Ʋrɔm 11
11
A Naaŋmɩn bɛ jɛ a Ɩsɩrayɛl nɩbɛ bɛr ɛ
1A na ɩ à ŋá a, sowru n'a ɩ̃ sowre: a Naaŋmɩn ya jɛ n a ʋ nɩ-bʋʋrɛ Ɩsɩrayɛl bɛr a baarɩ bɩɩ? Lɛ bɛ n'a towtow ɛ! Bʋ̃ʋ n'ʋ vɛ̃, a mãa tɔr za ɩ n Ɩsɩrayɛl nɩr, Abraham bʋʋrɛ, Bɛ̃zamɛ dɔwlʋ nɩr. 2Naaŋmɩn bɛ jɛ a ʋ nɩbɛ ʋ na tɩ dãw kaa ír a bɛr ɛ. Mɛ̃ nyɩ taa bãw a lɛ a Sɛb-sõw na yel a ʋ zie kãw, a lɛ a naaŋmɩn-ƴɛ̀r-manɛ Eli na tɩ manɛ a Ɩsɩrayɛl nɩbɛ sãwna a Naaŋmɩn zie a? 3«Sore e, bɛ kʋ n a fʋ ƴɛ̀r-manbɛ, ɛ́ da a fʋ bàwr-maal-kube lɔb: mãa yõ n'ʋ cɛ, ɛ́ bɛ bɔbr a ɩ̃ kʋb#11:3 Nyɛ̃ 1Na 19.10..» 4Ɛcɛ bʋ̃ʋ n'ʋ a Naaŋmɩn sɔw ʋ? «Ɩ̃ cãà na bɛr nɩbɛ túr-ayopõi (7 000) a ɩ̃ ƴãw, a bɛl na bɛ gbĩ dume a tɩɩb na dɩ kɛ́ Báàl a niŋé a#11:4 Nyɛ̃ 1Na 19.18..»
5Lɛ mɩ̀ n'a, a ƴɛrɛŋa, nɩbɛ ŋmãa blãlɛ, a Naaŋmɩn na kaa ír a ʋ maalʋ zũú a, mɩ̀ cãà be be. 6Ʋlɛ wa kaa ír bɛ a ʋ maalʋ zũú a, a bɛ ɩ-ɩrɩ zũú bɛ n'a ɩ, alɛ bɛ ɩ lɛ a, a maalʋ bɛ cãà ɩ maalʋ ɛ.
7Ŋmɩŋmɩn za n'a? A Ɩsɩrayɛl nɩbɛ bɛ páw a ʋlɩ bom nɛ bɛ na tɩ bɔbr a ɩ. Ɛcɛ a bɛlɩ dem a Naaŋmɩn na kaa ír a, bɛl páw ʋ na. A ŋmaarɛ bɛl a, bɛ kpawl'ɩ bɛ za, 8mɛ̃ a Sɛb-sõw na yere a: «Wa tɩ tɔ a dɩ̃a bibir a, Naaŋmɩn ɩ na a bɛ tɩɛrʋ ʋ gbini, ʋ ƴãw bɛ nɩ mimie kɛ́ bɛ ta nyɛrɛ nɩ ɛ, ƴãw bɛ tobe kɛ́ bɛ ta wone nɩ ɛ#11:8 Nyɛ̃ Wl-ayi 29.3, Ɩza 6.10..» 9A nãà Daviir mɩ̀ yere nɩ à ŋá:
«A bɛ cuw dɩb, a ɩ bɛrɩ nɩ mɩ̃ɛ a bɛ zie,
a ɩ fa-loba zie nɩ dɔwrʋ
na sɛwnɩ bɛ a páwfʋ zie.
10A bɛ mimie,
a zɔ̃wnɛ ta tɩ cãà nyɛrɛ ɩ,
ɩ bɛ tuo tuor kʋralɛ gʋr'ɩ zɩgɛ.»
