Kɔlɔsɩ 2
2
1Sɩza n'a, ɩ̃ bɔbr'a kɛ́ nyɩ bãwnɩ a k'ɩ̃ɩ mʋɔr'ɩ mɔb na ɩ mɔb a, a nyɩ ƴãw, a Lawdise tẽw dem ƴãw, nɩ a ŋmaarɛ yaga bɛl za na bɛ dãw nyɛ̃ m towtow a ƴãw. 2Ɩ̃ bɔbr'a k'ɩ̃ɩ ɩ à ŋá bɛ kpɛ socir yaga za, bɛ lãw taa nɔnɛ taa tʋ̃ɔ́ páw a yã za naalʋ kpɛ, tʋ̃ɔ́ bãw a Naaŋmɩn yel-sɔwla na ɩ a Kɩrɩta a. 3Ʋl zie n'a a yã-bãwfʋ na-bome nɩ a yele bãwfʋ na-bome sɔwlɩ gã. 4Ɩ̃ yere nɩ à ŋá kɛ́ nɩr za ta tʋ̃ɔ́ bɛlɩ nyɩ nɩ nɔ-kãá ƴɛ̀rʋ ɛ. 5Mãa saa bɛ be a nyɩ sɔgɔ a, a ɩ̃ tɩɛrʋ za be n a nyɩ zie, ɛ́ nʋ̃ɔ̀ kpɩɛr mɛ̃ na, ɩ̃ na nyɛ̃ nyɩ bɛ lɛb pùor ɛ́ cãà kpɛmɛ a nyɩ Kɩrɩta sàw-deb pʋɔ a.
Nyɩ páw nɩ nyɔ-vʋʋrʋ za nyɩ na lãwnɩ a Kɩrɩta a
6A na ɩ à ŋá nyɩ sàw de kɛ́ a Yeezu Kɩrɩta n'ɩ a Sore a, nyɩ lãw nɩ ʋ vʋʋrɛ. 7Nyɩ tɛ nyɩgɛ a ʋ pʋɔ, ɛ́ ƴãw a nyɩ nyɔ-vʋʋrʋ yele za tɩɛrʋ a ʋ ƴãw, lɛ n'a nyɩ na kpɛmɛ a naaŋmɩn-sàwfʋ pʋɔ mɛ̃ a lɛ bɛ na wul nyɩ a, ɛ́ puore a Naaŋmɩn yãanɩ bɛ dɩ vuo ɩ.
8Nyɩ gù vla nɩr za taa bɛlɛ nyɩ nyɔwr nɩ a nɩsaalbɛ yã-bãwfʋ nɩ a bɛ bãw-voru na mɩ́ tu sãàkʋm-kore yele nɩ a tẽ-daa bʋ̃-balɛ, ɛ́ bɛ tu a Kɩrɩta a ɩ. 9Bʋ̃ʋ n'ʋ vɛ̃, a Kɩrɩta ƴã-gan pʋɔ a, naaŋmɩnʋ za be n be, 10ɛ́ a ʋ pʋɔ n'a nyɩ páw bom za, ʋl na ɩ naalʋ-dɩb za nɩ fãw bʋʋrɛ za yib zie a.
11Nyɩ na lãw nɩ ʋ a, bɛ ŋmãa nyɩ nɩ a yʋ̀ɔr ŋmãafʋ kãw bʋʋrɛ nɩsaal nũu na bɛ pʋɔ a, ɛ́ a ŋmãafʋ ŋa ɩ nyɩ bɛ cãà ɩ yel-bier nɩbɛ a. À ŋá n'a a ŋmãafʋ na yi a Kɩrɩta zie a ŋmɛ̃. 12Nyɩ na de a suob a, bɛ ũù nyɩ na lãwnɩ a Kɩrɩta a bɔw pʋɔ. Bɛ mɩ̀ ɩ na nyɩ lãw nɩ ʋ lɛb yi, a nyɩ na sàw kɛ́ a Naaŋmɩn tɛr'ɩ fãw a zũú, a fãw ŋa na ɩ a Kɩrɩta ʋ lɛb yi a kũuni pʋɔ a. 13Ɛ́ a nyɩɩm na tɩ dãw ɩ kũuni a nyɩ yel-bebe zũú nɩ bɛ na bɛ tɩ ŋma a nyɩ yɛɛ a zũú, a Naaŋmɩn kʋ̀ nyɩ nɩ nyɔ-vʋʋrʋ lãwnɩ a Kɩrɩta: ʋ dɩ n a tɩ yel-bebe za suur kʋ̀ tɩ. 14A san-sɛbɛ ʋl na tɩ fɛrɛ tɩ a lɛ a nɛ-ƴãwnɩ na tɩ dĩ tɩ a, a Naaŋmɩn sãw nɩ a ʋlɩ san-sɛbɛ bɛr: ʋ ɩ na ʋ bɔr, ʋ kpa ʋ nɩ a da-gara zu. 15Ʋ zɛb'a tʋ̃ɔ́ a naalʋ-dɩb bʋʋrɛ za nɩ a fãw za, ʋ ɩ na a lɩɛbɩ bʋ̃-ɩ-laarɩ a nɩbɛ niŋé, a ɩ a gbãgbaar a ʋ Bie na zɛb tʋ̃ɔ́ bɛ cɔrɩ tuur ʋ a.
