Nɩ-toni 7
7
A Ɩtɩɛn ƴɛ̀rʋ ʋ na ƴɛ̀r a
1A bàwr-maal-kara tɩ sowr'ɩ a Ɩtɩɛn: «A sɩrɩ na ɩ à ŋá bɩɩ?» 2A Ɩtɩɛn tɩ sɔw na: «Ɩ̃ yɛbr nɩ ɩ̃ sãà mɩnɛ ɛ, nyɩ cɛlɛ vla: a yúor-vɩɛlʋ-danʋ Naaŋmɩn tɩ wul'ɩ ʋ tʋɔra a tɩ sãàkʋm-kʋra Abraham, a lɛ ʋ na tɩ be a Mezopotami ɛ́ wa bãw kpɛ a Haran a. 3Ʋ tɩ yel ʋ na: “Bɛr a fʋ tẽ-kpɩɛra nɩ a fʋ sãà yir, ɛ́ cen a tẽw ʋl pʋɔ ɩ̃ na na wul fʋ a.”#7:3 Nyɛ̃ Yzt 12.1. 4Lɛ n'a a Abraham tɩ bɛr a Kaldeyɛ̃ mɩnɛ tẽw ɛ́ cen tɩ kpɩɛr a Haran. A Abraham sãà na wa kpi a, a Naaŋmɩn ɩ na ʋ yi a be, ɛ́ wa a tẽw ŋa pʋɔ nyɩ na kpɩɛr a dɩ̃a a. 5A be a, Naaŋmɩn bɛ tɩ kʋ̀ ʋ zie ɩ, zie zaa pʋrɩ na yɛlmɛ man gbɛnaɓɛl a ɩ. Ɛcɛ ʋ tɩ ƴãw nɩ nʋɔr k'ʋʋ na kʋ̀ ʋ nɩ a tẽw nɛ ʋ ɩ a ʋ bʋ̃-sora, nɩ a ʋ bʋ̃-dɔwrɩ bʋ̃-sora a ʋ kũu pùorí, a Abraham na saa bɛ tɩ tɛr bie a lɛn daar a. 6A Naaŋmɩn tɩ yel ʋ na: “A fʋ bʋʋrɛ na zɩ̃ n tẽ-yoru pʋɔ, bɛ na ɩ na bɛ lɩɛbɩ gbãgbaar a be, bɛ dɔwrɩ bɛ yome kɔbr anaar (400). 7Ɛcɛ a tẽw nɛ na na ɩ bɛ ɩ a ʋ gbãgbaar a, ɩ̃ na dɩ n ʋ nɩ ƴɛ̀rʋ. Al pùorí, bɛ na yi n a be ɛ́ wa a ka wa puore mɛ̃#7:7 A kan-nɛ́ɛ 6 nɩ a 7 ƴãw a, nyɛ̃ Yzt 15.13-14 nɩ Ety 3.12..” 8A Naaŋmɩn tɩ maal'ɩ Wõ-taa nɩ a Abraham, ɛ́ a Wõ-taa nɛ bãwfʋ ɩ a yʋɔr-ŋmãafʋ. Lɛ so a Abraham na wa dɔw a Ɩzaakɩ a, ʋ ŋmãa nɩ a ʋ yʋ̀ɔr a bibie ani sob. Lɛ n'a a Ɩzaakɩ mɩ̀ tɩ tu a Zakɔb zie, a Zakɔb mɩ̀ tu a lɛ a sãàkʋm-kore pie nɩ ayi zie.