11A na ɩ à ŋá a, sowru n'a ɩ̃ sowre: lo ɛ́ ta lɛb ìr ƴãw n'a a Zifʋ mɩnɛ ŋmɛ a gbɛ́r bɩɩ? Lɛ bɛ n'a towtow ɛ! Ɛcɛ a bɛ sãwna ɩ na a nɩ-bʋʋr-yoru nyɛ̃ a faafʋ, kɛ́ nyuur tʋ̃ɔ́ ɩrɛ a Zifʋ mɩnɛ. 12A bɛ sãwna wa ƴãw a tẽ-daa naalʋ a, a bɛ nʋɔr na siwri a wa ƴãw a nɩ-bʋʋr-yoru naalʋ a, ŋmɩŋmɩn n'a a pãa nãà ŋmɛ̃ a lɛn daar bɛ za nãà wa nyɛ̃ a faafʋ a!
A nɩ-bʋʋr-yoru faafʋ yele
13Ƴɛrɛŋa a, a nyɩɩm nɩ-bʋʋr-yoru zie n'a ɩ̃ ƴɛ̀rɛ: mãa n'ɩ a nɩ-bʋʋr-yoru nɩ-tona, ɛ́ a lɛ pʋɔ a, ɩ̃ íre nɩ a ɩ̃ tõ-nʋɔr ŋa yúor, 14tɩɛrɛ nɩ k'ɩ̃ɩ ɩ a ɩ̃ bʋʋrɛ nyuur ìr, ɩ̃ tʋ̃ɔ́ faa bɛ mɩnɛ. 15A bɛ vɩrɩ-bɛrʋ wa ɩ a Naaŋmɩn nɩ a tẽ-daa lɛb kpɛ taa a, a pãa na ŋmɛ̃ n ŋmɩn a lɛn daar ʋ nãà wa lɛb de bɛ a? A na sɩrɩ na ɩ kũu pʋɔ bɛ na yi kpɛ nyɔ-vʋʋrʋ pʋɔ a!
16Bɛlɛ wa de a dipɛ̃-dãw kʋ̀ a Naaŋmɩn a, a dipɛ̃ za n'a bɛ mɩ̀ de kʋ̀ ʋ. Bɛlɛ wa de tɩɛ kãw nyɩgɛ kʋ̀ a Naaŋmɩn a, bɛ mɩ̀ de nɩ a wuli kʋ̀ ʋ#11:16 Bɛ na tʋ̃ɔ́ na wõ a ƴɛ̀r-gbɛl ŋa tu n à ŋá: a dipɛ̃-dãw nɩ tɩ nyɩgɛ ɩ n a Ɩsɩrayɛl nɩbɛ sãàkʋm-kore a Naaŋmɩn na tɩ kaa ír a: Abraham nɩ Ɩzaakɩ mɩnɛ. Mɛ̃ a lɛ a Naaŋmɩn na so bɛ a, lɛ n'a ʋ mɩ̀ cãà so a bɛ bʋʋrɛ. Nyɛ̃ Sɔr-n 15:19-21.. 17A Ɩsɩrayɛl nɩbɛ wa ɩ mɛ̃ olivʋ tɩ-kʋ́ɔra a Naaŋmɩn na cɛ a wuli a mɩnɛ bɛr a, ɛ́ a fʋ̃ʋ, na bɛ ɩ Zifʋ ɛ́ ɩ mɛ̃ mʋ̃ɔ pʋɔ olivʋ tɩɛ a, a Naaŋmɩn wa de fʋ ɓɛrɩ nɩ a olivʋ tɩ-kʋ́ɔra, fʋ pʋɔ a ʋ wuli na cɛ a pʋɔ páwr a tɩ-nyɩgɛ kʋ̃ɔ a, 18ta zɛwr fʋ tʋɔra mɛ̃ fʋ zuo nɩ a wuli bɛ na cɛ bɛr a ɩ. Fʋ̃ʋ wa zɛwr fʋ tʋɔra mɛ̃ fʋ zuo a na a, fʋ̃ʋ bãwnɩ a fʋ̃ʋ na bɛ n'ʋ so a tɩ-nyɩgɛ be a, a tɩ-nyɩgɛ n'a so fʋ be.
