जोहन्ना 3
3
ईशू अर निकूदमास
1एक निकूदमास नाओं मणछ त यहूदी सैणअ अर सह थिअ फरीसी। 2सह आअ राची ईशू सेटा अर तेऊ बोलअ, “हे गूरू, हाम्हां का आसा थोघ कि तूह आसा परमेशरै हाम्हां लै गूरू छ़ाडअ द। ज़ुंण स्वर्गे नछ़ैण अर च़मत्कार तूह करा, ईंयां करा ऐहा गल्ला प्रगट कि ताह संघै आसा परमेशर।”
3ईशू दैनअ तेऊ लै ज़बाब, “हुंह खोज़ा ताखा का सत्त, ज़ै कोई नऊंअ ज़ल्म नांईं लए, सह निं परमेशरो राज़ भाल़ी सकदअ।”
4निकूदमासै बोलअ ईशू लै, “ज़ै कुंण मणछ प्रोढअ गअ हई, सह तेखअ नऊंअ ज़ल्म किहअ करै सका लई? तेऊ कै आपणीं माए पेटै भिई लागणअ डेऊणअ?”
5ईशू दैनअ तेऊ लै ज़बाब, “हुंह खोज़ा ताखा सत्त, ज़ुंण मणछ पाणीं अर आत्मां करै ज़ल्म नां लए, सह निं परमेशरे राज़ा दी डेऊई सकदअ। 6इहअ करै कि ज़ुंण देही का निखल़अ सह आसा देही, अर ज़ुंण पबित्र आत्मां का ज़ल्मअ, सह आसा आत्मां। 7रहैन निं हऐ कि मंऐं किज़ै बोलअ, कि ताह लागणअ ‘नऊंअ ज़ल्म लणअ ज़रूरी।’ 8बागरी ज़ेथ बाखा डेऊणअ च़ाहा तेथ बाखा डेओआ, ताखा शुण्हिंआं तेते सिधी छ़ेल़। पर ताखा निं थोघ कि सह किधा का एछा अर सह किधा लै डेओआ? ऐहा गल्ला निं समझ़ाऊई सकदै कि मणछ पबित्र आत्मां करै किहअ करै लआ ज़ल्म।”#3:8 ज्ञैन. 11:5
9निकूदमासै ज़बाब दैनअ, “ईंयां गल्ला किहअ करै सका हई?”
10इहअ शूणीं दैनअ ईशू तेऊ लै ज़बाब, “इज़राईली मणछो बडअ गूरू हई बी तूह इना गल्ला निं समझ़दअ? 11हुंह खोज़ा ताखा सत्त, ज़ेतो हाम्हां का थोघ हआ अर ज़ुंण गल्ला हाम्हैं आपणीं आछी हआ भाल़ी दी हाम्हैं बोला तिन्नां ई गल्ला, पर तम्हैं निं म्हारी शाजत तज़ी बी मंदै आथी। 12ज़ेभै मंऐं तम्हां का एऊ संसारे गल्ला खोज़ी, तम्हैं निं तिन्नां गल्लो विश्वास करदै! ज़ै हुंह तम्हां का स्वर्गे गल्ला खोज़ूं, तै तम्हां किहअ करै करनअ विश्वास? 13मुंह मणछे पूता का सुआई निं उझै स्वर्गा लै कोहै उखल़अ अर नां मुखा सुआई होर कोहै स्वर्गा का पृथूई दी होथअ।#जोह. 6:38
14 “खास्सी साला पैहलै ज़िहअ परमेशरे गूर मोसा मिसर देशे गलामी का छ़ुटणैं बाद रेगीस्तानै कांस्सै करै बणाईं दी दानअ उछ़टै दी च़की अर ज़ुंणी तैहा दानुईं बाखा लै उझै भाल़अ तिंयां सोभ बच़ै। ठीक तिहअ ई च़कणअ हुंह मणछो पूत बी उछ़टै दी। #
जोह. 8:28
15ताकि ज़ुंण बी उझै भाल़े अर विश्वास करे तेऊ भेटणीं सदा रहणैं आल़ी ज़िन्दगी।
16 “किल्हैकि परमेशरै किई सारै संसारा संघै एही झ़ूरी कि तेऊ दैनअ आपणअ कल्ही पूत बल़ीदान हणां लै, ताकि ज़ुंण बी तेऊ दी विश्वास करे सह निं लोल़ी मूंअ, पर तेऊ लोल़ी सदा रहणैं आल़ी ज़िन्दगी भेटी। 17परमेशरै निं आपणअ पूत संसारे मणछा लै सज़ा दैंदअ छ़ाडी, पर सह छ़ाडअ एते तैणीं कि संसारे सोभी मणछा तेऊ करै उद्धार भेटे। 18ज़ुंण तेऊ दी विश्वास करा तेऊ निं सज़ा भेटणीं। पर ज़ुंण तेऊ दी विश्वास नांईं करा, तेऊ लै गअ इहअ करै दोश लागी कि तेऊ निं परमेशरे कल्है पूता दी विश्वास किअ।#3:18 जोह. 5:10
