1 Korɛ̃tɩ 1
1
A Pol puore nɩ a Korɛ̃tɩ tẽw Lãw-yir biir
1A mãa Pol, a Naaŋmɩn na nɔ̃w yã bʋɔlɩ k'ɩ̃ɩ wa ɩ a Kɩrɩta Yeezu nɩ-tona a, mãa n'ʋ sɛbr nyɩ, mãa nɩ a tɩ yɛb Sɔsɩtɛn.
2Nyɩɩm na ɩ a Naaŋmɩn Lãw-yir be a Korɛ̃tɩ a, nyɩɩm na páw a sonu lãwnɩ a Kɩrɩta Yeezu a, nyɩɩm bɛ na bʋɔlɛ nɩ-son lãwnɩ a bɛlɩ dem za na bʋɔlɛ a tɩ Sore Yeezu Kɩrɩta yúor zie nɛ za bɛ na be a, ʋl na ɩ a tɩɩm nɩ a bɛl za Sore a, nyɩ za nɛbɛ ɩ̃ sɛbr. 3A Naaŋmɩn tɩ Sãà nɩ a Sore Yeezu Kɩrɩta maalʋ nɩ ƴã-ɓaarʋ, a be a nyɩ zie.
A maalʋ na yi a Kɩrɩta zie a
4Ɩ̃ puore nɩ a ɩ̃ Naaŋmɩn yãanɩ kʋralɛ a nyɩ ƴãw, a maalʋ ʋ na kʋ̀ nyɩ a Kɩrɩta Yeezu pʋɔ a ƴãw. 5Bʋ̃ʋ n'ʋ vɛ̃, nyɩ na lãw nɩ ʋ a n'a nyɩ kpɛ naalʋ bʋʋrɛ za, a ƴɛ̀rʋ bãwfʋ naalʋ nɩ a yele bãwfʋ naalʋ. 6A Kɩrɩta dãsɩɛ a nɩbɛ na dɩ a tɛr'ɩ fãw a nyɩ zie, 7kɛ̀ Naaŋmɩn maalʋ kãw za bɛ cɛ nyɩ ɛ, nyɩɩm na gùre kɛ́ a tɩ Sore Yeezu Kɩrɩta wa sãá a. 8Ʋlɛ n'ʋ mɩ̀ na ɩ nyɩ kpɛmɛ tɩ ta n a baarʋ daar, kɛ́ nɩr ta nyɛ̃ sãwna kãw za yere a nyɩ zie a tɩ Sore Yeezu Kɩrɩta waa bibir ɛ. 9A Naaŋmɩn ŋmɛ̃ n ʋ ŋmɛ̃a, ʋl na bʋɔlɩ nyɩ kɛ́ nyɩ wa lãw nɩ a ʋ Bie tɩ Sore Yeezu Kɩrɩta a.
Bʋ́r-taa a Lãw-yir pʋɔ
10 Yɛbr i, ɩ̃ zɛlɛ nyɩ nɩ yãayãa a tɩ Sore Yeezu Kɩrɩta yúor ƴãw, nyɩ za nyɩ lãw nʋɔr, nyɩ ta ɩ bʋ́r-taa be a nyɩ cara pʋɔ ɩ. Nyɩ lãw yã ɛ́ tɛr tɩɛr-been. 11Bʋ̃ʋ n'ʋ vɛ̃, ɩ̃ yɛbr i, Kulowe yir dem yel'a kʋ̀ m kɛ́ taw-taa be n a nyɩ cara pʋɔ. 12Ɩ̃ manɩ nyɩ nyɛ̃: a nyɩ pʋɔ a, ŋa mɩ́ yel'a: «Pol so m», ŋa kɛ́: «Apɔlɔsɩ so m», ŋa yel kɛ́: «Pɩɛr so m», ɛ́ ŋa kɛ́: «Kɩrɩta so m». 13Nyɩ tɩɛrɛ kɛ́ a Kɩrɩta bʋ́r'a bɩɩ? Pol'ʋ bɛ kpa a da-gara zu a nyɩ ƴãw ɩ? Pol yúor ƴãw n'a bɛ kʋ̀ nyɩ a suob ɩ?
14Naaŋmɩn barka! Ɩ̃ bɛ kʋ̀ nyɩ been kãw za suob ɛ, a bɛ ɩ Kɩrɩsɩpɩsɩ nɩ Gayisɩ ɛ. 15A na ɩ à ŋá a, nɩr za kʋ̃ sàw yel kɛ́ mãa yúor ƴãw n'a bɛ kʋ̀ nyɩ a suob ɛ. 16Ãà! Sɩza n'a, ɩ̃ cãà na lɛb kʋ̀ Sɩtefanasɩ yir dem a suob. A al pùorí, ɩ̃ bɛ tɩɛr bãw k'ɩ̃ɩ lɛb'a kʋ̀ nɩr suob ɛ. 17A Kɩrɩta bɛ tõ m k'ɩ̃ɩ tɩ tɩrɛ suob ɛ, ʋ tõ m'a k'ɩ̃ɩ tɩ hiere a Yel-nʋ̃ɔ̀, ɛ́ ta hiere ʋ tu n a ƴɛ̀r-bãw wa mab ɩ a Kɩrɩta da-gara zu kũu ɩ zawla ɩ.
