मत्ती 16
16
स्वर्गीय निशानी री मांग
1फरीसियां अते सदूकी यीशु का आये से यीशु जो परखणे चाह्ंदे थिये, इधेरे तांइ तिन्हा ने यीशु जो बोल्लेया, असा जो स्वर्ग री कोई चिन्ह-चमत्कार दिखाओ। 2पर यीशु ने जवाब दित्तेया, जां सँझ हून्दी तां तुसा बोलदे, आसमान लाल है, मौसम ठीक रैह्णा। 3अते भ्यागा बोलदे, अज्ज हनेरी चलणी, किजोकी आसमान लाल अते ड्रोणा है तुसा आसमान रे लक्षण दिख्खी करी तिसेरे भेद दस्सी सकदे, पर इस जुग री निशानिया रा भेद किजो नी दस्सी सकदे? 4इस जुग रे बुरे अते व्यभिचारी पीढ़ी चिन्ह-चमत्कार तोपदी, पर योना री चिन्ह-चमत्कार जो छड्डी तिन्हा होर कोई चिन्ह-चमत्कार नी दित्ती जाणी।
यीशु तिन्हा जो छड्डी करी चली गे।
फरीसी ते सदूकियां री शिक्षा रा खमीर
5यीशु रे चेल्ले झील रे पार पूज्जे, तित्ते पूजी करी तिन्हा जो पता लग्गेया कि से रोट्टी लैणा भूली गेरे हिन। 6यीशु ने तिन्हा जो बोल्लेया, दिख्खो, फरीसी अते सदूकियां री तराक्क का सावधान रेयो।
7से अप्पु-मिते गल्ल-बात करी के बोलणा लग्गे, से इधेरे तांइ बोल्लेया करदे हिन किजोकी असी रोट्टी नी लियाये। 8पर यीशु ने ए जाणी लेया अते बोल्लेया, तुसा रा विश्वास छोटा है, तुसा अप्पु-मिते किजो बैह्स-बाजी करेया करदे हिन कि असा का रोट्टी नी है? 9कै तुसा हल्ले तांइ नी समजे? जां पंज हजार मणूआं तांइ पंज रोटियां थियां तां तुसा किन्ने टोकरे भरी के चुक्के थिये? 10अते ना तिन्हा चार हजार तांइ सत्त रोटियां थियां ते तुसा किन्ने टोकरे भरी के चुक्के थिये? 11तुसा किजो नी समजदे कि मैं तुसा जो रोटियां रे बारे नी बोल्लेया थिया पर ए कि तुसा फरीसी अते सदूकियां री तराक्क का सावधान रेयो।
12तां तिन्हेरी समझ बिच आया कि तिन्हा रोट्टी री तराक्क का नी, पर फरीसियां अते सदूकियां रे उपदेस का सावधान रैह्णे तांइ बोल्लेया थिया।
पतरस रा यीशु जो मसीह यीशु मनणा
13जां यीशु कैसरिया फिलिप्पी रे प्रदेश जो आये, तां अपणे चेल्लेयां जो पूच्छणा लग्गे, मणू, मणू रे पुत्तर, जे मैं ही है जो कै बोलदे?
14तिन्हा ने बोल्लेया, किच्छ तां यूहन्ना बपतिस्मा दैणे वाला बोलदे हिन, किच्छ एलिय्याह, अते होर यिर्मयाह या भविष्यद्वक्ता बिच का कोई इक्क बोलदे हिन। 15यीशु ने उन्हा जो बोल्लेया, पर तुसा मेरे जो कै बोलदे?
16शमौन पतरस ने जवाब दित्तेया, तुसा जिंदा परमेश्वर रे पुत्तर मसीह यीशु हिन। 17यीशु ने उन्हा जो बोल्लेया, ओ शमौन, योना रे पुत्तर, तू धन्न है किजोकी मांस अते खून ने नी, पर मेरे पिता ने जे स्वर्ग बिच हिन, ए गल्ल तिन्हा पर जाहिर कित्ती। 18ते मैं भी तिज्जो बोलदा कि तू पतरस है, ते मैं इस्सी पत्थर पर अपणी कलीसिया बनाणी ते पताल रे दुआर तिस पर हावी नी होणे। 19मैं तिज्जो स्वर्ग रे राज री चाब्बियां दैणी, अते जे किच्छ तू दुनिया पर बणना, से स्वर्ग बिच बन्नी जाणा अते जे किच्छ तू दुनिया पर खोलगा, से स्वर्ग बिच खुलणा।
20फिरी यीशु ने चेल्लेयां जो सख्ती कने समझाई करी बोल्लेया कि मेरे बारे बिच ए कुसकी कने मत बोलदे कि मैं मसीह यीशु है।
अपणे मरणे रे बारे बिच यीशु री भविष्यवाणी
21उस बेल्ले यीशु अपणे चेल्लेयां जो दस्सणा लगे, जरुरी है कि मैं यरुशलेम जो जां, ते बुजुर्ग लोक, बड्डे पुरोत्त, अते शास्त्रियां रे हत्थे बड़े दुख उठां, अते मारी दित्तेया जां, ते तिज्जे दिन जिंदा होई जां। 22तां पतरस तिन्हा जो अलग लै जाई करी बकणे लगेया, ओ प्रभु, परमेश्वर न करण कि तुसा रे कने इदेया कदी भी हो। 23तां यीशु ने मुड़ी करी पतरस जो बोल्लेया, ओ शैतान, मेरे सामणे का दुर होई जा तू मेरे तांइ इक्क अड़चन है किजोकी तू परमेश्वर री गल्लां पर नी, पर मणूआं री गल्लां पर मन लगादां।
यीशु रे पीच्छे चलणे रा मतलब
24तां यीशु ने अपणे चेल्लेयां जो बोल्लेया, जे कोई मेरा चेल्ला बणना चाह्ंदा तां अपणे आपे का इन्कार करण, ते अपणी सुली चुकी करी, मेरा चेल्ला बणी जाये। 25किजोकी जे कोई अपणी जिन्दगी जो बचाणे री इच्छा रखदा, तिन्ने तिसजो गवाई दैणा, पर जे कोई मेरे तांइ अपणी जिन्दगी जो गवाई दिंगा, तिन्ने तिसजो पाई लैणा। 26जे मणू सारी दुनिया जो पाई लेंन, ते अपणी जिन्दगी गवाई दे, तां तिसजो कै फायदा होणा? या मणू अपणे प्राण रे बाट्टे कै दिंगा? 27किजोकी मणू रा पुत्तर, जे मैं ही है अपणे स्वर्गदूतां कने अपणे पिता री महिमा बिच आणे वाला है तां तिन्ने हर इक्क मणू जो तिसेरे कम्मां रे हिसाब कने ईनाम दैणा।
28“मैं तुसा कने सच बोलदा कि इत्ते खड़ितेरे लोक्कां बिच का किच्छ, इदेय भी हिन कि जां तांइ मणू रे पुत्तर, जे मैं ही है जो तिसेरे राज बिच का आन्दे नी दिख्खी लिन्दे, तां तांइ तिन्हा ने मौत नी दिखणी।”
Đang chọn:
मत्ती 16: CDHNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
