Nɩ-toni 27
27
A Pol bɛ na tɛr cere nɩ a Ʋrɔm a
1Bɛ na wa yel kɛ́ tɩ na kpɛ n a gbor cen a Ɩtali a, bɛ de nɩ a Pol nɩ nɩ-pàwrɩ bɛ mɩnɛ ƴãw sojarɩ kʋba (100) nɩ-kpɛ̃ɛ na dɩ kɛ́ Ziliyisɩ a nũú. Ʋ tɩ ɩ n sojarɩ kʋba (100) nɩ-kpɛ̃ɛ a Ʋrɔm tẽw na-kpɛ̃ɛ-lɩɛrɛ sojarɩ pʋɔ. 2Tɩ tɩ kpɛ n Adɩramɩsɩɔm tẽw gbor-kpɛ̃ɛ kãw na tɩ cere a Azi tẽw gbee siwfʋ zie a. Masedʋan tẽw dɔɔ kãw na yi Tesalonikɩ bɛ bʋɔlɛ Arɩsɩtakɩ a, tɩ páw tɩ na. 3A bio daarɩ́, tɩ tɩ ta n Sɩdɔ̃ siw. A Ziliyisɩ tɩ maal'a tɛr a Pol nɩ nɩsaalʋ, ʋ tɩ kʋ̀ ʋ nɩ sɔ́r k'ʋʋ cen tɩ puori a ʋ bárɩ, bɛ tʋ̃ɔ́ kaa a ʋ zie. 4Tɩ tɩ yi n a be lɛb kpɛ a gbor, ɛ́ cen lanɩ a kʋ̃ɔ-kpɛ̃ɛ-sɔgɔ-tẽw Sɩɩpʋr lõbowr ʋl na pĩ a sɛsɛb a, a sɛsɛb na tɩ fure tuore tɩ a ƴãw. 5A kʋ̃ɔ-kpɛ̃ɛ ʋl na lanɩ a Silisi nɩ a Pãfili a zu n'a tɩ tɩ duw tɩ ta siw Mɩɩr Lisi lowr. 6A sojarɩ kʋba (100) nɩ-kpɛ̃ɛ tɩ nyɛ̃ nɩ Alɛsãdiri gbor a be ʋ cere a Ɩtali lowr, ʋ ƴãw tɩ kpɛ. 7Bibi-yaga za ƴãw, tɩ duwri nɩ bɛl bɛl ɛ́ hanɩ lɛɛɛ wa tɩ ta a Kinidɩ ƴãw. A sɛsɛb na tɩ tuore tɩ, tɩ kʋ̃ tʋ̃ɔ́ cãà tori niwn cere a, tɩ tɩ tu n Salimone tẽw nyɔ-ɓɩɩla lowr, kɛ́ tɩ tʋ̃ɔ́ lanɩ a kʋ̃ɔ-kpɛ̃ɛ-sɔgɔ-tẽw Kɩrɛtɩ lõbowr ʋl na pĩ a sɛsɛb a. 8Tɩ tɩ lanɩ nɩ a tẽw kõkowr hanɩ nɩ, ɛ́ wa ta tẽw kãw bɛ na bʋɔlɛ kɛ́ Gbee siwfʋ zie na vɩɛl a, na pɩɛlɩ Lasaya a.
9Tɩ tɩ kɔwr'ɩ a be yaga, ɛ́ a gbor duwfʋ wa tɩ ɩrɛ dɛ̃bɩ̃ɛ, bʋ̃ʋ n'ʋ vɛ̃, a mʋta-tuo bibir#27:9 Mʋta-tuo bibir: Ʋ ɩ n a Zifʋ mɩnɛ cuw kãw na mɩ́ ta a bɛ sɩ̃ɔ-kpɛ-paala daar a. tɩ tɔl'a baarɩ. Lɛ n'a a Pol tɩ yel a lɛ ʋ na nyɛ̃ a: 10«Ɩ̃ bá mɩnɛ ɛ, ɩ̃ nyɛ̃ na kɛ́ tɩɩm wa yel kɛ́ tɩ cãà duwre a, tɩ na sãw nɩ yel-yaga a gbor nɩ a ʋ tuor ƴãw, ɛ́ a tɩɩm tɛɛ za mɩ̀ kʋ̃ cɩ̃ɛ ɩ.» 11Ɛcɛ a sojarɩ kʋba (100) nɩ-kpɛ̃ɛ tɩ de nɩ a gbor sob nɩ a gbor duwre dem, ɛ́ bɛr a Pol ƴɛ̀rʋ. 12A tẽw nɛ gbee siwfʋ zie be bɛ tɩ tɛr kpɛb a sɩ̃ɔ vuo nɛ pʋɔ ɩ. Alɛ so nɩbɛ yaga zie tɩ sàw kɛ́ bɛ lɛb kpɛ a gbor cere. Bɛ tɩ bɔbr'a kɛ́ alɛ wa tʋ̃ɔ́, bɛ̃ɛ ta Fenisi, be a be a sɩ̃ɔ. Ʋ tɩ ɩ n a Kɩrɛtɩ tẽw gbee siwfʋ zie na be a saa-pɛrɩ́-dʋrʋ-lowr nɩ a mʋ̃tɔ̃w-kpɛb-lowr cará a, nɩ a saa-pɛrɩ́-gʋba-lowr nɩ a mʋ̃tɔ̃w-kpɛb-lowr cará a.
