Zã 21
21
Po-tuurbɛ ayopõi bɛ mɩnɛ nyɛ̃ nɩ a Yeezu
1A Yeezu tɩ lɛb'a wul ʋ tʋɔra a ʋ po-tuurbɛ a Tɩberiyadɩ kʋ̃ɔ-kpɛ̃ɛ nʋɔr. Nyɩ nyɛ̃ a lɛ a na tɩ tu a. 2Sɩmʋ̃ Pɩɛr nɩ Toma, bɛ na bʋɔlɛ Didim a, nɩ Natanayɛl na yi Kana a Galile tẽw a, a Zebede bibiir nɩ a Yeezu po-tuurbɛ ayi bɛ mɩnɛ tɩ nɛbɛ. 3A Sɩmʋ̃ Pɩɛr tɩ yel'ɩ a bɛ zie: «Mãa cere nɩ zʋ́mɛ́ nyɔwfʋ.» Bɛ yel ʋ: «Tɩ mɩ̀ na páw fʋ na cen.» Bɛ tɩ yi na kpɛ a gbor. Ɛcɛ a ʋlɩ tɩ̃ɩsɔw nɛ bɛ bɛ tɩ nyɔw bom za ɩ. 4A zie na wa vɩɛrɛ a, a Yeezu tɩ àr'ɩ a kʋ̃ɔ-kpɛ̃ɛ nʋɔr, ɛcɛ a ʋ po-tuurbɛ bɛ tɩ bãw kɛ́ ʋlɛ n'ʋ ɛ. 5A Yeezu tɩ yel bɛ na: «Bibiir i, nyɩ tɛr'ɩ zʋ́mɛ́ ɛ?» Bɛ sɔw: «Ʋ̃ʋ'hʋ̃.» 6Ʋ yel bɛ: «Nyɩ lɔb a mɩ̃ɛ a gbor dʋrʋ lowr, ɛ́ nyɩ na páw na.» Lɛ n'a bɛ tɩ lɔb a mɩ̃ɛ, ɛ́ bɛ lɛb tʋɔr ʋ tawr yire nɩ ɛ: ʋ tɩ paal'ɩ a zʋ́mɛ́ zuo. 7A po-tuure nɛ a Yeezu na tɩ nɔnɛ a tɩ yel'ɩ a Pɩɛr: «A Sore n'ʋ!» A Sɩmʋ̃ Pɩɛr na wa wõ kɛ́ a Sore n'ʋ a, ʋ su n a ʋ kparʋ — ʋ tɩ ɩ n ƴã-gã-zawla — ƴaw lo n a kʋ̃ɔmɩ́. 8A ʋ po-tuur-taabɛ tɩ waar'ɩ nɩ a gbor, lãw tawr'ɩ a mɩ̃ɛ na paalɩ a zʋ́mɛ́ a: bɛ bɛ tɩ zãá nɩ a kõkowr ɛ, a tɩ ta na mɛ̃ mɛtɩr kʋba (100) a. 9Bɛ na tɩ siw a, bɛ nyɛ̃ nɩ zʋ́mɛ́ vũu-bie zu nɩ dipɛ̃. 10A Yeezu tɩ yel bɛ na: «Nyɩ ír a zʋ́mɛ́ nyɩ na nyɔw a ƴɛrɛŋa a wa n.» 11A Sɩmʋ̃ Pɩɛr tɩ lɛb'a do a gbor pʋɔ, ɛ́ taw a mɩ̃ɛ yi n a kʋ̃ɔ nʋɔr, a mɩ̃ɛ tɩ paal'ɩ zʋm-bɛrɛ lɩz'a ayopõi nɩ pie dɔwlɩ zʋ́mɛ́ ata (153). Ɛ́ a zʋ́mɛ na saa tɩ yãwmɛ zɛ̃ à ŋá a, a mɩ̃ɛ bɛ tɩ cɩɛrɩ ɛ. 12A Yeezu tɩ yel bɛ na: «Nyɩ wa dɩ.» A po-tuurbɛ been kãw za bɛ tɩ sàw sowre ʋ ɛ: «Ãa nɛ b?» Bɛ tɩ bãwnɩ a na a Sore na n'ʋ a. 13A Yeezu tɩ taw na ta de a dipɛ̃ kʋ̀ bɛ, ɛ́ mɩ̀ lɛb ɩ a lɛ nɩ a zʋ́mɛ́. 14A gb'a ata sob tɩ n'ɩ a lɛ a Yeezu na tɩ wul ʋ tʋɔra a ʋ po-tuurbɛ a ʋ kũu-pʋɔ-lɛb-yibu pùorí a.
