प्रेरित 23
23
1पावल महासभओर एकटक लगाक हेर्ल, ओ कल, “हेरो भैयौ, मै आजसम परमेश्वरक नजरम पवित्र मनले जीवन बितारख्नु।” 2यी सुन्क प्रधान पूजारी हननिया पावलक लग्घ ठह्र्याइल मनैन हुँकहार मुहम ठोक्ना आदेश देल। 3तब पावल हुँकहीन कल, “टुँ कपटी! टुँहीन परमेश्वर ठोकुइयाबाट। टुँ कसिन न्यायाधीश हुइटो? टुँ त व्यवस्था अनुसार न्याय करक लाग बैठरलो। तर महीह ओसिक ठ्वाकक् लाग आदेश देक अपन्हे व्यवस्था भङ्ग कर्ठो!”#मत्ती २३:२७-२८
4पावलक लग्घ ठह्र्याइल मनै कल, “का टैँ परमेश्वरक नियुक्त करल प्रधान पूजारीक अपमान कर्ठ्या?”
5पावल कल, “भैयौ, उहाँ प्रधान पूजारी हुइट कैक मै नैचिह्न्लरनहुँ। काकरकि ‘टैँ आपन मनैन्हकम शासन करुइयक विरोधम खराब बात जिन ब्वालस’ कैक लिखल बात म्वार लाग थाहाँ बा।”#प्रस २२:२८
6जब पावल उ महासभम एक दल सदुकीहुँक्र ओ और दल फरिसीहुँक्र बाट कैक थाहाँ पैल, तब ऊ बरा बोलीले कल, “हेरो भैयौ, मै एकठो फरिसी हुइटुँ ओ म्वार पुर्खाओँ फे फरिसी जो रलह। मुवल मनै फेदोस्र जिजैहीँ कना म्वार आशा रलक कारण यिहाँ म्वार मुद्दा चलल् बा।”#प्रे २६:५; फिलि ३:५ 7पावलक कहल यी बातले फरिसी ओ सदुकीहुँकन्हक बीचम झग्रा हुइलन, ओ सभम फूट हुइल्। 8काकरकि सदुकीहुँक्र मनै मुलसे फेदोस्र जिना बातम विश्वास नैकरँट्, ओ स्वर्गदूत या आत्मा नैहो कहँट्। तर फरिसीहुँक्रजुन यी सब बातम विश्वास करँट्।#मत्ती २२:२३; मर्क १२:१८; लूक २०:२७
9यी बातले महासभम हल्लाखल्ला मचगैल्। फरिसी दलक कुई-कुई शास्त्रीहुँक्र ठह्र्याक सदुकीन्हक विरोध कर्टी कहलग्ल, “हम्र त यी मनैयक कुछु गल्ती नैदेख्टी। यदि आत्मा या स्वर्गदूत यहीसे बोल्लह कलसे फे, का हुइल् त?” 10हुँकन्हक बीचम अत्रा चर्काचर्की परगैलन, कि हुँक्र पावलह छिङ्टिछिङ्टा पारडरहीँ कैक सेनापति डरागैल। उहओर्से ऊ सिपाहीहुँकन पावलह बल प्रयोग कैक हुँकन्हक बीचमसे ब्यारेकम लैजैना आदेश देल।
11उ रात प्रभु पावलकठे देखपर्ल ओ कल, “हिम्मत जिन हारो, पावल, यिहाँ यरूशलेमम टुँ म्वार बारेम जसिक साक्षी बक्लो, रोमम फे टुँ म्वार बारेम ओसहेँक साक्षी बकपर्ठा।”
पावलह मुवैना योजना
12बिहान हुइल् त कुछ यहूदीहुँक्र पावलह मुवैना योजना बनैल। हुँक्र “हम्र पावलक हत्या नैकरट्सम ना कुछु खैबी, ना कुछु पिबी” कैक किर्या खैल। 13पावलह मुवाइक लाग योजना करुइयन चालीस जनसे फे धेर रलह। 14हुँक्र मुख्य पूजारीन्हकठे ओ और अगुवन्हकठे जाक कल, “हम्र पावलक हत्या नैकरट्सम ना कुछु खैबी, ना कुछु पिबी कैक किर्या खारख्ली। 15आब अप्नहुँक्र ओ महासभक और सदस्यन मिल्क सेनापतिह ‘हम्र पावलह थप सोधपुछ कर चाहटी’ कैक ओहीह ब्यारेकमसे झिकाई। ऊ अइटी-अइटी हम्र डगरीहम ओहीह सिध्यादेहुइयाबाटी।”
16पावलक भैनावाजुन पावलह मुवैना हुँकन्हक योजना थाहाँ पाडर्ल। उहओर्से ऊ ब्यारेकम जाक यी बात पावलह जनादेल।
17पावल तुरुन्त एकठो कप्तानह बलाक कल, “सेनापतिह आबहेँ जनाइपर्ना हिँकहार एकठो बात बाटन, हिँकहीन उहाँकठे पुगादी।”
18कप्तान पावलक भैनावह सेनापतिकठे लैगिल ओ कल, “कैदम परल पावल महीह बलाक ‘सेनापतिसे बिन्ती करपर्ना हिँकहार एकठो बात बाटन, हिँकहीन उहाँकठे पुगादी’ कलकओर्से मै यहीह अप्नकठे आनरख्नु।”
19सेनापति वाकर हाँठ पकर्क एकओँहर लैगिल ओ पुछ्ल, “टैँ महीह का कहक लाग बाट्या?”
