यूहन्ना 13
13
येशू चेलन्हक ग्वारा धुइलक
1मुक्ति-दिवस कना टिहार सुरु हुइटह। येशू यी संसार छोर्क आपन बाबकठे जैना समय अइटीबा कना बात उहाँह थाहाँ रलहन। उहाँ यी संसारम रहल आपन र्वाजल मनैन प्रेम करँट् ओ अन्तिमसम प्रेम कर्टीरल।
2येशू आपन चेलन्हकसँग सन्झ्यक खाना खाइटलह। उ ब्याला शैतान सिमोनक छावा यहूदा इस्करियोतक मनम उहाँह पक्रादेना विचार पैल्हहेँ डारदेरख्लहा। 3परमेश्वर बाबा उहाँह सक्कु अधिकार देरख्ल, ओ उहाँ परमेश्वरक तर्फसे अइलक हुइट, ओ परमेश्वरकठे घुम्क जउइयाबाट कना बात येशूह थाहाँ रलहन। 4उहओर्से येशू खाना खैटिखैटि उठ्ल ओ उप्रक झुल्वा काहर्क तौलिया कम्मरम बेर्ल। 5तबदोस्र पराटम पानी खन्ह्यैल ओ चेलन्हक ग्वारा धुइने आपनम ब्यारल तौलियाले हुँकन्हक ग्वारा प्वाँछलग्ल।
6ग्वारा धुइटी जाइबेर उहाँ सिमोन पत्रुसकठे पुग्ल त पत्रुस कल, “प्रभु, का अप्न म्वार ग्वारा धुइटी?”
7येशू हुँकहीन जवाफ देल, “मै का करटुँ टुँ आब नैबुझ्बो, तर पाछ बुझ्नेबाटो।”
8पत्रुस उहाँह कल, “अप्न म्वार ग्वारा कबु फे नैधुइनेहुइटी।”
येशू कल, “मै टुँहार ग्वारा नैधोदेहम कलसे टुँहार ओ म्वार कुछु सम्बन्ध नैरहुइया हो।”
9तब सिमोन पत्रुस उहाँह कल, “ओसिन हो कलसे ग्वारा केल नाही प्रभु, म्वार हाँठ ओ शिरसमेत धोदी।”
10येशू हुँकहीन कल, “लहास्याकल मनैयक ग्वारा बाहेक और कुछु धुइ नैपरट्, काकरकि उ सब शुद्ध बा। टुह्र शुद्ध बाटो, तर सबजन नाही।” 11काकरकि उहाँह पक्रुइया मनैया के हो कना बात उहाँह थाहाँ रलहन। उहोओर्से “टुह्र सबजन शुद्ध नैहुइटो” कैक उहाँ कल।
12हुँकन्हक ग्वारा धोक सेक्ल त काहर्क ढरल उप्रक लुगा घल्ल ओ फेदोस्र खाए बैठ्ल। तब उहाँ हुँकन कल, “मै टुन्हक लाग का कर्नु, टुह्र बुझ्लो? 13टुह्र महीह ‘गुरु ओ प्रभु’ कठो, यी बात ठीक कठो, काकरकि मै टुन्हक गुरु ओ प्रभु जो हुइटुँ। 14प्रभु ओ गुरु होक फे मै टुन्हक ग्वारा धोरख्नु कलसे टुह्र फे एक-दोसरजन्हक ग्वारा धुइपर्ठा। 15मै करअस टुह्र फे करो कैक मै टुँहन एकठो नमुना देखारख्नु।#लूक २२:२७ 16मै जाट्टीसे टुँहन कहटुँ, नोकर आपन मालिकसे बरा नैरहट्, ओ खबर अनुइया खबर पठुइयसे बरा नैरहट्।#मत्ती १०:२४; लूक ६:४०; यूह १५:२० 17यी बात जान्क टुह्र यिह अनुसार चल्बो कलसे, आशिष पउइयाबाटो।
आपन पक्राउबारे येशू बट्वइलक
मत्ती २६:२०-२५; मर्कूस १४:१७-२१; लूका २२:२१-२३
18“मै सबजन्हक विषयम नैकहठुइटुँ, मै जेहीह रोजरख्नु ओहीह चिह्न्ठुँ। तर ‘म्वारसँग रोटी खउइया म्वार विरोधम लात उठाइल’ कैक धर्मशास्त्रम लिखल बात पूरा हुइहीपर्ठा।#भज ४१:९
19“यी घटना हुइनासे आघहेँ मै टुँहन कहटुँ, जब घटना हुई तब मै उह हुइटुँ कैक टुह्र विश्वास कर्नेबाटो। 20जाट्टीसे मै टुँहन कहटुँ, जेहीह मै पठैठुँ, ओहीह स्वीकार करुइया महीह स्वीकार कर्ठा, ओ महीह स्वीकार करुइया महीह पठुइयह स्वीकार कर्ठा।”#मत्ती १०:४०; मर्क ९:३७; लूक ९:४८; १०:१६
21यी बात बट्वाक सेक्ल त येशू आत्मम महादुःखीत हुइल ओ स्पष्ट रूपले कल, “मै टुँहन जाट्टीसे कहटुँ, टुन्हक बीचमसे एक जन महीह पक्रादेहुइया बा।”
22येशू यी बात क्याकर बारेम कलक हुइट कैक नैजान्क चेलाहुँक्र एक-दोसरजहन हेरिकहेरा करलग्ल। 23उहाँक प्रेम कर्ना चेलाजुन उहाँकम ओमर्क बैठल रह। 24तब सिमोन पत्रुस उहाँकम ओम्रल चेलह इशारा कर्टी कल, “उहाँह पुछो त, उहाँ यी बात क्याकर बारेम कलक हुइट?”
