मोत्ती 17
17
च़ेल्लै का शुझुअ ईशू मोसा अर एलियाह संघै
(मार्कुस 9:2-13; लूका 9:28-36)
1छ़हा धैल़ी बाद निंयैं ईशू पतरास, याकब अर तेऊओ भाऊ जोहन्ना सोभै ज़ण्हैं कांगनरांगै दी एकी धारा प्रैंदा लै संघा। 2तिधी बधल़ूई ईशूए काया तिन्नें सम्हनै एही कि ईशूओ मुंह लागअ सुरज़ा ज़िहअ च़मकदअ अर झिकल़ै हुऐ प्रैश्शै ज़िहै शेतै। 3च़ेल्लै का शुझुऐ तिधी कि मोसा अर एलियाह आऐ संघा लागै ईशू संघै गल्ला करदै।
4इहअ भाल़ी बोलअ पतरासै ईशू लै, “हे प्रभू, अह हुअ ठीक कि हाम्हैं आसा इधी, ज़ै तेरी ज़ाज़त आसा, तै बणाणैं हाम्हां इधी चअन मंडप, एक ताल्है, एक परमेशरे गूर मोसा लै अर एक एलियाह गूरा लै।”
5पतरास त बोल्दअ ई लागअ द कि शेतअ बादल़ घोर्हुअ तिन्नां प्रैंदै अर बादल़ा पिछ़ू का शूणअ तिन्नैं परमेशर इहअ बोल्दअ, “अह आसा मेरअ पूत, हुंह झ़ूरा एऊ लै सोभी का खास्सअ एऊ करै आसा हुंह खुश, एऊए शूणां ज़िहअ तम्हां लै बोले तिहअ।” 6इहअ शूणीं फिरै च़ेल्लै धरनीं उटै अर तिंयां डरै खास्सै।
7ईशू आअ तिन्नां सेटा संघा छ़ुंहैं, तेखअ बोलअ इहअ, “खल़ै उझ़िआ, डरा निं आथी।” 8तेखअ भाल़अ तिन्नैं उझै फेर अर ईशू छ़ाडी निं तिन्नां आप्पू संघै होर कोहै शुझुअ।
9ज़ांऊं तिंयां धारा का उंधै तै होथदै लागै, ईशू दैनअ तिन्नां लै बाता-हांढदी इहअ हुकम, “ज़ेभै तैणीं मुंह मणछे पूता परमेशर मरी करै भिई ज़िऊंदै निं करी हेरे, तेभै तैणीं निं इना गल्ला कोही का खोज़ी ज़ुंण तम्हैं आझ़ धारा प्रैंदै भाल़ी।”
10तेखअ पुछ़अ च़ेल्लै ईशू का, “तै ईंयां यहूदी शास्त्री किल्है बोला इहअ कि मसीहा का आजी एलियाह गूरो पैहलै एछणअ आसा ज़रूरी।”
11ईशू बोलअ, “अह गल्ल आसा शुची कि परमेशरै आसा आप्पै बोलअ द कि एलियाह एछणअ अर तेऊ करनै कई लोग मसीहा एछणें धैल़ी लै तैर। 12पर हुंह खोज़ा तम्हां का सत्त कि एलियाह आसा गअ द, तिन्नैं निं सह बछ़ैणअ ई आथी। ज़िहअ तिन्नें दिलै बोलअ तिहै किऐ तिन्नैं तेऊ लै ज़ुल्म। इहै ई ज़िरनै मुंह मणछे पूता बी तिन्नें हाथै दुख।”
13च़ेल्लै समझ़अ इहअ कि अह आसा लागअ द हाम्हां लै जोहन्ना डुबकी दैणैं आल़ेए बारै बोल्दअ।
मिर्गिए बमारी आल़अ लान्हअ किअ नरोगअ
(मार्कुस 9:14-29; लूका 9:37-43)
14ज़ांऊं तिंयां खास्सै मणछा सेटा पुजै, एक मणछ आअ तिन्नां सेटा अर माथअ टेक्की करै लागअ सह बोल्दअ, 15“हे प्रभू, मेरै शोहरू लै कर झींण, तेऊ पल़ा मिर्गिए दौरै, केभै बधल़िआ सह तेता करै पाणीं जैंदरी अर केभै बधल़िआ सह आगी जैंदरी। तेऊ हआ तेता करै खास्सी तकलिफ। 16मंऐं बोलअ तेरै च़ेल्लै का बी कि एऊ भूता काढा एऊ का पोर्ही। पर तिंयां निं एऊ नरोगै करी सकै।”
