Efɛɛzɩ 3
3
A Pol tõ-nʋɔr a nɩ-bʋʋr-yoru zie
1Alɛ n'a so a mãa, Pol, ɩ̃ puore a Naaŋmɩn. Ɩ̃ be n a gaso pʋɔ a Yeezu Kɩrɩta tome ɩ̃ na tone a nyɩɩm nɩ-bʋʋr-yoru ƴãw a zũú. 2Nyɩ bãw nɩ a maalʋ a Naaŋmɩn na kʋ̀ m a nyɩ ƴãw a ʋ pʋ-tɩɛrʋ maalʋ ƴãw a, 3a lɛ ʋ na wul mɛ̃ ɩ̃ bãw a ʋ yel-sɔwla a, mɛ̃ a lɛ ɩ̃ na sɛb ŋmãa ŋmãa kʋ̀ nyɩ a. 4Nyɩmɛ wa kanɛ a ɩ̃ sɛbɛ a, nyɩ na nyɛ̃ nɩ a lɛ ɩ̃ na bãw a yel-sɔwla na càarɩ a Kɩrɩta sɛw a. 5A Naaŋmɩn yel-sɔwla ŋa a, ʋ bɛ tɩ wul ʋ a koro za nɩbɛ mɛ̃ a lɛ ʋ na ƴãw a Vʋʋrʋ Sõw wul ʋ a ƴɛrɛŋa a ʋ nɩ-toni na ɩ son a, nɩ a ʋ ƴɛ̀r-manbɛ a ɩ. 6A Naaŋmɩn yel-sɔwla ʋl n'ɩ ŋa: a Yel-nʋ̃ɔ̀ zũú, a Yeezu Kɩrɩta pʋɔ, ʋ ɩ na a nɩ-bʋʋr-yoru mɩ̀ pʋɔ a gbã-dɩ-bʋ̃-been nɛ pʋɔ, bɛ pʋɔ a ƴã-gã-been nɛ pʋɔ, nɩ a nɔ-been nɛ ʋ na ƴãw a pʋɔ.
7Ɩ̃ lɩɛb'ɩ a Yel-nʋ̃ɔ̀ tõ-tõ-bie, a maalʋ a Naaŋmɩn na kʋ̀ m nɩ fãw a zũú. 8A mãa na ɩ a pʋrɩ woro a kɩrɩta-nɩbɛ za pʋɔ a, mãa n'ʋ a Naaŋmɩn kʋ̀ a maalʋ ŋa, k'ɩ̃ɩ hieri yel a Kɩrɩta Naalʋ na bɛ vʋʋr a Yel-nʋ̃ɔ̀ kʋ̀ a nɩ-bʋʋr-yoru, 9ɛ́ ɩ a ɩ cãà a nɩsaalbɛ za zie, a lɛ a Naaŋmɩn na mɩ́ ɩ a ʋ yel-sɔwla tu a ʋ tub a. Ʋl na ɩ bome za Íre a, ʋ ɩ n a ʋ yel-sɔwla ŋa gã koro za a ʋl mɩŋa pʋɔ. 10À ŋá n'a a ƴɛrɛŋa, a Lãw-yir ƴãw, a salom zu naalʋ-dɩrbɛ nɩ fãw dem bãw a Naaŋmɩn yã-bãwfʋ pɔ́lɛ́ za. 11À á ŋá za tu n a lɛ a Naaŋmɩn na tɩ cɔbrɩ a yele bin kʋralɛ a, a yele ʋ na maalɩ a tɩ Sore Yeezu Kɩrɩta pʋɔ a. 12A Kɩrɩta tɩ na sàw de ɛ́ lãw nɩ a ƴãw n'a tɩ mɩ́ sʋ̃ɔmɩ sàw bɛr dɛ̃bɩ̃ɛ ɛ́ àr a Naaŋmɩn niŋé. 13A na ɩ à ŋá a, ɩ̃ zɛlɛ nyɩ na, nyɩ ta sàw a kpɩɛrʋ ɩ̃ na sàwr dier a nyɩ ƴãw a tʋ̃ɔ́ nyɩ ɛ, a ɩ n a nyɩ yúor-vɩɛlʋ-danʋ.
Nyɩ bãw a Kɩrɩta nɔ̃wfʋ
14Alɛ n'a so ɩ̃ gbine dume a Naaŋmɩn Sãà niŋé, 15ʋl zie dɔwlʋ za na yi, a salom zu nɩ a tẽw zu ka a. 16Ʋl na kpɛ yúor-vɩɛlʋ-danʋ naalʋ a, ɩ̃ zɛlɛ na k'ʋʋ ɩ a Vʋʋrʋ kʋ̀ nyɩ a fãw, k'aa nyɩ pʋ̃ɔmɩ nɩr tɛr fãw. 17Ʋ sàw a Kɩrɩta kpɩɛr a nyɩ socie pʋɔ. A nyɩ naaŋmɩn-sàwfʋ zũú, nyɩ tɛ nyɩgɛ ɛ́ kpɛmɛ a nɔ̃wfʋ pʋɔ. 18Lɛ n'a nyɩ na tʋ̃ɔ́ bãw, lãwnɩ a kɩrɩta-nɩbɛ za, a lɛ a Kɩrɩta nɔ̃wfʋ na yɛlmɛ ɛ́ wõwme a, na kɛrɩ ɛ́ zulme a, 19ɛ́ bãw a Kɩrɩta nɔ̃wfʋ na gãw bãwfʋ za a, lɛ n'a a Naaŋmɩn na paalɩ nyɩ ʋ za.
20A Naaŋmɩn na na tʋ̃ɔ́ mɩ́ maalɩ yel za tɩ zuo nɩ a lɛ tɩ na zɛlɛ bɩɩ tɩɛrɛ a, a ʋ fãw na tone a tɩ pʋɔ a zũú a, 21ʋlɛ so yúor-vɩɛlʋ-danʋ a Lãw-yir pʋɔ a Yeezu Kɩrɩta yúor ƴãw, kʋralɛ nɩ yome yome za. Amɛn.
Đang chọn:
Efɛɛzɩ 3: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.