2 Korɛ̃tɩ 12
12
A Sore ƴãw nɩ a Pol nyɛ̃ bʋ̃-nyɛrɩ, ʋʋ wul ʋ bʋ̃-wuli
1A na ɩ à ŋá a, alɛ saa bɛ tɛr pɛr a, ɩ̃ mɩ̀ na zɛw nɩ ɩ̃ tʋɔra. Ƴɛrɛŋa a, a bʋ̃-nyɛrɩ a Sore na ƴãw ɩ̃ nyɛ̃ a, nɩ a yel-wuli ʋ na wul mɛ̃ a, al ƴɛ̀rʋ n'a ɩ̃ na ƴɛ̀r. 2Ɩ̃ bãw nɩ kɩrɩta-nɩr kãw, yome pie nɩ anaar'ɩ dɩ̃a, bɛ na ír ʋ do n tɩ gãw nɩ a salom a. Ɩ̃ bɛ bãw a ʋ ƴã-gan n'ʋ bɛ ír'ɩ ʋ do n bɩɩ a ʋ ƴã-gan bɛ n'ʋ a, Naaŋmɩn yõ n'ʋ bãw. 3Ɩ̃ bãwnɩ a na, a nɩr ŋa a, bɛ ír ʋ na do n nɩ a ʋ ƴã-gan, bɩɩ bɛ bɛ ír ʋ do n nɩ a ʋ ƴã-gan a, Naaŋmɩn yõ n'ʋ bãw, 4bɛ ír ʋ na do n tɩ ta n a tẽ-vla, be n'a ʋ wõ ƴɛ̀r-bie ʋ na kʋ̃ tʋ̃ɔ́ manɩ a, ɛ́ nɩsaal bɛ tɛr sɔ́r k'ʋʋ lɛb yel a. 5A nɩr ŋa ƴãw a, ɩ̃ na zɛwr'ɩ ɩ̃ tʋɔra. Ɛcɛ, mãa a, a ɩ̃ bãbàalʋ ƴãw n'a ɩ̃ na zɛwr ɩ̃ tʋɔra. 6Bʋ̃ʋ pãa ɩ! Mãa tɩ bɔbr k'ɩ̃ɩ zɛwr ɩ̃ tʋɔra a, a kʋ̃ʋ ɩ yãyaar'a ɩ, a nãá ɩ n yel-mɩŋa tɛwr ɩ̃ yere, ɛcɛ ɩ̃ bɛ ɩrɛ a lɛ ɩ, ɩ̃ na bɛ bɔbr kɛ́ bɛ tɛr tɩɛrʋ a ɩ̃ ƴãw, ʋ zuo a lɛ bɛ na nyɛ̃ m ɩ̃ ɩrɛ a, bɩɩ ʋ zuo a lɛ bɛ na wone ɩ̃ yere a ɩ.
7Ɛ́ a yele á ŋá bɛ na wul mɛ̃ ɩ̃ nyɛ̃ a, a na tɩ ɩ nɔ-ɓãa-yele a zũú n'a bɛ ƴãw 'wɔbrʋ kãw a ɩ̃ ƴã-ganɩ́: Sɩtaana malkɩ bɛ na ƴãw k'ʋʋ ŋmɩɛr mɛ̃ k'ɩ̃ɩ taa wa nanɩ zɛwr ɩ̃ tʋɔra a. 8Gb'a ata za n'a ɩ̃ zɛlɩ a Sore k'ʋʋ ír a 'wɔbrʋ ŋa bɛr mɛ̃. 9Ɛcɛ ʋ tɩ yel mɛ̃ na: «A ɩ̃ maalʋ sɛw fʋ na, a bãbàalʋ pʋɔ n'a a ɩ̃ fãw mɩ́ sãá ʋ za bɛ nyɛ̃.» Lɛ so ɩ̃ na nɩ̃ɛ zɛwr ɩ̃ tʋɔra a ɩ̃ bãbàalʋ ƴãw, k'aa Kɩrɩta fãw tʋ̃ɔ́ be a ɩ̃ zie. 10Lɛ zũú n'a nʋ̃ɔ̀ cãà kpɩɛr mɛ̃ a bãbàalʋ, a zʋmɛ nɩ a yel-fɛrɩ pʋɔ, a dɔwrʋ nɩ a pʋl-vʋ̃ɔ pʋɔ, ɩ̃ na sàw de a Kɩrɩta a ƴãw. Bʋ̃ʋ n'ʋ vɛ̃, a lɛn daar ɩ̃ na mɩ́ ɩ bãbàal a, lɛn daar a, ɩ̃ mɩ́ kpɛmɛ.
