यूहन्ना 20
20
येशू मुवलमसे फेदोस्र जिगैलक
मत्ती २८:१-८; मर्कूस १६:१-८; लूका २४:१-१२
1हप्तक पैल्ह दिन बिहान्नी अन्धारऽ पलरहलम, मगदाला सहरक मरियम गर्यम गैली, ऊ उहाँ पुग्ली त गर्यमसे पत्थ्रा हटाइल देख्ली। 2यी देख्क ऊ दगुर्टी सिमोन पत्रुस ओ येशू प्रेम कर्ना और चेलकठे गैली ओ हुँकन कली, “हुँक्र प्रभुह गर्यमसे लैजारख्ल त! तर लैजाक कहाँ ढर्ल कैक भर हमन थाहाँ नैहो।”
3तब पत्रुस ओ और चेला तुरुन्त गर्यओर गैल। 4हुँक्र दुनु जन सँगसँग दौरटलह, तर और चेला पत्रुससे आघ गर्यम पुग्गैल। 5ऊ लिहुर्क गर्यक भित्तर हेर्ल त, लाश लप्याटल सूती लुगा केल देख्ल। तर ऊ गर्यक भित्तर नैगैल।
6हुँकहार पाछ-पाछ सिमोन पत्रुस अइल, ऊ सरासर गर्यक भित्तर गैगिल, ओ लाश लप्याटल सूती लुगा केल देख्ल। 7उहाँक कपारिम ओह्राइल लुगाजुन लाश लप्याटल सूती लुगठे नैरह, तर अल्ग पट्याक एक ठाउँम ढरल रह। 8तब गर्यम आघ पुगुइया और चेला फे गर्यक भित्तर गैल, ओ यी देख्क येशू मुवलमसे फेदोस्र जिगैल कैक विश्वास कर्ल। 9धर्मशास्त्रम लिखल येशू मुवलमसे फेदोस्र जिएपर्ठा कना वचन हुँक्र आम्हीसम फे नैबुझ्लरलह। 10तबदोस्र उ दुनु चेलावँ घर घुम्ल।
येशू मगदाला सहरक मरियमकठे देखपर्लक
मत्ती २८:९-१०; मर्कूस १६:९-११
11तर मरियम गर्यक बाहर रुइटी ठह्र्याइल रलही। ऊ रुइटी लिहुर्क गर्यक भित्तर हेर्ली त, 12चह्कार उज्जर लुगा लगैल दुइ जन स्वर्गदूतन देख्ली। हुँक्र एक जन येशूक कपार रहल ठाउँओर ओ औरजुन ग्वारा रहल ठाउँओर बैठलरलह।
13हुँक्र हुँकहीन कल, “बाबु, काजे रुइटो?”
ऊ हुँकन कली, “हुँक्र म्वार प्रभुह लैगिल, तर उहाँह लैजाक कहाँ ढैरख्ल कना महीह थाहाँ नैहो।” 14अत्रा कैक सेक्क ऊ पाछओर घुम्क हेर्ली त येशूह ठह्र्याइल देख्ली, तर येशू जो हुइट कैक नैचिह्न्ली।
15येशू हुँकहीन कल, “बाबु, काजे रुइटो? केहीह ख्वाजटो?”
ऊ उहाँह फुलर्यम काम कर्ना मनैया समझ्क कली, “हजुर, अप्न उहाँह यिहाँसे लैजारख्ली कलसे, कहाँ ढैरख्ली, महीह कही, ओ मै उहाँह लैजैम।”
16येशू हुँकहीन कल, “मरियम!”
ऊ उहाँकओर घुम्क हिब्रू भाषम कली, “रब्बोनी!” याकर अर्थ “गुरुजी!” हो।
17येशू हुँकहीन कल, “महीह पक्रलऽ जिन रहो, काकरकि मै आम्हीसम बाबकठे नैगैलहुँ। बेनसे म्वार भैयन्हकठे जाक हुँकन कैदेओ, ‘मै म्वार बाबा ओ टुन्हक बाबा, ओ म्वार परमेश्वर ओ टुन्हक परमेश्वरकठे जाइटुँ।’”
18मरियम गैली, ओ चेलन कली, “मै प्रभुह देख्नु।” ओ ऊ उहाँक कहल बात हुँकन जनादेली।
येशू चेलन्हकठे देखपर्लक
मत्ती २८:१६-२०; मर्कूस १६:१४-१८; लूका २४:३६-४९
19उह दिन, अर्थात् हप्तक पैल्ह दिनिक सन्झ्या, यहूदीन्हक डरले चेलावँ ड्वार लगाक भित्तर बैठलरलह। येशू आक हुँकन्हक माझम ठह्रेइल, ओ हुँकन कल, “टुँहन शान्ति ह्वाए!” 20उहाँ अत्रा कैक हुँकन आपन हाँठ ओ क्वाखा देखैल। प्रभुह देख्क चेलावँ धेर खुशी हुइल।
21येशू फेदोस्र हुँकन कल, “टुँहन शान्ति ह्वाए! जसिक बाबा महीह पठैल, ओसहेँक मै फे टुँहन पठाइटुँ।” 22तबदोस्र उहाँ हुँकन्हकम साँस फुँक्ल ओ कल, “पवित्र आत्मा लेओ। 23ज्याकर पाप टुह्र क्षमा कर्ठो, हुँक्र क्षमा पैठ, ओ ज्याकर पाप टुह्र क्षमा नैकर्टो, हुँक्र क्षमा नैपैट।”#मत्ती १६:१९; १८:१८
येशू थोमकठे देखपर्लक
24येशू आइल समयम बाह्र जनमध्ये एक जन, दिदुमस कना थोमाजुन हुँकन्हकसँग नैरलह। 25और चेलावँ हुँकहीन कल, “हम्र प्रभुह देख्ली।”
तर ऊ हुँकन कल, “जबसम मै उहाँक हाँठम कील्ला ठ्वाकल डाम नैदेखम, ओ किल्लक डामम आपन अङ्ग्री नैडारम, ओ उहाँक क्वाखम आपन हाँठ नैडारम, तबसम मै विश्वास नैरकम।”
26एक हप्ता पाछ उहाँक चेलावँ फेदोस्र घरभित्तर रलह। थोमा फे सँग रलह। ड्वार लगाइल रह तर फे येशू भित्तर अइल, ओ माझम ठह्र्याक कल, “टुँहन शान्ति ह्वाए!” 27तब उहाँ आपन हाँठ देखैटी थोमह कल, “यिहाँ हेरो, आपन अङ्ग्री म्वार हाँठम डारो, ओ म्वार क्वाखम डारो! शङ्का जिन करो, बेनसे विश्वास करो।”
28थोमा उहाँह कल, “म्वार प्रभु, ओ म्वार परमेश्वर!”
29येशू हुँकहीन कल, “टुँ त महीह देख्लो तब विश्वास कर्लो, तर महीह बिना देख्ल विश्वास करुइयन कत्रा धन्यक हुइट।”
यी किताबक उद्देश्य
30येशू आपन चेलन्हक सामुन्ने और फे शक्तिशाली चिन्ह ओ काम धेर कर्ल, जौन बात यी किताबम लिख्गैल् नैहो। 31तर जत्रा बात यी किताबम लिखल बा, उ बातले परमेश्वरक छावा येशू जो ख्रीष्ट हुइट कैक टुह्र विश्वास करो, ओ विश्वासद्वारा उहाँक नाउँम जीवन पाओ कना उद्देश्यले लिखल बा।
Đang chọn:
यूहन्ना 20: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