17ईशू बोलअ तिन्नां लै, “हे बैहम करनै आल़ै हठी लोगो, मुंह कधू तैणीं रहणअ तम्हां संघा कि तम्हैं विश्वास करे? मुंह केभै तैणीं रहणअ तम्हां न्हैल़ै लागी कि तम्हैं भरोस्सअ करे? ओर्ही आणा एऊ लान्हैं इधी मुंह सेटा लै!” 18तेखअ नैरअ ईशू सह भूत अर भूत निखल़अ तेऊ का दूर अर सह शोहरू हुअ तेभी नरोगअ।
19तेखअ पुछ़अ च़ेल्लै ईशू का कांगनरांगै डेऊई, हाम्हैं एऊ शोहरू दी शाचै दै भूता किल्है निं काढी सकै?
20ईशू बोलअ तिन्नां लै, “तम्हैं निं परमेशरे शगती दी विश्वास करदै, ज़ै थारअ विश्वास शाऊईए दाणैं बराबर धख ज़िहअ बी होए, ज़ै तम्हैं ऐहा धारा लै बी बोले कि इधा का पेछ़ुई करै डेऊ दुजी बाखा लै, सह डेऊणीं अर तम्हैं सका सोभै गल्ला करी।
“इहै भूत निं प्राथणां अर ब्रत करनै बाझ़ी निखल़दै।”
ईशू बोलअ भिई आपणीं मौत हणें बारै
(मार्कुस 9:30-32; लूका 9:43-45)
21ज़ांऊं च़ेल्लै गलील मुल्खै तै कठा हुऐ दै ईशू बोलअ तिन्नां लै, 22“हुंह मणछो पूत बझ़ैल़णअ धोखै करै मेरै दुशमणा का कैद करनै अर तिन्नां पाणअ हुंह मारी। 23पर हुंह हणअ मरी करै चिऐ धैल़ै भिई ज़िऊंदअ।” ऐहा गल्ला शूणीं हुऐ च़ेल्लै खास्सै दुखी।
परमेशरे भबना लै कारअ दैणअ
24ज़ांऊं ईशू अर तेऊए च़ेल्लै कफरनहूम नगरी पुजै, तिधी पुछ़अ एकी लै कारै गराहणै आल़ै पतरासा का, “थारअ गूरू परमेशरे भबना लै कारअ बी दैआ कि नांईं?” पतरासै बोलअ, “हाँ, दैआ ता दैआ।”
25ज़ांऊं पतरास घअरै पुजअ, तेऊए पुछ़णै का आजी हेरअ ईशू तेऊ लै बोली, “शमौन, तूह कै समझ़ा? कि ईंयां पृथूईए राज़ै च़ंदअ या कारअ कहा-कहा का मांगा? आपणैं शोहरू या पराऐ का?”
पतरासै बोलअ, “पराऐ का।”
26ईशू बोलअ तेऊ लै, “एऊ साबै गऐ तै शोहरू कारै दैणैं बच़ी।
27 “तैबी बी दैणअ हाम्हां बी कारअ ताकि तिंयां नराज़ नां होए। तूह कर इहअ, समुंदरे बाढै डेऊ अर कांडअ पाआ म्हाछ़ली लै, ज़ुंण म्हाछ़ली पैहलै तेथ शाचे तैहा आणै। म्हाछ़लीए खाख खोल्ही भेटणअ ताह एक च़ंदीओ सिक्कअ, अर तेऊ निंईं दैऐ मेरै अर आपणैं बदल़ै कारअ।”
Đang chọn:
मोत्ती 17: OSJ
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
This work is licensed under Creative Commons Attribution-ShareAlike 4.0 License.