19 “सज़ा दैणैंओ कारण आसा इहअ कि प्रैश्शअ आअ संसारै अर मणछै किई प्रैश्शै छ़ाडी न्हैरै संघै खास्सी झ़ूरी, अर तिन्नें तै काम ई बूरै। 20किल्हैकि ज़ुंण बूरअ करा सह निं प्रैश्शै नेल़ एछदअ। सह डाहा प्रैश्शै संघै ज़ीद। इहअ निं हआ कि तेऊए कामों दोश लागे तेऊ दी। 21पर ज़ुंण सत्ता दी रहा, सह एछा प्रैश्शै नेल़, ताकि तेऊए काम प्रगट हई सके कि तिंयां आसा परमेशरे मरज़ी दी किऐ दै।”
ईशूए बारै जोहन्ने शाजत
22तेखअ आऐ ईशू अर तेऊए च़ेल्लै यहूदा मुल्खै; अर सह लागअ तिन्नां संघै डुबकी दैंदअ।
23जोहन्ना डुबकी दैणैं आल़अ बी दैआ त सामरी मुल्खै शालेम नगरी नेल़ एनोन नाओंए ज़ैगा जरदण नदी दी डुबकी। किल्हैकि तिधी त खास्सअ पाणीं अर लोग लआ तै तिधी एछी डुबकी। 24तेभै तैणीं निं जोहन्ना कैद खानै पाई त। 25तिधी पल़ी जोहन्ने च़ेल्लै परमेशरा सेटा डेऊणा लै शुचै हणैं पिछ़ू यहूदी मणछा संघै हठ। 26तिन्नैं पुछ़अ जोहन्ना सेटा एछी, “हे गूरू, ज़ुंण मणछ जरदण नदी पार ताह संघै त, ज़हा लै तंऐं इहअ बोलअ त कि अह आसा मसीहा। सह बी दैआ ऐबै डुबकी अर सोभ एछा एऊ सेटा लै।”
27जोहन्ना दैनअ तिन्नां लै ज़बाब, “ज़ेभै तैणीं मणछा लै स्वर्गा का नांईं दैए, ‘तेभै तैणीं निं तेऊ किछ़ै भेटी सकदअ।’ 28तम्हैं, आप्पै आसा मेरै शाजत कि हुंह निं मसीहा आथी। पर हुंह आसा तेऊ आजू छ़ाडअ द।#जोह. 1:20; मला. 3:1
29“ज़सरी लाल़ी आसा, सह आसा लाल़अ, पर ज़ुंण तेऊ लाल़ेओ साथी तेऊ संघै खल़अ आसा, सह शूणां तेऊए अर तेऊए गल्ला शूणीं हआ खुश। ऐबै हुई मेरी बी अह खुशी पूरी। 30अह आसा ज़रूरी कि तेऊए लोल़ी बढोतरी हुई अर हुंह लोल़ी घटअ।
31“ज़ुंण उझै का एछा सह आसा सोभी का महान, हाम्हैं आसा संसारे हाम्हैं करा संसारे गल्ला, पर सह आसा स्वर्गा का आअ द अर सह आसा सोभी का महान।#जोह. 2:23 32सह खोज़ा तिन्नां ई गल्ला ज़ुंण तेऊ भाल़अ अर शूणअ, पर सोभ लोग निं तेऊए गल्ला मंदै। 33पर ज़ुंणी तेऊए शाजत मनी, सह लाआ ऐहा गल्ला दी मोहर कि परमेशर आसा शुचअ।
34“किल्हैकि ज़ुंण परमेशरै आसा छ़ाडअ द, सह खोज़ा परमेशरे गल्ला। किल्हैकि सह दैआ तेऊ लै पबित्र आत्मां भरपूर। 35बाब झ़ूरा आपणैं पूता लै खास्सअ अर तेऊ दैनअ सोभी गल्लो हक तेऊ लै। 36ज़ुंण परमेशरे पूता दी विश्वास करे, तेऊ भेटणीं सदा रहणैं आल़ी ज़िन्दगी, पर ज़ुंण शोहरू नांईं मंदअ, सह निं तैहा ज़िन्दगी भाल़ी सकदअ, तेऊ लै भेटणीं परमेशरा का सज़ा।”
Đang chọn:
जोहन्ना 3: OSJ
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
This work is licensed under Creative Commons Attribution-ShareAlike 4.0 License.
