प्रेरित 5
5
हननिया ओ सफिरा
1तर हननिया नाउँक एकठो मनैया रलह। ऊ ओ हुँकहार गोसिन्या सफिरा आपन जग्गा बेँच्ल। 2हुँक्र जग्गा बेँच्लक आकुर रूप्या आपन लाग नुकैल ओ बाँकी रूप्या हननिया प्रेरितन्हकठे अन्ल।
3तब पत्रुस कल, “हननिया, काजे टुँ आपन मनम शैतानह राज कर देलो ओ पवित्र आत्मसे झूट बोल्लो? जग्गा बेँच्क आकुर पैँसा काजे नुकैलो? 4बेँच्नासे आघ उ जग्गा टुन्हक्के नैरह का? जग्गा बेँच्लो त, उहिँमसे आइल पैँसा फे टुन्हक्के नैरह का? असिन कर्ना विचार टुन्हक मनम कसिक आइल? टुह्र मनैनसे झूट नैबोल्लो तर परमेश्वरसे झूट बोल्लो।”
5यी सुन्टीकि हननिया गिर्ल ओ मुगैल। यी घट्ना सुनुइयन सबजन डरले कायल हुइल। 6तबदोस्र जवान-जवान मनै आक हननियक लाश लुगले लपेट्ल ओ बाहर लैजाक गारदेल।
7करीब तीन घण्टा पाछ हननियक गोसिन्या अइली। हुँकहीन आपन गोस्या मुलक थाहँ नैरलहिन। 8पत्रुस हुँकहीन पुछ्ल, “महीह कहो त, का टुह्र अत्रहे पैँसम आपन जग्गा बेँच्लहो?” ऊ कली, “हजुर, जग्गक म्वाल अत्रहे हो।”
9उहओर्से पत्रुस हुँकहीन कल, “प्रभुक आत्मह रिस लगैना बातम टुह्र कसिक सहमत हुइलो? हेरो! टुँहार गोस्सेह गरुइयन ड्वारिटर आपुगरल। हुँक्र टुँहीन फे गारक लाग लैजहीँ।”
10ऊ अत्रा बात सुन्टीकि पत्रुसक ग्वारटर गिर्ली ओ मुगैली। जवान-जवान मनै भित्तर अइल त, हुँकहीन मुवल देख्ल। उहओर्से हुँक्र हुँकहीन बाहर लैजाक हुँकहार गोस्सेक पञ्ज्र गारदेल। 11यी घटना हुइल् त सारा मण्डलीम ओ यी बात सुनुइया सबजन्हकम डर हुइलन।
बेराम परल धेर मनै चोखैलक
12प्रेरितहुँक्र मनैन्हक बीचम धेर अचम्मक काम करँट् ओ अचम्मक चिन्ह देखाइँट्। सब विश्वासीहुँक्र मन्दिरक एकठो ठाउँम जम्मा हुइँट्, ओहीह सोलोमनक बरण्डा कहँट्। 13हुइना त मनै हुँकन् आदर करँट्, तर हुँकनसे मिल्ना आँट कुई फे नैकरँट्। 14जे होस, धेर जन, पुरुष ओ स्त्रीहुँक्र, प्रभु येशूम विश्वास कर्टिगैल ओ हुँकन्हक संख्या बहर्टीगैलन। 15अचम्मक काम हुइलकओर्से मनै गल्ली-गल्लीम बेरम्हेन आन्क गोन्द्रीम, खट्टेम सुतादेहँट्। पत्रुस आइबेर हुँकहार छैह्याँ केल हुइलसे फे हुँकन्हकम परन कना आशा करँट्। 16यरूशलेमक आसपासम रहल सहरसे फे धेर मनै अइल। हुँक्र बेरम्हेन ओ भूत लागल मनैन आनँट् ओ हुँक्र सबजन चोखाजाइँट्।
प्रेरितहुँकन सतावट
17प्रधान पूजारी ओ हुँकहार सदुकी समूहक सङ्घरेन् प्रेरितन्हक बिह्र मुव लग्ल। 18हुँक्र प्रेरितहुँकन पकर्क जेलम थुनदेल। 19तर उह रात परमेश्वरक पठाइल एकठो स्वर्गदूत जेलक ड्वार उभक्क हुँकन् बाहर निक्रैल ओ कल, 20“आब जाओ, ओ मन्दिरम ठह्र्याक यी लौव जीवनक बारेम मनैन सुनाओ।”
21यी सुन्क प्रेरितहुँक्र बिहान्नी मन्दिरम गैल ओ मनैन सिखाइलग्ल।
जब प्रधान पूजारी ओ हुँकहार मनै अइल, तब हुँक्र इस्राएलक सब अगुवन महासभम बलैल ओ जेलमसे कैदीन आनो कैक आदेश देल। 22तर सिपाहीहुँक्र जेलम गैल त प्रेरितहुँकन नैदेख्ल। तब हुँक्र घुम्क अइल ओ असिन खबर देल, 23“जेलक ड्वार पक्कासे लगाइल रह। द्वरपालेहुँक्र ड्वारीम लग्लरलह। तर हम्र ड्वार उभक्ली त किहुह फे नैदेख्ली।” 24हुँकन्हक बात सुन्ल त, मन्दिरक सिपाहीन्हक कप्तान ओ मुख्य पूजारीहुँक्र बक्क पर्ल। हुँक्र आब का-का हुइठा? कैक जातसे अक्मकागैल।
