Nɩ-toni 21
21
A Pol dúor'ɩ a Zerizalɛm
1Tɩ na wa tɩ bɛr taa a, tɩ kpɛ n a gbor cen Kɔsɩ daadaalɛ. A bio daarɩ́, tɩ tɩ ta n Ʋrɔdɩ, yi a be cen Patara. 2Tɩ tɩ nyɛ̃ nɩ gbor kãw a be ʋ cere Fenisi, tɩ kpɛ a ʋ pʋɔ cen. 3Tɩ na tɩ pɩɛlɛ Sɩɩpʋr nyɛ̃ a tẽw ʋ sãá a, tɩ ŋmɛ na lɩɛbɩ a kʋ̃ɔ-kpɛ̃ɛ-sɔgɔ-tẽw dʋrʋ lowr, tu a Siiri lowr sɔ́r, tɩ ta siw a Tɩ́ɩ̀r. Be n'a a gbor tuor tɩ siwr. 4Tɩ tɩ nyɛ̃ nɩ po-tuurbɛ a be, lɛ so tɩ tɩ kpɛ a be bibie ayopõi. A Vʋʋrʋ Sõw tɩ ƴãw bɛ na bɛ yel a Pol k'ʋʋ ta do a Zerizalɛm ɛ. 5Tɩ na tɩ kpɛ a be tɩ ta a bibie ayopõi a, tɩ lɛb'a lo a sɔ́r. Tɩ na tɩ cere a, bɛ za, tɩ lãwnɩ a pɔwbɛ nɩ a bibiir, tɩ bɩɛlɩ tɩ na tɩ yi n a tẽw pʋɔ. Tɩ na tɩ ta a kʋ̃ɔ-kpɛ̃ɛ nʋɔr a, tɩ gbĩ n dume lãw puori. 6Al pùorí, tɩ tɩ puori taa ɛ́ tɩ kpɛ a gbor, ɛ́ bɛ lɛb kule. 7A tɩɩm na tɩ kpɛ a gbor a, tɩ tɩ yi n a Tɩ́ɩ̀r ɛ́ cen tɩ ta Pitolemayisɩ. Tɩ tɩ siw na puori a yɛbr na be a be a, ɛ́ lãw zɩ̃ nɩ bɛ bibi-been. 8A bio daarɩ́, tɩ tɩ duw na tɩ ta Sezaare, cen tɩ kpɩɛr Yel-nʋ̃ɔ̀ hiere Filib yir. A Filib tɩ ɩ n a nɩbɛ ayopõi bɛl kãw bɛ na tɩ kaa ír a Zerizalɛm a. 9Ʋ tɩ tɛr'ɩ pɔwyabɛ anaar na bɛ kul sɩrbɛ, ɛ́ ƴɛ̀rɛ naaŋmɩn-ƴɛ̀r-manbɛ ƴɛ̀rʋ a. 10Tɩ na tɩ cãà be a be maalɩ bibie á ŋá a, Zude tẽw naaŋmɩn-ƴɛ̀r-manɛ kãw na dɩ Agabisɩ a tɩ wa ta na. 11Ʋ tɩ wa n a tɩ zie wa de a Pol kpàwr 'lẽ nɩ a ʋl tɔr za gbɛ́ɛ nɩ a nuru ɛ́ yel: «À ŋá n'a a Vʋʋrʋ Sõw yere: “À à ŋá tɔr za n'a a Zifʋ mɩnɛ na 'lẽ a kpàwr ŋa sob a Zerizalɛm, ɛ́ de ʋ ƴãw a nɩ-bʋʋr-yoru nuru pʋɔ.”» 12Tɩ na tɩ wõ à à ŋá a, tɩɩm nɩ a yɛbr na be a Sezaare a, tɩ zɛlɩ nɩ a Pol yãayãa k'ʋʋ ta do a Zerizalɛm ɛ. 13Lɛ n'a ʋ tɩ sɔw yel tɩ: «Bʋ̃ʋ ƴãw n'a nyɩ kone ɛ́ sãwnɛ mɛ̃ pʋɔ à ŋá? Mãa a, 'leb yõ bɛ n'a ɩ̃ gù ɛ, ɩ̃ mɩ̀ gù n a kũu a Zerizalɛm a Sore Yeezu yúor ƴãw.» 14Ʋ na bɛ tɩ sàwr dier a tɩ ƴɛ̀rʋ a, tɩ tɩ bɛr ʋ na ɛ́ yel: «A Sore pʋ-tɩɛrʋ, ʋ maalɩ!» 15Tɩ na tɩ kpɛ a be bibie blã a, tɩ cɔbr'ɩ a tɩ tuor yi lo n a Zerizalɛm sɔ́r. 16Sezaare tẽw po-tuurbɛ, mɩ̀ na tɩ páw tɩ dúor a Zerizalɛm a, tɩ tɛr tɩ na cen nɩ Mɩnasɔ̃ na yi Sɩɩpʋr a yir, tɩ tɩ be a be. A Mɩnasɔ̃ ŋa tɩ sàw na de a Yeezu yele a pɛr-tib daar za.
