मोत्ती 4
4
ईशूए परिक्षा
(मार्कुस 1:12; लूका 4:1-13)
1पबित्र आत्मां निंयं तेभी ईशू शुन्नैं रेगीस्ताना लै अर तिधी रहअ राख्स तेऊ परखदअ लागी। 2ईशू रहअ च़ाल़्ही धैल़ै अर च़ाल़्ही राची ब्रतू, अर च़ाल़्ही धैल़ै बाद आई तेऊ भुखै।#लुआ. 34:28
3तेखअ बोलअ राख्सै ईशू लै, “ज़ै तूह परमेशरो पूत आसा, तै बोल तूह इना पात्थरा लै इहअ कि रोटी बण?”
4ईशू दैनअ तेऊ लै ज़बाब, “पबित्र शास्त्रा दी आसा लिखअ द इहअ,
‘मणछ निं सिधअ रोटी करै ज़िऊंदअ,
पर परमेशरे बोली दी हरेक गल्ला मनी सका सह ज़िऊंदअ रही।’”
5तेखअ निंयं राख्सै ईशू पबित्र एरुशलेम नगरी, संघा किअ परमेशरे भबने च़ुंडी खल़अ, तेखअ बोलअ इहअ,#लुआ. 34:28 6“ज़ै तूह परमेशरो पूत आसा, तै दै इधा का उंधै छ़ाहल़! किल्हैकि पबित्र शास्त्रा दी आसा इहअ बी लिखअ द,#भज. 91:11-12
‘परमेशरा डाहणैं तेरी फाज़त करदै हर ज़ैगा स्वर्ग दूत लाई,
तूह ज़िधी बी डेऊए, तिंयां रहणैं ताह संघा।
तूह नढैऊणअ तिन्नां स्वर्ग दूता हाथा ढाकी,
ताकि तेरै च़रणैं ठोहल़ नां लागे।’”
7ईशू बोलअ तेऊ लै, “पबित्र शास्त्रा दी आसा इहअ बी लिखअ द, ‘तम्हैं निं आपणैं परमेशर परखदै लागी#4:7 बधा. 6:16।’”
8 #
लूक. 4:9
तेखअ निंयं राख्सै सह एकी उछ़टी धारा संघा बोलअ तेऊ ईशू का सारै संसारो राज़ अर सुख रहैऊई, 9“ज़ै तूह मुंह सेटा माथअ टेक्के तै हणीं ईंयां सोभै गल्ला तेरी।”
10तेखअ बोलअ ईशू राख्सा लै, “#4:10 बधा. 6:13ओ राख्सा मेरी आछी का हअ दूर, पबित्र शास्त्रा दी आसा लिखअ द,
‘तूह टेक्कै सिधअ आपणैं प्रभू परमेशरा सेटा माथअ
सिधी तेऊए ई च़ाकरी करै।’”
11तेखअ डेऊअ राख्स ईशू सेटा का दूर अर स्वर्ग दूत लागै ईशूए च़ाकरी करदै।
ईशूए च़ाकरीए शुरूआत
(मार्कुस 1:14,15; लूका 4:14,15,31)
12ज़ांऊं ईशू शूणअ कि जोहन्ना डुबकी दैणैं आल़अ किअ कैद, सह डेऊअ यहूदा मुल्खा का गलील मुल्खा लै फिरी।#मोत्त. 14:3; मार्क. 6:17; लूक. 3:19,20 13तेखअ लागअ ईशू नासरत गराऊंआं छ़ाडी कफरनहूम नगरी समुंदरे बाढै ज़बलून अर नप्तालीए मुल्खै रहंदअ। 14ताकि पबित्र शास्त्रा दी परमेशरे गूर ईशायाह बोली दी गल्ला पूरी होए,
15“ज़बलून अर नप्तालीए मुल्खै,
समुंदरे बाढै, जरदण नदी नेल़,
गलील मुल्खै, होरी ज़ातीए लोग,
16ज़ुंण न्हैरै दी तै बेठै दै,
तिन्नां का शुझुअ खास्सअ प्रैश्शअ,
ज़ुंण लोग तेऊ देशै मौते छ़ैल्ली दी तै बेठै दै,
तिन्नां लै हुअ ऐबै प्रैश्शअ।”
17तधा पोर्ही किई ईशू लोगा का एही गल्ला खोज़णीं शुरू, “आपणैं पापो प्राश्त करा, अर परमेशरा सेटा एछा फिरी, स्वर्गो राज़ गअ नेल़ एछी।”
पैहलै च़ेल्लै शादणैं
(मार्कुस 1:16-20; लूका 5:1-11; जोहन्ना 5:42)
18एकी धैल़ी त ईशू गलील समुंदरे बाढै हांढदअ लागअ द, तेऊ भाल़ै दूई मणछ शमौन ज़हा लै पतरास बोला अर तेऊओ भाऊ आन्दरू। तिंयां थिऐ लागै दै पाणीं दी म्हाछ़ली ढाकणा लै ज़ज़ाल़ा पांदै किल्हैकि तिंयां करा तै म्हाछ़ली ढाकणैं अर बेच़णेंओ काम। 19ईशू बोलअ तिन्नां लै, “ज़ेही तम्हैं म्हाछ़ली कठा करदै आसा लागै दै, मुंह संघै च़ाल्ला हुंह सखाऊं तम्हां मेरै च़ेल्लै हणां लै मणछ कठा करनै।” 20तिंयां बी लागै तेभी ज़ज़ाल़ा छ़ाडी तेऊ संघै हांढदै।
21तिधा का आजू डेऊई भाल़ै ईशू दूई होर भाई, याकब अर तेऊओ भाऊ जोहन्ना, तिंयां थिऐ लागै दै आपणैं बाब जबदी संघै किश्ती प्रैंदै बेशी ज़ज़ाल़ा सोहरदै, अर तेऊ शादै तिंयां बी, 22तिंयां बी लागै तेभी किश्ती अर आपणैं बाब छ़ाडी तेऊ संघै हांढदै।
ईशूए बमार ठीक करनै
(लूका 6:17-19)
23तेखअ डेऊअ ईशू गलील मुल्खै कई ज़ैगा। सह रहअ यहूदीए सभागृहा#4:23 सभागृहा यहूदी ज़िधी कठा हआ, सभा करा शिक्षा दैंदअ अर स्वर्ग राज़े खुशीए समादा खोज़दअ लागी अर सोभी रंगे दाह-खिज़ा का तिन्नां नरोगै करदअ लागी।
24ईशूए बारै ईंयां गल्ला पुजी सारै सिरीया मुल्खै। तेखअ ज़ुंण लोग कई बमारी, दुख, भूत शाचै दै, मिर्गिए रोगी थिऐ, तिंयां आऐ ईशू सेटा लै अर ईशू किऐ तिंयां सोभ नरोगै। 25खास्सै मणछ आऐ गलील, दिकापुलिस, एरुशलेम नगरी, यहूदा मुल्खै, अर जरदण नदी पारा बाखा का ईशू पिछ़ू।
Đang chọn:
मोत्ती 4: OSJ
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
This work is licensed under Creative Commons Attribution-ShareAlike 4.0 License.