25उहब्याला एकठो मनैया आइल ओ कहल, “म्वार बात सुनी, अप्नहुँक्र कैद करल मनै त मन्दिरम ठह्र्याक मनैन सिखाइट।” 26तब कप्तान ओ सिपाहीहुँक्र प्रेरितहुँकन लिह गैल। हुँक्र मनै पत्थ्रले मरहीँ कना डरले हुँकन् जबरजस्ती नैकैक अन्ल।
27हुँक्र प्रेरितहुँकन महासभम उपस्थित करैल। तबदोस्र प्रधान पूजारी हुँकन पुछ्ल, 28“हम्र टुँहन ‘आबठेसे येशूक बारेम किहुह जिन सिखैहो’ कैक चेताउनी देरख्लही। तर टुह्र त आपन शिक्षा सारा यरूशलेमम फैलाडर्लो ओ येशूह मुवैलक दोष हमन लगाइ चाहटो।”#मत्ती २७:२५
29तबदोस्र पत्रुस ओ और प्रेरितहुँक्र कल, “हम्र परमेश्वरक कहल मान छोर्क टुन्हक कहल मान नैसेक्टी। 30येशूह क्रूसम कील्ला ठोक्क अप्नहुँक्र मुवैलही। तर हमार पितापुर्खन्हक परमेश्वर उहाँह मुवलमसे फेदोस्र जियारख्ल। 31इस्राएलीहुँक्र आपन पापी मन परिवर्तन कैक परमेश्वरकठे घुमहीँ ओ क्षमा पैहीँ कैक परमेश्वर उहाँह शासक ओ मुक्ति देहुइया बनाक आपन दाहिन पाञ्जर बैठारख्ल। 32हम्र यी बातक साक्षी हुइटी, ओ परमेश्वर आपन आज्ञापालन करुइयन देलक पवित्र आत्मा फे साक्षी देटीबाट।”
33जब सारा सभक मनै यी बात सुन्ल, तब हुँक्र रिसले चूर हुइल ओ प्रेरितहुँकन मुवैना विचार कर्ल। 34गमलिएल नाउँक एक जन फरिसी रलह। ऊ मोशक व्यवस्थक एकठो गुरु रलह ओ सब यहूदीहुँक्र उहाँह आदर करँट्। ऊ सभम ठह्रेइल ओ एक घरिक लाग प्रेरितहुँकन बाहर पठैना आदेश देल। 35तबदोस्र ऊ सभम जुटल मनैन् कल, “आदरणीय इस्राएलीहुँक्र, अप्नहुँक्र यी मनैन का कराइक लाग बाटी? होस करी! 36कुछ वर्ष आघ थूदास नाउँक एकठो मनैया अप्न महान व्यक्ति रलक दाबी करल। लगभग चार सय जन वाकर पाछ लागरलह, तर ऊ मुवापाइल त, वाकर पाछ लगुइयन सबजन तितरबितर हुइल ओ हुँकन्हक नाउँनिसान हेरागैलन। 37तबदोस्र पाछ जनगणना कर्ना समयम गालील क्षेत्रक यहूदा देखपरल। धेर मनै वाकर पाछ लग्ल। तर ऊ फे मुवापाइल ओ वाकर चेलावँ तितरबितर हुइल। 38उहओर्से यी मामिलम मै अप्नहुँकन् का सल्लाह देह चाहटुँ कलसे अप्नहुँक्र हुँकन् कुछु जिन कराई। हुँकन् छोरदी। काकरकि यदि हुँक्र मनैन्हक बनाइल योजना ओ कामम लागल हुइहीँ कलसे, उ अपन्हे हेराजाई। 39तर यदि हुँक्र परमेश्वरक योजना ओ कामम लागल हुइहीँ कलसे, अप्नहुँक्र हुँकन् र्वाक नैसेक्नेहुइटी। अप्नहुँक्र परमेश्वरक विरोधम उठल केल ठहर्बी।”
40महासभक सदस्यहुँक्र हुँकहार सल्लाह मन्ल। हुँक्र प्रेरितहुँकन भित्तर बलाक कोर्रा लगैल, ओ येशूक बारेम किहुसे जिन बोलहो कैक हुँकन आदेश देल ओ छोरदेल। 41येशूम विश्वास कर्लक कारण दुःख ओ अपमान सह पैना अनुमति पैलकम प्रेरितहुँक्र आनन्दित हुइटी सभामसे निकर्क गैल। 42हुँक्र हरेक दिन मन्दिरम ओ घर-घरम जाक “येशू जो ख्रीष्ट हुइट” कना खुशीक खबर सिखैना ओ प्रचार कर्ना काम कर्टीरल।
Đang chọn:
प्रेरित 5: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
