उहओर्से हुँक्र सब किसिमक खराबी ओ दुष्टताले भरल बाट। हुँक्र ल्वाभ ओ घृणा कर्ठ, आनक डाहा कर्ठ ओ हत्या कर्ठ। हुँक्र झग्रा कर्ठ, छल कर्ठ ओ झूट बोल्ठ, चिब्ली लगैठ, 30आनक निन्दा कर्ठ। हुँक्र परमेश्वरह फे घृणा कर्ठ, केक्रो आदर नैकर्ट तर अपन्हे घमण्डले फुल्ठ, बराबरा धाक लगैठ। खराब काम कर्ना लौव-लौव जुक्ति लगैटीरठ। हुँक्र डाई-बाबक बात नैमन्ट। 31हुँक्र मूर्ख बाट ओ करम कैक कहल बात फे नैकर्ट। हुँक्र प्रेम नैरहल निर्दयी मनै हुइट। 32असिन मनै मृत्युक योग्य रठ कना परमेश्वरक धार्मिक विधान जानजान्क फे हुँक्र ओस्तहेँ काम कर्ठ। ओत्र केल नाहीँ, ओसिन काम कर्ना मनैन हुँक्र झन् उल्ट सुर्यैठ।
Đang chọn:
रोमी 1: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.