Sɛsɛb kpɛ̃ɛ cɛ̀r'ɩ a kʋ̃ɔ-kpɛ̃ɛ zu
13Sɛsɛble kãw tɩ yi n a saa-pɛrɩ́-dʋrʋ-lowr fure. Lɛ n'a bɛ tɩ tɩɛr kɛ́ bɛ na tʋ̃ɔ́ na maalɩ a bɛ pʋ-tɩɛrʋ. Bɛ tɩ ír'ɩ a gbor kpawbir#27:13 Kur-tɩbr-jajaa kãw n'ʋ bɛ mɩ́ lɔb ƴãw a kʋ̃ɔmɩ́, ʋ nyɔw a gbor tɛr àr'ɩ. bɛr, ɛ́ cere lanɛ a Kɩrɛtɩ. 14Ɛcɛ, a bɛ tɩ cɛlɩ ɛ, ɛ́ sɛsɛb-kpɛ̃ɛ kãw, bɛ na bʋɔlɛ Erakɩlɔ̃ a, yi a kʋ̃ɔ-kpɛ̃ɛ-sɔgɔ-tẽw tan pʋɔ ɛ́ fu siw. 15A sɛsɛb tɩ ŋmɛ na ɓáw a gbor, ʋ kʋ̃ lɛb tʋ̃ɔ́ duw tuori a sɛsɛb ɛ. Lɛ n'a tɩ tɩ bɛr a sɛsɛb ɓáw tɩ cere nɩ. 16Kʋ̃ɔ-kpɛ̃ɛ-sɔgɔ-tẽle kãw bɛ na bʋɔlɛ kɛ́ Koda a, ʋʋ tɩ pĩ a sɛsɛb blã a, a ʋ lõbowr ʋl na be a saa-pɛrɩ́-dʋrʋ-lowr a, ʋlɛ n'ʋ tɩ tu lanɩ tɔl, ɛ́ hanɩ lɛɛɛ wa tɩ tʋ̃ɔ́ nyɔw a gbor bile tɛr. 17Bɛ na wa taw ʋ do n ƴãw a gbor-kpɛ̃ɛ pʋɔ baarɩ a, bɛ ɩ n a lɛ bɛ na tʋ̃ɔ́ a: bɛ de nɩ mie 'lẽ nɩ a gbor viiri koli, ɛ́ bɛ na tɩ zɔrɛ dɛ̃bɩ̃ɛ bɛ nãà wa cen tɩ kpa gbɛ́ɛ a biire na be a Libi tẽ-kõkowr ƴãw a, bɛ lɔb'ɩ a gbor kpawbir#27:17 Nyɛ̃ 27.13. ƴãw a kʋ̃ɔmɩ́, ɛ́ pãa bɛr a sɛsɛb darɛ bɛ cere nɩ. 18A bio daarɩ́, a sɛsɛb tɩ cãà bɛ bɛrɛ tɩ ɛ. Lɛ n'a bɛ tɩ wob a gbor tuor lɔb ƴãw a kʋ̃ɔmɩ́. 19A bibie ata sob, a gbor duwrbɛ tɛɛ za tɩ wob'ɩ a gbor duwfʋ bome lɔb ƴãw a kʋ̃ɔmɩ́. 20Bibie a ŋmɩn za, mʋ̃tɔ̃w bɛ tɩ cãà pure ɩ, ŋmar-bie mɩ̀ bɛ tɩ cãà yire ɩ, a sɛsɛb-kpɛ̃ɛ na tɩ pili pàw tɩ a tɩ cãà na fure nɩ fãw bɛ dɩ vuo ɩ. Tɩ bɛ tɩ cãà tɩɛrɛ kɛ́ tɩ na cɩ̃ɛ na ɩ.
