Zã 18

A Yeezu nyɔwfʋ yele

(Mat 26:47-56, Mark 14:43-50, Luk 22:47-53)

1A Yeezu na tɩ ƴɛ̀r à ŋá baar'a, ʋlɛ nɩ a ʋ po-tuurbɛ yi na lo gãw a Sedrɔ̃ bà-fʋɔla. Zaadɛ̃ kãw tɩ be n be. Be n'a ʋ tɩ kpɛ n a ʋ po-tuurbɛ. 2A ʋ mɩlɛ Zuda mɩ̀ tɩ bãw nɩ a ʋlɩ zie nɛ: a Yeezu na mɩ́ tɩ cere a be kʋralɛ nɩ a ʋ po-tuurbɛ a ƴãw. 3A Zuda tɩ tɛr'ɩ a sojarɩ nɩ a Ŋmɩn-yir-kpɛ̃ɛ gùrbɛ, a bàwr-maal-nɩ-bɛrɛ nɩ a Faarizɩ̃ɛ mɩnɛ na tɩ kʋ̀ ʋ a, cen nɩ a be. Bɛ tɩ tɛr'ɩ mɔ̃-'lena vũuni nɩ lãparɩ nɩ zɛbr bome. 4A Yeezu na tɩ bãw bom nɛ za na na ɩ ʋ a, ʋ tuor'a sowri bɛ: «Ãa n'ʋ nyɩ bɔbr?» 5Ɛ́ bɛ yel ʋ: «Yeezu na yi Nazarɛtɩ a n'ʋ tɩ bɔbr.» A Yeezu yel bɛ: «Mãa n'ʋ.» A ʋ mɩlɛ Zuda tɩ àr'ɩ a bɛ sɔgɔ. 6A Yeezu na wa yel: «Mãa n'ʋ a», bɛ tɩ̃wnɩ nɩ pùor, ɛ́ lo tẽsɔw. 7A Yeezu tɩ lɛb'a sowri bɛ: «Ãa n'ʋ nyɩ bɔbr?» Ɛ́ bɛ lɛb yel: «Yeezu na yi Nazarɛtɩ a n'ʋ tɩ bɔbr.» 8A Yeezu sɔw yel bɛ: «Ɩ̃ yel nyɩ na kɛ́ mãa n'ʋ. Alɛ wa ɩ mãa n'ʋ nyɩ bɔbr a, nyɩ bɛr a bɛ ŋa kɛ̀ bɛ cere.»

9À ŋá n'a a ƴɛ̀r-bir ŋa ʋ na tɩ dãw yel a tu a ʋ tub: «A bɛlɩ dem fʋ na kʋ̀ m a, ɩ̃ Sãà a, ɩ̃ bɛ bɔr bɛ been kãw za ɩ.» 10Sɩmʋ̃ Pɩɛr na tɩ tɛr zɛbr-sɔ-kpɛ̃ɛ a nyɔw ʋ na vʋ̃ɔ, pɛl'ɩ a bàwr-maal-kara tõ-tõ-bie kãw dʋrʋ tobr ŋmãa. A tõ-tõ-bie nɛ yúor tɩ dɩ na kɛ́ Malkisi. 11Ɛcɛ a Yeezu tɩ yel'ɩ a Pɩɛr: «Lɛb su a fʋ zɛbr-sɔ-kpɛ̃ɛ a ʋ kpar pʋɔ. Ɩ̃ ta nyũ a tuo koli-nyúura a ɩ̃ Sãà na kʋ̀ m a bɩɩ?»

Bɛ tɛr'ɩ a Yeezu cen nɩ An zie

12A sojarɩ nɩ a bɛ nɩ-kpɛ̃ɛ nɩ a Zifʋ mɩnɛ Ŋmɩn-yir-kpɛ̃ɛ gùrbɛ tɩ nyɔw nɩ a Yeezu 'lẽ. 13Bɛ tɩ de nɩ niwn tɛr ʋ cen nɩ An zie. A An tɩ ɩ n a bàwr-maal-kara na dɩ kɛ́ Kayifʋ a dɩɛm. A Kayifʋ n'ʋ tɩ ɩ a bàwr-maal-kara a ʋlɩ yũon nɛ. 14A Kayifʋ ŋa tɔr za n'ʋ tɩ wul yã ŋa a Zifʋ mɩnɛ: «A nyɩ vla n'a kɛ́ nɩ-been yõ kpi a nɩbɛ za ƴãw.»

