Zã 12
12
Marya cir'ɩ kãa-nyũu ƴãw a Yeezu gbɛ́ɛ ƴãw
(Mat 26:6-13, Mark 14:3-9)
1A Tɔl-gãw cuw na tɩ cɛ bibie ayʋɔb a, a Yeezu tɩ ta n a Betani. Be n'a a Lazaar, ʋ na tɩ ɩ ʋ lɛb ìr a kũuni pʋɔ a, tɩ kpɩɛr. 2Bɛ tɩ ɩ n bʋ̃-dɩrɩ a ʋ ƴãw: Marta tɩ dier'ɩ a bʋ̃-dɩrɩ tɩrɛ, ɛ́ a Lazaar tɩ pʋɔ a nɩbɛ pʋɔ zɩ̃ a dɩb ƴãw. 3A Marya tɩ de nɩ litɩr ŋmãa kãa-nyũu kãw bɛ na maal'ɩ náàr#12:3 Náàr kãá-nyũu: Náàr tɩ-nyɩgɛ nɩ a váar'a bɛ mɩ́ maal'ɩ a kãá á ŋá. mɩŋa a, ɛ́ a daarʋ bɛ gbʋ́r a, cir ƴãw a Yeezu gbɛ́ɛ ƴãw ɛ́ fɩɛlɩ a nɩ a ʋ zukɔbɛ. A nyũu tɩ ìr'a paalɩ a yir za. 4A lɛ n'a a po-tuurbɛ ƴen sob, a Zuda Ɩsɩkarɩɔtɩ, a ʋl na na mɩl a Yeezu nyɔw tɩr a, tɩ yel: 5«Bʋ̃ʋ pãa ɩ bɛ bɛ kʋɔrɩ a kãa-nyũu á ŋá, bibie kɔbr ata (300) sã-ya libie kʋ̀ a nan dem a!» 6Nan dem sõwfʋ tɩɛrʋ bɛ n'a ʋ tɩ tɛr ƴɛ̀r'ɩ à à ŋá ɩ. Nyãnyuge tɩ n'ʋ. Ʋlɛ n'ʋ mɩ́ tɩ tɛr a bɛ wɛr-wʋɔ zure íre a libie bɛ na mɩ́ ƴãwnɛ a. 7A lɛ n'a a Yeezu tɩ yel: «Bɛr ʋ! Ʋ tu n à à ŋá a ɩ̃ ũufʋ ƴãw. 8Nan dem be n a nyɩ zie kʋralɛ, ɛcɛ a mãa a, ɩ̃ kʋ̃ be a nyɩ zie kʋralɛ ɩ.»
A bàwr-maal-nɩ-bɛrɛ bɔbr'ɩ a Lazaar kʋb
9A Zifʋ mɩnɛ yaga yaga tɩ wõ na kɛ́ a Yeezu be n a Betani. Bɛ tɩ zɔrɛ na waar kɛ́ bɛ wa nyɛ̃ ʋ, ɛ́ mɩ̀ nyɛ̃ a Lazaar ʋ na tɩ ɩ ʋ lɛb ìr a kũuni pʋɔ a. 10A lɛ n'a a bàwr-maal-nɩ-bɛrɛ tɩ yel kɛ́ bɛ mɩ̀ na kʋ n a Lazaar, 11ʋlɛ na n'ʋ so a Zifʋ mɩnɛ yaga sàw de a Yeezu ɛ́ zawrɩ bɛ bɛr a.
A Yeezu kpɛ n a Zerizalɛm tẽw pʋɔ mɛ̃ nãà a
(Mat 21:1-11, Mark 11:1-11, Luk 19:28-40)
12A dãw-bio daarɩ́, a zu-sɛbla na bɛ dɩ vuo a na tɩ wa a cuw ƴãw a, tɩ wõ na kɛ́ a Yeezu tarɛ nɩ a Zerizalɛm. 13Bɛ tɩ kár'ɩ kpãkparmɛ wuli yi tuore nɩ ʋ, cáarɛ nɩ yere nɩ: «Ozaana#12:13 Ozaana: A ƴɛ̀r-bir ŋa a, cɛl'ʋ bɛ mɩ́ ŋmɛ danɩ nɩ nɩr, ʋ ŋmɛ̃ na mɛ̃ a Dagara kuryii a. ! A Naaŋmɩn, ʋ maalɩ a sob nɛ na waar a Sore yúor ƴãw a! A Naaŋmɩn, ʋ maalɩ a Ɩsɩrayɛl nãà!» 14A Yeezu tɩ nyɛ̃ nɩ bõw bile do zɩ̃ a ʋ zu, a tu a Sɛb-sõw ƴɛ̀r-bie á ŋá:
15«Sɩyɔ̃ tẽw i, ta zɔrɛ dɛ̃bɩ̃ɛ ɩ.