16A na ɩ à ŋá a, nyɩ ta sàw nɩr za tɛrɛ nɩ nyɩ ƴɛ̀rʋ bʋ̃-dɩra bɩɩ bʋ̃-nyúura kãw ƴãw ɛ, cuw kãw ƴãw, cuw-paala ƴãw bɩɩ pɩ̃ɛnʋ-bibir ƴãw ɛ. 17À á ŋá za ɩ n a nɩdaar yele dasule, ɛcɛ a lɛ a yele na sɩrɩ ŋmɛ̃ a, Kɩrɩta zie n'a a yi. 18Nyɩ ta sàw a bɛlɩ dem na nɔnɛ tʋɔra-siwru ɩ-ɩrɩ a nɩbɛ niŋé a, bɩɩ na tɛr a malkɩ mɩnɛ ƴãwfʋ a, ɛ́ mɩ́ nyɛ̃ a bɛ bʋ̃-nyɛrɩ a ɩ bʋ̃-sɩza zuo a, nyɩ ta sàw bɛ wa yel kɛ́ nyɩ sãw na ɩ. A nɩbɛ bɛ ŋa taabɛ mɩ́ ɩrɛ nɩ pɔ̀l-ɩb zawla, bɛ na mɩ́ tɩɛrɛ a yele mɛ̃ nɩsaal tɛwr a ƴãw. 19Bɛ bɛ lãw nɩ a Kɩrɩta na ɩ a ƴã-gan zu a ɩ. Ɛcɛ a Kɩrɩta zũú n'a a ƴã-gan za páwr a dɩb, ɛ́ a kɔbɛ tuor-taa ziir nɩ a jiile ɩ ʋ nyɔw taa ɛ́ kɛrɛ mɛ̃ a lɛ a Naaŋmɩn na bɔbr a.
Nyɩ lãw nɩ nɩ a Kɩrɩta kpi ɛ́ lãw nɩ ʋ lɛb vʋʋrɛ
20A na ɩ lɛ nyɩ lãw nɩ a Kɩrɩta kpi yi zaa a tẽ-daa bʋ̃-balɛ pʋɔ a, bʋ̃ʋ ƴãw n'a nyɩ fɛrɛ nyɩ tʋɔra tuur a nɛ́ɛ á ŋá taabɛ, mɛ̃ a tẽ-daa n'ʋ cãà so a nyɩ nyɔ-vʋʋrʋ a: 21ta de bom ŋa ɩ, ta lɛm bom ŋa ka a ɩ, ta tɔ bom ŋa ɩ? 22Ɛ́ à á ŋá za càar'ɩ bome na kʋ̃ cãà be, bɛlɛ wa tone nɩ a a. Nɩsaalbɛ nɛ-ƴãwnɩ nɩ a bɛ wulu sɩrɩ n'ɩ à á ŋá. 23Sɩza n'a, a mɩ́ sãá na mɛ̃ yã-bãwfʋ be n a nɛ́ɛ á ŋá pʋɔ a, bʋ̃ʋ n'ʋ vɛ̃, a mɩ́ ƴɛ̀rɛ nɩ ŋa za nɩ ʋ puoru ƴɛ̀rʋ, tʋɔra-siwru ƴɛ̀rʋ, ƴã-gan dɔwrʋ ƴɛ̀rʋ, ɛcɛ a bɛ tɛr tɔnɛ kãw za ɩ, nɩsaal ƴã-gan yã-nɔn tɛwr'a a maalɛ.
Đang chọn:
Kɔlɔsɩ 2: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.