Pɩɛr ciir'a k'ʋʋ bɛ ɩ a Yeezu po-tuure ɩ

(Mat 26:69-70, Mark 14:66-68, Luk 22:55-57)

15A Sɩmʋ̃ Pɩɛr nɩ a Yeezu po-tuure ƴen sob tɩ tu n a Yeezu. A po-tuure ʋl tɩ tu n a Yeezu kpɛ a bàwr-maal-kara davʋrá, ʋ na tɩ ɩ a bàwr-maal-kara nɩ-bãwna a ƴãw. 16A Pɩɛr ʋl tɩ àr'ɩ a yẽw, a dɩ̃dɔr nʋɔr. A po-tuure ʋl na tɩ ɩ a bàwr-maal-kara nɩ-bãwna a, tɩ lɛb'a yi tɩ ƴɛ̀r'ɩ a pɔw na gùre a dɩ̃dɔr a, ɛ́ ɩ a Pɩɛr ʋ kpɛ. 17A lɛ n'a a tõ-tõ-bi-pɔw na gùre a dɩ̃dɔr a tɩ yel a Pɩɛr: «A fʋ̃ʋ mɩ̀ a, fʋ bɛ ɩ a nɩr ŋa po-tuure kãw bɩɩ?» A Pɩɛr tɩ yel'a: «Ɩ̃ bɛ ɩ ʋ ɛ.»

18A tõ-tõ-biir nɩ a Ŋmɩn-yir-kpɛ̃ɛ gùrbɛ tɩ gbɔw nɩ vũu ʋʋrɛ, ƴawr na tɩ ɩrɛ a ƴãw. A Pɩɛr tɩ pʋɔ na àr ʋʋrɛ a vũu.

A bàwr-maal-kara kʋ̀rɛ nɩ sowru a Yeezu

(Mat 26:59-66, Mark 14:55-64, Luk 22:66-71)

19Lɛ n'a a bàwr-maal-kara tɩ sowr'ɩ a Yeezu a ʋ po-tuurbɛ yele nɩ a ʋ kanʋ yele. 20A Yeezu tɩ sɔw ʋ na: «Cãàmɩlɛ n'a ɩ̃ mɩ́ ƴɛ̀rɛ a nɩbɛ za niŋé, ɛ́ kanɛ nɩ bɛ a puoru-dirú nɩ a Ŋmɩn-yir-kpɛ̃ɛ pʋɔ, a be a Zifʋ mɩnɛ za na mɩ́ ɓã taa a. Ɩ̃ bɛ dãw sɔwlɩ ƴɛ̀r ƴɛ̀rʋ ɛ. 21Bʋ̃ʋ n'ʋ ɩ fʋ sowre mɛ̃? Sowri a bɛl na bɛr wõ a ɩ̃ kanʋ a, bɛ bãw nɩ a ʋlɩ bom nɛ ɩ̃ na yel a.» 22A ƴɛ̀r-bie á ŋá bɛ tɩ lo tẽw sɛr ɛ, ɛ́ a Ŋmɩn-yir-kpɛ̃ɛ gùre ƴen sob kãw, na tɩ àr a be a, ɓa ʋ ɛ́ yel: «À ŋá n'a fʋ sɔwr a bàwr-maal-kara ƴɛ̀rʋ bɩɩ?» 23A Yeezu tɩ sɔw ʋ na: «Mãa wa ƴɛ̀r faa a, wul mɛ̃ a faa lowr, ɛ́ mãa wa ƴɛ̀r vla a, bʋ̃ʋ n'ʋ so fʋ ŋmɛ m?» 24Lɛ n'a a An tɩ ƴãw bɛ tɛr a Yeezu 'lẽ cen nɩ a bàwr-maal-kara Kayifʋ zie.

Pɩɛr lɛb'a maal ciiri k'ʋʋ bɛ ɩ a Yeezu po-tuure ɩ

(Mat 26:71-75, Mark 14:69-72, Luk 22:58-62)

25A Sɩmʋ̃ Pɩɛr ʋl tɩ àr'a ʋʋrɛ a vũu. Bɛ tɩ sowr'ʋ na: «Fʋ mɩ̀ bɛ ɩ a ʋ po-tuure kãw bɩɩ?» A Pɩɛr ciiri: «Ɩ̃ bɛ ɩ ʋ ɛ.» 26A bàwr-maal-kara tõ-tõ-bie kãw, na ɩ a ʋlɩ sob nɛ a Pɩɛr na tɩ dãw pɛl a tobr ŋmãa a nɩr a, tɩ sowr'ʋ na: «Ɩ̃ bɛ tʋ̃ɔ́ dãw nyɛ̃ b a zaadɛ̃ pʋɔ, fʋ̃ʋ nɩ a Yeezu ɛ?» 27Ɛcɛ a Pɩɛr tɩ lɛb'a maal ciiri, ɛ́ daadaalɛ nʋra kõ.