9A sãàkʋm-kore tɩ nyuur'ɩ nɩ a Zuzɛb, nyɔw ʋ kʋɔrɩ ƴãw bɛ cen nɩ Eziptɩ. Ɛcɛ a Naaŋmɩn tɩ be n a ʋ zie. 10Ʋ tɩ faa ʋ nɩ a ʋ kpɩɛrʋ za pʋɔ, ɛ́ kʋ̀ ʋ maalʋ nɩ yã-bãwfʋ a Eziptɩ nãà Faarawɔ̃ niŋé, ʋ de ʋ ʋ kaarɛ a Eziptɩ tẽw zie, lãwnɩ a nãà yir bome zie. 11Kɔ̃ wa tɩ lo n a Eziptɩ nɩ a Kanãa, wa n kpɩɛrʋ yaga. A tɩ sãàkʋm-kore bɛ tɩ cãà páwr a dɩrɛ ɩ. 12A Zakɔb na tɩ wõ kɛ́ bʋ̃-dɩrɩ be n a Eziptɩ a, ʋ tõ n a tɩ sãàkʋm-kore a gb'a a dãw-niwn sob ƴãw. 13Ʋ na tɩ lɛb tõ bɛ a gb'a ayi sob ƴãw a, a Zuzɛb tɩ ɩ na a ʋ yɛbr bãw kɛ́ ʋlɛ n'ʋ, ɛ́ a Faarawɔ̃ mɩ̀ tɩ bãw a ʋ yib zie. 14Lɛ n'a a Zuzɛb tɩ ƴãw bɛ cen tɩ tɛr a ʋ sãà Zakɔb nɩ a ʋ yir dem za wa n. Bɛ za tɩ ɩ n nɩbɛ lɩz'a anaar ŋmãa nũu. 15À ŋá n'a a Zakɔb tɩ siw a Eziptɩ, be n'a ʋ tɩ kpi, ʋlɛ nɩ a tɩ sãàkʋm-kore. 16Bɛ tɩ tuo bɛ na wa n a Sɩsɛm, wa ũù a yaa-bɔw nɛ pʋɔ a Abraham na tɩ dà a Amɔɔr bibiir zie a Sɩsɛm a.
17A daar nɛ a Naaŋmɩn na na tu a nʋɔr ʋ na ƴãw kʋ̀ a Abraham a tɩ pɩɛlɛ na. A tɩ nɩ-bʋʋrɛ tɩ yɛ̀r'a yãwmɛ dɔwlɩ a Eziptɩ tẽw pʋɔ. 18Na-yũo kãw, na bɛ tɩ bãw a Zuzɛb a, tɩ de nɩ a naalʋ a Eziptɩ. 19A nãà ŋa tɩ bɛ̀lɩ nɩ a tɩ bʋʋrɛ ɛ́ dɔwrɛ a tɩ sãàkʋm-kore, mɩ́ tɩ fɛr bɛ ƴãw bɛ zawrɩ a bɛ bi-pɩɩlɛ bɛr kɛ́ bɛ kpi. 20A ʋlɩ vuo nɛ pʋɔ n'a a Moyiir tɩ dɔw, ɩ bi-vla na pɛlɩ a Naaŋmɩn pʋɔ a. Bɛ tɩ tɛr ʋ na guoli a ʋ sãà dĩó tɩ maalɩ cuwr ata. 21A lɛn daar bɛ na wa zawr'ʋ bɛr a, a Faarawɔ̃ pɔwyaa de ʋ na guoli mɛ̃ a ʋ bi-dɔwra a. 22À ŋá n'a bɛ tɩ zànɩ nɩ a Moyiir a Eziptɩ yã-bãwfʋ za, ʋʋ tɩ tɛr'ɩ fãw a ʋ ƴɛ̀rʋ pʋɔ nɩ a ʋ ɩ-ɩrɩ pʋɔ. 23Ʋ na wa tɛr yome lɩz'a ayi a, a tɩɛrʋ wa ʋ na k'ʋʋ cen tɩ nyɛ̃ a ʋ yɛbr Ɩsɩrayɛl biir. 24Ʋ na tɩ nyɛ̃ Eziptɩ tẽw nɩr ʋ dɔwrɛ a bɛ kãw a, ʋ ŋmãa na yi de a sob nɛ bɛ na dɔwrɛ a zɛbr, ɛ́ lɩɛr'ʋ ŋmɛ a Eziptɩ tẽw nɩr nɛ kʋ. 25Ʋ tɩ tɩɛrɛ k'aa ʋ yɛbr na bãwnɩ a na kɛ́ Naaŋmɩn n'ʋ tu a ʋ Moyiir kʋ̀rɛ bɛ a faafʋ, ɛcɛ bɛ bɛ tɩ bãw kɛ́ lɛ n'a ɩ. 26A bio daarɩ́, ʋ tɩ nyɛ̃ nɩ Ɩsɩrayɛl bʋʋrɛ nɩbɛ ayi bɛ pɔbr taa, ʋ yel k'ʋʋ faarɩ bɛr. Ʋ tɩ yel bɛ na: “Ɩ̃ bá mɩnɛ ɛ, nyɩ ɩ n yɛbr, bʋ̃ʋ n'ʋ so nyɩ dɔwrɛ taa?” 27Ɛcɛ a sob nɛ na tɩ dɔwrɛ a ʋ tɔ a tɩ dáa nɩ a Moyiir bɛr ɛ́ yel à ŋá: “Ãa n'ʋ ƴãw fʋ kɛ́ fʋ ɩ a tɩ nɩ-kpɛ̃ɛ nɩ a tɩ ƴɛ̀r-maalɛ? 28Fʋ bɔbr'a kɛ́ fʋ kʋ m mɛ̃ a lɛ fʋ na zãa kʋ a Eziptɩ tẽw nɩr a bɩɩ?” 29A Moyiir na tɩ wõ a ƴɛ̀r-bie á ŋá a, ʋ zɔ na cen tɩ kpɩɛr Madian. Ʋ tɩ dɔw nɩ dɛbli ayi a be.