19Mɛ̃ fʋ taa na yel mɛ̃: «Bɛ cɛ n a wuli á ŋá ŋma, kɛ́ bɛ tʋ̃ɔ́ de mɛ̃ ɓɛr'ɩ a tɩɛ lɩɛr'ɩ a.» 20Sɩza n'a, bɛ cɛ a na ŋma bɛr, a na bɛ sàw de a ƴãw, ɛ́ fʋ̃ʋ a, a fʋ sàw-deb zũú n'a fʋ lɩɛr'a. Ɛcɛ taa wa ɩrɛ pɔ̀l-ɩb ɛ, nɩ̃ɛ vɛ̃ kɛ́ zɔrɛ a Naaŋmɩn. 21Bʋ̃ʋ n'ʋ vɛ̃, a Naaŋmɩn bɛ wa jɩɩrɩ a tɩɛ wuli tɛɛ za bɛr a, a pɛr lɛ k'aa Zifʋ mɩnɛ a, ʋ mɩ̀ kʋ̃ jɩɩrɩ fʋ bɛr ɛ. 22A na ɩ à ŋá a, jɩ́r nyɛ̃ a lɛ a Naaŋmɩn vɩɛlʋ na ɩ a, nɩ a Naaŋmɩn na bɛ tɛr dɩ̃ɛnʋ a: ʋ bɛ tɛr dɩ̃ɛnʋ a bɛlɩ dem na lo a zie ɩ, ɛ́ tɛr a ʋ vɩɛlʋ ɩb a fʋ zie. Ɛcɛ a fɛr'a fʋ cãà ɩrɛ ƴãwn a vɩɛlʋ ŋa ƴãw, alɛ bɛ ɩ lɛ, bɛ mɩ́ na cɛ b'a ŋmãa bɛr mɛ̃ wule a. 23A Zifʋ mɩnɛ ƴãw a, bɛlɛ wa lɛb sàw de a, Naaŋmɩn na ɩ na bɛ lɛb ɓɛrɩ a tɩɛ, bʋ̃ʋ n'ʋ vɛ̃, ʋ tɛr'ɩ fãw na ɩ bɛ lɛb ɓɛrɩ a tɩɛ. 24Fʋ̃ʋ a, fʋ ɩ n mʋ̃ɔ pʋɔ olivʋ tɩɛ wule tɔr za, a Naaŋmɩn na ŋmãa wa ɓɛrɩ nɩ olivʋ tɩ-kʋ́ɔra a, ɛcɛ à ŋá bɛ n'a a ɩrɛ ɩ. A Zifʋ mɩnɛ bɛl a, bɛ ɩ n a olivʋ tɩ-kʋ́ɔra ŋa wuli tɛɛ za: a na ɩ à ŋá a, Naaŋmɩn na pãa nɩ̃ɛ na tʋ̃ɔ́ ɩ a lɛb ɓɛrɩ a al mɩŋa tɩɛ ƴãw mɔlɛ lɛ.
A Ɩsɩrayɛl bʋʋrɛ na na pãa nyɛ̃ a faafʋ a
25 Yɛbr i, ɩ̃ bɔbr'a k'ɩ̃ɩ ɩ nyɩ bãw a Naaŋmɩn yel-sɔwla ŋa, kɛ̀ nyɩ taa wa de nyɩ tʋɔra bʋɔlɛ yã-bãwnbɛ ɩ: a Ɩsɩrayɛl nɩbɛ ŋmãa na kpawl'a, ɛ́ gù a nɩ-bʋʋr-yoru za tɩ nyɛ̃ a faafʋ. 26Ɛ́ à à ŋá n'a a Ɩsɩrayɛl nɩbɛ za na nyɛ̃ a faafʋ, mɛ̃ à ŋá a Sɛb-sõw na yere a:
«Sɩyɔ̃ tẽw n'a a Faarɛ na yi wa,
ʋ na ɩ na a Naaŋmɩn bɛ-ƴãwfʋ ɩ-ɩrɩ
baarɩ a Zakɔb bʋʋrɛ zie.