A Pol cen na tɩ nyɛ̃ a Zakɩ
17Tɩ na wa ta a Zerizalɛm a, a yɛbr tuor'a nyɔw tɩ nɩ nʋ̃ɔ̀. 18A bio daarɩ́, tɩɩm nɩ a Pol tɩ cen nɩ a Zakɩ zie. Be n'a a Lãw-yir nɩ-kore za mɩ̀ tɩ ɓã taa. 19A Pol na wa puori bɛ baar'a, ʋ manɩ na owri a yele al za a Naaŋmɩn na tɩ tu a ʋ tome pùor maalɩ a nɩ-bʋʋr-yoru zie a. 20Bɛ na tɩ wõ a ʋ manʋ a, bɛ danɩ nɩ a Naaŋmɩn ɛ́ yel a Pol: «Yɛb i, nyɛ̃, Zifʋ mɩnɛ ta n túre túre na lɩɛbɩ a kɩrɩta-nɩbɛ a. Bɛ za tu n a Naaŋmɩn wulu pùor sɩza. 21Ɛcɛ bɛ wone nɩ a lɛ a nɩbɛ na ƴɛ̀rɛ a fʋ ƴãw a: a nɩbɛ yere na kɛ́ fʋ wule nɩ a Zifʋ mɩnɛ na kpɩɛr a nɩ-bʋʋr-yoru pʋɔ a, kɛ́ bɛ ta tuur a Wulu a Moyiir na ƴãw a ɩ, kɛ́ fʋ cãà na mɩ̀ lɛb yere kʋ̀rɛ bɛ kɛ́ bɛ ta ŋmarɛ a bɛ bibiir yɛɛ ɩ, ɛ́ mɩ̀ ta tuur a Zifʋ mɩnɛ ɩ-ɩrɩ ɛ. 22Ŋmɩŋmɩn za n'a tɩ na ɩ? Bʋnʋ bɛ ka be ɩ, bɛ na wõ na kɛ́ fʋ be n ka. 23Lɛ so, sàw tu à à ŋá tɩ na na yel kʋ̀ b a. Tɩ tɛr'ɩ dɛbr anaar na kõ nʋɔr a. 24Tɛr bɛ nyɩ za lãw tu a dɛwr-so-bɛrʋ tub, ɛ́ fʋ ya a bɛ bʋ̃-daarɩ kʋ̀ bɛ, bɛ tʋ̃ɔ́ fɔr a bɛ zuru. Lɛ n'a nɩr za na bãw kɛ́ a lɛ bɛ na yere a fʋ ƴãw a bɛ tɛr pɛr ɛ, ɛ́ kɛ́ a fʋ̃ʋ mɩ̀, fʋ tuur'ɩ a Naaŋmɩn wulu. 25Ɛcɛ, a nɩ-bʋʋr-yoru nɩbɛ bɛl na lɩɛbɩ a kɩrɩta-nɩbɛ a, tɩ sɛb'a yel kʋ̀ bɛ kɛ́ bɛ ciir a bàwr nɛnɛ nɩ a zɩ̃ɩ, kɛ́ bɛ ciir dʋ̃w bɛ na bɛ ŋmãa a kɔkɔr a nɛn, kɛ́ bɛ ta maalɛ pɩ̃ɔ-yele ɩ.»
26Lɛ n'a a Pol tɩ ìr a bio daarɩ́ tɛr a dɛbr anaar bɛl tĩ nɩ a dɛwr-so-bɛrʋ tub. Ʋ tɩ kpɛ n a Ŋmɩn-yir-kpɛ̃ɛ pʋɔ k'ʋʋ tɩ ƴãw a bibir ʋl bɛ nãà wa tu a dɛwr-so-bɛrʋ tub baarɩ, ɛ́ bɛ maalɩ a bàwr a bɛ been been ƴãw a.
Bɛ wa na wa nyɔw a Pol a Ŋmɩn-yir-kpɛ̃ɛ pʋɔ
27A bibie ayopõi na tɩ waar na baar'a, Azi tẽw Zifʋ bɛ mɩnɛ kãw tɩ nyɛ̃ nɩ a Pol a Ŋmɩn-yir-kpɛ̃ɛ pʋɔ. Bɛ tɩ ƴɛ̀r'a ƴãw a zu-sɛbla dam a ʋ ƴãw, ɛ́ bɛ nyɔw ʋ. 28Bɛ tɩ cɩɩrɛ na yere nɩ: «Ɩsɩrayɛl biir i, nyɩ wa faa tɩ! Nyɩ nyɛ̃ ʋ! A nɩr ŋa wule nɩ a nɩbɛ a ziir za kɛ́ bɛ hɩ̃ɛn a tɩ nɩ-bʋʋrɛ nɩ a tɩ zi-sõw ŋa, kɛ́ bɛ ta tuur a Wulu a Moyiir na ƴãw kʋ̀ tɩ a ɩ. Ʋ sʋ̃ɔm'a bul tɛr Gɩrɛkɩ mɩnɛ kpɛ n a Ŋmɩn-yir-kpɛ̃ɛ pʋɔ, dɛw nɩ a zi-sõw ŋa bɛr.» 29Efɛɛzɩ tẽw Torofim nɩ a Pol nɛbɛ bɛ tɩ nyɛ̃ bɛ cɔlɛ a tẽw pʋɔ. Lɛ n'a bɛ tɩ manɛ kɛ́ a Pol tɛr ʋ na kpɛ n a Ŋmɩn-yir-kpɛ̃ɛ pʋɔ.