21A tɩ kɔwrɩ na bɛ na bɛ dɩ bom a. Lɛ n'a a Pol tɩ ìr àr a bɛ sɔgɔ ɛ́ yel bɛ: «Ɩ̃ bá mɩnɛ ɛ, nyɩ nãá tɩ bɛr'a wõ a ɩ̃ ƴɛ̀rʋ ɛ́ tɩ tɩ cãà be a Kɩrɛtɩ, a bome kʋ̃ʋ sãw ɛ́ wɛ à à ŋá ɩ. 22Ɛcɛ ƴɛrɛŋa a, ɩ̃ yere na kʋ̀rɛ nyɩ kɛ́ nyɩ cãà ƴãw fãw, nyɩ been kãw za bɛ kpiir ɛ, a gbor yõ n'ʋ na wɛ. 23Bʋ̃ʋ n'ʋ vɛ̃, a tɩ̃ɩsɔw a, a ɩ̃ Naaŋmɩn ɩ̃ na tone a malkɩ kãw wa n a ɩ̃ zie 24wa yel mɛ̃: “Ta zɔrɛ dɛ̃bɩ̃ɛ ɩ, Pol i, a fɛr'a kɛ́ fʋ ta a na-kpɛ̃ɛ niŋé, ɛ́ a Naaŋmɩn nɔnɛ na kʋ̀ b k'aa bɛlɩ dem za nɩ a fʋ̃ʋ na lãw duwre a, bɛ kʋ̃ kpi ɛ!” 25Lɛ so, nyɩ ƴãw fãw, ɩ̃ bá mɩnɛ ɛ! Ɩ̃ bɛr'ɩ tɩɛrʋ, a Naaŋmɩn na tu n a lɛ ʋ na yel kʋ̀ m a. 26A fɛr'a kɛ́ tɩ tɔ kʋ̃ɔ-kpɛ̃ɛ-sɔgɔ-tẽw kãw kõkowr àr.»
27A tɩ̃ɩsɔwr pie nɩ anaar sob tɩ n'ɩ à ŋá a sɛsɛb na tɩ darɛ tɩ gʋɔr'ɩ a Mediterane kʋ̃ɔ-kpɛ̃ɛ zu a. A na tɩ manɛ a tɩ̃ɩsɔw zi-põ-zɛ̃-taa a, a gbor duwrbɛ tɩ nyɛ̃ na k'aa ɩ na mɛ̃ tɩ pɩɛlɛ nɩ tẽw a. 28Bɛ tɩ lɔb'ɩ a kʋ̃ɔ-kpɛ̃ɛ-zulu bʋ̃-mána nyɛ̃ a ɩ mɛtɩr lɩz'a ayi ŋmãa nũu dɔwlɩ ayi. Bɛ tɩ cen nɩ blã ɛ́ lɛb lɔb nyɛ̃ mɛtɩr lɩzɛr'ɩ ani. 29Bɛ na tɩ zɔrɛ dɛ̃bɩ̃ɛ a gbor nãà wa cen tɩ ŋmɛ pìe a, bɛ lɔb'ɩ kpawbie anaar a gbor pùorí ƴãw a kʋ̃ɔmɩ́, ɛ́ bɛ pãa gùre kɛ́ a zie vɩɛ fɔ̃w. 30Ɛcɛ a gbor duwrbɛ tɩ bɔbr'a kɛ́ bɛ zɔ ɛ́ bɛr a gbor. Bɛ tɩ ɓáw nɩ a gbor bile ƴãw a kʋ̃ɔmɩ́, ɛ́ bɛlɩ yel kɛ́ kpawbie n'a bɛ bɔbr kɛ́ bɛ cen tɩ ƴãw a kʋ̃ɔmɩ́ a gbor nisɔw. 31Lɛ n'a a Pol tɩ yel a sojarɩ kʋba (100) nɩ-kpɛ̃ɛ nɩ a sojarɩ: «A nɩbɛ bɛ ŋa bɛ wa cãà be a gbor pʋɔ a, nyɩ kʋ̃ tʋ̃ɔ́ faa nyɩ tʋɔra ɩ.» 32Lɛ n'a a sojarɩ tɩ ŋma a gbor bile mie bɛr, ɛ́ bɛr ʋ cere.