Dɛ̃bɩ̃ɛ ɩrɛ nɩ a Pol a Korɛ̃tɩ Lãw-yir ƴãw
11Mãa n'ɩ ŋan ƴɛ̀rɛ yãya-ƴɛ̀rʋ, ɛcɛ nyɩmɛ nɛbɛ fɛr mɛ̃ ƴãw. Nyɩmɛ nɛbɛ a tɩ sɛw kɛ́ nyɩ manɛ a ɩ̃ ɩ-vɩɛlɩ. Bʋ̃ʋ n'ʋ vɛ̃, ɩ̃ na saa bɛ ɩ nɩr a, a nɩ-ton-gãdaar bɛ ŋa kãw za bɛ zuo mɛ̃ bom kãw za ƴãw ɛ. 12A yele al na wul k'ɩ̃ɩ ɩ n nɩ-tona a, a maal'ɩ a nyɩ sɔgɔ nɩ tʋɔra nyɔwfʋ na vɩɛl bɛ cɛ a: yele na ɩ bãwfʋ sãá a, yel-bãw-guuri nɩ nɔ-ɓãa-yele. 13Bʋ̃ʋ n'ʋ a Lãw-yie al na cɛ a tɛr zuo nyɩ? Alɛ bɛ ɩ ɩ̃ na bɛ ƴãw nyɩ hanɩ a ɩ̃ ƴãw a? Nyɩ dɩ suur kʋ̀ m a yel ŋa na bɛ tu sɔ́r a ƴãw.
14Mãa n'ɩ ŋan cɔbrɩ a nyɩ zie waa baarɩ, ɩ̃ na na wa a gb'a ata sob a, ɛcɛ ɩ̃ cãà kʋ̃ ƴãw nyɩ hanɩ a ɩ̃ ƴãw ɛ. Bʋ̃ʋ n'ʋ vɛ̃, a nyɩ bʋ̃-tɛrɩ bɛ n'a ɩ̃ bɔbr ɛ, a nyɩɩm tɛɛ za n'a ɩ̃ bɔbr. Bibiir bɛ nɛbɛ a fɛrɛ kɛ́ bɛ bɔbr bine a dɔwrbɛ ƴãw ɛ, dɔwrbɛ nɛbɛ a fɛr kɛ́ bɛ ɩrɛ a lɛ a bibiir ƴãw. 15Ɛ́ mãa a, mãa saa na sãw a ɩ̃ bʋ̃-tɛrɩ za bɛr a nyɩ ƴãw, ɛ́ de ɩ̃ tʋɔra za tɩr a nyɩ ƴãw a, nʋ̃ɔ̀ na kpɩɛr mɛ̃ na. Mãa wa nɔnɛ nyɩ sɛw à ŋá a, nyɩ na sàw na bɛ nɔ̃w mɛ̃ man a lɛ bɩɩ?
16A na ɩ lɛ a, nyɩ sàw na kɛ́ nyɩ bɛ hanɩ a ɩ̃ ƴãw ɛ. Ɛcɛ bɛ na yel'a k'ɩ̃ɩ na ɩ nɩ-bɛlɛ a, kɛ́ yã n'a ɩ̃ maalɩ nyɔw nɩ nyɩ. 17A nɩbɛ bɛl ɩ̃ na tõ a nyɩ zie a, ɩ̃ ƴãw nɩ bɛ kãw nɛb nyɩ a ɩ̃ ƴãw bɩɩ? 18Ɩ̃ zɛlɩ nɩ yãayãa k'aa Títɩ̀ wa a nyɩ zie, ɩ̃ɩ tõ ʋ na ʋlɛ nɩ a yɛb ʋl ƴɛ̀rʋ ɩ̃ na ƴɛ̀r a. A Títɩ̀ nɛb nyɩ na bɩɩ? Yã-been bɛ n'ʋ mãa nɩ a ʋl tɩ tɛr vʋʋr'ɩ a nyɩ zie ɩ? Sɔr-been bɛ n'ʋ tɩ tu ɛ?
19A mɩnɛ kãw, nyɩ tɩɛrɛ nɩ koro za, kɛ́ tɩ bɔbr'a kɛ́ tɩ manɩ a tɩ yel-mɩŋa a nyɩ niŋé. Lɛ bɛ n'a ɩ, Naaŋmɩn niŋé n'a tɩ lãw nɩ a Kɩrɩta ƴɛ̀rɛ. Ɛ́ à á ŋá za a, ɩ̃ nɩ-nɔnɩ i, a nyɩ maalʋ ƴãw n'a. 20Ɩ̃ zɔrɛ nɩ dɛ̃bɩ̃ɛ ɩ̃ nãà wa ta a nyɩ zie nyɛ̃ nyɩ, nyɩ bɛ ŋmɛ̃ a lɛ ɩ̃ na bɔbr a ɩ, ɛ́ nyɩ mɩ̀ nyɛ̃ m ɩ̃ bɛ ŋmɛ̃ a lɛ nyɩ na bɔbr a ɩ. Ɩ̃ zɔrɛ nɩ dɛ̃bɩ̃ɛ ɩ̃ nãà wa ta a nyɩ zie nyɛ̃ taw-taa nɩ nyuur, suur nɩ cier-taa, tʋ-taa nɩ zu-yel-taa, nyʋʋr nɩ damnʋ a. 21Ɩ̃ zɔrɛ nɩ dɛ̃bɩ̃ɛ ɩ̃ nãà lɛb wa a be, a ɩ̃ Naaŋmɩn wa ɩ ɩ̃ nyɛ̃ vĩ a nyɩ niŋé, ɛ́ a fɛr k'ɩ̃ɩ kõ a nyɩ yaga ƴãw a, a bɛl na dãw maalɩ a yel-bier ɛ́ bɛ lɩɛbɩ a bɛ ɩb so a bɛ dɛwr bɛr, ɛ́ bɛ zawrɩ a pɩ̃ɔ-yele nɩ a faalʋ bɛr a.
Đang chọn:
2 Korɛ̃tɩ 12: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.