30A tɩ maal'ɩ yome lɩz'a ayi, ɛ́ malkɩ tɩ wul ʋ tʋɔra a Moyiir Sinayi tãw wɛja pʋɔ, tuw kãw vũu-zɛlɛ pʋɔ. 31A Moyiir na tɩ nyɛ̃ a yel ŋa a, a tɩ ɓãá ʋ nɩ nʋɔr ʋ tawr pɩɛlɛ k'ʋʋ maal jɩ́r kaa. Lɛ n'a ʋ tɩ wõ kɔkɔr ʋ yere: 32“Mãa n'ɩ a fʋ sãàkʋm-kore Naaŋmɩn, a Abraham, a Ɩzaakɩ nɩ a Zakɔb Naaŋmɩn.” A Moyiir tɩ màwr'ɩ ʋ za, ɛ́ bɛ lɛb sàw na zɛw zu jɩ́r kaa ɩ. 33Lɛ n'a a Sore tɩ yel ʋ: “Fowri a fʋ nafawr bɛr, a ka fʋ na àr a, ɩ n zi-sõw. 34Sɩza, ɩ̃ nyɛ̃ nɩ a ɩ̃ nɩ-bʋʋrɛ kpɩɛrʋ a Eziptɩ, ɩ̃ wõ n a bɛ kon. Ɩ̃ siw na wa k'ɩ̃ɩ wa faa bɛ. Ƴɛrɛŋa a, ɩ̃ tone fʋ na, cen a Eziptɩ#7:34 A kan-nɛ́ɛ 27 tɩ tɔ a 34 ƴãw a, nyɛ̃ Ety 2.14—3.10..”
35A Moyiir ŋa a Ɩsɩrayɛl nɩbɛ na tɩ jɛ bɛr a, a ʋl bɛ na tɩ sowri: “Ãa n'ʋ ƴãw fʋ fʋ ɩ nɩ-kpɛ̃ɛ nɩ ƴɛ̀r-maalɛ a?” Ʋlɛ n'ʋ a Naaŋmɩn tõ a bɛ zie, k'ʋʋ ɩ a bɛ nɩ-kpɛ̃ɛ nɩ a bɛ faarɛ. A tõ-nʋɔr ŋa n'ʋ a Naaŋmɩn tɩ tõ a malkɩ k'ʋʋ tɩ kʋ̀ a Moyiir, a lɛn daar ʋ na tɩ wul ʋ tʋɔra a tuw pʋɔ a. 36A Moyiir'ʋ tɛr bɛ yi n a Eziptɩ ɛ́ maalɩ yel-bãw-guuri nɩ nɔ-ɓãa-yele a Eziptɩ tẽw nɩ a Kʋ̃ɔ-kpɛ̃ɛ-zɩɛ ƴãw nɩ a wɛja-kpalɛ pʋɔ yome lɩz'a ayi. 37Ʋlɛ n'ʋ tɩ cãà yel a Ɩsɩrayɛl nɩbɛ: “Naaŋmɩn na ɩ na ƴɛ̀r-manɛ na ŋmɛ̃ mɛ̃ a mãa a, ʋ yi a nyɩ pʋɔ a nyɩ ƴãw#7:37 Nyɛ̃ Wl-ayi 18.15..” 38A wɛja-kpalɛ pʋɔ lãw daar a, a Moyiir'ʋ tɩ be a tɩ sãàkʋm-kore nɩ a malkɩ cará, ɛ́ a malkɩ ƴɛ̀rɛ nɩ ʋ a Sinayi tãw zu. Ʋlɛ n'ʋ de a nyɔ-vʋʋrʋ ƴɛ̀r-bie wa kʋ̀ tɩ. 39Ɛcɛ a tɩ sãàkʋm-kore bɛ tɩ sàw a Moyiir nʋɔr ɛ. Bɛ zawr'ʋ na bɛr, ɛ́ lɛb tɩɛrɛ a Eziptɩ cenu. 40Lɛ n'a bɛ tɩ yel a Aarɔ̃: “Maalɩ ŋmɩmɛ kʋ̀ tɩ, a de tɩ niwn. A Moyiir ŋa na tɛr tɩ yi n a Eziptɩ a, tɩ bɛ bãw ʋlɩ bom nɛ na ɩ ʋ a ɩ.”