A Yeezu kʋ̀ n a Pɩɛr a ʋ tõ-nʋɔr
15Bɛ na wa dɩ baar'a, a Yeezu yel'ɩ a Sɩmʋ̃ Pɩɛr: «Sɩmʋ̃, Zã bidɛb i, fʋ nɔnɛ mɛ̃ na zuo a bɛ ŋa bɩɩ?» Ʋ sɔw: «Ʋ̃ʋ, Sore e, fʋ bãwnɩ a na ɩ̃ na nɔnɛ fʋ a.» A Yeezu yel ʋ: «Cɩ̃ɩnɛ a ɩ̃ péli.» 16A Yeezu tɩ lɛb'a sowr'ʋ a gb'a ayi sob ƴãw: «Sɩmʋ̃, Zã bidɛb i, fʋ nɔnɛ mɛ̃ na a?» Ʋ sɔw: «Ʋ̃ʋ, Sore, fʋ bãwnɩ a na ɩ̃ na nɔnɛ fʋ a.» A Yeezu yel ʋ: «Ɩ a ɩ̃ pi-cɩ̃ɩnɛ.» 17Ʋ tɩ lɛb'a yel a gb'a ata sob ƴãw: «Sɩmʋ̃, Zã bidɛb i, fʋ nɔnɛ mɛ̃ na a?» Pʋ-sãwna tɩ tɛr'ɩ a Pɩɛr, a Yeezu na tɩ sowr'ʋ a gb'a ata sob ƴãw: «Fʋ nɔnɛ mɛ̃ na a?» Ʋʋ tɩ sɔw na: «Sore e, fʋ bãw nɩ bom za, fʋ bãwnɩ a na ɩ̃ na nɔnɛ fʋ a.» A Yeezu yel ʋ: «Cɩ̃ɩnɛ a ɩ̃ píir. 18Yel-mɩŋa sɩza sɩza n'a ɩ̃ yere kʋ̀rɛ fʋ: fʋ na tɩ ɩ pɔlbile a lɛn daar a, fʋ mɩ́ tɩ sɛ n a fʋ kpàwr fʋ tʋɔra cere nɩ be fʋ na bɔbr a. Fʋ̃ʋ wa kor a, fʋ na mɩ́ zɛw nɩ a kpãkpamɛ ɛ́ nɩ-yũo sɛ b a kpàwr, ɛ́ tɛr fʋ cere nɩ ʋlɩ zie nɛ fʋ na bɛ bɔbr a.» 19A Yeezu tɩ yel'ɩ à à ŋá, k'ʋʋ wul a kũu nɛ bʋʋrɛ a Pɩɛr nãà wa kpi ɩ kɛ̀ Naaŋmɩn nyɛ̃ yúor-vɩɛlʋ-danʋ a. A Yeezu na tɩ yel à ŋá baar'a, ʋ yel'ɩ a Pɩɛr: «Tuur mɛ̃!»
A Yeezu nɩ a ʋ po-tuur-nɔna
20A Pɩɛr na tɩ ŋmɛlɩ kaa a pùorí a, ʋ nyɛ̃ nɩ a po-tuure ʋl a Yeezu na nɔnɛ a, a ʋl na tɩ cɩɩlɩ cen a Yeezu nyãa ƴãw a dɩb daar sowr'ʋ: «Sore e, ãa n'ɩ a sob nɛ na na mɩl fʋ nyɔw tɩr a?» 21A Pɩɛr na tɩ nyɛ̃ ʋ a, ʋ sowr'ɩ a Yeezu: «Ɛ́ à ŋà sob, Sore e, bʋ̃ʋ n'ʋ na ɩ ʋ?» 22A Yeezu tɩ sɔw ʋ na: «Mãa wa bɔbr k'ʋʋ be be ɛ́ gùre ɩ̃ tɩ lɛb wa a, a jɩ́rɛ fʋ na bɩɩ? A fʋ̃ʋ a, tuur mɛ̃!» 23A lɛ n'a bɛ tɩ ŋmɛ yaarɩ a yɛbr sɔgɔ kɛ́ a po-tuure ŋa kʋ̃ kpi ɛ. Ɛcɛ a Yeezu bɛ tɩ yel ʋ k'ʋʋ kʋ̃ kpi ɛ. Ʋ tɩ yel'a: «Mãa wa bɔbr k'ʋʋ be be ɛ́ gùre ɩ̃ tɩ lɛb wa a, a jɩ́rɛ fʋ na bɩɩ?»
24A po-tuure ŋa n'ʋ dɩrɛ a yele á ŋá dãsɩɛ, ɛ́ ʋlɛ n'ʋ sɛb a, ɛ́ tɩ bãwnɩ a na, a ʋ dãsɩɛ tu n yel-mɩŋa.
A sɛbɛ baarʋ zie ƴɛ̀r-bie
25A Yeezu cãà na lɛb maalɩ yel-yaga yaga: bɛlɛ tɩ sɛbr a za been been a, ɩ̃ tɩɛrɛ k'aa tẽ-daa za kʋ̃ʋ tʋ̃ɔ́ de a sɛbr bɛ nãá sɛb a ɩ.
Đang chọn:
Zã 21: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