30A damnʋ tɩ tɔ n a tẽw nɩbɛ za, ɛ́ a zu-sɛbla zɔ wa gbõ taa. Bɛ tɩ nyɔw nɩ a Pol vɩr yi n bɛr a Ŋmɩn-yir-kpɛ̃ɛ pʋɔ ɛ́ pàw a pamɛ daadaalɛ. 31Bɛ tɩ bɔbr'ɩ a Pol kʋb a lɛn daar a sojarɩ túr (1 000) nɩ-kpɛ̃ɛ na tɩ wõ a yel ŋa a: «A Zerizalɛm dam'a nyaw taa ʋ za!» 32Daadaalɛ, a sojarɩ túr nɩ-kpɛ̃ɛ tɩ bʋɔl'ɩ a sojarɩ kʋba (100) nɩ-bɛrɛ nɩ a sojarɩ zɔ cen nɩ a zu-sɛbla zie. Bɛ na wa nyɛ̃ a sojarɩ-nɩ-kpɛ̃ɛ nɩ a sojarɩ a, bɛ bɛr'ɩ a Pol ŋmɛb. 33A sojarɩ túr (1 000) nɩ-kpɛ̃ɛ tɩ taw na ta ƴãw bɛ nyɔw a Pol 'lẽ nɩ bamɛ ayi. Al pùorí ʋ tɩ sowr'a kɛ́ ãa n'ʋ? Nɩ kɛ́ bʋ̃ʋ n'ʋ ʋ ɩ? 34Ɛcɛ a zu-sɛbla pʋɔ a, ŋa za mɩ́ tɩ cɩɩrɛ nɩ à ŋá, ɛ́ a ʋ tɔ mɩ́ tɩ cɩɩrɛ a mɩnɛ. A na bɛ tɩ tɛr a sojarɩ túr nɩ-kpɛ̃ɛ na bãw yel-mɩŋa kãw za a damnʋ zũú a, ʋ tɩ ƴãw na kɛ́ bɛ tɛr a Pol kpɛ n a yir-kpɛ̃w ʋl pʋɔ a sojarɩ na mɩ́ be gù a tẽw a. 35A Pol na wa nyɔw a tanɛ dɛ́r dúor a yir pʋɔ a, a tɩ fɛr'a kɛ́ a sojarɩ ɓáw ʋ, a zu-sɛbla na tɩ damnɛ taa yaga a ʋ ƴãw a zũú. 36Bɛ za tɩ tuur ʋ na cɩɩrɛ yere nɩ: «Nyɩ kʋ ʋ!»
A Pol ƴɛ̀r'a k'ʋʋ faa ʋ tʋɔra
37A na tɩ cɛ blã bɛ na na ɩ a Pol kpɛ a sojarɩ yir pʋɔ a, ʋ sowr'ɩ a sojarɩ túr nɩ-kpɛ̃ɛ: «Ɩ̃ na tʋ̃ɔ́ na ƴɛ̀r a fʋ zie e?» A sojarɩ-nɩ-kpɛ̃ɛ tɩ sɔw ʋ na yel: «Fʋ wone nɩ a Gɩrɛkɩ ƴɛ̀rʋ ʋ? 38A ɩ lɛ fʋ bɛ ɩ a Eziptɩ tẽw dɔɔ ʋl na daar ìr wa n a damnʋ, ɛ́ tɛr nɩ-kʋrbɛ túr-anaar (4 000) zɔ kpɛ n wɛja pʋɔ a ʋ?» 39A Pol tɩ lɛb'a yel ʋ: «A mãa a, Zifʋ nɛ m. Tarsɩ na be Silisi a n'a ɩ̃ dɔw. Tẽw na tɛr yúor a tẽ-bie nɛ m. Ɩ̃ zɛlɛ fʋ na, sàw ɩ̃ ƴɛ̀r a zu-sɛbla zie.» 40A sojarɩ túr nɩ-kpɛ̃ɛ tɩ sàw na kʋ̀ ʋ. A Pol tɩ ìr'a àr a tanɛ dɛ-mimie zu, ɛ́ zɛw nũu kabrɩ yel a nɩbɛ kɛ́ bɛ bɛr gɔmɛ. A nɩbɛ tɩ ŋmãa nɩ vʋʋrʋ ɛ́ a Pol de a ƴɛ̀rʋ nɩ a arameyɛ̃ kɔkɔr yel:
Đang chọn:
Nɩ-toni 21: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.