#7:40 Nyɛ̃ Ety 32.1. 41A alɩ bibie nɛ pʋɔ n'a bɛ tɩ maalɩ nadele ɛ́ maalɩ bàwr kʋ̀ ʋ, ɛ́ maalɩ cuw-kpɛ̃ɛ a bɛ nuru bʋ̃-maala ƴãw. 42Lɛ n'a a Naaŋmɩn gùr pùor cɔw bɛ, ɛ́ bɛr bɛ bɛ su zu maalɛ a salom zu bʋ̃-caalɩ, a tu a lɛ a naaŋmɩn-ƴɛ̀r-manbɛ na tɩ sɛb yel a:
“Ɩsɩrayɛl yir nɩbɛ ɛ,
yome lɩz'a ayi za nyɩ na kpɛ
a wɛja-kpalɛ pʋɔ a,
nyɩ kʋ n dʋn kʋ̀ m ɩ?
Nyɩ maal'ɩ bàwr kʋ̀ m ɩ?
43Nyɩ tuo nɩ ŋmɩn Molɔkɩ pɛn-sɛw
nɩ a nyɩ ŋmar-bi-ŋmɩn Erefan dasule.
A tɩbɛ á ŋá n'a nyɩ maalɩ gbine dume puore.
Lɛ so, ɩ̃ na ír nyɩ nɩ a nyɩ tẽw pʋɔ
cen nɩ tɩ zuo nɩ Babɩlɔn bɛr.”#7:43 Nyɛ̃ Am 5.25-27.
44A wɛja-kpalɛ pʋɔ a, a tɩ sãàkʋm-kore tɩ tɛr'ɩ a Naaŋmɩn Wõ-taa pɛn-sɛw. A Naaŋmɩn tɩ yel'a kʋ̀ a Moyiir k'ʋʋ maalɩ a pɛn-sɛw ŋa ʋ ŋmɛ̃ taa nɩ a ʋl ʋ na tɩ nyɛ̃ a. 45A tɩ sãàkʋm-kore lʋɔrɩ nɩ a pɛn-sɛw ŋa kʋ̀ taa. A lɛn daar a Zozue na wa tɩ de bɛ a niwn a, bɛ tɩ cãà na tɛr a pɛn-sɛw ŋa. A Zozue n'ʋ tɩ tɛr bɛ tɩ kpɛ n a tẽw ʋl pʋɔ, a Naaŋmɩn na diw a tẽ-biir, ɛ́ a Ɩsɩrayɛl nɩbɛ zɛb de a. A pɛn-sɛw ŋa tɩ be n a be tɩ ta a Daviir daar. 46A Daviir tɩ pɛlɩ nɩ a Naaŋmɩn pʋɔ. Ʋlɛ n'ʋ tɩ zɛlɩ k'ʋʋ tʋ̃ɔ́ ŋmãa yir kʋ̀ a Zakɔb Naaŋmɩn. 47Ɛcɛ Salomɔ̃ n'ʋ wa ŋmãa yir kʋ̀ a Zakɔb Naaŋmɩn. 48Ɛcɛ a Naaŋmɩn-na-do-saa-bɛ-pɩɛl-a bɛ kpɩɛr nɩsaalbɛ nuru yir-mɩɛrɩ pʋɔ ɩ, mɛ̃ a lɛ a naaŋmɩn-ƴɛ̀r-manɛ na yel a:
49“A Sore yel'a:
a salom ɩ n a ɩ̃ naalʋ-dà-kɔw,
ɛ́ a tẽsɔw ɩ a ɩ̃ gbɛ́ɛ dɔwlʋ zie.