A Yeezu Kɩrɩta n'ɩ a Naaŋmɩn kpɛnʋ nɩ a ʋ yã-bãwfʋ
18A Kɩrɩta da-gara zu kũu tɩ na hiere a, a ɩ n gẽgẽ-ɩb a bɛlɩ dem na bɔrɛ a zie. Ɛcɛ a bɛlɩ dem na lo a faafʋ sɔ́r a, a tɩɩm zie, a ɩ n Naaŋmɩn kpɛnʋ. 19À ŋá n'a a Sɛb-sõw yere:
«Ɩ̃ na sãw nɩ a yã-bãwnbɛ yã-bãwfʋ bɛr,
ɛ́ ɩ a bãw-bãwnbɛ bãwfʋ bɔr#1:19 Nyɛ̃ Ɩza 29.14..»
20A na ɩ à ŋá a, nyɩnɛ n'a a yã-bãwnɛ be? Nyɩnɛ n'a a Naaŋmɩn wulu bãw-bãw-kara be? A dɩ̃a zie ŋa pʋɔ ƴɛ̀r-bãw-ƴɛ̀rɛ wa? A Naaŋmɩn bɛ ɩ a tẽ-daa yã-bãwfʋ lɩɛbɩ gẽgemi ɛ?
21Bʋ̃ʋ n'ʋ vɛ̃, a tẽ-daa nɩbɛ nɩ a bɛ yã-bãwfʋ za na faa bɛ tʋ̃ɔ́ bãw a Naaŋmɩn a ʋ yã-bãwfʋ ɩb pʋɔ a, alɛ so a Naaŋmɩn yel k'ʋʋ na faa nɩ a bɛlɩ dem na sàw de ʋ a, nɩ a da-gara zu kũu hieru na sãá mɛ̃ gẽgẽ-ɩb a a. 22A Zifʋ mɩnɛ zɛlɛ nɩ yele na ɩ bãwfʋ sãá a, ɛ́ a Gɩrɛkɩ mɩnɛ bɔbr yã-bãwfʋ. 23Ɛcɛ tɩɩm a, Kɩrɩta bɛ na kpa da-gara zu a n'ʋ tɩ hiere: ʋ ɩ n yel-faa na bɛ sɛw taa nɩ a, a Zifʋ mɩnɛ zie, ɛ́ ɩ gẽgemi a nɩ-bʋʋr-yoru zie. 24Ɛcɛ a bɛlɩ dem a Naaŋmɩn na bʋɔlɩ a zie a, bɛ ɩ n Zifʋ bɩɩ Gɩrɛkɩ a, a bɛl zie a, ʋ ɩ n a Kɩrɩta, ʋl na ɩ a Naaŋmɩn kpɛnʋ nɩ a Naaŋmɩn yã-bãwfʋ a. 25Bʋnʋ bɛ ka be ɩ, a al na sãá ɩ Naaŋmɩn gẽgẽ-ɩb a cãà na ɩ yã-bãwfʋ zuo a nɩsaalbɛ yã-bãwfʋ, ɛ́ a al na sãá ɩ Naaŋmɩn bãbàalʋ a, cãà na tɛr fãw zuo a nɩsaalbɛ fãw.
26Yɛbr i, nyɩ nyɛ̃ a lɛ nyɩ na ŋmɛ̃ a, nyɩɩm a Naaŋmɩn na bʋɔlɩ a: a nɩsaalbɛ niŋé a, yã-bãwnbɛ bɛ yãwmɛ a nyɩ pʋɔ ɩ, kpɛnʋ dem bɛ yãwmɛ ɩ, nɩ-yée mɩ̀ bɛ yãwmɛ ɩ. 27Ɛcɛ a al na ɩ gẽgemi a tẽ-daa zie a, alɛ n'a a Naaŋmɩn kaa ír k'ʋʋ ƴãw nɩ a yã-bãwnbɛ vĩ. A alɩ bome nɛ na bɛ tɛr fãw a tẽ-daa zie a, alɛ n'a a Naaŋmɩn kaa ír k'ʋʋ ƴãw nɩ a al na tɛr fãw a vĩ. 28A alɩ bome nɛ na bɛ tɛr yúor a tẽ-daa zie a, a al bɛ na jewre a, a al na bɛ ɩ bom a, alɛ n'a a Naaŋmɩn kaa ír k'ʋʋ sãw nɩ a al na ɩ bʋ̃-sɩza a bɛr, 29kɛ́ nɩsaal za taa wa zɛwr ʋ tʋɔra Naaŋmɩn niŋé ɩ. 30A Naaŋmɩn n'ʋ so nyɩ lãw nɩ a Kɩrɩta Yeezu, ʋl a Naaŋmɩn na ɩ ʋ lɩɛbɩ a tɩ yã-bãwfʋ, a tɩ mɩnʋ, a tɩ sonu, nɩ a tɩ faafʋ a. 31À ŋá n'a a ɩ, kɛ́: «Ʋlɩ sob na zɛwr ʋ tʋɔra a, ʋ zɛwr ʋ tʋɔra a Sore ƴãw#1:31 Nyɛ̃ Zer 9.22-23.», mɛ̃ a lɛ a Sɛb-sõw na yel a.
Đang chọn:
1 Korɛ̃tɩ 1: DBDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
La Bible en Dagara © Alliance Biblique du Burkina Faso, 2013.