20पावलक भैनावा कल, “यहूदीहुँक्र पावलह थप सोधपुछ कर्ना बहाना बनाक काल हुँकहीन महासभम झिकाइक लाग अप्नसे बिन्ती करुइयाबाट। 21तर अप्नहुँकन्हक कहल जिन मन्बी, काकरकि चालीससे फे धेर मनै ‘हम्र पावलक हत्या नैकरट्सम ना कुछु खैबी, ना कुछु पिबी’ कैक किर्या खारख्ल। हुँक्र पावलह मुवाइक लाग नुकल बाट, ओ अप्न सहमति जनादेबी कना आशम बाट।”
22यी सुन्क सेनापति पावलक भैनावह “टैँ महीह यी खबर देहल बात किहुह जिन कहस” कैक कल ओ ओहीह पठादेल।
पावल कैसरियम
23तबदोस्र सेनापति दुइ जन कप्तानहुँकन बलाक कल, “दुइ सय जन सिपाहीन, सहत्तर जन घोडचढी सिपाहीन ओ दुइ सय जन भाला बोक्ल सिपाहीन तयार पारो। हुँक्र आज रात नौ बजेओर कैसरिया सहरम जाइक लाग तयार हुइपर्ठा। 24पावलक लाग फे घोर्वक व्यवस्था कैदेहो, ओ ओहीह सुरक्षासहित बडाहाकिम फेलिक्सकठे पुगादेहो।”
25तबदोस्र सेनापति बडाहाकिम फेलिक्सह यी चिठी लिख्ल:
26“माननीय बडाहाकिम फेलिक्स ज्यू, मै क्लौडियस लुसियसक अभिवादन!
27पावल कना यी मनैयह यहूदीहुँक्र पक्रलह ओ मुवादेहक लाग रलह। तर यी त रोमी नागरिक हो कैक जब मै थाहाँ पैनु, तब मै सिपाहीहुँकन बल प्रयोग कर लगाक यहीह हुँकन्हक हाँठमसे छुटैनु। 28हुँक्र काजे यहीह दोष लगाइट कैक पत्ता लगाइक लाग मै यहीह हुँकन्हक महासभम हाजिर करैनु। 29तर यहीह मृत्युदण्ड देहपर्ना या कैद करपर्ना किसिमक अपराध करल मै कुछु नैपैनु। हुँक्र आपन व्यवस्थक विषयम यहीह दोष लगारख्लह। 30यहूदीहुँक्र यहीह मुवैना योजना बनारख्ल कैक मै थाहाँ पैनु। उहओर्से मै तुरुन्त यहीह अप्नकठे पठारख्नु। यहीह दोष लगुइयन फे अप्नकठे जो उजुर करहो कैक मै कैरख्नु।”
31सिपाहीहुँक्र सेनापतिक आदेश अनुसार पावलह उह रात एन्टिपाट्रिस सहरम पुगादेल। 32द्वासर दिन, पैदल गैल् सिपाहीहुँक्र ब्यारेकम घुम्ल ओ घोडचढी सिपाहीहुँक्र पावलह कैसरियम लैगिल। 33घोडचढी सिपाहीहुँक्र कैसरियम पुग्ल त, सेनापतिक लिखल चिठीसहित पावलह बडाहाकिमक आघ हाजिर करैल। 34बडाहाकिम चिठी पहर्क सेक्ल त, पावलह पुछ्ल, “टुँहार घर कहाँ हो?” पावल कल, “किलिकिया क्षेत्रम बा।” 35बडाहाकिम कल, “टुँहीन दोष लगुइयन यिहाँ अइहीँ त, टुँहार मुद्दा मै अपन्हे हेरम,” ओ पावलह हेरोदक दरबारम थुन्लरहहो कैक हुकुम देल।
Đang chọn:
प्रेरित 23: thl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2020, Wycliffe Bible Translators, Inc. All rights reserved.