25उ चेला येशूकम ओम्रल-ओम्रल पुछल्, “प्रभु, उ मनैया के हो?”
26येशू कल, “जेहीह मै रोटीक टुक्रा टठ्यक रसम बोर्क देहम, म्वार कहल मनैया उह हो।” तब उहाँ रोटीक टुक्रा लेल ओ टठ्यक रसम बोर्क सिमोनक छावा यहूदा इस्करियोतह देल। 27यहूदा रोटी लेटिकी वाकर मनम दुष्ट शैतान पैँठलस।
तब येशू ओहीह कल, “टुँ ज्या करक लाग बाटो उ काम झट्ट कैडारो।” 28येशू यी बात काजे ओहीह कल कैक उहाँ खाए बैठल मनै कौनोजन फे नैबुझ्ल। 29कौनो-कौनोजन, यहूदकठे पैँसक थैली बाटस, उहओर्से येशू ओहीह टिहारक सामान किन या गरीबन कुछु चिज दी कना ठन्ल। 30तब यहूदा रोटीक टुक्रा खैटिकी बाहर निकरगैल्। उ ब्याला रात होस्याकल रह।
पत्रुसक इन्कारबारे आघहेँ कलक
मत्ती २६:३१-३५; मर्कूस १४:२७-३१; लूका २२:३१-३४
31यहूदा गैल् त येशू कल, “आब मै मनैयक छावक महिमा प्रकट हुउइया बा, ओ म्वारम परमेश्वरक महिमा प्रकट हुउइया बा। 32यदि परमेश्वरक महिमा छावकम प्रकट हुउइया बा कलसे, परमेश्वर फे आपनम छावक महिमा प्रकट कर्नेबाट, ओ यी काम उहाँ झट्टहेँ कर्नेबाट।
33“हेरो लर्काओँ, कुछ समयसम केल मै टुन्हकसँग रहम। टुह्र महीह खोज्नेबाटो, ओ जसहेँक मै यहूदीन कनहुँ, ओसहेँक आब मै टुँहन फे कहटुँ, ‘मै जहाँ जाइटुँ, उहाँ टुह्र आइ नैसेक्टो।’#यूह ७:३४
34“मै टुँहन एकठो लौव आज्ञा देहटुँ, टुह्र एक-दोसरजहन प्रेम करो। जसहेँक मै टुँहन प्रेम कैरख्नु, ओसहेँक टुह्र फे एक-दोसरजहन प्रेम करपर्ठा।#यूह १५:१२,१७; १ यूह ३:२३; २ यूह ५ 35टुह्र एक-दोसरजहन प्रेम कर्बो कलसे, यिह बातले सबजन टुह्र म्वार चेला हुइटो कैक चिन्ह्नेबाट।”
36सिमोन पत्रुस उहाँह कल, “प्रभु, अप्न कहाँ जाइटी?”
येशू कल, “मै जहाँ जाइटुँ, टुँ आब म्वार पाछ लाग्क आइ नैसेक्टो, तर पाछ त टुँ म्वार पाछ लग्नेबाटो।”
37पत्रुस कल, “प्रभु, काजे मै आब अप्नक पाछ-पाछ आइनैसेकम? मै त अप्नक लाग मुना फे तयार बाटुँ।”
38येशू कल, “का टुँ म्वार लाग मुना फे तयार बाटुँ कहटो? मै जाट्टीसे टुँहीन कहटुँ, आज मुर्घा बस्नासे आघ टुँ तीनचो ‘मै ओहीह चिह्न्बोचिह्न्बो नैकर्टुं’ कैक महीह इन्कार कर्बो।”
Đang chọn:
यूहन्ना 13: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