A fʋ nãà n'ɩ ŋan waar,
zɔm bõw-nyãw bile!#12:15 Nyɛ̃ Zak 9.9.»
16A Yeezu po-tuurbɛ bɛ tɩ bãw a yel ŋa pɛr a daadaalɛ ɩ. Ɛcɛ a Yeezu na wa lɛb yi a kũu pʋɔ baarɩ nyɛ̃ yúor-vɩɛlʋ-danʋ a, bɛ lɛb'a tɩɛrɩ bãw kɛ́ a Sɛb-sõw tɩ yel'ɩ à á ŋá a ʋ ƴãw, nɩ kɛ́ a yel ŋa n'ʋ a nɩbɛ tɩ tu a ʋ ƴãw.
17A zu-sɛbla na tɩ be be a ʋlɩ bibir a Yeezu na bʋɔlɩ a Lazaar ʋ yi a yaa pʋɔ a, ʋʋ ɩ ʋ lɛb vʋʋrɛ a, bɛ tɩ dɩrɛ nɩ a ʋ dãsɩɛ. 18Bɛ na tɩ wõ k'ʋʋ maal'ɩ a yel ŋa na ɩ bãwfʋ sãá a, alɛ n'a so bɛ tɩ zɔ tuor'ʋ. 19A lɛ n'a a Faarizɩ̃ɛ mɩnɛ tɩ yere kʋ̀rɛ taa: «Nyɩ nyɛ̃ a na: nyɩ kʋ̃ tʋ̃ɔ́ ɩ bom za ɩ: a tẽ-daa nɩbɛ za n'ɩ bɛ ŋa tuur ʋ!»
Gɩrɛkɩ bɛ mɩnɛ kãw bɔbr'ɩ a Yeezu nyɛ́b
20Gɩrɛkɩ bʋʋrɛ bɛ mɩnɛ kãw mɩ̀ tɩ pʋɔ na wa a Zerizalɛm a cuw daar, kɛ́ bɛ wa puori a Naaŋmɩn nɩ bɛ tʋɔra-siwru. 21Bɛ tɩ taw na ta a Filib zie na yi Bɛtɩsayida a, Galile tẽw a, yel ʋ: «Sore e, tɩ bɔbr'a kɛ́ tɩ nãá nyɛ̃ a Yeezu.» 22A Filib tɩ cen na tɩ yel kʋ̀ Ãdere, a Ãdere nɩ a Filib za cen tɩ yel kʋ̀ a Yeezu. 23A Yeezu tɩ sɔw bɛ nɩ à ŋá: «A daar ʋl a Nɩsaal Bie na na nyɛ̃ a yúor-vɩɛlʋ-danʋ a pãa ta na. 24Yel-mɩŋa sɩza sɩza n'a ɩ̃ yere kʋ̀rɛ nyɩ: a ka-bir wa lo a tẽw bɛ wɛ a, ʋ mɩ́ gã nɩ ʋ yõ. Ɛcɛ ʋlɛ wa wɛ a, ʋ mɩ́ wɔ̃ n wɔmɛ yaga. 25Ʋlɩ sob na nɔnɛ a ʋ nyɔ-vʋʋrʋ a, ʋ bɔrɛ ʋ na bɛrɛ, ɛ́ ʋlɩ sob na hɩ̃ɛn a ʋ nyɔ-vʋʋrʋ a tẽ-daa ŋa zu a, ʋ na maal'a tɛr ʋ a nyɔ-vʋʋrʋ na be kʋralɛ a ƴãw. 26Nɩr wa bɔbr k'ʋʋ tone a ɩ̃ tome a, ʋ tuur mɛ̃, ɛ́ zie nɛ za ɩ̃ na be a, be n'a a ɩ̃ tõ-tone mɩ̀ na be. Nɩr wa tone a ɩ̃ tome a, a ɩ̃ Sãà na ƴãwnɛ ʋ na.»