33Bɛ na tɩ zɩ̃ cɛlɛ a zie vɩɛfʋ a, a Pol tɩ yere na kʋ̀rɛ bɛ za kɛ́ bɛ dɩ. Ʋ tɩ yere na: «Bibie pie nɩ anaar n'ɩ à ŋá nyɩ na wone a tuo ɛ́ bɛ dɩ bom za a. 34Lɛ so ɩ̃ zɛlɛ nyɩ kɛ́ nyɩ dɩ bom kãw, a nyɩ faafʋ ƴãw n'a. Ɩ̃ lɛb yel ƴãw pʋɔ, a nyɩ been kãw za zukɔbr been sɩrɩ kʋ̃ bɔr ɛ.» 35Ʋ na tɩ ƴɛ̀r à ŋá baar'a, ʋ de nɩ dipɛ̃, puori Naaŋmɩn yãanɩ a bɛ za niŋé, ɛ́ nyɔw ŋma, tĩ 'wɔbr. 36Lɛ n'a bɛ za mɩ̀ pãa tɩ ƴãw fãw dɩ. 37Tɩ za na tɩ be a gbor pʋɔ a, tɩ ɓã n taa ɩ nɩbɛ kɔbr ayi dɔwlɩ lɩz'a anaar ŋmãa nũu dɔwlɩ nɩ-been (276). 38Ŋa za na wa dɩ tɩw baar'a, bɛ ír'ɩ a ci-vʋɔrɩ lɔb ƴãw a kʋ̃ɔmɩ́ kɛ́ a gbor ta cãà tɩbrɛ ɩ.
A Pol mɩnɛ gbor tu n kʋ̃ɔ
39A zie na wa vɩɛ a, a gbor duwrbɛ bɛ tɩ bãw ʋlɩ tẽw nɛ na n'ʋ a ɩ. Ɛcɛ bɛ tɩ nyɛ̃ nɩ a kʋ̃ɔ-kpɛ̃ɛ zie kãw na ɩ goraa a, ɛ́ gbãgbala pɩɛlɩ a. Be n'a bɛ tɩ bɔbr kɛ́ alɛ na na tʋ̃ɔ́ a, bɛ̃ɛ ɩ a gbor ʋ ta. 40Bɛ tɩ cɛ̀r'ɩ a kpawbie mie bɛr, ɛ́ bɛr a a siw a kʋ̃ɔmɩ́ lãwnɩ a gbor vue mie. Al pùorí, bɛ tɩ 'lẽ nɩ pɛn kɛ́ a sɛsɛb kpɛ ʋ pi tʋ̃ɔ́ darɛ a gbor cere nɩ a gbãgbala ʋl pɛr.
41Ɛcɛ bɛ tɩ tuor'ɩ zi-biire, a gbor kpɛ nɛr a be. A gbor niŋé tɩ kpɛ na nɛr a biire pʋɔ kʋ̃ lɛb tʋ̃ɔ́ dam ɛ, ɛ́ a kʋ̃ɔ mie ŋmɩɛr a gbor pɛr wɛlɛ. 42Lɛ n'a a sojarɩ tɩ tɩɛr kɛ́ a nɩ-pàwrɩ na lo n a kʋ̃ɔmɩ́ duwri yi zɔ, ɛ́ bɔbr kɛ́ bɛ kʋ bɛ. 43Ɛcɛ a sojarɩ kʋba (100) nɩ-kpɛ̃ɛ na tɩ bɔbr k'ʋʋ faa a Pol a, tɩ piw bɛ nɩ sɔ́r a lɛ ƴãw. Ʋ tɩ yel'ɩ a bɛlɩ dem na bãw a duwfʋ a, kɛ́ bɛ de niwn lo a kʋ̃ɔmɩ́ duwri ta a tẽw, 44ɛ́ a ŋmaarɛ a, kɛ́ bɛ nyɔw dapawli bɩɩ a gbor na wɛl yaarɩ a bʋ̃-kãw tuur'ɩ. A ŋa n'a bɛ ɩ bɛ za tʋ̃ɔ́ ta a tẽw, ɛ́ bom bɛ ɩ a bɛ kãw za ɩ.
Đang chọn:
Nɩ-toni 27: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