Yir buor'ʋ nyɩ na ŋmãa kʋ̀ m?
Nyɩnɛ n'a na ɩ a ɩ̃ pɩ̃ɛnʋ zie?
50A ɩ̃ nũu bɛ n'ʋ maalɩ à á ŋá za a ɩ?#7:50 A kan-nɛ́ɛ 49 nɩ a 50 ƴãw a, nyɛ̃ Ɩza 66.1-2.”
51Zu-kpɛn dem n'ɩ nyɩ! A nyɩ tobe nɩ a nyɩ socie bɛ wone a Naaŋmɩn bʋɔlʋ ɛ. Nyɩ mʋɔrɩ nɩ a Vʋʋrʋ Sõw kʋralɛ. Nyɩ sɩrɩ na ŋmɛ̃ mɛ̃ a nyɩ sãàkʋm-kore a. 52Naaŋmɩn-ƴɛ̀r-man-buor sob'ʋ a nyɩ sãàkʋm-kore bɛ dɔwrɩ? Bɛ kʋ n a bɛl na tɩ dãw hiere a nɩ-mɩŋa waa a. A Nɩ-mɩŋa ŋa tɔr za nyɩ na pãa mɩl kʋ a, 53nyɩɩm Naaŋmɩn na tu malkɩ mɩnɛ kʋ̀ a ʋ Wulu ɛ́ nyɩ zawrɩ a tub a.»
Bɛ lɔb'ɩ a Ɩtɩɛn nɩ kʋsɛbɛ kʋ
54A Zifʋ mɩnɛ ƴɛ̀rʋ-dɩb-lãw nɩbɛ tɩ pi n kɔkɛɛ dʋnɛ nɩ nyɩmɛ a Ɩtɩɛn ƴãw, a ʋ ƴɛ̀r-bie á ŋá zũú. 55Ɛcɛ a Vʋʋrʋ Sõw tɩ paal'ɩ a Ɩtɩɛn, ʋ úori a salom nyɛ̃ a Naaŋmɩn yúor-vɩɛlʋ-danʋ nɩ a Yeezu na àr a Naaŋmɩn dʋrʋ lowr a. 56Ʋ tɩ yel'a: «Ɩ̃ nyɛ̃ nɩ a salom k'ʋ yuo, ɛ́ a Nɩsaal Bie àr a Naaŋmɩn dʋrʋ lowr.» 57A bɛlɩ dem na tɩ be a be a tɩ pàw nɩ a bɛ tobe ŋmɩɛr'ɩ cɛlsɩ. Bɛ za tɩ lãw na zɔ mɛ̃ nɩ-been a, 58tɩ lo nyɔw ʋ vɩr yi n a tẽw pʋɔ, tɩ tĩ lɔbr'ɩ ʋ kʋsɛbɛ. A yel-mɩn-dem tɩ bin nɩ a bɛ bʋ̃-suuri pɔlbile kãw bɛ na bʋɔlɛ kɛ́ Sol a zie. 59Bɛ na tɩ lɔbr'ɩ ʋ a kʋsɛbɛ a, a Ɩtɩɛn tɩ puore nɩ à ŋá: «Sore Yeezu u, de a ɩ̃ vʋʋrʋ!» 60Al pùorí, ʋ tɩ gbĩ n dume ɛ́ yel kpɛ̃w za: «Sore e, taa dier a yel-bier ŋa dɔwlɛ a bɛ zu ɛ.» Ʋ na tɩ yel à ŋá baar'a, ʋ gur'ɩ a kũu gʋ̃ɔ.
Đang chọn:
Nɩ-toni 7: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