A Yeezu ƴɛ̀rɛ nɩ a ʋ kũu ƴɛ̀rʋ
27«Ɛcɛ a ƴɛrɛŋa a, a ɩ̃ tɩɛrʋ dam'a. Ɩ̃ yel kɛ́ bo? Kɛ́ a ɩ̃ Sãà faa mɛ̃ a daar ŋa yel-kpɩɛrɩ pʋɔ bɩɩ? Ɛcɛ a yel-kpɩɛrɩ daar ŋa tɔr za ƴãw n'a ɩ̃ wa. 28Ɩ̃ Sãà a, ɩ a fʋ yúor nyɛ̃ vɩɛlʋ-danʋ.» Kɔkɔr kãw tɩ ƴɛ̀r'a yi a salom zu yel: «Ɩ̃ ɩ na ʋ nyɛ̃ a yúor-vɩɛlʋ-danʋ, ɛ́ na lɛb ɩ ʋ nyɛ̃ ʋ.» 29A zu-sɛbla na tɩ àr a be ɛ́ wõ a a tɩ yel'a kɛ́ saa n'ʋ tanɩ. Bɛ mɩnɛ tɩ yel'a kɛ́ malkɩ n'ʋ ƴɛ̀r a ʋ zie. 30A Yeezu tɩ lɛb'a yel: «Mãa ƴãw bɛ n'a a kɔkɔr ŋa ƴɛ̀r nyɩ wõ ɩ, nyɩɩm ƴãw n'a. 31A ƴɛrɛŋa n'a bɛ na maal'ɩ a tẽ-daa ŋa a ƴɛ̀rʋ. Ƴɛrɛŋa n'a bɛ na diw a tẽ-daa ŋa nãà bɛr. 32Ɛ́ a mãa a, bɛlɛ wa bà m a tẽsɔw k'ɩ̃ zɛw do a, ɩ̃ na taw nɩ a nɩsaalbɛ za wa n a ɩ̃ zie.» 33Ʋ tɩ ƴɛ̀r'ɩ à à ŋá wul a kũu nɛ bʋʋrɛ ʋ nãà kpi a. 34A zu-sɛbla tɩ sɔw ʋ na: «A tɩ Naaŋmɩn wulu sɛbɛ pʋɔ, tɩ wõ na kɛ́ a Kɩrɩta na be n kʋralɛ. Ŋmɩŋmɩn n'a fʋ na tʋ̃ɔ́ yel kɛ́ a fɛr'a bɛ bà a Nɩsaal Bie ʋ zɛw do? Ãa n'ɩ a Nɩsaal Bie ŋa?» 35A Yeezu tɩ sɔw bɛ na: «A cãà na cãà nɩ a nyɩ sɔgɔ blãlɛ ƴãw. Nyɩ na tɛr a cãà a, nyɩ cere, kɛ̀ lige taa pile pàwr nyɩ ɛ. Sob nɛ na cere lige pʋɔ a bɛ bãw be ʋ na cere a ɩ. 36Nyɩ na tɛr a cãà a, nyɩ sàw de a cãà, tʋ̃ɔ́ lɩɛbɩ cãà bibiir.»
A Zifʋ mɩnɛ bɛ sàw de a Yeezu ɛ
A Yeezu na tɩ ƴɛ̀r à à ŋá baar'a, ʋ tɔl'a cen tɩ sɔwlɩ zãá nɩ bɛ. 37A Yeezu na saa tɩ maalɩ a yele-na-ɩ-bãwfʋ-sãá sɛw à ŋá za a bɛ niŋé a, bɛ bɛ tɩ sàw de ʋ ɛ. 38Lɛ n'a a naaŋmɩn-ƴɛ̀r-manɛ Ɩzayi ƴɛ̀r-bie á ŋá tɩ tu: «Sore e, ãa n'ʋ sàw de a tɩ ƴɛ̀rʋ? Ãa n'ʋ a Sore wul a ʋ kpɛnʋ?#12:38 Nyɛ̃ Ɩza 53.1.» 39A Ɩzayi been nɛ n'ʋ tɩ yel a ʋlɩ bom nɛ na n'ʋ so bɛ kʋ̃ tʋ̃ɔ́ sàw de a.