27Ɛ́ a Wõ-taa n'ɩ ŋa ɩ̃ na na maal'ɩ bɛ,
a lɛn daar ɩ̃ nãà wa ír a bɛ yel-bebe bɛr a#11:27 Nyɛ̃ Ɩza 59.20-21..»
28A bɛ Yel-nʋ̃ɔ̀ bɛ-sàw-deb ƴãw wa n'a a, bɛ ɩ n Naaŋmɩn dɔ̃ dem a nyɩɩm vla ƴãw, ɛcɛ alɛ wa ɩ a kaa-íru a Naaŋmɩn na kaa ír bɛ a ƴãw n'a a, ʋ cãà na nɔnɛ bɛ, a bɛ sãàkʋm-kore zũú. 29Bʋ̃ʋ n'ʋ vɛ̃, a Naaŋmɩn maalʋ nɩ a ʋ bʋɔlʋ bɛ tɛr lɩɛb-bɛrʋ ɛ. 30A koro za a, nyɩ tɩ zawr'ɩ a Naaŋmɩn nʋɔr, ɛcɛ ƴɛrɛŋa a, ʋ zɔ n a nyɩ nɩbaalʋ, a Ɩsɩrayɛl nɩbɛ na zawrɩ a nʋɔr a ƴãw. 31Lɛ n'a a bɛl mɩ̀ a ƴɛrɛŋa, bɛ zawrɩ a Naaŋmɩn nʋɔr, k'ʋʋ tʋ̃ɔ́ zɔ a nyɩ nɩbaalʋ, kɛ́ a bɛl mɩ̀ tʋ̃ɔ́ páw a nɩbaalʋ zɔba ŋa tɔr za a ƴɛrɛŋa. 32Bʋ̃ʋ n'ʋ vɛ̃, Naaŋmɩn pàw nɩ a nɩsaalbɛ za a nʋɔr-zawrʋ gaso pʋɔ, k'ʋʋ tʋ̃ɔ́ wul bɛ za a ʋ su-ɓaarʋ.
A Naaŋmɩn kpɛnʋ na bɛ tɛr manʋ a
33Nyɛ̃ a Naaŋmɩn naalʋ na bɛ vʋʋr a! Nyɛ̃ a ʋ yã-bãwfʋ nɩ a ʋ yele bãwfʋ na zulme a! Nyɛ̃ a ʋ ƴɛ̀rʋ-dɩb na bɛ tɛr bãwfʋ, ɛ́ a ʋ sɛ́ɛ bɛ tɛr bɩ́ɛrʋ a! 34Mɛ̃ à ŋá a Sɛb-sõw na yere a:
«Ãa n'ʋ bãw a Sore tɩɛrʋ?
Bɩɩ ãa n'ʋ dãw wul ʋ yã?#11:34 Nyɛ̃ Ɩza 40.13.
35Bɩɩ ãa n'ʋ dãw de niwn kʋ̀ ʋ bom,
a fɛr k'ʋʋ mɩ̀ kʋ̀ ʋ yáa a san?#11:35 Nyɛ̃ Zɔb 41.3.»
36Bʋ̃ʋ n'ʋ vɛ̃, ʋl zie n'a bom za yi, ʋlɛ n'ʋ so bom za be, ʋl ƴãw n'a bom za be. Ʋlɛ so yúor-vɩɛlʋ-danʋ a yome yome za! Amɛn.
Đang chọn:
Ʋrɔm 11: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.