Bɛ tɛr'ɩ a Yeezu cen nɩ Pɩlatɩ zie

(Mat 27:1-2,11-14, Mark 15:1-5, Luk 23:1-5)

28Al pùorí, bɛ tɩ tɛr'ɩ a Yeezu yi n a Kayifʋ zie cen nɩ a Ʋrɔm tẽw na-kpɛ̃ɛ-lɩɛrɛ yir. Biɓaara tɩ n'a. Bɛ bɛ tɩ kpɛ a Ʋrɔm tẽw na-kpɛ̃ɛ-lɩɛrɛ yir ɛ, kɛ́ bɛ taa wa páw dɛwr ɛ, tʋ̃ɔ́ dɩ a Tɔl-gãw cuw. 29Alɛ so a Pɩlatɩ yi wa a yẽw wa sowri bɛ: «Bʋ̃ʋ sãwna n'a nyɩ yere a nɩr ŋa ƴãw?» 30Bɛ tɩ sɔw ʋ na: «A nɩr ŋa bɛ tɩ maalɩ yel-faa a, tɩ kʋ̃ʋ tɩ nyɔw ʋ wa n a fʋ zie ɩ.» 31A Pɩlatɩ lɛb yel bɛ: «Nyɩ de ʋ maal'ɩ a ƴɛ̀rʋ tu n a nyɩ Naaŋmɩn wulu.» A Zifʋ mɩnɛ yel ʋ: «Tɩ bɛ tɛr sɔ́r na kʋ nɩr kãw za ɩ!»

32À ŋá n'a a tɩ fɛr kɛ́ a ƴɛ̀rʋ ʋl, a Yeezu na tɩ ƴɛ̀r manɩ wul a kũu nɛ bʋʋrɛ ʋ na na kpi a, tu. 33A Pɩlatɩ tɩ lɛb'a kpɛ a dĩó, ɛ́ bʋɔlɩ a Yeezu sowr'ʋ: «Fʋ ɩ n a Zifʋ mɩnɛ nãà bɩɩ?» 34A Yeezu sɔw ʋ: «Fʋ mɩŋa n'ʋ bãw sowre bɩɩ, nɩ-yoru nɛbɛ yel kʋ̀ b?» 35A Pɩlatɩ sowr'ʋ: «Ɩ̃ mɩ̀ ɩ n a Zifʋ mɩnɛ nɩ-bʋʋrɛ nɩr kãw bɩɩ? A fʋ nɩ-bʋʋrɛ nɩ a bàwr-maal-nɩ-bɛrɛ nyɔw fʋ na wa n a ɩ̃ zie, bʋ̃ʋ n'ʋ fʋ ɩ?» 36A Yeezu sɔw: «A ɩ̃ naalʋ bɛ yi a tẽ-daa ŋa zu ɛ. A ɩ̃ naalʋ tɩ yi a tẽ-daa ŋa zu a, a ɩ̃ nɩbɛ nãá zɛb'a faa mɛ̃ bɛr, ɩ̃ ta lo a Zifʋ mɩnɛ nuru pʋɔ ɩ. Ɛcɛ ƴɛrɛŋa a, ɩ̃ naalʋ bɛ ɩ a tẽ-daa ŋa zu naalʋ ɛ.» 37Lɛ n'a a Pɩlatɩ sowr'ʋ: «A ɩ lɛ fʋ ɩ nãà ʋ?» A Yeezu sɔw: «Fʋ̃ʋ n'ʋ yere k'ɩ̃ɩ ɩ n nãà. Ɩ̃ dɔw na, ɩ̃ɩ wa n a tẽ-daa zu k'ɩ̃ɩ wa dɩ a yel-mɩŋa dãsɩɛ. Nɩr za na ɩ yel-mɩŋa nɩr a bɛrɛ na wone a ɩ̃ ƴɛ̀rʋ.» 38A Pɩlatɩ yel ʋ: «Bʋ̃ʋ n'ɩ a yel-mɩŋa?»

Bɛ ƴãw nɩ a Yeezu a kũu dɔwrʋ

(Mat 27:15-31, Mark 15:6-20, Luk 23:13-25)

A ƴɛ̀r-bie á ŋá zu n'a, a Pɩlatɩ lɛb yi a Zifʋ mɩnɛ zie tɩ yel bɛ: «Ɩ̃ bɛ nyɛ̃ sãwna za a ʋ zie ɩ. 39Ɛcɛ mɛ̃ a lɛ a ɩb na ɩrɛ a nyɩ zie a, ɩ̃ mɩ́ lɛb'a bɛr nɩ-pàwra kãw kʋ̀ nyɩ a Tɔl-gãw cuw bibir. Nyɩ bɔbr'a k'ɩ̃ɩ lɛb bɛr a Zifʋ mɩnɛ nãà bɩɩ?» 40Bɛ tɩ ŋmɩɛr'ɩ cɛlsɩ bɛ za: «Ta bɛr a ʋl ɛ, bɛr Barabasɩ!» Zɩ̃ kɛ́ a Barabasɩ nɛ tɩ ɩ n nyãnyu-nɩ-kʋrɛ.

Đang chọn:

Zã 18: DBDC

Tô màu

Sao chép

So sánh

Chia sẻ