40«Naaŋmɩn ɩ na bɛ zɔ̃w,
ʋʋ ɩ a bɛ socie kpawlɩ,
kɛ́ bɛ ta tʋ̃ɔ́ nyɛ̃ nɩ a bɛ mimie ɩ,
kɛ́ bɛ ta tʋ̃ɔ́ bãw a pɛr ɛ,
kɛ́ bɛ ta tʋ̃ɔ́ lɩɛbɩ a bɛ ɩb ɛ,
ʋ ta tʋ̃ɔ́ sanɩ bɛ ɩ#12:40 Nyɛ̃ Ɩza 6.9-10..»
41A Ɩzayi na tɩ de niwn nyɛ̃ a Yeezu yúor-vɩɛlʋ-danʋ, ɛ́ ƴɛ̀r a ʋ ƴɛ̀rʋ a n'a so ʋ ƴɛ̀r à à ŋá#12:41 Nyɛ̃ Ɩza 6.1.. 42Ɛcɛ a Zifʋ mɩnɛ nɩ-bɛrɛ pʋɔ a, nɩ-yaga tɩ sàw na de a Yeezu. Ɛcɛ bɛ tɩ zɔrɛ nɩ a Faarizɩ̃ɛ mɩnɛ, lɛ so bɛ bɛ mɩ́ tɩ sàw ƴɛ̀r a yi ɛ, kɛ́ bɛ taa wa diw bɛ bɛr a puoru-dĩó ɛ. 43Bɛ tɩ nɔnɛ nɩ a yúor a nɩsaalbɛ zie zuo a yúor ʋl na yi a Naaŋmɩn zie a.
A Yeezu ƴɛ̀rʋ n'ʋ na maal'ɩ a nɩsaalbɛ a ƴɛ̀rʋ
44A Yeezu tɩ zɛw nɩ kɔkɔr yel: «Sob nɛ na sàw de m a, mãa bɛ n'ʋ ʋ sàw de ɩ, a sob nɛ na tõ m a n'ʋ ʋ sàw de. 45Sob nɛ na nyɛ̃ m a, mɩ̀ nyɛ̃ nɩ a sob nɛ na tõ m a. 46A mãa na ɩ a cãà a, ɩ̃ wa n a tẽ-daa zu kɛ́ sob nɛ za na sàw de m a, ta be lige pʋɔ ɩ. 47Nɩr wa wõ a ɩ̃ ƴɛ̀rʋ ɛ́ bɛ dier a, mãa bɛ n'ʋ maalɛ nɩ a ʋ sob a ƴɛ̀rʋ ɛ: ɩ̃ bɛ wa k'ɩ̃ɩ wa maal'ɩ a tẽ-daa ƴɛ̀rʋ ɛ, ɩ̃ wa na k'ɩ̃ɩ wa faa a tẽ-daa. 48Sob nɛ na zawrɩ mɛ̃ bɛr ɛ́ bɛ dier a ɩ̃ ƴɛ̀rʋ a, tɛr'ɩ a ʋ ƴɛ̀r-maalɛ: a ƴɛ̀rʋ ɩ̃ na ƴɛ̀r a na yel'ɩ a ʋ sãwna a bibi-pɛ-baara wa vɩɛ a. 49Ɩ̃ bɛ nyɛ̃ ɩ̃ tʋɔra ƴɛ̀r ɛ, ɛcɛ a ɩ̃ Sãà na tõ m a n'ʋ wul mɛ̃ a lɛ ɩ̃ na na ƴɛ̀r a, nɩ bom nɛ a na sɛw k'ɩ̃ɩ wul a. 50Ɩ̃ɩ bãw na kɛ́ a ʋ wulu tɩrɛ nɩ nyɔ-vʋʋrʋ na be kʋralɛ a: bom nɛ za ɩ̃ na yere a, ɩ̃ yere na mɛ̃ a lɛ a ɩ̃ Sãà na yel kʋ̀ m a.»
Đang chọn:
Zã 12: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
